Stadi 10
Rot Bilong Painim Lotu i Tru
Sapos yu laik stap pren bilong God, yu mas bihainim lotu God i orait long en. Jisas i tok “olgeta man i laik lotu tru” ol i mas lotu long God long “pasin i tru.” ( Jon 4:23, 24) I gat wanpela rot tasol i stret bilong lotuim God. (Efesus 4:4-6) Lotu i tru i save bringim man long laip oltaim, na lotu giaman i save bringim man long ples bilong lus.—Matyu 7:13, 14.
Yu inap luksave long lotu i tru taim yu lukim pasin bilong ol man i stap long dispela lotu. Jehova em i gutpela man, olsem na ol man i lotu tru long em ol i mas i stap gutpela man. Olsem wanpela gutpela diwai muli i save karim ol gutpela muli, lotu i tru i save kamapim ol gutpela manmeri.—Matyu 7:15-20.
Ol pren bilong Jehova i save tingim tru ol tok bilong Baibel. Ol i save olsem God i givim Baibel long yumi. Ol i larim ol tok bilong Baibel i bosim wokabaut bilong ol, na stretim hevi bilong ol, na helpim ol long kisim save long God. (2 Timoti 3:16) Ol i wok strong long bihainim ol tok ol i autim long ol man.
Ol pren bilong Jehova i save laikim tru ol narapela. Jisas i kamapim klia olsem em i laikim tru ol man taim em i skulim ol long God na em i oraitim sik bilong ol man. Ol man i save mekim lotu i tru ol tu i save laikim ol narapela. Olsem Jisas, ol i save tingim ol rabisman na ol man bilong narapela ples na ol i no ting olsem ol i samting nating. Jisas i tok ol man bai i save long ol disaipel bilong em taim ol i lukim gutpela pasin bilong ol olsem narapela i save laikim tru narapela.—Jon 13:35.
Ol pren bilong God i save litimapim nem bilong God, em Jehova. Sapos wanpela man i no laik kolim nem bilong yu, yu ting dispela man inap stap pren tru bilong yu? Nogat, a? Taim yumi gat wanpela pren, yumi save kolim nem bilong em na yumi save kamapim ol gutpela stori bilong dispela pren long ol narapela. Olsem na ol man i laik stap pren bilong God ol i mas kolim nem bilong em na tokim ol narapela long em. Jehova i laik yumi mas mekim olsem.—Matyu 6:9; Rom 10:13, 14.
Olsem Jisas, ol pren bilong God i save skulim ol man long Kingdom bilong God. Kingdom bilong God em i wanpela gavman bilong heven na em bai mekim dispela graun i kamap Paradais. Ol pren bilong God i save autim gutnius bilong dispela Kingdom bilong God long ol narapela.—Matyu 24:14.
Ol Witnes Bilong Jehova i wok strong long i stap pren bilong God. Ol i save tingim tru ol tok bilong Baibel na narapela i save laikim narapela. Na tu, ol i save kolim nem bilong God na litimapim nem bilong em, na skulim ol narapela long Kingdom bilong God. Ol Witnes Bilong Jehova i save bihainim lotu i tru long graun long nau.