Kaunim Buk Wantaim Ol Pikinini

Nius Veja bilong Brasil i tok, ol pikinini bilong ol papamama i save givim bel long kaunim buk bai ol i kisim bikpela laik long kaunim ol buk, winim ol pikinini em papamama bilong ol i no save kaunim buk long haus. Martha Hoppe, em wanpela savemeri i gat wok long helpim pikinini long wokim tingting bilong em na bai em i ken lain na kisim save, em i tok: “Sapos ol papamama i kaunim buk wantaim ol pikinini, dispela i save helpim ol long pas gut wantaim na em i save helpim ol pikinini long kisim gut ol tok bilong buk.”

Na tu, taim yu kaunim buk long ol pikinini bilong yu, dispela i opim rot bilong yu ken bekim ol askim. Sapos buk i gat sampela piksa, orait yu ken stori long ol piksa. Hoppe i tok: “Sapos pikinini i save gut long ol samting ol buk i save stori long en, dispela bai kirapim em moa yet long painim ol buk bilong kisim save long samting em i laik kisim save long en.”

Planti papamama namel long ol Witnes Bilong Jehova, ol i amamas long kaunim buk wantaim ol pikinini bilong ol. Ating ol bai kaunim ol buk olsem, Baibel Stori Buk Bilong Mi, Harim Tok Bilong Bikpela Tisa, na Nambawan Man Tru i Winim Olgeta Narapela Man.a Ol buk kain olsem ol dispela buk ol i save helpim ol pikinini long lain long kaunim gut tok, na tu, ol i save helpim ol pikinini long kisim bikpela laik moa long kaunim nambawan buk ol man i save baim​—⁠em Baibel Holi. Olsem na sapos yu wanpela papa o mama, stap olsem gutpela piksa ol pikinini bilong yu i ken bihainim na givim bel long kaunim Tok Bilong God. (Josua 1:​7, 8) Na lusim hap taim long kaunim buk long ol!

[Futnot]