Kot i Pasim Tok i Helpim Sikman

NAMBAWAN bikpela Man bilong heven na graun em i save helpim pasin bilong larim ol man i mekim wok long save ol i bin kisim na bai ol yet i ken makim ol samting ol i laik mekim. Em i Man bilong wokim yumi. Em i save olgeta long ol samting ol man i mas kisim, na em i save skulim ol, na givim tok lukaut long ol, na stiaim ol na bai ol i ken save wanem rot i stret long ol i bihainim. Tasol em i no sakim pasin em yet i bin putim long ol man na meri, olsem ol i stap fri long makim wanem rot ol i laik bihainim. Profet bilong em, Moses, i kamapim wankain tingting olsem bilong God taim em i tok: “I gat rot bilong i stap gut na rot bilong i dai. Long wanpela rot God bai i mekim gut long yupela, na long narapela rot bai yupela i painim bagarap. Orait nau yupela i mas makim wanem rot yupela i laik bihainim. . . . Tasol mi laikim yupela i mas bihainim rot bilong i stap gut.”​—⁠Lo 30:⁠19.

Dispela lo i bosim tu ol samting bilong marasin na ol kain samting olsem. Dispela tingting olsem dokta i mas toksave long sikman na kisim tok orait long em pastaim, isi isi ol man long Japan na sampela kantri moa ol i wok long orait long dispela kain tingting, tasol bipo i no planti man i gat dispela kain tingting. Dokta Michitaro Nakamura i stori long dispela pasin olsem dokta i mas toksave long sikman na kisim tok orait long em pastaim, na dispela pasin i olsem: ‘Dokta i save stori gut long sikman long sik bilong em na ol inap oraitim dispela sik o nogat, na ol samting dokta i mas mekim bilong stretim sik, na dispela marasin samting inap nogutim em o nogat, na dokta i mas save, i stret long sikman yet i ken skelim wanem kain marasin samting em i laik kisim.’​—⁠Japan Medical Journal.

Inap planti yia ol dokta long Japan i kamapim kain kain as bilong sakim dispela kain pasin bilong helpim ol sikman, na ol kot i helpim dispela pasin bilong ol dokta. Olsem na em i bikpela samting tru taim Nambawan Jas Takeo Inaba bilong Nambawan Kot Bilong Tokyo, long Februeri 9, 1998, i tokaut olsem i stret dokta i mas toksave long sikman na kisim tok orait pastaim. Jas i pasim wanem tok long kot? Na wanem samting i bin kamap na ol i mekim dispela kot?

Long Julai 1992, Misae Takeda, em wanpela Witnes Bilong Jehova i gat 63 krismas, em i go long haus sik bilong Yunivesiti Bilong Tokyo (Institute of Medical Science Hospital). Ol dokta i bin glasim em na tok em i gat wanpela buk long lewa i gat sik kensa long en, na dokta i mas katim em. Em i gat strongpela laik long bihainim lo bilong Baibel olsem yumi no ken mekim wok nogut long blut, olsem na em i tokaut klia long ol dokta long laik bilong em long kisim ol samting i no gat blut long en. (Stat 9:​3, 4; Aposel 15:29) Em i wokim wanpela pepa i tokaut olsem ol dokta na haus sik i no gat asua long ol samting inap kamap taim ol i katim em na ol i no mekim wok long blut. Ol i tok ol bai bihainim laik bilong em.

Tasol taim ol i katim em pinis na tingting bilong em i dai yet, ol i givim blut long em, maski em i bin tokaut klia olsem em i no laik kisim blut. Ol i laik haitim dispela samting, tasol bihain em i kamap ples klia​—⁠ol i ting wanpela wokman bilong haus sik i bin kamapim dispela samting long wanpela niusman. Taim dispela gutpela meri Kristen i harim olsem ol i bin givim blut long em, bel bilong em i bagarap stret. Em i bin bilip long ol dokta, na em i ting ol bai bihainim tok bilong ol olsem ol i no ken givim blut long em, na em i ting ol bai daun long ol bilip bilong em. Em i kisim bikpela bel hevi stret long dispela pasin bilong ol long brukim tok promis bilong ol, na em i tingting olsem nogut bihain sampela moa i kisim wankain hevi long ol dokta, olsem na em i kisim dispela hevi bilong em i go long kot.

Ol Stretpela Pasin Ol Man i Mas Bihainim

Tripela jas bilong Distrik Kot Bilong Tokyo i harim dispela kot na ol i tokaut olsem ol dokta i winim kot, olsem na ol i sakim lo olsem dokta i mas toksave long sikman na kisim tok orait long em pastaim. Long dispela tok em kot i bin pasim long Mas 12, 1997, kot i tok, sapos ol i wokim kontrak olsem ol i mas givim ol samting long sikman i no gat blut long en, dispela i no stret. Ol i tok, sapos wanpela dokta i wokim kontrak wantaim sikman olsem dokta i no ken givim blut long em maski em i laik bagarap, dispela pasin i kalapim lo bilong kojo ryozoku,a olsem lo ol man i save bihainim. Kot i tok, nambawan bikpela wok bilong dokta, em i bilong lukautim laip bilong man, na em i ken mekim long wanem rot em i ting i gutpela, olsem na kain kontrak olsem i no stret, maski sikman i gat wanem wanem bilip bilong lotu. Kot i pasim tok olsem tingting bilong dokta i mas i stap olsem nambawan bikpela samting, na ol tok sikman i bin givim long dokta paslain long ol i katim em, dispela i nambatu tasol.

Na tu, ol jas i tok, long dispela as yet, maski dokta i mas tokim sikman long ol samting em bai mekim, na ol samting dispela bai mekim long skin bilong sikman, na ol samting nogut inap kamap taim dokta i katim em, dokta ‘i no gat wok long tokim sikman olsem em i tingting long givim blut long em o nogat.’ Tok bilong kot i olsem: ‘Yumi no ken tok em i pasin bilong brukim lo o i no stret long ol dokta i bin kisim gut tok bilong sikmeri olsem em i no laik kisim blut, maski wanem samting i kamap, na ol dispela dokta i mekim olsem ol bai bihainim laik bilong em na dispela i mekim na em i orait long ol i katim em.’ Dispela tingting i olsem: Sapos ol dokta i bin tokaut long meri long samting ol i tingting long mekim, em bai no ken larim ol i katim em na em bai lusim haus sik.

Ol man i helpim dispela tok olsem dokta i mas toksave long sikman na kisim tok orait pastaim, ol i kirap nogut na tingting planti long dispela tok bilong kot. Profesa Takao Yamada, em wanpela bikpela saveman bilong ol lo bilong kantri, em i toktok long dispela tok ol i bin pasim long kot bilong Takeda na ol samting dispela bai mekim long Japan long dispela lo olsem dokta i mas toksave long sikman na kisim tok orait long em pastaim, na dispela profesa i raitim tok olsem: ‘Sapos ol i larim dispela tok bilong kot i stap olsem, orait pasin bilong sakim blut na dispela lo i tok olsem dokta i mas toksave long sikman na kisim tok orait long em pastaim, isi isi em bai i kamap olsem liklik lait bilong kandel em win i mekim na em i laik i dai.’ (Nius bilong ol loya, Hogaku Kyoshitsu) Em i tok strong olsem pasin bilong subim man long kisim blut em i samting nogut, olsem ‘man i brukim tok promis em narapela i bin bilip long en, na i olsem wanpela man i kam isi tasol long baksait na i kam pait long yumi.’ Profesa Yamada i tok moa olsem dispela pasin bilong brukim tok promis em man i bin bilip long en, ‘i no stret liklik long larim dispela pasin i kamap.’

Misae i gat pasin daun na i hatwok long em long sanap long kot long ai bilong ol man. Tasol em i save em i gat rot long helpim wok bilong sambai long nem bilong Jehova na ol stretpela lo olsem blut i holi, olsem na em i strong long helpim dispela wok. Em i raitim pas long loya bilong em olsem: ‘Mi olsem das tasol. Olsem na mi tingting, olsem wanem Jehova i mekim wok long mi, mi wanpela meri i no gat save liklik long mekim dispela wok? Tasol taim mi wok strong long mekim ol samting olsem Jehova i tok long en​—⁠em dispela Man inap mekim na ol ston yet i singaut​—⁠em bai givim strong long mi.’ (Matyu 10:18; Luk 19:40) Taim em i sanap long kot, nek bilong em i guria na em i tokaut long bikpela bel hevi em i kisim taim ol dokta i brukim tok promis ol i bin mekim long em. Em i tok: ‘Mi pilim olsem ol i bin reipim mi.’ Taim em i mekim tok bilong em, aiwara i kamap long ai bilong planti man insait long haus kot.

Samting i Strongim Bel Bilong Em

Tok bilong Distrik Kot i mekim na kwiktaim ol i bringim dispela tok i go long Nambawan Kot. Tok bilong kot bilong apil i kirap long Julai 1997, na Misae i sindaun long wanpela wilsia na em i kam long kot. Sik kensa i kamap gen na strong bilong em i wok long pinis. Tok bilong nambawan jas i strongim tru bel bilong em, em jas i kolim klia ol tok em kot bai kamapim. Em i tokaut klia olsem em i no wanbel long tok em narapela kot i bin pasim​—⁠olsem i stret dokta i ken sakim laik bilong sikman, na dokta i mekim olsem em bai bihainim laik bilong sikman, tasol long bel em i tingting long mekim narapela samting. Nambawan jas i tok em i no ken helpim lo bilong “Shirashimu bekarazu, yorashimu beshi,”b insait bilong dispela tok i olsem, ‘Larim ol i stap olsem man i no gat save na ol i mas wetim ol dokta i helpim ol.’ Bihain Misae i tok: ‘Mi amamas tru long harim tok bilong jas, em i narapela kain tru long tok em Distrik Kot i bin pasim.’ Na em i tok: ‘Mi bin beten long Jehova long dispela samting i mas kamap.’

Long mun bihain long dispela, Misae i dai, na famili bilong em wantaim ol lain olsem dokta na nes samting bilong narapela haus sik em ol i bin daun long bilip bilong em, ol i stap wantaim em. Pikinini man bilong em, Masami, na ol narapela long famili bilong em ol i bel hevi tru long em i bin i dai, tasol ol i strong long kot i mas stretim dispela samting, olsem Misae i bin laikim.

Tok Em Kot i Pasim

Orait, long Februeri 9, 1998, 3-pela jas bilong Nambawan Kot i tokaut long tok ol i bin pasim, na dispela i senisim tok em kot bilong pastaim i bin pasim. Planti niusman, na saveman, na ol narapela em ol i bin laik long harim olgeta tok bilong dispela kot, ol i stap long dispela liklik rum kot. Ol bikpela nius na televisen ol i kamapim tok em kot i pasim. Sampela het-tok bilong ol nius i tok: “Kot: Ol Sikman Inap Sakim Samting Dokta i Laik Mekim”; “Nambawan Kot: Ol i Givim Blut na Dispela i Kalapim Lo Bilong Ol Samting i Stret Long Man i Ken Mekim”; “Dokta i Bin Subim Sikman Long Kisim Blut, Em i Lus Long Kot”; na “Ol i Mas Baim Wanpela Witnes Bilong Jehova Ol i Bin Givim Blut Long Em.”

Ol ripot bilong ol nius na televisen long dispela tok em kot i bin pasim, em i stret na i helpim tru ol Witnes. Wanpela nius (The Daily Yomiuri) i tok: “Jas Takeo Inaba i tok, i no stret long ol dokta i mekim ol samting em sikman i tok pinis olsem em i no laikim.” Na dispela nius i tokaut klia olsem: “Ol dokta i bin givim [blut] long em, ol i pasim rot bilong em long makim wanem samting em i laik bai dokta i ken mekim.”

Narapela nius (Asahi Shimbun) i tok, tru i no gat wanpela samting i kamapim klia tru olsem dokta na sikman i bin wokim wanpela kontrak i tok olsem ol i wanbel long ol i no ken mekim wok long blut, maski sikman i laik bagarap, tasol ol jas i no wanbel long tok bilong narapela kot i bin tok olsem dispela kontrak i no stret long lo: “Sapos i gat wanpela kontrak tru namel long dokta na sikman olsem dokta i no ken givim blut long em, maski wanem samting i kamap, dispela kot i no ting dispela kontrak i laik daunim pasin bilong bihainim lo na em i no stret.” Na tu, dispela nius i kamapim tingting bilong ol jas olsem ‘wanpela taim bihain, dai i mas painim olgeta man, na ol samting i bringim em i go klostu long dispela taim, em samting bilong ol wan wan man yet i ken tingim.’

Tasol ol Witnes Bilong Jehova i bin tingim na skelim gut dispela samting na ol i bilip tru olsem ol i bin makim gutpela rot tru bilong bihainim long i stap bilong ol. Sampela samting i olsem: Ol i sakim pasin bilong kisim blut, em ol man i save pinis long sampela sik nogut ol man inap kisim long en, na ol i orait long kisim ol marasin samting i no gat blut long en na planti kantri i save mekim wok long ol dispela kain samting na ol i stret wantaim lo bilong God. (Aposel 21:25) Wanpela profesa bilong lo bilong kantri long Japan em planti man i save long em, em i tok: “Taim man i sakim [blut], i no olsem em i makim ‘rot bilong i dai,’ nogat; em i makim rot bilong i stap laip.”

Dispela tok em Nambawan Kot i pasim, em i mas kirapim tingting bilong ol dokta olsem ol samting ol i ting i stret ol i ken mekim, i no planti tumas olsem sampela i bin ting. Na dispela tok i mas mekim na bai planti haus sik moa i ken makim ol samting i stret o i no stret ol dokta i ken mekim. Tru, dispela tok em kot i pasim, planti man i orait long en, na dispela i strongim bel bilong ol sikman em pastaim ol i no inap makim ol samting ol i laik bai dokta i mekim bilong helpim ol, tasol i no olgeta haus sik na dokta i orait long en. Haus sik em gavman i bosim na 3-pela dokta hia ol i bringim dispela tok i go long Sprim Kot. Olsem na yumi mas wet na lukim olsem nambawan bikpela kot tu long Japan bai helpim ol sikman na bai ol inap mekim ol samting i stret ol i ken mekim, olsem King bilong heven na graun i larim ol man i mekim, o nogat.

[Ol Futnot]