Ripot Long Wok Bilong Kingdom
Man i Wok Long Painim God Tru Em i Kisim Gutpela Samting
INAP wan tausen yia samting paslain long Krais, lotu giaman i bin pulap long kingdom bilong 2-pela lain bilong Juda. Maski pasin bilong lotuim god giaman i bikpela tru long dispela taim, i gat wanpela man i stap em i gat gutpela bel. Nem bilong em Jehosafat. Profet Jehu i tok long em olsem: “Yu save mekim sampela gutpela pasin tu. . . . Na yu bin strong tru long bihainim laik bilong God.” (2 Stori 19:3) Olsem tasol long nau, long dispela taim bilong “planti hevi nogut tru,” planti milion manmeri i “strong tru” long painim dispela God tru, em Jehova. (2 Timoti 3:1-5) Stori i kam long Togo, Wes Afrika na i stap daunbilo i kamapim klia dispela samting.
Casimir i go long wanpela skul Katolik na em i kisim namba wan Komyunio bilong em taim em i gat 9-pela krismas. Tasol taim Casimir i kamap 14 krismas, em i no go moa long lotu. Em i no go lotu na em i pret, long wanem, em i ting olsem dispela bai mekim na em bai i go long bikpaia, o em bai i go long klinpaia.
Long skul Casimir i bung wantaim wanpela lain yangpela em ol i save bung wanpela taim long olgeta wik na stadi long Baibel. Em i kirap tu long kaunim Baibel. Long wanpela taim Casimir i kaunim tok long Kamapim Tok Hait i tok long wanpela wel animal i kamap long solwara. (KTH 13:1, 2) Taim em i askim man i lukautim grup bilong Baibel-stadi long dispela samting, em i tokim Casimir olsem dispela wel animal em i wanpela animal tru tru na em bai kamap long solwara. Dispela tok em i kamapim i mekim Casimir i pret, long wanem, Casimir i sindaun klostu long nambis bilong Atlantik. Em i pilim olsem em bai insait long namba wan lain em wel abus bai bagarapim ol.
Casimir i kirap bungim mani na bai em i ken ranawe i go long ples wesan antap long hap not na bai wel animal i no ken bagarapim em. Em i tokim wanpela wanklas bilong em long dispela samting em i laik mekim. Dispela wanklas i wanpela Witnes Bilong Jehova, olsem na em i tok klia long Casimir olsem i no gat wanpela wel animal tru olsem dispela bai kamap long solwara, nogat. I no longtaim na ol i singautim Casimir i go long miting long Haus Kingdom. Em i laikim ol miting na em i kirap i go long olgeta miting. Em i orait tu long stadi long Baibel.
Taim Casimir i stadi i go, ol famili bilong em i kirap birua long em. Famili bilong em i save lotu long ol tumbuna na ol i save kaikai hap abus i stap yet em ol i bin mekim ofa long en na i gat blut i stap yet. Long gutpela pasin Casimir i tok em i no inap kaikai dispela abus, na taim em i tok olsem, ol i mekim nogut long em na tokim em long em i no ken i stap long haus. Casimir i stap isi, na ol i no rausim em long haus. Tasol inap 3-pela mun ol i redim kain abus olsem bilong famili i ken kaikai. Dispela i givim hevi long Casimir, long wanem, nau em i no kisim kaikai inap long em, tasol em i sanap strong na karim dispela hevi na ol narapela hevi tu.
Casimir i wok long kamap strong na bihain em i dediket na kisim baptais. Bihain, em i kamap wanpela wokman bilong kongrigesen na em i go long Namba 4 klas bilong Skul Bilong Lainim Wok Bilong Lukautim Kongrigesen long Togo. Long nau em i save amamas long mekim wok volantia long brens.
Em nau, tok bilong King Devit i stret tru long kain kain rot: “Sapos yu wok strong long kisim save long laik bilong em [Jehova], orait bai em i larim yu i save gut long em.”—1 Stori 28:9.
[Ol Piksa long pes 8]
Casimir (long han sut) i save amamas long mekim wok volantia long brens