Kingdom News No. 37

Toksave i Go Long Olgeta Man Bilong Graun

Pinis Bilong Lotu Giaman i Kam Klostu Tru!

▪ Lotu giaman em i wanem samting?

▪ Em bai pinis olsem wanem?

▪ Dispela bai mekim wanem long yu?

Lotu Giaman Em i Wanem Samting?

Olsem wanem? Bel bilong yu i save bagarap long ol pasin nogut ol man i save mekim long nem bilong lotu? Taim ol man husat i tok ol i mekim wok bilong God, tasol ol i insait long ol woa, pasin teroris, na korapsen, dispela i save bagarapim tingting bilong yu long stretpela pasin? Bilong wanem i luk olsem lotu i as bilong planti hevi?

I no asua bilong olgeta lotu, em asua bilong lotu giaman tasol. Wanpela man bilong lotu em planti man i save rispektim, Jisas Krais, em i bin tok lotu giaman i save kamapim ol pasin nogut, olsem “diwai nogut i save karim kaikai nogut.” (Matyu 7:​15-17) Lotu giaman i save karim wanem kaikai nogut?

Lotu Giaman i Save . . .

◼ INSAIT LONG OL WOA NA WOK POLITIK: Nius Asiaweek i tok: “Long Esia na long planti narapela hap, ol hetman bilong lotu i mekim wok long tingting ol man i holim long samting bilong lotu bilong kontrolim ol man na kisim ol samting ol i laikim.” Dispela i mekim na nius i tok lukaut olsem: “Dispela graun olgeta i laik kamap longlong.” Wanpela bikman bilong lotu long Amerika i bin tok: “Bilong pasim ol teroris long kilim i dai ol man, yumi mas kilim i dai ol teroris pastaim.” Wanem tingting bilong em bilong stretim dispela hevi? “Long nem bilong God yumi mas kilim ol i dai.” Tasol Baibel i tok: “Sapos wanpela man i tok, ‘Mi laikim tru God,’ tasol em i no laikim wanpela bilong ol arapela manmeri bilong God, orait dispela man em i man bilong giaman.” (1 Jon 4:20) Jisas i bin tok: “Yupela i mas laikim ol birua bilong yupela.” (Matyu 5:44) Yu ting hamas lotu i gat ol memba bilong ol i save insait long ol woa?

◼ SKULIM OL MAN LONG OL BILIP GIAMAN: Klostu olgeta lotu i save skulim ol man olsem taim man i dai i gat wanpela spirit samting yumi no inap lukim na dispela samting i no save dai. Planti lotu i save mekim wok long dispela bilip bilong pulim mani bilong ol memba bilong ol bilong mekim ol prea long helpim spirit bilong man i dai pinis. Tasol Baibel i mekim narapela tok long dispela, olsem: “Ol [man] i save wanpela samting bai i kamap long ol. Ol i save bai ol i dai. Tasol ol man i dai pinis, ol i no inap save long wanpela samting.” (Saveman 9:⁠5) Jisas i bin skulim ol man olsem man i dai pinis em bai kirap bek​—⁠tasol sapos yumi gat wanpela spirit i no save dai, orait yumi no gat wok long kirap bek. (Jon 11:​11-25) Olsem wanem? Lotu bilong yu i save tok olsem ol man i gat wanpela spirit samting i no save dai?

◼ ORAIT LONG PASIN PAMUK: Long planti kantri ol misin i save makim ol man i slip wantaim man na ol meri i slip wantaim meri long kamap pris pasto na ol i kirapim ol gavman long orait long pasin bilong man i maritim man na meri i maritim meri. Na ol misin, em ol i tambuim pasin pamuk, ol i orait long larim ol hetman husat i bin mekim pasin sem long ol pikinini i stap yet insait long misin. Tasol Baibel i tok wanem long dispela samting? Em i tokaut klia olsem: “Nogut yupela i giamanim bel bilong yupela yet. Ol man i save mekim pasin pamuk, na ol man i save lotu long ol giaman god, na ol man i trabel long ol maritmeri, na ol man i save mekim ol kain kain pasin i gat sem wantaim ol arapela man . . . bai i no inap i go insait long kingdom bilong God.” (1 Korin 6:​9, 10) Olsem wanem? Yu save long sampela lotu i save orait long pasin pamuk?

Wanem samting bai painim ol lotu i save karim ol kaikai nogut? Jisas i tok lukaut olsem: “Olgeta diwai i no save karim gutpela kaikai, em ol i save katim na tromoi i go long paia.” (Matyu 7:19) Yes, God bai bagarapim ol lotu giaman! Tasol dispela samting bai kamap olsem wanem? Em bai kamap long wanem taim? Wanpela driman olsem tok profet i stap long Baibel long Buk Kamapim Tok Hait, sapta 17 na 18, i bekim dispela tupela askim.

Lotu Giaman Bai Pinis Olsem Wanem?

Piksaim dispela samting long tingting bilong yu. Wanpela pamukmeri i sindaun antap long wanpela wel animal nogut tru. Wel animal i gat 7-pela het na 10-pela kom. (KTH 17:​1-4) Dispela pamukmeri i makim wanem samting? Em i gat strong bilong bosim “olgeta king bilong graun.” Em i werim retpela laplap, yusim paura bilong kamapim smok i gat gutpela smel, na em i gat planti mani samting. Na tu, long rot bilong wokim ol kain kain posin em i “giamanim ol manmeri bilong olgeta kantri.” (KTH 17:18; 18:​12, 13, 23) Baibel i helpim yumi long save olsem dispela pamukmeri em i wanpela oganaisesen bilong lotu i stap long olgeta hap. Em i no makim wanpela lotu tasol, nogat, em i makim olgeta lotu i save karim ol kaikai nogut.

Wel animal em pamukmeri i sindaun antap long en i makim ol gavman bilong dispela graun.a (KTH 17:​10-13) Lotu giaman i sindaun antap long dispela wel animal, olsem ol gavman, na i laik bosim ol disisen ol i mekim na kontrolim samting ol i mekim.

Tasol i no longtaim na narapela kain samting bai kamap. “Ol dispela 10-pela kom yu bin lukim, ol dispela kom wantaim dispela wel animal ol bai i birua long pamukmeri. Ol bai i bagarapim em tru na rausim olgeta klos samting bilong en. Na ol bai i kaikai mit bilong bodi bilong en, na kukim em olgeta long paia.” (KTH 17:16) Ol man bai kirap nogut taim wantu ol gavman bilong graun i kirap biruaim lotu giaman na bagarapim em olgeta! Wanem samting bai kirapim ol long mekim olsem? Baibel i bekim dispela askim long Buk Kamapim Tok Hait olsem: “God yet i givim tingting long ol dispela king, bai ol i ken mekim ol dispela samting i kamap, em ol samting bipo God i tok pinis long ol i mas kamap.” (KTH 17:17) Yes, God bai kotim lotu giaman long ol samting nogut em i bin mekim long nem bilong God. Long stretpela pasin bilong skelim kot, God bai yusim ol gavman bilong bagarapim lotu giaman.

Yu mas mekim wanem sapos yu no laik poroman wantaim lotu giaman long taim em i kisim pe nogut? Mausman bilong God i tok: “Yupela ol manmeri bilong mi, yupela i mas lusim dispela ples na i kam ausait.” (KTH 18:⁠4) Tru tumas, nau em i taim bilong ranawe lusim lotu giaman! Tasol bai yu ranawe i go we? No ken ranawe i go long ol man i ting i no gat God i stap, bikos i no gat gutpela samting bai painim ol bihain. (2 Tesalonaika 1:​6-9) I gat wanpela ples hait tasol, em lotu i tru. Olsem wanem yumi ken luksave long lotu i tru?

Ol Samting i Makim Lotu i Tru

Lotu i tru i mas karim wanem gutpela kaikai?​—⁠Matyu 7:⁠17.

Lotu i Tru i Save . . .

◼ KAMAPIM PASIN LAIKIM: Ol manmeri i lotu tru long God ol i “no bilong dispela graun,” na kala bilong skin o pasin bilong ples i no mekim na ol i bruk bruk, nogat, ol i save “laikim tru ol arapela man bilong lain bilong [ol].” (Jon 13:35; 17:16; Aposel 10:​34, 35) Ol i no kilim i dai ol wanbilip, nogat, ol i laik givim laip bilong ol yet bilong helpim ol wanbilip.​—⁠1 Jon 3:⁠16.

◼ BILIPIM TOK BILONG GOD: Ol i no skulim ol man long bihainim ‘ol pasin tumbuna’ na “lo bilong ol man” na tok olsem em i tok bilong God, nogat. As bilong ol bilip bilong lotu i tru em ol tok i stap long Baibel. (Matyu 15:​6-9) Bilong wanem i olsem? Long wanem, “spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi.”​—⁠2 Timoti 3:⁠16.

◼ STRONGIM OL FAMILI NA BIHAINIM STRETPELA PASIN: Lotu i tru i save skulim ol man marit long ‘laikim tru meri bilong ol olsem ol i save laikim bodi bilong ol yet,’ na i helpim ol meri marit long ‘stap aninit long man bilong ol,’ na i skulim ol pikinini long ‘bihainim tok bilong papamama bilong ol.’ (Efesus 5:​28, 33; 6:⁠1) Na tu, ol man i holim sampela wok insait long lotu i mas stap gutpela piksa tru long bihainim stretpela pasin.​—⁠1 Timoti 3:​1-10.

I gat wanpela lotu i save winim ol dispela mak? Wanpela buk (Holocaust Politics) ol i wokim long 2001, i tok: “Sapos planti manmeri moa i bihainim ol tok ol Witnes Bilong Jehova i save autim na bihainim, orait pasin nogut Hitler i bin mekim i no ken kamap na pasin bilong bagarapim na pinisim wanpela lain olgeta i no inap kamap moa.”

Tru tumas, long 235 kantri, ol Witnes Bilong Jehova i save autim ol stretpela lo bilong Baibel, na i no dispela samting tasol, ol i save bihainim tu ol dispela lo. Mipela i laik kirapim yu long askim ol Witnes Bilong Jehova long helpim yu long lainim ol samting God i laik bai yu mas mekim na long dispela rot yu ken lotuim em long pasin em i laikim. Nau em i taim bilong mekim olsem. No ken westim taim. Pinis bilong lotu giaman i kam klostu tru!​—⁠Sefanaia 2:​2, 3.

Sapos yu laik kisim sampela save moa long ol tok bilong Baibel ol Witnes Bilong Jehova i save autim, orait raitim pas long ol long atres i stap daunbilo.

□ Salim wanpela buklet Was i Stap! long mi.

□ Plis kam lukim mi, mi laik stadi long Baibel, no gat pe.

[Futnot]

[Rait long pes 3]

Lotu giaman i gat strong bilong bosim “olgeta king bilong graun”

[Rait long pes 3]

‘Yupela ol manmeri bilong mi, lusim dispela ples na kam ausait’