Baibel i Tok Wanem?
I Gat Rong Long Senisim Lotu Bilong Yu?
Taim Avtar i kirap stadi long Baibel, famili bilong em bilong lotu Sik, ol i kros. Em i tok: “Long ples bilong mi, taim yu senisim lotu bilong yu ol bai rausim yu long komiuniti. Ol bai rausim tu ol lotu nem bilong mipela. Sapos yu senisim lotu bilong yu, long ai bilong ol i olsem yu no laik i stap wanpela man bilong Lotu Sik na yu no rispek long famili bilong yu.”
BIHAIN Avtar i kamap wanpela Witnes Bilong Jehova. Olsem wanem? Em i mekim pasin i no stret long senisim lotu bilong em? Ating yu gat wankain tingting olsem famili bilong em. Ating yu pilim olsem lotu i kamap pasin bilong famili kirap long bipo yet na em samting man i no inap tru long senisim.
Em i bikpela samting long tingim gut famili bilong yumi. Baibel i tok: “Papa bilong yu i bin kamapim yu na yu mas harim tok bilong en.” (Sindaun 23:22) Tasol em i bikpela samting moa yet long kisim stretpela save long Man Bilong Wokim yumi na long ol samting em i tingting pinis long mekim. (Aisaia 55:6) Yu ting yumi inap kisim dispela save? Sapos olsem, orait wok bilong kisim dispela save em i bikpela samting olsem wanem long yu?
Painim Lotu i Skulim Man Long Tok i Tru
Ol tok em ol lotu i skulim ol man long en, ol dispela tok ol i pait wantaim. Yumi save, i no olgeta bilong ol dispela tok ol i tru. Olsem na yumi ken ting olsem i gat ol man i stap em Baibel i tok long ol olsem “ol i strong tumas long bihainim pasin God i laikim. Tasol ol i no klia gut long laik tru bilong God, na ol i mekim.” (Rom 10:2) Tasol long 1 Timoti 2:4, aposel Pol i tok God i laik bai “olgeta manmeri . . . i ken save long as bilong tok tru.” Orait, olsem wanem yu inap kisim kain stretpela save olsem?
Bai yumi stori long sampela as na yumi mas skelim gut Baibel. Pol, em man holi spirit i bin kirapim em long raitim Baibel, em i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi.” (2 Timoti 3:16) Taim yu wok long painim tok i tru, skelim tu ol samting i kamapim klia olsem ol tok Baibel i kamapim em i tru. Yu yet i ken mekim wok painimaut long olsem wanem gutpela tingting na save i stap long Baibel i winim savetingting bilong ol man, na olsem wanem stori bilong Baibel long ol samting i kamap bipo em i tru, na olsem wanem ol tok profet bilong en i kamap tru.
Baibel i no tok olgeta lotu i wanpela rot tasol bilong i go long God, nogat. Em i tok ol man i no ken bilipim olgeta tok ol i harim, ol “i mas traim olgeta spirit, bai [ol] i ken save, ol [dispela spirit] i kam long God, o nogat.” (1 Jon 4:1) Olsem: Olgeta tok em God i as bilong en, ol dispela tok i mas stret long pasin bilong God yet, na nambawan bikpela pasin bilong en, em pasin laikim.—1 Jon 4:8.
Baibel i tokim yumi olsem God i laik bai yumi “painim em.” (Aposel 17:26, 27) Man Bilong Wokim yumi i laik bai yumi painim tok i tru, olsem na i no gat rong long mekim samting em yumi luksave i stret long yumi mekim—na sapos yumi mas senisim lotu bilong yumi, orait yumi mas mekim olsem. Tasol olsem wanem long ol hevi bai kamap taim yumi senisim lotu?
Stretpela Tingting Long Pasin Bilong Stap Gut Long Famili
Taim ol man i senisim ol bilip bilong ol, ating ol i no laik insait moa long sampela pasin bilong lotu o ol bikpela de malolo bilong en. Na yumi save dispela pasin inap kamapim hevi insait long famili. Jisas i bin save long dispela. Em i tokim ol disaipel bilong em: “Mi kam bilong mekim pasin birua i kamap. Man bai i birua long papa bilong en, na pikinini meri bai i birua long mama bilong en, na maritmeri bai i birua long mama bilong man bilong en.” (Matyu 10:35) Olsem wanem, yu ting tok bilong Jisas i makim olsem ol tok bilong Baibel em samting bilong kamapim kros pait? Nogat. Jisas i save long wanem samting bai kamap taim ol narapela long famili i no wanbel long wanpela bilong ol i sanap strong long ol bilip we i no wankain long bilip bilong ol.
Yu ting man i mas mekim olgeta samting bilong abrusim tok pait insait long famili? Baibel i tok ol pikinini i mas bihainim tok bilong papamama na ol maritmeri i mas aninit long ol man bilong ol. (Efesus 5:22; 6:1) Tasol em i tok ol man husat i laikim God ol “i mas bihainim tok bilong God tasol. . . . [Na ol] i no ken bihainim tok bilong ol man.” (Aposel 5:29) Olsem na sampela taim, pasin bilong i stap gut long God bai kirapim yu long mekim disisen we ol narapela long famili i no orait long en.
Tru, Baibel i kamapim klia olsem tok i tru i narapela kain long ol bilip giaman, tasol God i larim wan wan man yet long makim samting em i laik mekim. (Lo 30:19, 20) Ol narapela i no ken subim yu long lotu long pasin we yu ting em i no stret o long wokim disisen olsem yu bai makim lotu bilong yu yet, o yu bai bihainim famili bilong yu, nogat. Yu ting pasin bilong stadi long Baibel i save brukim famili? Nogat. Baibel i strongim ol man na meri marit em ol i gat narapela narapela lotu long stap gut yet wantaim olsem famili.—1 Korin 7:12, 13.
Daunim Pret
Ating yu pret long ol man bilong ples bai kros taim yu stadi long Baibel wantaim ol Witnes Bilong Jehova, laka? Mariamma i tok: “Famili bilong mi i wari, nogut mi no inap painim wanpela gutpela man em inap long lukautim mi gut. Olsem na ol i kros long mi stadi long Baibel.” Mariamma i bilip long God Jehova na wok yet long stadi long Baibel. (Song 37:3, 4) Yu tu ken mekim olsem. No ken pret long wanem samting bai kamap, nogat, tingim ol gutpela samting inap kamap long dispela. Tok bilong Baibel i save helpim sindaun bilong man na mekim pasin bilong em i kamap gutpela moa. Ol man i kisim skul long mekim pasin laikim long famili bilong ol. Ol inap lusim ol kain pasin nogut olsem tok nogut, kros pait, na mekim nabaut long alkohol na drak. (2 Korin 7:1) Baibel i kirapim man long kisim ol gutpela pasin olsem pasin bilong stap gut long God, mekim tok tru, na pasin bilong mekim wok. (Sindaun 31:10-31; Efesus 4:24, 28) Olsem wanem? Yu laik stadi long Baibel na lukim ol gutpela senis i kamap long sindaun bilong yu taim yu bihainim ol dispela tok?
YU LAIK SAVE?
◼ Bilong wanem yu mas skelim ol bilip bilong lotu bilong yu?—Sindaun 23:23; 1 Timoti 2:3, 4.
◼ Olsem wanem yu inap luksave long ol tok em ol i tru?—2 Timoti 3:16; 1 Jon 4:1.
◼ Yu ting i stret long larim pasin birua bilong famili i pasim yu long stadi long Baibel?—Aposel 5:29.
[Rait long pes 29]
Tok bilong Baibel i save helpim sindaun bilong man na mekim pasin bilong em i kamap gutpela moa
[Piksa long pes 29]
Mariamma na man bilong em