Ol Toksave i Stap Long Rot Bilong Kisim Laip

SAPOS yu raun long wanpela rot em yu no save long en, bai yu tingim ol toksave ol i putim long rot olsem samting bilong pasim rot bilong yu? Nogat a? Ol dispela toksave i bilong soim rot long yu na yu no paul long rot i go long hap yu go long en.

Tasol olsem wanem sapos yu wokabaut long rot i go long ples bilong kisim laip? Yu inap i go stret long dispela ples maski i no gat ol toksave i stap long rot? Wanpela profet bilong God long bipo em i bin tokaut long popaia bilong ol man long dispela samting. Em i tok: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.”​—⁠Jeremaia 10:⁠23.

Orait, ol man inap kisim we stretpela save bilong bosim wokabaut bilong ol? Man i bin wokim ol man, em tasol inap soim rot long ol man, na ol tok bilong soim rot kain olsem dispela toksave ol i putim long rot, em i stap long Baibel. Long rot bilong Baibel, Jehova i tok olsem: “Taim yupela i wokabaut na yupela i paul long wanem rot yupela i mas bihainim, rot bilong han sut o rot bilong han kais, orait [mi] bai i stap baksait long yupela na [mi] bai i tokim yupela long rot yupela i mas bihainim.”​—⁠Aisaia 30:⁠21.

Tru tumas, Baibel i save soim gutpela rot long yumi mas bihainim long olgeta samting yumi mekim. (Aisaia 48:17; 2 Timoti 3:​16, 17) Tasol sori tru, planti manmeri i save bihainim tingting bilong ol yet na ol i wokabaut​—⁠ol i no larim God i soim rot long ol. (Matyu 7:13) Tasol dispela toksave i stap long rot na i no gat wanpela man inap rausim! Olsem wanem? Bai yu bihainim dispela toksave taim yu wokabaut long dispela rot i go long kisim laip?