Gutpela Ples Bilong Ol Venda

INAP 10-pela yia pinis, mitupela meri bilong mi i bin mekim wok bilong autim tok bilong God long olgeta de namel long ol Venda. Ol Venda i save sindaun long hap saut bilong wara Limpopo long hap not bilong Saut Afrika. Insait long lain Venda i gat sampela lain em planti handet yia bipo ol tumbuna bilong ol i bin brukim wara Limpopo na ol i kam sindaun long dispela hap. Sampela Venda i tok ol tumbuna bilong ol i bin kam sindaun long dispela hap inap 1,000 yia i go pinis.

Tru tumas, bipo dispela hap em hap bilong lain bilong ol Mapunguwe, em wanpela lain bilong bipo tru. Em i namba wan bikpela setelmen olsem taun em i bin kamap long Saut Afrika na em i bin bosim bikpela ples daun bilong wara Limpopo, kirap long Botswana long hap bilong wes i go inap long Mosambik long hap bilong is. Kirap long yia 900 C.E. i go inap long yia 1100 C.E., ol Arap bilong raun na wokim bisnis ol i bin go long Mapunguwe bilong kisim tit bilong elefan, kom bilong raino, skin bilong ol animal, kopa, na gol tu. Ol gutpela gutpela samting ol lain bilong bipo i bin sapim na karamapim long gol, ol man i bin painim insait long graun bilong wanpela maunten ol i kolim Mapunguwe. Bipo dispela maunten em ples matmat bilong ol king. Wanpela bikpela buk dikseneri i tok, ol dispela samting “i makim olsem long bipo tru ol i bin digim graun na painim gol long sauten Afrika.”

Nau ol i no digim graun bilong painim gol long dispela hap. Long nau, graun bilong ol Venda i gat nem olsem ples bilong kamapim planti kaikai. Long hap saut bilong ol maunten Sotpansbek i gat wanpela gutpela ples daun em planti prut i save kamap long en, olsem bata bilong diwai, banana, mango, na guava. Na tu, kain kain galip na kumu sayor samting i save kamap planti long dispela ples. Wanpela kumu ol i kolim muroho, swit bilong en i kain olsem swit bilong aibika samting, na ol asples i laikim tru dispela kumu.

Ol Venda i man bilong bel isi na ol i laik mekim gut long ol man. Olsem na planti papa bai tokim famili long kukim kakaruk bilong givim long wanpela man i kam long haus, maski em i kam long wanpela taim ol i no tingim. Ol bai kaikai dispela kakaruk wantaim buswa​—⁠em wanpela kaikai ol i wokim long kon na em i kaikai bilong ol Venda long olgeta de. Bihain, papa bilong famili bai wokabaut i go liklik wantaim dispela man bilong lusim em long rot samting. Dispela em pasin bilong ples bilong kamapim klia olsem ol i tingim gut man i bin kam lukim ol. Bilong tok gude long ol man i kam lukim famili, ol i skulim ol pikinini long brukim skru liklik na long rapim tupela han wantaim. Long dispela pes yu inap lukim tupela meri Venda i bihainim dispela pasin bilong ples.

Wanpela Strongpela Tok Ples

Ol waitskin i hatwok tru long lain gut long tok Venda. Wanpela hatwok bilong dispela tok ples i olsem: Planti tok bilong en ol i raitim wankain, tasol ol i kolim long ol narapela kain pasin. Taim mi mekim wanpela tok bilong Baibel long wanpela kongrigesen Venda bilong ol Witnes Bilong Jehova, mi laik kirapim ol man i harim tok long toktok long olgeta man. Wanpela man i harim tok bilong mi em i lap, long wanem, mi tok “ol wan wan pinga,” mi no tok “ol wan wan man.”

Namba wan taim mi traim long autim tok long tok Venda, wanpela meri Venda i tokim mi: “Mi no save long tok Inglis.” Mi ting mi bin mekim gutpela tok Venda, tasol meri i ting mi bin tok Inglis long em! Long narapela taim, mi go long wanpela haus na mi askim wanpela pikinini long singautim papa bilong famili. Long tok Venda, tok ol i tanim olsem papa bilong famili, em thoʹho. Tasol mi popaia na tok thohoʹ, olsem mi bin tokim pikinini mi laik toktok wantaim monki bilong haus! Ol popaia kain olsem dispela i mekim na mi bel hevi, tasol mitupela meri bilong mi i no les na nau mipela inap mekim gut tok Venda.

Planti i Laikim Ol Samting Bilong Spirit

Long ples bilong ol Venda planti man i laik harim tok long ol samting bilong spirit. Long 1953 samting, wanpela kongrigesen bilong ol Witnes Bilong Jehova i kamap. Ol man bilong dispela kongrigesen ol i bin lusim kantri bilong ol yet na kam long hap bilong ol Venda bilong wok long wanpela kopa-main long taun Mesina. Ol i givim bel long mekim wok autim tok na dispela i bin helpim planti Venda long save long tok i tru bilong Baibel. Tenpela yia bihain, wanpela liklik lain Venda​—⁠em ol i Witnes​—⁠ol i mekim ol miting long haus bilong wanpela man long taun Sibasa.

Bilong hariapim wok na lain Witnes i ken i go bikpela moa, brens-ofis bilong Sosaiti Was Taua long Saut Afrika i salim sampela man bilong autim tok long olgeta de i kam long dispela hap i gat planti man i laik harim tok. I no longtaim na dispela liklik lain Witnes long Sibasa em i kamap wanpela bikpela kongrigesen. Long dispela taim ol i mekim ol miting Kristen long wanpela klas-rum. Tasol ol Witnes Bilong Jehova long Pitasbek​—⁠em wanpela taun inap 160 kilomita longwe long hap saut​—⁠ol i helpim wok bilong wokim wanpela Haus Kingdom long Tohoyandou, em wanpela taun klostu.

Winim 500,000 manmeri i sindaun long hap not bilong Saut Afrika ol i save mekim tok ples Venda. I no gat wanpela Venda i bin stap insait long lain Witnes taim wok bilong autim tok bilong Kingdom em i kirap hia long 1953 samting. Nau i gat inap 150 Venda ol i Witnes. Tasol i gat planti hap mipela i no bin autim tok yet long en na i gat planti wok bilong mekim long dispela hap. Long 1989, mipela i kirap long i go lukim ol man long Hamutsa, em wanpela liklik ples bilong ol Venda. Long dispela taim i gat wanpela Witnes tasol i sindaun long dispela ples. Nau i gat 40 manmeri i sindaun long dispela ples ol i save autim tok bilong Kingdom. Mipela i wok strong long pinisim wok bilong Haus Kingdom bilong mipela. Mipela i tok tenkyu gen long ol Witnes bilong ol kongrigesen long Pitasbek long ol i bin helpim dispela wok, na mipela tok tenkyu long mani ol brata long ol kantri i gat planti samting bilong skin ol i bin salim i kam olsem kontribusen.

Mipela i save sindaun long wanpela liklik haus i gat wil i stap long wanpela fam. Mipela i no wok long painim planti samting bilong skin, olsem na mipela i gat bikpela hap taim moa long painim ol manmeri long dispela hap bilong autim gutnius long ol. (Mak 13:10) Olsem na mipela i kisim ol gutpela blesing tru. Mipela i bin helpim planti man long dediketim laip bilong ol long God Jehova. Nem bilong wanpela man olsem em Michael​—⁠em i bin lukim buk Yu Inap i Stap Oltaim Long Paradais Long Graun long haus bilong wanpela pren.a Em i kirap kaunim dispela buk na wantu em i save em tok i tru. Olsem na em i raitim pas i go long Sosaiti Was Taua bilong kisim sampela buk moa bilong Baibel. Long pas bilong em Michael i tok, nau tasol em i kisim baptais olsem wanpela memba bilong Misin Apostolik. Em i tok moa: “Mi kisim save olsem rot mi wokabaut long en bilong kisim Kingdom bilong God, em i no stret. Mi pasim tok long bel long kamap wanpela memba bilong yupela, tasol mi no save olsem wanem mi ken mekim olsem.” Em i raitim atres bilong em na em i tokim Sosaiti long salim wanpela Witnes Bilong Jehova i kam bilong helpim em. Mi painim Michael na mi kirapim Baibel-stadi wantaim em. Long nau, em i wanpela Witnes i baptais pinis na em i stap gut long mekim wok bilong Jehova.

Long Disemba 1997, mipela i go long “Bilip Long Tok Bilong God” Kibung Distrik bilong ol Witnes Bilong Jehova. Kibung i bin kamap long wanpela stediam bilong pilai spot long Tohoyandou. Inap 634 i bung na 12-pela nupela man i kisim baptais. Mi kisim gutpela wok bilong mekim tupela tok long kibung long tok ples Venda. Dispela em i wanpela bikpela samting tru long mi insait long ol 10-pela yia mipela i bin amamas long wok long dispela gutpela ples!​—⁠Wanpela man i salim dispela stori i kam.

[Futnot]