Yu Painim Pinis Lotu i Tru?
“Pasin bilong Kristen i stap stret olgeta . . . long ai bilong God Papa bilong yumi, em i olsem.”—JEMS 1:27.
LONG nau planti man i no givim bel tumas long lotu. Ating ol i go long lotu sampela taim, tasol wan wan tasol i save go oltaim. Planti man i no bilip olsem lotu bilong ol tasol i stret na olgeta narapela lotu i kranki. Ating ol i pilim olsem lotu bilong ol i stret long laik bilong ol.
2 Olsem na wanem insait bilong dispela askim: Yu painim pinis lotu i tru? Yu ting i olsem yu painim pinis lotu yu laikim? Wanem samting i stiaim tingting bilong yu? Laik bilong famili? o bilong ol poroman? o laik bilong yu yet? Tasol God i ting olsem wanem long dispela lotu? Yu bin tingim dispela?
Olsem Wanem Yumi Ken Save Long Tingting Bilong God?
3 Bilong save long tingting bilong God, God i mas kamapim dispela tingting long wanpela rot. Baibel em i olpela buk tru i tok, God yet i bin kamapim ol tok bilong en. (2 Timoti 3:16, 17) Tasol tru Baibel tasol i kamapim ol tok God i laik givim long olgeta man? Yu ting olsem wanem? Wanem as bilong tingting bilong yu? Yu kisim dispela tingting long papamama? O long ol poroman? O yu yet yu bin skelim Baibel na yu ting olsem? Orait, skelim dispela 4-pela samting i makim tru olsem Baibel em i buk bilong God.
4 Olgeta inap kisim: Sapos tru i gat wanpela tok i kam long God na em i bilong olgeta manmeri, orait olgeta i mas i gat rot bilong kisim dispela tok. Olsem wanem long Baibel? Olgeta inap kisim? Orait, yu tingim: Long nau ol i wokim Baibel o hap tok bilong Baibel long 2,000 samting tok ples. Long Amerika wanpela sosaiti bilong tilim ol Baibel i tok, 10-pela yia bipo klostu olgeta manmeri (98 pesen) inap kisim Baibel long wanpela tok ples ol i save long en. Wanpela buk i tok, ol man i bin tilim planti Baibel tru long planti hap, winim olgeta narapela buk. (Guinness Book of World Records) Na em i mas olsem sapos Baibel em i tok bilong God na em i bilong ol manmeri long olgeta lain na olgeta tok ples, a? (Lukim Kamapim Tok Hait 14:6.) I no gat narapela buk olsem. Nogat tru.
5 Stori i stret: Sapos yumi skelim gut ol stori bilong Baibel, bai yumi save long narapela samting i makim olsem Baibel i narapela kain long olgeta narapela buk i tok ol i buk bilong God. Ol stori bilong Baibel i stret—i no stori nating bilong ol tumbuna. Wanpela loya (Irwin Linton) i gat save long skelim ol samting inap makim olsem stori bilong man long kot em i stret o nogat, na em i tok: “Ol stori nating bilong man i laikim meri, na stori bilong ol tumbuna, na stori giaman, ol dispela kain stori i save tok, ol samting ol i stori long en i bin kamap long wanpela longwe ples, long wanpela taim bipo; ol i no kolim ples stret o taim stret. . . . Tasol ol stori bilong Baibel i kolim stret tru ples na taim.” (Lukim 1 King 14:25; Aisaia 36:1; Luk 3:1, 2.) Ol man i laik painim lotu i tru, ol i mas tingim gut dispela samting.
6 Helpim ol man: Ol man i skelim gut ol tok bilong Baibel ol i save, ol lo na tok bilong en i bilong helpim ol. Baibel i makim stretpela pasin man i mas bihainim na sapos em i bihainim gut, bai em i stap gutpela. (Aisaia 48:17, 18) Ol tok bilong Baibel bilong helpim man i gat hevi, ol dispela tok i gat as bilong en; em i no toktok nating. Baibel i helpim ol man long karim hevi bilong ol. Em i helpim ol long 3-pela rot, olsem: (1) Em i givim gutpela tingting long ol, na (2) soim rot long ol bilong kisim helpim long God na long ol wokboi bilong em, na (3) kolim ol gutpela samting bilong bihain em God bai mekim bilong helpim ol wokboi bilong em, na i kolim as na ol i ken bilip tru long ol dispela tok promis.
7 Ol man i bikhet na mekim laik bilong ol yet, ol i no laik bihainim tok bilong Baibel, tasol nau planti ol i save, pasin ol i mekim, i no helpim ol long i stap amamas tru. (Galesia 6:7, 8) Baibel i kamapim ol stretpela bekim bilong ol askim long pasin bilong rausim bel, na katim marit, na pasin sodom. Man i bihainim tok bilong Baibel, dispela i lukautim em na em i no mekim nabaut long drak o dring, na em i no kisim sik AIDS long rot bilong blut nogut o pasin pamuk. Baibel i makim rot bilong helpim famili long i stap amamas. Sapos man i bel hevi, long wanem, famili tru i givim baksait long em, o bikpela sik i kisim em, o wanpela man o meri em i laikim tumas i dai, orait Baibel inap strongim bel bilong em. Baibel i helpim yumi long tingim gut ol bikpela samting, na bai yumi no bel hevi long samting yumi bin mekim; bai yumi amamas tasol.a
8 Tok profet: Na Baibel tasol i tokaut stret long ol samting bai kamap bihain na kolim olgeta wan wan samting bai kamap. Baibel i tok profet olsem taun Tair bilong bipo bai bagarap, na Babilon bai bagarap, na ol bai wokim gen Jerusalem, na kantri bilong Midia na Persia na kantri Grik bai kamap strong na bihain strong bilong ol king bilong ol bai pinis, na Baibel i kolim planti samting bilong Krais Jisas. Baibel i bin kolim tu ol samting i kamap long nau, na i tokaut long as bilong en. Baibel i stori long rot bilong stretim ol hevi ol hetman bilong nau i no inap stretim. Na Baibel i makim dispela King em bai kamapim gutaim na ol manmeri bai sindaun gut oltaim.b—Aisaia 9:6, 7; 11:1-5, 9; 53:4-6.
9 Baibel i tok, wanpela mak bilong God tru em olsem: Em inap kolim ol samting bai kamap tru long bihain. (Aisaia 41:1–46:13) Man inap mekim olsem o kirapim ol narapela long mekim, em i no wanpela god giaman, o wanpela man nating bilong lotu. Em i God tru, na buk i gat dispela tok profet, em i buk bilong God, em Baibel.—1 Tesalonaika 2:13.
Olgeta i Kolim Tok Bilong Baibel Ol i Gat Lotu i Tru?
10 Olsem wanem? I stret yumi ken ting olgeta misin i kolim tok bilong Baibel ol i lainim ol man long lotu i tru? Yu ting Baibel i makim olsem? Yu ting olgeta man i holim Baibel o kolim tok bilong en ol i bihainim lotu i tru?
11 Planti pris pasto i gat Baibel, tasol long rot bilong lotu ol i laik litimapim nem bilong ol yet. Ol i abusim tok i tru wantaim ol stori nating na giaman save bilong ol man. Yu ting God i laikim lotu bilong ol? Krais i kolim tok bilong Aisaia na makim ol hetman bilong lotu long Jerusalem i hambak olsem. Long maus bilong Aisaia, God i tok: “Ol i save litimapim nem bilong mi long maus bilong ol, tasol bel na tingting bilong ol i stap longwe tru long mi. Ol i save autim lo bilong ol man tasol na tok, ‘Dispela em i tok bilong God.’ Olsem na ol i lotu nating long mi.” (Matyu 15:8, 9; 23:5-10) Dispela kain lotu i no lotu i tru.
12 Olsem wanem sapos lotu i skulim ol man na orait long ol, tasol pasin bilong ol i nogut? Long maunten, Jisas i toksave olsem: “Yupela lukaut long ol giaman profet. . . . Yupela lukim pasin bilong ol na bai yupela i save, ol i giaman profet, o nogat. . . . Olsem tasol olgeta gutpela diwai i save karim gutpela kaikai. Na diwai nogut i save karim kaikai nogut.” (Matyu 7:15-17) Ating sampela man bai mekim rong na misin i mas stretim ol. Tasol sapos planti long lain bilong misin na ol pris pasto tu i mekim olkain pasin nogut, olsem pamuk na bagarapim marit, o pait, o dring spak, o mangalim mani, o tok giaman, o mekim wok papait samting, o lotuim ol god giaman, na misin i no stretim ol o rausim ol, dispela i narapela kain samting tru. Baibel i tokaut klia olsem kongrigesen i mas rausim ol man i save mekim olkain pasin olsem; ol i no inap i go insait long Kingdom bilong God. (Galesia 5:19-21) God i no laikim lotu bilong ol, na sapos yumi poroman wantaim ol man God i sakim, em i no ken amamas long ol samting yumi mekim bilong lotuim em.—1 Korin 5:11-13; 6:9, 10; KTH 21:8.
13 Tru tumas, planti lain i tok ol i skulim ol man long Baibel, tasol ol i no lotuim God long pasin God i laikim na Baibel i makim. Baibel i kolim wanem ol mak bilong lotu i tru?
Ol Mak Bilong Lotu i Tru
14 Baibel tasol i as bilong ol bilip bilong lotu i tru. “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi.” (2 Timoti 3:16) Orait, wanem tok bilong Baibel i as bilong bilip bilong ol misin long God Triwan? Wanem tok i as bilong bilip bilong ol olsem yumi gat tewel na taim yumi dai, tewel i stap yet? Yu bin askim pris o pasto, ol dispela tok i stap we long Baibel? Wanpela buk (The New Encyclopædia Britannica) i tok: “Tok God Triwan na bilip bilong God Triwan i no stap long Nupela Testamen.” (1992, Micropædia, Volyum 11, pes 928) Na narapela buk i tok: “Ol tisa Kristen bilong pastaim i no gat dispela kain tingting o bilip. Nogat tru.” (New Catholic Encyclopedia, 1967, Volyum 14, pes 299) Na bilip bilong ol misin olsem yumi gat tewel, ol saveman bilong ol misin i tok, ol i bin kisim dispela bilip long ol Grik. Tasol lotu i tru i no sakim tok i tru bilong Baibel na bihainim giaman save bilong ol man.—Stat 2:7; Lo 6:4; Esekiel 18:4; Jon 14:28.
15 Lotu i tru i kirapim ol man long lotuim Jehova, em wanpela tasol i God tru. (Lo 4:35; Jon 17:3) Jisas i kolim tok bilong Lo 5:9 na De 6:13, na em i tok strong olsem: “Yu mas aninit long God . . . Na yu mas lotu long em wanpela tasol.” (Matyu 4:10) Olsem na Jisas i kamapim nem bilong Papa bilong em long ol disaipel. (Jon 17:26) Olsem wanem? Lotu bilong yu i skulim yu long lotuim Jehova? Yu kisim save long laik bilong Jehova, na ol wok na pasin bilong em, olsem na yu inap bilip tru long em? Sapos lotu bilong yu em lotu i tru, bai yu ‘Yesa’ long ol dispela askim.—Luk 10:22; 1 Jon 5:14.
16 Ol man i lotu long God long pasin em i laikim, ol i mas bilip long Pikinini bilong em, Krais Jisas. (Jon 3:36; Aposel 4:12) Ol i mas bilip olsem Jisas em i wanpela man tru na em i nambawan man tru, tasol ol i mas bilip tu long ol tok bilong Baibel long ofa bilong em na pilim tru; na ol i mas save, nau em i stap King long heven na ol i mas daun long em. (Song 2:6-8; Jon 3:16; KTH 12:10) Sapos yu bung wantaim ol man i bihainim lotu i tru, orait yu save, ol i wok strong oltaim long bihainim ol tok na pasin bilong Jisas, na ol i givim bel long mekim wok em i makim bilong ol disaipel bilong em. (Matyu 28:19, 20; Jon 15:14; 1 Pita 2:21) Sapos ol man long lotu bilong yu i no mekim olsem, yu no painim pinis lotu i tru.
17 Ol man i bihainim lotu i tru ol i no save insait long ol wok politik o ol pait bilong dispela graun. (Jems 1:27) Bilong wanem ol i no insait? Long wanem, Jisas i tok long ol disaipel bilong em, olsem: “Ol i no bilong dispela graun, olsem mi yet mi no bilong dispela graun.” (Jon 17:16) Jisas i no insait liklik long ol wok politik, na em i tok lain bilong em ol i no ken holim bainat samting na pait. (Matyu 26:52) Ol man i bilip tru long ol tok bilong Baibel, “ol i no skul moa long pait.” (Aisaia 2:2-4) Sapos lotu bilong yu i no bihainim ol dispela tok, gutpela sapos yu lusim.—Jems 4:4; KTH 18:4, 5.
18 Ol man i bihainim lotu i tru i save mekim pasin sori na lainim ol narapela long mekim. (Jon 13:35; 1 Jon 3:10-12) Ol i no toktok tasol long laikim tru ol narapela; dispela pasin bilong laikim tru ol narapela i save pulim ol man bilong olgeta lain na skin na tok ples na sindaun, na ol i pas gut wantaim olsem ol brata brata tru. (KTH 7:9, 10) Dispela pasin i makim ol Kristen tru i narapela kain long ol lain bilong dispela graun. Sapos yu no i go yet long sampela miting bilong ol Witnes Bilong Jehova long Haus Kingdom, o long wanpela kibung bilong ol, gutpela sapos nau yu mekim. Go lukim ol i wok wantaim long wokim wanpela Haus Kingdom. Lukim pasin ol i mekim long ol lapun, na ol meri em man bilong ol i dai pinis, na ol yangpela, na sampela yangpela i gat papa o mama tasol i lukautim ol, o ol i no gat papamama. (Jems 1:27) Skelim ol dispela samting wantaim pasin yu lukim long ol narapela lotu, na askim yu yet: ‘Husat ol i bihainim lotu i tru?’
19 Ol man i bihainim lotu i tru i save tokaut olsem Kingdom bilong God tasol inap stretim tru ol hevi bilong ol man. (Daniel 2:44; 7:13, 14; 2 Pita 3:13; KTH 21:4, 5) Yu ting ol misin i tokaut olsem? Wanem taim yu bin harim wanpela pris o pasto i kamapim klia olsem Kingdom bilong God em wanem samting, na ol samting Baibel i tok Kingdom bai mekim? Misin bilong yu i save kirapim yu long tokim ol narapela long Kingdom bilong God? Sapos olsem, olgeta long dispela misin i save autim tok bilong Kingdom? Jisas i autim tok olsem; ol disaipel bilong em long pastaim ol i mekim. Yu tu yu inap mekim dispela gutpela wok, em nambawan bikpela wok long graun long nau.—Matyu 24:14.
20 I gat planti tausen lotu, tasol Baibel i helpim yumi long save kwik wanem lotu i tru. Yumi mas save long dispela lotu, tasol bikpela samting em olsem: Yumi mas bihainim. Tok i kamap bihain bai stori moa long ol samting yumi mas mekim bilong lotu long God long pasin em i laikim.
[Ol Futnot]
a Rausim bel: Aposel 17:28; Song 139:1, 16; Kisim Bek 21:22, 23. Katim marit: Matyu 19:8, 9; Rom 7:2, 3. Pasin sodom: Rom 1:24-27; 1 Korin 6:9-11. Mekim nabaut long drak na dring: 2 Korin 7:1; Luk 10:25-27; Sindaun 23:20, 21; Galesia 5:19-21. Blut na pasin pamuk: Aposel 15:28, 29; Sindaun 5:15-23; Jeremaia 5:7-9. Famili: Efesus 5:22–6:4; Kolosi 3:18-21. Famili i givim baksait long man: Song 27:10; Malakai 2:13-16; Rom 8:35-39. Sik: Kamapim Tok Hait 21:4, 5; 22:1, 2; Taitus 1:2; Song 23:1-4. Dai: Aisaia 25:8; Aposel 24:15. Ol bikpela samting: Matyu 6:19-34; Luk 12:16-21; 1 Timoti 6:6-12.
b Bilong save long sampela tok profet olsem, na truim bilong en, yu ken lukim buk (tok Inglis) The Bible—God’s Word or Man’s?, pes 117-161; na Reasoning From the Scriptures, pes 60-62, 225-232, 234-240. Sosaiti Wastaua bilong Nu Yok i wokim dispela tupela buk.
Bai Yu Bekim Olsem Wanem?
◻ Bilong save long lotu i tru, tingting bilong husat i bikpela samting?
◻ Wanem 4-pela samting i kamapim klia olsem Baibel em i Tok Bilong God?
◻ Olsem wanem na God i no orait long olgeta lotu i mekim wok long Baibel?
◻ Wanem 6-pela mak bilong dispela wanpela lotu tasol em i lotu i tru?
[Askim Bilong Stadi]
1, 2. (a) Long tingting bilong planti man wanem samting i makim olsem lotu bilong ol i stret o nogat? (b) Taim yumi skelim ol lotu, yumi mas tingim gut wanem samting?
3. (a) Yumi mas i gat rot bilong kisim wanem samting bambai yumi inap save long tingting bilong God? (b) Sapos yumi bilip olsem Baibel em i tok bilong God, yumi mas tingim wanem ol askim?
4. Olsem wanem long rot bilong kisim Baibel na dispela i makim olsem Baibel tasol em i buk bilong God?
5. Olsem wanem ol stori bilong Baibel i bikpela samting bilong makim olsem Baibel em i tok bilong God?
6. (a) Olsem wanem Baibel i helpim tru ol man long ol hevi bilong nau? (b) Long wanem 3-pela rot Baibel i helpim ol man long karim ol hevi?
7. (a) Lukim sta long han sut i gat planti skripsa long en na kamapim tok bilong Baibel long wanpela samting ol man i gat kain kain tingting long en long nau. (b) Stori long olsem wanem Baibel inap lukautim yumi o helpim yumi taim yumi bel hevi long wanpela samting.
8, 9. (a) Wanem tok profet bilong Baibel i kirapim yu long ting olsem, God i as bilong ol tok bilong Baibel? (b) Ol tok profet bilong Baibel i kamapim klia olsem husat i as bilong en?
10, 11. Jisas i tok wanem na yumi ken save, maski pris o pasto i kolim tok bilong Baibel, dispela i no makim olsem lotu bilong em i stret?
12, 13. (a) Olsem wanem pasin bilong lain bilong lotu inap helpim man long save, dispela lotu i tru o nogat? (b) Sapos yumi poromanim ol man God i sakim, bai God i ting olsem wanem long ol samting yumi mekim bilong lotuim em? (2 Stori 19:2)
14. (a) Wanem as bilong olgeta bilip bilong lotu i tru? (b) Olsem wanem long as bilong tok bilong ol misin long God na tewel?
15. (a) Baibel i helpim yumi olsem wanem long save long dispela wanpela God yumi mas lotuim? (b) Ol man bilong lotu i tru ol i ting olsem wanem long pasin bilong bilip tru long Jehova?
16. Ol man i bihainim lotu i tru, ol i ting olsem wanem long bilip long Krais?
17. Ol man i bihainim lotu i tru, bilong wanem ol i was gut bambai pasin bilong dispela graun i no ken mekim ol i kamap doti? Ol i mekim wanem na ol i klia long pasin bilong dispela graun?
18. (a) Jon 13:35 i kamapim wanem pasin i bikpela mak bilong ol Kristen tru? (b) Olsem wanem yu inap helpim man long save, ol dispela tok long Jon 13:35 i makim wanem lain tru?
19. (a) Lotu i tru i tokaut long wanem samting inap stretim ol hevi? (b) Lain i bihainim lotu i tru ol i mas mekim wanem wok?
20. Yumi mas save long lotu i tru na mekim wanem samting moa?
[Blok long pes 10]
Ol Witnes Bilong Jehova . . .
◆ Baibel i as bilong olgeta bilip bilong ol.
◆ Ol i lotuim Jehova tasol, em i God tru.
◆ Ol i bilip long Jisas na bihainim tok bilong em.
◆ Ol i no save insait long ol wok politik o ol pait bilong dispela graun.
◆ Ol i wok long bihainim pasin sori long olgeta taim.
◆ Ol i tokaut olsem Kingdom bilong God tasol inap stretim ol hevi.
[Piksa long pes 9]
BAIBEL—wanem samting i makim ol tok bilong en em ol tok bilong God na em i bilong olgeta manmeri?