Sapta 22
Husat Ol i Lotu Tru Long God?
1. Long taim bilong ol aposel, husat ol i lotu tru long God?
HUSAT ol i lotu tru long God long taim bilong ol aposel? Yumi save, em ol disaipel bilong Krais Jisas tasol. Ol i bilong wanpela lotu tasol, em lain Kristen. Orait, olsem wanem yumi ken save long ol manmeri i lotu tru long God long nau?
2. Olsem wanem yumi ken save long ol manmeri i lotu tru long God?
2 Long pasin bilong ol yumi ken save long ol. Olsem Jisas i tok: “Olgeta gutpela diwai i save karim gutpela kaikai. Na diwai nogut i save karim kaikai nogut.” (Matyu 7:16, 17) Ol manmeri i lotu tru long God, yu ting ol i mas kamapim wanem ol gutpela “kaikai”? Ol i mas autim wanem tok na mekim wanem wok?
MEKIM NEM BILONG GOD I STAP HOLI
3, 4. (a) Wanem namba wan tok Jisas i kolim insait long dispela beten em i lainim ol man long en? (b) Olsem wanem Jisas i mekim nem bilong God i stap holi?
3 Ol manmeri i lotu tru long God, ol i mas mekim wok i stret wantaim dispela beten Jisas i lainim ol disaipel long en. Namba wan tok Jisas i mekim long dispela beten, em olsem: “Papa bilong mipela, yu stap long heven, nem bilong yu i mas i stap holi.” (Matyu 6:9) Olsem wanem yumi ken mekim nem bilong God “i stap holi”? Olsem wanem Jisas i mekim?
4 Jisas i mekim olsem: Em i tok: “Mi telimautim pinis nem bilong yu long ol man yu bin givim mi long dispela graun.” (Jon 17:6) Jisas i kamapim nem bilong Jehova long ol man. Em i no surik long kamapim dispela nem. Jisas i save, Papa bilong em i laik bai ol manmeri i mas litimapim nem bilong em long olgeta hap bilong graun. Olsem na Jisas i makim gutpela pasin ol manmeri i mas bihainim, em i autim dispela nem long ol man na mekim i stap holi.—Jon 12:28; Aisaia 12:4, 5.
5. (a) Olsem wanem nem bilong God i stap long lain Kristen? (b) Sapos yumi laik kisim laip, yumi mas mekim wanem?
5 Baibel i tok, God i kisim wanpela “lain manmeri bilong em yet,” em ol Kristen tru, na em i putim nem bilong em long ol. (Aposel 15:14) Olsem na lain tru bilong God ol i mas litimapim nem bilong God, na mekim i stap holi, na kamapim long olgeta hap bilong graun. Olgeta manmeri i laik kisim laip ol i mas save long dispela nem. Olsem Baibel i tok: “olgeta man i kolim nem bilong Bikpela [Jehova] na i singaut long em, bai em i kisim bek ol.”—Rom 10:13, 14.
6. (a) Planti misin ol i mekim nem bilong God i stap holi o olsem wanem? (b) I gat wanpela lain ol i save autim nem bilong God long ol man?
6 Orait, long nau husat ol i save mekim nem bilong God i stap holi na kamapim dispela nem long olgeta hap bilong graun? Ol misin i surik long kamapim dispela nem Jehova. Na sampela ol i rausim dispela nem long Baibel bilong ol. Tasol sapos yu toktok wantaim narapela man na kamapim nem bilong God na kolim em Jehova, orait dispela man bai ting yu bilong wanem lain? I gat wanpela lain tasol i bihainim tru pasin bilong Jisas long kamapim nem bilong God. Nambawan bikpela tingting bilong ol, em olsem: Bilong mekim wok bilong God na autim nem bilong em, olsem Jisas i mekim. Olsem na ol i kisim dispela nem Baibel i makim, em “Ol Witnes Bilong Jehova.”—Aisaia 43:10-12.
AUTIM TOK LONG KINGDOM BILONG GOD
7. Jisas i tok wanem na yumi save, kingdom bilong God em i bikpela samting?
7 Long dispela beten Jisas i lainim ol disaipel long en, em i soim yumi Kingdom tu em i bikpela samting. Em i tok: “Kingdom bilong yu i mas i kam.” (Matyu 6:10) Planti taim Jisas i tokaut long dispela Kingdom tasol em i rot bilong stretim ol hevi. Em wantaim ol aposel ol i autim tok bilong dispela Kingdom long “ol ples” na “long haus bilong ol manmeri.” (Luk 8:1; Aposel 5:42; 20:20) Tok bilong kingdom bilong God em nambawan bikpela tok ol i autim na lainim ol man long en.
8. Jisas i tok wanem na yumi save long bikpela tok lain bilong em i mas autim long “las taim”?
8 Orait, lain tru bilong God long nau ol i mas lainim ol man long wanem nambawan bikpela tok? Jisas i tok profet long “las taim” na em i tok: “Bai ol i autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Olsem na nambawan bikpela tok lain bilong God i mas autim long nau em tok bilong Kingdom.
9. Wanem lain ol i autim tok bilong Kingdom long nau?
9 Sapos wanpela man i kam long haus bilong yu na em i tokim yu, kingdom bilong God tasol inap helpim ol man, orait yu ting dispela man em i bilong wanem lain? Lain bilong narapela misin o Ol Witnes Bilong Jehova tasol ol i bin tokim yu long kingdom bilong God? Wan wan man tasol long ol narapela misin i save long dispela Kingdom! Na ol i no save autim tok long dispela gavman bilong God i mas bosim graun. Tasol tok bilong dispela gavman em bikpela tok tru. Profet Danyel i tok, dispela kingdom ‘bai bagarapim na pinisim olgeta narapela gavman na em wanpela bai bosim graun.’—Danyel 2:44.
LITIMAPIM TOK BILONG BAIBEL
10. Jisas i mekim wanem na em i litimapim tok bilong Baibel?
10 Narapela mak bilong ol manmeri i lotu tru long God, em olsem: Oltaim ol i save litimapim tok bilong Baibel. Jisas tu i mekim olsem. Planti taim em i kolim tok bilong Baibel bilong strongim tok bilong em. (Matyu 4:4, 7, 10; 19:4-6) Na Jisas i bihainim ol tok bilong Baibel na long dispela rot tu em i litimapim tok bilong Baibel. Em i no save daunim tok bilong Baibel. Em i krosim ol man i daunim tok bilong Baibel na lainim ol man long tok i kamap long tingting bilong ol yet.—Mak 7:9-13.
11. Tasol planti taim ol misin i mekim wanem long Baibel, em tok bilong God?
11 Olsem wanem long ol misin i tok ol i Kristen? Ol i litimapim tok bilong Baibel? Planti pris pasto long nau ol i no bilipim stori bilong Adam na bilong bikpela tait wara i kamap long taim bilong Noa, na stori bilong Jona na sampela stori moa bilong Baibel. Na ol i tok, God i no bin wokim man, ol man i kamap long ol animal samting. Orait, taim ol i skulim ol manmeri olsem, yu ting ol i kirapim ol long litimapim tok bilong Baibel? Na sampela bikpela man bilong ol misin ol i orait long pasin pamuk. Na sampela taim ol i orait long man o meri i mekim pasin bilong Sodom o man i maritim planti meri. Tasol taim ol i mekim olsem, yu ting ol i kirapim ol manmeri long bihainim tok bilong Baibel? Nogat, a? Ol i no bihainim pasin bilong Jisas na ol aposel.—Matyu 15:18, 19; Rom 1:24-27.
12. (a) Planti manmeri ol i gat Baibel, tasol bilong wanem God i no amamas long lotu bilong ol? (b) Sapos long laik bilong man yet em i mekim rong na misin bilong em i no rausim em, orait yumi mas ting olsem wanem long dispela misin?
12 Sampela manmeri bilong ol lotu ol i gat Baibel, na sampela ol i skul na lainim tok bilong en, tasol yumi lukim pasin bilong ol na yumi save, ol i no bihainim tok bilong Baibel. Baibel i stori long ol kain man olsem, na i tok: “Long maus ol i save tok olsem: ‘Mi save long God.’ Tasol long wokabaut bilong ol ol i save givim baksait long God.” (Taitas 1:16; 2 Timoti 3:5) Sapos misin i no rausim ol manmeri long lain bilong ol, em ol i save pilai laki na spak na mekim ol narapela pasin i no stret, orait, olsem wanem long dispela misin? God i no ken orait long en.—1 Korin 5:11-13.
13. Taim man i save, ol tok bilong misin bilong em i no wankain olsem tok bilong Baibel, orait em i mas tingim gut wanem samting?
13 Sapos yu bin tingim gut ol narapela tok bilong dispela buk, na yu bin skelim gut ol tok bilong Baibel i stap long en, orait yu save pinis long ol bikpela tok bilong Baibel. Tasol olsem wanem sapos ol tok bilong misin bilong yu i no wankain olsem ol dispela tok bilong Baibel? Sapos olsem, orait yu mas tingting gut, bai yu bihainim tok tru bilong Baibel o bai yu sakim na bihainim ol tok i no stret wantaim Baibel? Tru, yu yet yu mas tingim ol samting yu laik mekim; em samting bilong yu. Tasol yu mas tingting gut, nogut yu mekim wanpela samting na bai yu no stap gut long ai bilong God na yu no inap i stap oltaim long paradais long graun.
KLIA LONG PASIN BILONG DISPELA GRAUN
14. (a) Wanem narapela mak bilong ol manmeri i lotu tru long God? (b) Bilong wanem ol manmeri i lotu tru long God ol i mas mekim dispela samting?
14 Jisas i kolim narapela mak bilong ol manmeri i lotu tru long God, Jisas i tok: “Ol i no bilong dispela graun.” (Jon 17:14) Olsem na ol i mas klia olgeta long pasin na wok nogut bilong dispela graun. Krais Jisas i no laik mekim wok politik na kamap wanpela hetman long dispela graun. (Jon 6:15) Baibel i tok, Seten em i bos bilong dispela graun, olsem na i stret yumi mas klia long pasin bilong dispela graun. (Jon 12:31; 2 Korin 4:4) Em bikpela samting tru, long wanem Baibel i tok moa, olsem: “Sapos man i laikim pasin bilong graun, . . . em i kamap birua bilong God.”—Jems 4:4.
15. (a) Ol misin yu save long en, yu ting ol i “no bilong dispela graun”? (b) Yu save long wanpela lain ol i save bihainim dispela tok bilong Krais?
15 Orait, olsem wanem long ol misin i stap long hap bilong yu? Ol i save bihainim dispela tok bilong Baibel? Ol pris pasto wantaim lain bilong ol, yu ting ol i “no bilong dispela graun”? O ol i insait tru long ol wok bilong litimapim ples, na wok politik, na ol kros pait bilong dispela graun? Planti manmeri i save, ol misin i insait long ol dispela wok. Tasol sapos yu skelim ol samting Ol Witnes Bilong Jehova i mekim, bai yu save ol i bihainim pasin bilong Krais na ol disaipel. Ol i klia long pasin bilong dispela graun wantaim wok politik bilong en na ol pasin i no stret na ol kros pait samting.—1 Jon 2:15-17.
NARAPELA I LAIKIM TRU NARAPELA
16. Wanem wanpela bikpela mak bilong ol Kristen tru?
16 Wanpela bikpela mak bilong ol Kristen tru em olsem: Narapela i laikim tru narapela. Jisas i tok: “Sapos yupela i laikim tru ol brata, orait bambai olgeta man i save, yupela i disaipel bilong mi.” (Jon 13:35) Ol misin yu save long en, ol i gat dispela kain pasin? Taim ples bilong ol i pait wantaim narapela ples, ol i save mekim wanem?
17. Ol misin wantaim lain bilong ol, narapela i save laikim tru narapela, o olsem wanem?
17 Yu save long ol samting ol i save mekim. Ol bikpela man bilong graun i tok na lain bilong ol dispela misin i kirap i go insait long pait na kilim i dai ol wanlotu bilong ol i stap long narapela ples. Katolik i kilim i dai Katolik, na Talatala i kilim i dai Talatala, na Moslem i kilim i dai Moslem. Taim ol i mekim olsem, yu ting ol i bihainim tok bilong Baibel na pasin bilong God?—1 Jon 3:10-12.
18. Olsem wanem long Ol Witnes Bilong Jehova, narapela i save laikim tru narapela?
18 Tasol olsem wanem long Ol Witnes Bilong Jehova? Ol i no bihainim dispela pasin bilong ol misin bilong graun. Ol i no save insait long ol pait na kilim i dai ol wanlotu bilong ol. Ol i no giaman na tok “Mi laikim tumas God,” na ol i bel nogut long brata bilong ol em i bilong narapela lain o skin. Nogat. (1 Jon 4:20, 21) Na ol i kamapim pasin sori bilong ol long ol narapela rot tu. Ol i mekim olsem wanem? Ol i mekim gutpela pasin long ol narapela man na ol i wok strong long helpim ol long kisim save long God.—Galesia 6:10.
WANPELA LAIN TASOL OL I LOTU TRU
19. Bilong wanem i stret yumi ken tok, i gat wanpela lain tasol ol i lotu tru long God?
19 Yumi save i mas i gat wanpela lain tasol ol i lotu tru long God. Long wanem God tru em “i no save paulim nabaut ol samting. Nogat. Em i save mekim yumi stap wanbel.” (1 Korin 14:33) Na Baibel i tok i gat “wanpela bilip tasol.” (Efesas 4:5) Orait, husat ol i lain bilong lotu tru long God long nau?
20. (a) Olsem na dispela buk i makim wanem lain ol i lotu tru long God? (b) Yu ting olsem tu? (c) Yu ken mekim wanem na bai yu inap save gut long Ol Witnes Bilong Jehova?
20 Mipela i no pret long tokaut olsem: Em Ol Witnes Bilong Jehova tasol. Mipela laik bai yu kam bung wantaim Ol Witnes long Haus Kingdom na bai yu tu yu ken save, dispela lain tasol ol i lotu tru long God. Gutpela sapos yu mekim olsem, long wanem Baibel i tok ol manmeri i lotu tru long God bai ol i stap bel isi long nau, na bihain bai ol inap i stap oltaim long paradais long graun. (Diuteronomi 30:19, 20) Mipela laik tru bai yu kam bung wantaim mipela na skelim dispela samting. Gutpela sapos nau yu mekim, a?
[Piksa long pes 185]
Sapos yu toktok wantaim wanpela man na tokim em long Jehova na kingdom bilong em, dispela man bai ting yu bilong wanem lotu?
[Ol Piksa long pes 186]
Sapos man i no bihainim tok bilong God long Baibel, yu ting em i daun long dispela tok?
[Piksa long pes 188, 189]
Jisas i no laik kamap wanpela hetman bilong dispela graun
[Piksa long pes 190]
Mipela laik tru bai yu kam long ol miting bilong Ol Witnes Bilong Jehova