Stadi 11
Sakim Ol Lotu Giaman!
Satan na ol spirit nogut bilong em i no laik bai yu mekim wok bilong God. Sapos inap ol i laik pulim olgeta manmeri na bai ol i lusim God. Ol i laik mekim dispela samting olsem wanem? Wanpela rot bilong ol long mekim olsem, em long rot bilong ol lotu giaman. (2 Korin 11:13-15) Sapos wanpela lotu i no skulim ol man long tok i tru i stap long Baibel, orait em i lotu giaman. Lotu giaman i olsem mani giaman—dispela mani i luk olsem mani tru, tasol em i no gat strong. Em inap givim planti hevi long yu.
Ol bilip giaman i no inap amamasim Jehova, em God bilong tok tru. Taim Jisas i stap long graun, i gat wanpela lain lotu ol i laik kilim em i dai. Ol i ting pasin bilong ol long mekim lotu i stret. Ol i tok: “Mipela i gat wanpela Papa tasol, em God.” Yu ting Jisas i wanbel long tok bilong ol? Nogat! Em i tokim ol: “Yupela i pikinini bilong papa bilong yupela, em Satan.” ( Jon 8:41, 44) Long nau planti manmeri i ting ol i lotuim God, tasol ol i lotuim Satan na ol spirit nogut bilong em!—1 Korin 10:20.
Olsem wanpela diwai nogut i save karim ol pikinini nogut, lotu giaman i save kamapim ol manmeri i mekim ol pasin nogut. Ol hevi i pulap long graun, long wanem, ol manmeri i mekim ol pasin nogut. I gat pasin pamuk, pait, stil, daunim narapela man, kilim i dai man, na reipim ol meri. Planti man i save mekim ol dispela pasin nogut ol i gat lotu, tasol lotu bilong ol i no save kirapim ol long bihainim gutpela pasin. Sapos ol i no lusim ol dispela pasin nogut, ol i no inap i stap pren bilong God.—Matyu 7:17, 18.
Ol lotu giaman i lainim ol manmeri long beten long ol imis. God i tok ol man i no ken beten long ol imis. I stret God i tok olsem. Olsem wanem? Yu bai amamas sapos wanpela man i no save toktok liklik long yu tasol oltaim em i save toktok long piksa bilong yu? Yu ting dispela man inap i stap pren tru bilong yu? Nogat, a? Jehova i laik ol man i mas toktok long em, na i no long wanpela imis o piksa, em samting i no gat laip.—Kisim Bek 20:4, 5.
Lotu giaman i save lainim ol man olsem i stret long kilim ol narapela i dai long taim bilong pait. Jisas i tok ol pren bilong God ol i save laikim ol narapela. Yumi no inap kilim i dai ol man yumi laikim. ( Jon 13:35) Na tu, em i no stret long yumi kilim i dai ol man nogut. Taim ol birua bilong Jisas i kam bilong holim Jisas, em i no larim ol disaipel bilong em i pait bilong lukautim em.—Matyu 26:51, 52.
Ol lotu giaman i lainim ol man olsem ol man nogut bai kisim pen long bikpaia. Tasol Baibel i lainim ol man olsem pe bilong sin em dai. (Rom 6:23) Jehova em God bilong pasin sori. Yu ting wanpela God i gat pasin sori em inap givim pen oltaim long ol manmeri? Nogat, a? Long Paradais, bai i gat wanpela lotu tasol, em dispela lotu Jehova i orait long en. (KTH 15:4) Olgeta lotu em giaman bilong Satan i as bilong en ol bai pinis olgeta.