Yu Ting Maria i Sik o Lapun na Em i Dai?

OLSEM nius bilong Vatiken (L’Osservatore Romano) i kamapim, bilip bilong lotu Katolik long Asumsio i tok: “Maria i no gat sin, kirap long taim em i stap blut yet long bel bilong mama, na em i go antap long heven wantaim skin bilong graun taim em i pinisim i stap bilong em long graun.” Nius i tok, dispela bilip i mekim na sampela tisa bilong lotu Katolik i tok olsem Maria “i no dai, nogat. Kwiktaim God i kisim em long graun na bringim em i go long heven.”a

I no longtaim i go pinis, Pop John Paul Namba 2 i kamapim narapela kain tok long dispela samting. Long Jun 25, 1997, taim em i givim tok long ol manmeri long Vatiken, em i tok: “Nupela Testamen i no kamapim wanpela tok long i dai bilong Maria. Dispela i mekim na yumi ken ting em i go lapun na em i dai, na i no gat wanpela stori bilong dispela samting. . . . Dispela tingting olsem em i no dai long sik o lapun samting em i no gat as bilong en.”

Tok bilong Pop John Paul i kamapim bikpela popaia long dispela bilip olsem Maria i no gat sin. Sapos mama bilong Jisas “i no gat sin, kirap long taim em i stap yet long bel bilong mama,” orait olsem wanem na Maria i dai long “sik o lapun samting,” em dispela samting i kamap long sin Adam i givim long yumi? (Rom 5:12) Misin Katolik yet i gat tingting kranki long mama bilong Jisas, na dispela i mekim na ol tisa bilong lotu i paul long sampela tok. Olsem na insait long Misin Katolik ol lain i bruk bruk na tingting bilong ol i paul nabaut long dispela samting.

Baibel i stori long Maria olsem em i gat pasin daun, na bilip tru, na givim bel long God, tasol Baibel i no tok olsem em i kisim ol dispela pasin, long wanem, em i no gat sin taim em i kamap long bel bilong mama. (Luk 1:38; Aposel 1:​13, 14) Baibel i tok olsem: “Yumi olgeta man yumi bin mekim sin.” (Rom 3:23) Em nau, olgeta manmeri na Maria tu i gat sin na i no gutpela olgeta, na i no gat wanpela samting i makim olsem Maria i dai long narapela rot na i no long sik o lapun samting.​—⁠Skelim wantaim 1 Jon 1:​8-10.

[Futnot]