I Stap na Autim Tok Klostu Long Maunten i Save Pairap

“EM I wanpela samting bilong mekim man i pret nogut tru. I olsem las de bilong dispela graun i kamap, olsem Baibel i stori long en. Oltaim yumi mas was i stap na yumi mas i stap stret long ai bilong Jehova long olgeta taim.” Em tok bilong wanpela Witnes Bilong Jehova, nem bilong em Víctor, em i stori long taim em i bin sindaun klostu tru long wanpela bikpela maunten i save pairap, em maunten Popokatepetel long Meksiko, tasol planti man i save kolim Popo.

Kirap long 1994, ol nius bilong olgeta hap i stori long dispela maunten i save pairap.a Gavman i tok, olgeta samting i stap insait long mak olsem 30 kilomita longwe long dispela maunten, ol inap tru long kisim bagarap. Hap saut bilong maunten i nogut moa, long wanem, hul long het bilong maunten i slip liklik i go long dispela hap bilong saut, na i gat sampela bikpela baret long en, olsem na ol hatpela ston i boil na tanim olsem wara, na graun malumalum tu, inap ran i go daun long ol dispela baret.

Planti manmeri ol i save tingting, sapos dispela maunten i pairap bikpela tru, olsem wanem long Biktaun Meksiko? Em inap kisim bagarap? Na i gat planti man ol i sindaun long provins Morelos i stap long hap saut bilong dispela maunten. Olsem wanem? Olgeta man i sindaun long dispela hap ol inap kisim bagarap? Na olsem wanem long i stap bilong ol man i save sindaun klostu long dispela maunten na ol i no save wanem samting bai painim ol long olgeta wan wan de?

Bikpela Bagarap Inap Kamap

Hap bilong Biktaun Meksiko i gat ol stua na bisnis samting long en, em i stap longwe long Popokatepetel inap 70 kilomita long hap bilong not-wes, tasol sampela hap bilong biktaun em ol man i save sindaun long en ol i stap klostu long dispela maunten inap olsem 40 kilomita. Tru, dispela biktaun i gat 20 milion manmeri long en, em i stap ausait long mak bilong kisim bagarap long dispela maunten, tasol sapos em i pairap bikpela na tromoi planti sit bilong paia i go antap, na win i karim i go long dispela taun, em inap kisim nogut long en.

Ol samting dispela sit bilong paia i mekim i nogut moa long hap is bilong dispela maunten. Bikpela taun Puebla i stap long dispela hap, na i gat sampela bikpela na liklik taun moa i gat olsem 200,000 manmeri ol i sindaun long hap ol inap tru long kisim bagarap sapos maunten i pairap. Long Sande, Me 11, 1997, maunten i tromoi planti ton sit bilong paia i go antap na em i pundaun long dispela hap na i go inap long provins Verakrus, em i stap longwe inap olsem 300 kilomita long hap bilong is. Long hap saut bilong maunten, long provins Morelos, i gat sampela bikpela na liklik taun i stap, em ol i gat olsem 40,000 i save sindaun long hap ol inap kisim bagarap.

Sampela Witnes Bilong Jehova i save sindaun long ol dispela hap na ol i mekim wok bilong ol. Long Biktaun Meksiko ol inap olsem 90,000 samting, na i gat olsem 1,700 kongrigesen. Brens-ofis bilong Sosaiti Was Taua i stap ausait long Biktaun Meksiko long hap bilong not-is, na em i stap longwe long dispela maunten inap olsem 100 kilomita samting. I gat olsem 800 ol i wok volantia long brens-ofis, na 500 volantia ol i wok long sanapim sampela bikpela haus olsem faktori samting long brens. Olgeta i stap ausait long mak ol inap kisim bagarap long en sapos maunten i pairap.

Long provins Morelos i gat olsem 50 kongrigesen bilong ol Witnes Bilong Jehova na 2,000 manmeri i save autim tok bilong Kingdom. Sampela, em ol i sindaun long Tetela del Bolkan na Hueyapan, ol i stap klostu long dispela maunten inap olsem 20 kilomita. Na long hap bilong is long provins Puebla, i gat sampela kongrigesen i stap, em ol i gat olsem 600 manmeri i save autim tok, na ol i save sindaun klostu long dispela maunten olsem 20 i go inap 30 kilomita. Ol dispela manmeri ol inap tru long kisim bagarap sapos maunten i pairap.

Ol Witnes Bilong Jehova i Wok Yet

Maski ol inap kisim bagarap long dispela maunten i save pairap, ol Witnes Bilong Jehova long dispela hap ol i no lusim wok bilong ol long autim tok. Na ol i wok yet long mekim ol miting Kristen bilong ol; dispela i helpim ol na ol i pilim olsem ol i stap wanbel na stap strong, maski dispela hevi i stap. (Hibru 10:​24, 25) Ripot i kam long wanpela kongrigesen i tok: “Planti man ol i senisim tru tingting bilong ol long gutnius bilong Kingdom. Long wanpela liklik ples, 18 manmeri ol i orait long stadi long Baibel long haus bilong ol.”

Narapela kongrigesen, em i stap klostu long dispela maunten inap olsem 20 kilomita, i salim tok olsem: “Kongrigesen i wok long go bikpela hariap. Dispela kongrigesen i bin kamap long Novemba 1996. Insait long 6-pela mun bihain long en, 10-pela manmeri ol i winim mak bilong mekim wok autim tok. Sampela man bilong autim tok ol i save sindaun klostu tru long dispela maunten, inap olsem 20 kilomita tasol. Ol i save mekim ol miting Kristen bilong ol, na inap olsem 40 ol i save kam long ol dispela miting.”

Magdalena, em i save sindaun long San Agustin Ikstawikstala, long Puebla, em i stap klostu long dispela maunten inap 25 kilomita, em tu i wok strong long mekim ol Baibel-stadi. Em i stori long samting i kamap taim dispela maunten i bin pairap bikpela long bipo.

Em i tok: “Mipela i kisim toksave olsem mipela i mas lusim haus, na mipela i mekim olsem, na bikpela sit bilong paia i wok long pundaun antap long mipela. Bagarap i laik painim mipela, tasol mi tingting long famili Dorado mi save stadi wantaim ol long Baibel. Mi wantaim sampela brata i go long haus bilong ol bilong helpim ol long go long wanpela hap ol i no ken kisim bagarap. Long taun Puebla i stap klostu, wanpela komiti bilong ol Witnes Bilong Jehova i gat wok long helpim ol brata long taim bilong bagarap, ol i kirapim pinis wok bilong ol. Dispela famili Dorado i pilim tru gutpela pasin ol i mekim long mipela olgeta. Ol brata Kristen i redim pinis ples slip bilong mipela long ol narapela narapela hap. Mipela i no sot long wanpela samting, maski mipela i stap longwe long haus bilong mipela. Dispela famili i bin kam long sampela miting long Haus Kingdom, tasol ol i kirap nogut long pasin sori ol brata i mekim long ol, maski bipo ol i no bin bungim ol. Sampela wik bihain long taim mipela i kam bek long haus bilong mipela, dispela famili i kirap long i go long olgeta miting. I no longtaim na ol i winim mak bilong mekim wok bilong autim gutnius. Nau tupela long dispela famili ol i baptais pinis. Ol i bin mekim wok painia haptaim inap sampela mun, na nau ol i stretim rot bilong go insait long wok painia oltaim.”

Martha em wanpela yangpela meri i gat 20 krismas, na em i sindaun klostu long dispela maunten inap 21 kilomita. Maski em i no inap wokabaut, em i no larim dispela hevi i pasim em long autim tok long olgeta taim i gat rot long mekim. Em i bin lainim tok i tru inap 3-pela yia i go pinis, taim dispela maunten i pairap gen. I hatwok long em i raun long wilsia, long wanem, em i save stap long ples i gat ol maunten na rot nogut, olsem na taim em i mekim wok autim tok em i save wokabaut long donki. Na em i save wokabaut long dispela donki na go long ol miting. Ol sista insait long kongrigesen ol i mas helpim Martha long go antap long donki na long lusim donki na go daun, olsem na em i tenkyu tru long Jehova i bin helpim em na nau em i insait long wanpela lain brata em narapela i save laikim tru narapela. Long olgeta mun em i save lusim 15 aua samting long autim tok.

Long ol dispela hap i stap longwe long ol taun, ol wanples i strong long ol Witnes Bilong Jehova i mas bung wantaim ol long ol bikpela de bilong lotu. Long Tulsingo, em wanpela ples i stap klostu long dispela maunten inap olsem 20 kilomita, ol i salim wanpela man long i go lukim ol Witnes na kisim sampela mani olsem kontribusen bilong mekim bung long bikpela de bilong lotu. Long pasin isi ol brata i kamapim as na ol i no inap insait long ol dispela bung bilong lotu. Dispela man i strong tru long kisim sampela mani long ol dispela brata, olsem na em i kirap long bung wantaim ol, na em i kisim save long sampela bilip bilong ol. Em i amamas long painim bekim bilong ol askim bilong em insait long Baibel Katolik bilong em yet. Inap wanpela yia pinis, em wantaim meri na pikinini meri bilong em ol i save go oltaim long ol miting, na em i tokaut pinis olsem em i laik kamap wanpela man bilong autim gutnius.

Olsem Wanem Yu Ken Redi i Stap?

Ol saveman i save glasim gut maunten Popokatepetel na kamapim ripot bilong en, tasol i no gat wanpela man i save wanem samting bai kamap o wanem taim em bai kamap. Ol nius na ol man i sindaun klostu long dispela maunten ol i tok, ating i no longtaim na em bai pairap. Dispela samting inap kamap tru tru. Ol lain bilong gavman ol i tingting planti na ol i laik mekim olgeta samting ol inap mekim bambai ol i ken redi gut sapos maunten i pairap. Tasol yumi save, ol i mas tingting gut pastaim, nogut ol i kirap nating na givim tok lukaut long ol man, long wanem, ol i no laik bai olgeta man i kirap lusim nating ples sapos dispela hevi i no inap kamap hariap. Orait, ol man i ken mekim wanem?

Wanpela savetok bilong Baibel i tok: “Man i gat gutpela tingting, em i save olsem, hevi i laik kamap long em na em i abrusim. Tasol man i no gat tingting, em i lukim trabel i stap long rot bilong en, na em i go na bungim na karim hevi.” (Sindaun 22:⁠3) Olsem na man i gat gutpela tingting em bai mekim ol samting bilong lukautim laip bilong em taim i gat rot yet long mekim. Em i no laik mekim olsem i no gat wanpela hevi inap kamap, o em i laik wetim maunten i pairap pastaim na nau em i ken kirap mekim sampela samting, nogat; em i no laik pilai long bikpela strong i stap insait long dispela maunten. Ol Witnes Bilong Jehova long dispela hap ol i gat kain tingting olsem long dispela samting.

I no longtaim i go pinis na sampela lain bilong brens-ofis bilong Sosaiti Was Taua i bin bung wantaim ol wasman bilong raun long provins Puebla, em ol i save go lukim ol kongrigesen i stap long hap ol man inap kisim bagarap long dispela maunten. Ol i stretim rot bambai ol wasman bilong raun na ol wan wan long komiti bilong helpim ol brata long taim bilong bagarap ol i ken i go lukim olgeta wan wan famili i sindaun klostu long dispela maunten i go inap long mak olsem 25 kilomita. Ol brata i helpim ol dispela famili long tingting long lusim ples taim maunten i no pairap yet. Ol i stretim rot bilong redim ol ka samting na ples slip bilong 1,500 manmeri ol i mas i go i stap long taun Puebla taim dispela hevi i kamap. Sampela famili ol i lusim ples na i go sindaun wantaim sampela wanblut long ol narapela taun.

Wanpela Bikpela Tok Lukaut Tru

Bikpela smok na paia i kamap long Popokatepetel na ol pairap i kamap insait long maunten, ol i makim klia olsem klostu nau dispela maunten bai pairap. Olgeta man i laik abrusim bagarap ol i mas bihainim toksave bilong gavman na mekim ol samting bilong lukautim laip bilong ol. Ol Witnes Bilong Jehova i sindaun long hap klostu long dispela maunten ol i save was i stap long olgeta taim bambai ol i ken lukautim laip bilong ol yet na helpim ol narapela long luksave olsem bagarap i laik kamap na ol i mas mekim sampela samting bilong abrusim bagarap, nogut ol i wet wet na bihain ol i no gat rot moa.

Na ol Witnes Bilong Jehova i was i stap na tingim wanpela samting i kain olsem dispela, tasol em i bikpela samting moa​—⁠em ol samting i kamap nau long graun na i wankain olsem ol tok profet bilong Baibel i makim. Ol pait, bikpela guria, bikpela hangre, ol kain kain sik, pasin raskol, ol i makim wanpela bikpela samting bai kamap, wankain olsem smok na paia samting i save kamap long wanpela maunten. Ol dispela samting i kamap i olsem wanpela mak Krais Jisas i tok bai makim olsem pasin bilong “dispela graun i laik pinis.” Tru, i no gat wanpela man i save long taim stret dispela pasin bilong graun bai pinis, tasol yumi save em bai kamap tru na em i kam klostu pinis.​—⁠Matyu 24:​3, 7-​14, 32-​39.

Taim i sot pinis na ol man bilong olgeta hap ol i mas tingim gut tok lukaut bilong Jisas, em i tok: “Yupela lukaut gut. Nogut yupela i dring nabaut oltaim na yupela i spak. Na nogut yupela i wari long ol samting bilong bodi. Sapos kain pasin olsem i daunim yupela, orait dispela de bilong Bikpela bai i kamap long yupela wantu tasol.” (Luk 21:34) Man i gat gutpela tingting em bai bihainim dispela tok. Taim yumi lukim ol samting i makim olsem maunten i laik pairap, yumi no ken ting em i samting nating, na olsem tasol yumi no ken givim baksait long ol samting i makim olsem Pikinini Bilong Man, Krais Jisas, i laik i kam. Em i tok strong long yumi olsem: “Yupela tu i mas redi. Pikinini Bilong Man bai i kam long wanpela taim yupela i no ting em bai i kam.”​—⁠Matyu 24:⁠44.

[Futnot]

[Ol Piksa long pes 23]

Martha (em i sindaun long donki) wantaim sampela moa ol i autim tok long hap klostu long Popokatepetel