Askim Bilong Ol Rida
Klostu nau Jehova bai givim wanem “tingting” long ol gavman?
Ol samting bai kamap taim traipela hevi tru i kirap em Revelesen 17:16, 17 i stori long en olsem: “Dispela 10-pela kom na dispela wel animal yu bin lukim, ol bai heitim dispela pamukmeri na rausim olgeta samting bilong em na mekim em i stap skin nating. Na ol bai kaikaim mit bilong em, na ol bai kukim em olgeta long paia. Long wanem, God i givim tingting long ol long mekim samting em yet i tingting pinis long en, yes, em long karimaut dispela wanpela tingting ol i gat bilong givim kingdom bilong ol long wel animal.” Long ol pablikesen bilong yumi long bipo, yumi bin tok olsem Jehova yet bai putim “tingting” long bel bilong ol gavman bilong graun na ol bai bagarapim ol lotu giaman.
Tasol nau i gat senis long dispela save yumi bin holim pinis. Dispela “tingting” em Jehova bai putim long bel bilong ol gavman, em long “givim kingdom bilong ol long wel animal.” Bilong kliagut long hau truim bilong dispela tok bai kamap, yumi ken skelim ol dispela askim.
Husat lain i insait long dispela tok profet? “Dispela pamukmeri” em Baibel i kolim em tu olsem “Bikpela Babilon,” em i makim olgeta lotu giaman. Na dispela “retpela wel animal” i makim oganaisesen bilong kamapim bel isi em ol i bin kamapim long yia 1919 em Lig ov Nesen, nau em Yunaitet Nesen. (Rev. 17:3-5) Na “10-pela kom” i makim olgeta gavman em ol i sapotim dispela wel animal.
Olsem wanem pamukmeri na dispela retpela wel animal i wok bung wantaim? Dispela pamukmeri i “sindaun antap” long wel animal na em i givim blesing long wel animal na traim long stiaim em na bosim em.
Wanem samting bai kamap long dispela pamukmeri? Wel animal wantaim 10-pela kom bilong en “bai heitim dispela pamukmeri.” Na bilong soim belhat bilong ol, ol bai rausim olgeta samting em i gat na soim olgeta man olsem em i meri nogut. Na ol bai karimaut kot bilong Jehova long em, em long bagarapim em na pinisim em olgeta. (Rev. 17:1; 18:8) Na dispela em bai pinis bilong olgeta lotu giaman. Tasol paslain long dispela samting i kamap, Jehova bai kirapim ol kantri long mekim wanpela narakain samting em ol i no bin mekim bipo.
Jehova bai kirapim ol kantri long mekim wanem? Em bai putim “tingting” bilong em long bel bilong dispela 10-pela kom, em long “givim strong na namba bilong ol long dispela [retpela] wel animal” em Yunaitet Nesen. (Rev. 17:13) Tingim samting dispela i makim. Yu ting ol gavman bilong graun bai wokim disisen long laik bilong ol olsem ol i laik givim strong na namba bilong ol long dispela wel animal? Nogat! Tok profet i soim olsem God yet bai stiaim tingting bilong ol long mekim ol dispela samting. (Prov. 21:1; skelim Aisaia 44:28.) Yu ting isi isi ol bai wok long givim strong na namba long wel animal? Nogat! Dispela samting bai kamap wantu tasol, na em bai wanpela bikpela senis ol i wokim disisen long mekim. Na bihain long en, dispela wel i kisim nupela strong bai kamapim kot bilong Jehova long olgeta lotu giaman na ol oganaisesen bilong ol na em bai rausim ol na pinisim ol olgeta.
Yumi ken save tru olsem wanem samting bai kamap klostu nau? Yumi no gat wok long putim yau long ol ripot long nius olsem isi isi ol gavman i wok long sapotim Yunaitet Nesen, nogat. Samting yumi ken save tru em bai kamap em olsem: Kwiktaim tasol Jehova bai putim tingting bilong em long bel bilong ol kantri na ol bai givim namba na strong bilong ol long dispela wel animal. Taim dispela samting i kamap, yumi ken save tru olsem taim bilong traipela hevi tru i laik kirap klostu nau. So taim yumi wetim dispela samting i kamap, “yumi mas was i stap na holim stretpela tingting,” long wanem, wantu tasol ol bikpela senis bai kamap!—1 Tes. 5:6.