Yu Ting Ol Pris Pasto i Bilip Long Ol Samting Ol i Lainim Ol Man Long En?
NAU tasol, man bilong wanpela meri em i dai. Pris bilong dispela meri i tok, man bilong em i no bihainim gutpela pasin inap long em i ken go long heven, na em i no bihainim pasin nogut inap long em i mas i go long bikpaia. Olsem na pris i tok, em i stap long klinpaia na em bai kisim strafe i go inap long taim em i winim mak bilong i go long heven. Meri i baim pris long mekim ol beten bambai man bilong em i ken lusim klinpaia hariap. Meri bilong dispela man i dai pinis i bel gut long dispela samting, na em i ting dispela pris i holim wankain bilip olsem em yet.
Tasol sapos dispela meri i kisim save olsem pris bilong em i no holim dispela bilip olsem strafe inap painim man i dai pinis, ating em bai bel hevi, a? Planti man i bel hevi taim ol i kisim save olsem planti pris ol i no bilip long planti tok ol i lainim ol man long en. Nius National Catholic Reporter i stori olsem: ‘Planti pris i save pamuk. Tasol samting i moa nogut i olsem: Planti pris i no bilip moa olsem God i stap na man i dai pinis bai kisim gutpela pe o pe nogut o kirap bek. Ol dispela pris ol i planti tru, olsem na dispela tingting bilong ol i bin kamap olsem tingting tru bilong planti lain pris.’
Wankain samting i bin painim sampela narapela misin. Nius Canberra Times bilong Ostrelia i tok, taim ol i givim askim long ol pris bilong Sios Bilong Inglan, ol i kisim save olsem planti ‘i no bilip long ol bikpela tok bilong misin olsem Jisas i bin kamap long graun long rot bilong wanpela meri i no bin slip wantaim man, na ol i no bilip olsem Jisas i bin wokim ol mirakel, na mesaia bai kam bek namba tu taim.’
George R. Plagenz, em man bilong raitim tok bilong lotu, em i askim wanpela pasto, olsem wanem em inap kolim wanpela tokaut bilong bilip em yet i no bilip long en. Wanpela pasto i tok em i save senisim namba wan hap bilong dispela tok, “Mi bilip.” Em i tok: “Mi save kirapim dispela tokaut olsem: ‘OL i bilip long God, em Papa i Gat Olgeta Strong . . .’ ” Plagenz i tok, dispela em i wanpela bikpela giaman tru, ‘winim ol narapela pasin i kamap long Amerika bilong giamanim ol man.’
Sori tru, dispela pasin giaman bilong ol pris pasto na pasin bilong ol olsem ol i no bilip, dispela i mekim na planti man i les long ol samting bilong lotu. Tasol i no dispela samting tasol. Klostu olgeta man i go long lotu ol i bin skul olsem Baibel em i Tok Bilong God. Tasol ating ol bai kirap nogut sapos ol i kisim save olsem i gat sampela tok bilong lotu em longtaim ol man i bin bilip long en, tasol ol dispela tok i no stap long Baibel. Stori i kamap bihain long dispela bai stori long wanpela tok olsem.