“Yupela i Bihainim Stret Pasin God i Laik Yumi Bihainim”
TAIM ol Kristen “i tingting long Bikpela” na wok gut wantaim ol gavman samting, ol man inap litimapim nem bilong ol olsem ol i lain bilong bihainim tok. (1 Pita 2:13-15) I no longtaim i go pinis, ol Witnes Bilong Jehova long Saut Afrika i pilim dispela samting taim ol i mekim kibung distrik bilong ol long wanpela haus bung bilong wanpela skul koles.
Long namba wan de bilong kibung, ol lain sekyuriti bilong koles i redi bilong was long ol man i bikhet na mekim nabaut olsem ol i save mekim long ol bung bilong ol narapela lain. Ol i no save long pasin bilong ol Witnes Bilong Jehova, tasol nau bai ol i kirap nogut long gutpela pasin bilong ol!
Olsem olgeta taim ol i save mekim, long ol get ol sekyuriti i sekim olgeta ka i go insait na kam ausait. Ol i kirap nogut taim ol brata sista i mekim gutpela pasin pren, na pasin isi, na daun long ol, maski ol sekyuriti i pulim sampela hap taim bilong ol. I no gat wanpela i sakim tok, tok pait na mekim tok nogut olsem ol narapela i save mekim. Wanpela sekyuriti i tok, “Yupela i no olsem ol narapela lain i save kam, mipela olgeta inap lukim olsem yupela i gat pasin daun, na pasin isi.”
Taim nambawan bilong ol sekyuriti i save long gutpela pasin bilong ol Witnes Bilong Jehova, em i tokim ol sekyuriti ol i no gat wok long sekim ka bilong ol, “long wanem, yupela i gat gutpela pasin.” Long dispela as, taim ol ka i gat mak “JW” ol i go insait, ol sekyuriti i no sekim ol.
Long pinis bilong kibung, nambawan bilong ol sekyuriti i tok em bai amamas long lukim ol Witnes i kam gen. Em i tok, “Mipela i no bin lukim wanpela lain i save bihainim ol gutpela pasin olsem yupela. Yupela i bihainim pasin God i laik yumi mas bihainim.” Kain gutpela tok olsem i save strongim ol trupela Kristen long “wokabaut stret” bambai ol manmeri ‘i lukim gutpela pasin bilong ol na litimapim nem bilong God.’—1 Pita 2:12.