Yu Ting God i Save Mekim Ol Samting Long Rot “i No Stret”?
“DEUS ESCREVE CERTO POR LINHAS TORTAS” (“GOD I SAVE RAITIM stret ol tok, tasol ol lain long pepa i krungut”), em wanpela tok ol man bilong Brasil i save mekim. Dispela tok i makim olsem, long olgeta taim God i save mekim ol samting i stret, tasol sampela taim em i mekim long wanpela pasin ol man i ting i no stret tumas. Olsem: Taim wanpela man i gat strong yet na em i dai, planti man i save tok, ‘God i singautim em i go long heven.’ Na taim hap skin bilong man i bagarap o bikpela hevi i painim em, sampela i save tok, ‘Em laik bilong God.’ Ol i ting em asua bilong God na dai i painim man o hap skin bilong man i bagarap o kain samting olsem i painim em, olsem na taim ol man i mekim ol dispela tok, i olsem ol i tok, God ‘i raitim krungut ol tok,’ olsem em i mekim ol samting long wanpela pasin ol man i no inap save long as bilong en.
I gat wanem as na planti man bilong lotu i bilip olsem God i gat asua long man i dai na long ol hevi i painim em? Planti taim, as bilong ol dispela bilip em sampela tok bilong Baibel ol man i gat tingting kranki long en. Orait bai yumi stori long sampela.
● “Husat i save mekim man i yaupas o mauspas? Na husat i save mekim ai i lukluk o mekim man i aipas? Mi Bikpela tasol, mi save mekim olsem.”—Kisim Bek 4:11.
Olsem wanem? Dispela tok i makim olsem em asua bilong God na ol man i yaupas o mauspas samting? Nogat, i no olsem. Long wanem, dispela i no stret wantaim ol pasin bilong God. Baibel i tok: “Olgeta samting God i wokim, ol i gutpela tasol.” (1 Timoti 4:4) Taim mama i karim ol man, sapos ol i stap aipas o mauspas o yaupas, God i no gat asua long dispela, nogat. Em i As bilong “olgeta gutpela samting yumi save kisim na olgeta presen i gutpela tru,” olsem na em i laik bai ol gutpela samting tasol i painim ol man em i bin wokim ol.—Jems 1:17.
Tupela tumbuna bilong yumi bilong pastaim, em Adam na Iv, long laik bilong ol yet ol i bikhet long God, na dispela i mekim na nau ol i no gutpela man moa na ol i no inap kamapim ol pikinini i gutpela olgeta. (Stat 3:1-6, 16, 19; Jop 14:4) Taim ol tumbuna pikinini bilong ol i marit na kamapim pikinini, kain kain sik i wok long kamap long ol. God Jehova i no as bilong ol dispela sik, tasol em i larim ol dispela hevi i kamap. Olsem na em inap tok em yet i “mekim” ol man i mauspas na yaupas na aipas.
● “Ol samting i krungut pinis, em yumi no inap stretim.”—Saveman 1:15.
Olsem wanem? God yet i mekim na ol samting i krungut? Nogat. Saveman 7:29 i tok: “God i bin makim rot bilong ol manmeri, na ol i no hatwok long bihainim. Tasol ol yet i kamapim planti kain tingting na pasin, na dispela i mekim wokabaut bilong ol i hat tumas.” Baibel Contemporary English Version i kamapim dispela ves olsem: “Taim God i wokim yumi, pasin bilong yumi i stretpela tasol, tasol nau tingting bilong yumi i paul pinis.” Klostu olgeta man na meri ol i no bihainim ol stretpela lo bilong God; ol i laik bihainim ol laik na tingting na rot ol yet i laikim, na dispela i bin mekim nogut long ol.—1 Timoti 2:14.
Na olsem aposel Pol i tok, ol man i gat sin, olsem na ‘olgeta samting i stap nogut na i save bagarap.’ (Rom 8:20) Ol man yet i no inap ‘stretim dispela samting i krungut pinis.’ God tasol inap stretim na pinisim ol samting bilong dispela graun i krungut pinis na i stap nogut na i save bagarap.
● “Tingting gut long olgeta samting God i bin mekim. Sapos God i bin mekim wanpela samting i krungut, orait husat tru inap stretim bek?”—Saveman 7:13.
I olsem King Solomon i tok: ‘Wanem man long graun inap stretim ol samting i krungut pinis em God i save larim i kamap?’ I no gat wanpela man inap mekim olsem, long wanem, i gat as na God Jehova i save larim ol dispela samting i kamap.
Olsem na Solomon i tok: “Taim ol samting long laip bilong yu i stap gut, orait yu mas amamas. Na sapos taim nogut i painim yu, orait yu mas tingting olsem, God i save salim gutpela taim na taim nogut i kam long yumi. Olsem na yumi no inap save wanem samting bai i kamap bihain.” (Saveman 7:14) Yumi mas amamas taim ol samting i stap gut na yumi mas soim olsem yumi amamas. Taim ol samting i stap gut, yumi mas tingting olsem God yet i bin salim dispela gutpela taim. Tasol olsem wanem sapos taim nogut i painim yumi? Orait yumi mas “tingting” olsem, dispela taim nogut em samting God i bin larim i kamap. Bilong wanem em i mekim olsem? Solomon i tok: God i mekim olsem na bai “yumi no inap save wanem samting bai i kamap bihain.” Wanem insait bilong dispela tok?
God i save larim gutpela taim na taim nogut i painim yumi, na dispela i helpim yumi long tingim olsem yumi no inap save wanem samting bai kamap bihain. Taim nogut inap painim gutpela man na man nogut wantaim. Dispela samting i mas kirapim yumi long bilip na wetim God i helpim yumi; nogut yumi ting yumi inap stretim ol hevi long strong bilong yumi yet. Yumi mas save, ‘God em i as bilong pasin bilong laikim ol arapela.’ (1 Jon 4:8) Tru, ating i gat sampela samting nau yumi no save gut long en, tasol yumi ken bilip olsem, dispela hap taim God i bin larim pasin nogut i stap, dispela bai kamapim ol gutpela samting long bihain bilong helpim yumi olgeta.
Wanem wanem samting em i larim i kamap long ol man i gat stretpela bel, dispela i no inap mekim nogut long ol i go inap long olgeta taim bihain, nogat. Aposel Pita i kamapim klia dispela samting taim em i stori long ol hevi i painim ol wanbilip i stap long taim bilong em: “God em i as bilong olgeta marimari. Em i bin singautim yupela long Krais Jisas, bai yupela i ken i stap wantaim em long gutpela lait bilong en i save stap oltaim. Olsem na bai yupela i karim pen sotpela taim tasol, na bihain bai em yet i mekim yupela i orait gen, na strongim bilip bilong yupela na mekim yupela i sanap strong oltaim.”—1 Pita 5:10.
Taim Bilong Stretim Ol Samting
Jehova i save givim strong long yumi bilong karim ol hevi i save painim yumi long nau. Na em i tok promis pinis long mekim “olgeta samting i kamap nupela.” (KTH 21:5) Em nau, em laik bilong em na klostu nau Kingdom bilong em long heven bai oraitim bek skin bilong man i yaupas o aipas samting, na Kingdom bai bosim wok bilong kirapim bek ol man i dai pinis. Na dispela gavman bai pinisim tu dispela man nogut, Satan, em pasin bilong em i “krungut” olgeta. (Jon 5:28, 29; Rom 16:20; 1 Korin 15:26; 2 Pita 3:13) Taim God i kirap na stretim ol samting long taim em i makim pinis, gutpela samting tru bai kamap long ol man long olgeta hap bilong graun em ol i save pret long em!
[Piksa Kredit Lain long pes 28]
Jop i Kisim Toksave Olsem Olgeta Samting Bilong Em i Lus/The Doré Bible Illustrations/Dover Publications