Wanem As Bilong Ol Bilip Bilong Yu?

Pasin bilong bilip i olsem man i ting tok em i harim i tru na i stret olgeta. Wanpela tokaut bilong Yunaitet Nesen, em Yunivesal Dekleresen ov Human Raits, i tok olsem olgeta man “i mas i stap fri long bihainim tingting, o maus bilong bel, o lotu bilong em.” Na tu, em i mas i stap fri long “senisim lotu o bilip bilong em,” sapos em i laik mekim olsem.

TASOL bilong wanem wanpela man i laik senisim lotu o bilip bilong em? Planti man i save tok: “Mi gat bilip bilong mi yet, na em i gutpela long mi.” Na planti man i ting ol bilip kranki tu i no inap bagarapim man. Olsem: Man i ting graun i stret olsem antap bilong tebol, dispela tingting i no inap bagarapim em yet o narapela man. Sampela i save tok: “Yumi no gat wankain tingting, tasol maski long tok pait long dispela.” Olsem wanem? I gutpela long tingting olsem long olgeta taim? Yu ting wanpela dokta bai tok tasol olsem em i no wanbel wantaim wanwok bilong em, em dispela wanwok i save go sekim ol sikman long haus sik bihain stret long em i bin holim skin bilong ol daiman long mog?

Ol bilip kranki bilong ol misin i bin kamapim planti samting nogut. Tingim ol samting nogut i bin kamap taim ol bikman bilong lotu i “kirapim ol Kristen long givim bel tru long pait strong” long taim bilong ol Pait Holi Bilong Lotu long yia 500 i go inap 1500 samting. O tingim ol “Kristen” i holim gan long wanpela pait i kamap long nau, em ol i “wankain olsem ol soldia bilong bipo i gat nem bilong ol santuman long han bilong bainat, na ol i putim piksa bilong Virgo Maria long gan bilong ol.” Olgeta dispela man i givim bel long lotu, ol i ting samting ol i mekim i stret. Tasol yumi inap save olsem dispela pasin na ol narapela pait bilong lotu i no stret liklik.

Bilong wanem ol man i paul nabaut na i pait? Baibel i tok Satan i “giamanim olgeta manmeri bilong graun.” (KTH 12:9; 2 Korin 4:4; 11:⁠3) Aposel Pol i tok, planti manmeri i save givim bel long lotu ol “bai i bagarap,” long wanem, Satan i giamanim ol, em i dispela man i save “mekim olgeta kain strongpela wok na ol kain kain giaman mirakel.” Pol i tok, ol kain man olsem ‘ol i no laikim tru tok i tru God i givim long ol,’ olsem na ol i “bilipim tok giaman.” (2 Tesalonaika 2:​9-12) Yu inap mekim wanem bilong yu no ken bilip long tok giaman? Ol bilip bilong yu i gat wanem as bilong en?

Famili i Stiaim Bilip Bilong Yu?

Ating yu kisim bilip bilong famili yu go bikpela insait long en. Ating dispela em i gutpela samting. God i laik bai ol papamama i skulim pikinini bilong ol. (Lo 6:​4-9; 11:​18-21) Olsem: Yangpela man Timoti i kisim gutpela helpim taim em i putim yau long tok bilong mama na bubu meri bilong em. (2 Timoti 1:5; 3:​14, 15) Baibel i kirapim ol pikinini long rispektim bilip bilong papamama. (Sindaun 1:8; Efesus 6:⁠1) Tasol yu ting God i laik bai yu bilip long ol samting, long wanem, papamama bilong yu i bilip long en? Pasin bilong bilip nating long ol samting ol tumbuna i bin mekim na bilip long en inap bagarapim man.​—⁠Song 78:8; Amos 2:⁠4.

Wanpela meri bilong Samaria i bungim Jisas Krais, em i go bikpela long lotu bilong ol Samaria. (Jon 4:20) Jisas i save dispela meri i stap fri long makim ol samting em i laik bilip long en, tasol em i tokim em olsem: “Yupela Samaria i save lotu long samting yupela i no save long en.” Planti bilip bilong lotu bilong em i kranki, na Jisas i tokim em olsem em i mas senisim bilip bilong em bambai em i ken lotuim God long pasin God i laikim​—⁠“long strong bilong Holi Spirit na long pasin i tru.” Em i no ken holimpas strong ol bilip em i bin laikim na bihainim, nogat; em na ol narapela olsem em, ol i mas “bihainim tok bilong God” em Jisas Krais i kamapim.​—⁠Jon 4:​21-24; 39-41; Aposel 6:⁠7.

Ol i Skulim Yu Long Bilip?

I stret yumi rispektim ol tisa na saveman i gat bikpela save long sampela samting. Tasol long bipo yet na i kam inap long nau i gat planti tisa em ol i gat nem, tasol tingting bilong ol i kranki olgeta. Olsem: Saveman Bertrand Russell i stori long tupela buk bilong saiens em saveman Aristotal bilong kantri Grik i bin raitim, na em i tok, “i no gat wanpela sentens bilong dispela tupela buk i stret wantaim save bilong saiens long nau.” Planti bikman bilong nau ol tu i save tingting kranki long ol samting. Long 1895 wanpela saientis bilong Inglan, em Bikman Kelvin, i tok strong olsem: “Ol man i no inap wokim wanpela masin samting, em hevi bilong en i winim hevi bilong win, na em inap flai antap.” Olsem na sapos wanpela tisa i gat namba i tok olsem tok em i mekim i tru, man i gat gutpela tingting em bai no bilip nating long dispela tok.​—⁠Song 146:⁠3.

Yumi mas was gut tu taim narapela i skulim yumi long ol samting bilong lotu. Aposel Pol i bin kisim bikpela skul long ol tisa bilong lotu na em i bin “strong tumas long bihainim olgeta pasin bilong ol tumbuna bilong [em].” Tasol pasin bilong em long givim bel long ol bilip bilong ol tumbuna bilong em, i givim ol hevi long em. Dispela i mekim na em i ‘mekim nogut tru long ol manmeri bilong sios bilong God, na em i wok long bagarapim sios olgeta.’ (Galesia 1:​13, 14; Jon 16:​2, 3) Na inap longpela taim Pol i “wok long kikim samting i gat sap,” olsem em i wok long sakim ol samting inap helpim em long bilip long Jisas Krais. Jisas yet i mas mekim sampela bikpela samting bilong kirapim Pol long senisim bilip bilong em.​—⁠Aposel 9:​1-6; 26:⁠14.

Ol Nius na TV Samting i Stiaim Bilip Bilong Yu?

Ating ol nius na TV samting i bin stiaim ol samting yu save bilip long en. Planti manmeri i amamas long TV samting i stap fri long kamapim kain kain tok, long wanem, long dispela rot ol man inap kisim save long ol samting em inap helpim ol. Tasol i gat ol strongpela samting em inap stiaim tok ol nius na TV samting i save kamapim, na planti taim ol i save stiaim tok bilong ol. Planti tok ol i kamapim i no stret na isi isi dispela inap bagarapim tingting bilong yu.

Na tu, bilong kirapim planti man long lukim na harim tok bilong ol, ol nius na televisen i save stori long ol samting i save kirapim tingting bilong ol man na i narapela kain tru. Ol samting ol man i no bin harim o ritim long niuspepa inap sampela yia i go pinis, long nau planti taim ol i save harim o ritim ol kain stori olsem. Isi isi ol pasin ol man i bin bihainim inap longpela taim i wok long bagarap. Tingting bilong ol man i wok long paul. Ol i kirap ting olsem “pasin nogut em i gutpela na gutpela pasin em i nogut.”​—⁠Aisaia 5:20; 1 Korin 6:​9, 10.

Painim As Tru Bilong Bilip

Sapos tingting bilong ol man i as bilong ol bilip bilong yumi, i olsem yumi sanapim haus antap long wesan. (Matyu 7:26; 1 Korin 1:​19, 20) Orait wanem samting i olsem gutpela as bilong ol bilip bilong yu? God i bin givim tingting long yu bambai yu inap skelim ol samting i stap long graun, na kamapim ol askim long ol samting bilong spirit, olsem na ating em i bin givim ol samting bambai yu inap kisim stretpela bekim long ol askim bilong yu, a? (1 Jon 5:20) Yes, em i mekim olsem! Tasol olsem wanem yu inap save long wanem tok long ol samting bilong lotu i tru na i stret olgeta? Mipela inap tokaut stret olsem Tok Bilong God, em Baibel, em tasol inap helpim man long save long dispela samting.​—⁠Jon 17:17; 2 Timoti 3:​16, 17.

Sampela bai tok: “Tasol wet pastaim. Ol man i gat Baibel, ol tasol i as bilong planti pait na ol i paulim ol samting bilong graun.” Tru, ol bikman bilong lotu em ol i tok ol i save bihainim tok bilong Baibel, ol i bin kamapim planti tok i pait wantaim na i paulim ol man. Dispela samting i kamap, long wanem, Baibel i no as bilong bilip bilong ol. Aposel Pita i tok, ol i “giaman profet” na ol i “giaman long skulim ol manmeri,” na ol i kamapim “ol kain kain tok giaman” namel long ol. Pita i tok pasin bilong ol i mekim na “ol man nabaut i tok nogut long Rot bilong pasin i tru.” (2 Pita 2:​1, 2) Tasol Pita i tok, “mipela i save bilip strong moa long tok bilong ol profet, na sapos yupela tu i holim strong tok bilong ol, em i gutpela. Tok bilong ol profet em i olsem lam i lait i stap long ples tudak.”​—⁠2 Pita 1:19; Song 119:105.

Baibel i kirapim yumi long skelim bilip bilong yumi wantaim ol tok bilong Baibel. (1 Jon 4:⁠1) Planti milion manmeri i save ritim dispela nius, ol inap tok olsem dispela samting i bin helpim ol na nau i stap bilong ol i gat as bilong en na ol i stap gut. Olsem na bihainim pasin bilong ol gutpela lain Beria. Paslain long yu makim wanem samting yu laik bilip long en, ‘ritim na skelim tok i stap long buk bilong God long olgeta de.’ (Aposel 17:11) Ol Witnes Bilong Jehova i amamas long helpim yu long mekim olsem. Tru, yu yet bai makim wanem samting yu laik bilip long en. Tasol bai yu bihainim savepasin sapos yu larim tok i tru bilong Baibel i stiaim bilip bilong yu, na save na ol laik bilong ol man, nogat.​—⁠1 Tesalonaika 2:13; 5:⁠21.

[Ol Piksa long pes 6]

Larim Baibel i stap olsem as bilong ol bilip bilong yu