Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w02 5/1 p. 4-7
  • Olsem Wanem Ol Bagarap Bilong Skin Bai Pinis?

No gat vidio bilong dispela seksen.

Sori, popaia kamap long lodim vidio.

  • Olsem Wanem Ol Bagarap Bilong Skin Bai Pinis?
  • Wastaua i Tokaut Long Kingdom Bilong Jehova—2002
  • Ol Liklik Het Tok
  • Wankain Infomesen
  • Ol Mirakel Bilong Jisas​—Piksa Bilong Samting Bai Kamap Bihain
  • Ol i Kamap Orait—Ol i No Pilim Pen o Givim Mani
  • Pastaim Man i Mas Kamap Orait Long Ol Samting Bilong Spirit!
  • Ol Samting ‘God Em Wanpela Tasol i God Tru’ i Tok Promis Long En
    Kirap!—2005
  • Em i Laikim Tru Ol Manmeri
    Wastaua i Tokaut Long Kingdom Bilong Jehova—2015
  • Ol Mirakel Klostu Nau Bai Kamap
    Wastaua i Tokaut Long Kingdom Bilong Jehova—2012
  • Klostu Nau God Bai Oraitim Ol Man Long Rot Bilong Mirakel
    Wastaua i Tokaut Long Kingdom Bilong Jehova—1997
Lukim Moa
Wastaua i Tokaut Long Kingdom Bilong Jehova—2002
w02 5/1 p. 4-7

Olsem Wanem Ol Bagarap Bilong Skin Bai Pinis?

TINGIM ol aipas i lukluk gen, na ol yaupas i harim toktok, na ol mauspas i amamas na mekim singsing, na ol lek nogut i wokabaut strong gen! Mipela i no tok long nupela save bilong ol dokta samting, nogat, mipela i tok long ol samting bai kamap taim God i kirap long helpim ol man. Baibel i tok profet olsem: “Ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.” (Aisaia 35:​5, 6) Tasol olsem wanem yumi inap bilip tru olsem dispela tok profet bai kamap tru?

Taim Jisas Krais i stap long graun, em i bin oraitim ol man i gat kain kain sik na bagarap long skin. Na tu, planti man i bin lukim ol mirakel em i wokim​​—ol birua bilong em tu ol i bin lukim. Wanpela taim, ol birua i wok strong long painimaut samting Jisas i bin mekim bilong oraitim wanpela man, long wanem, ol i laik daunim ol wok bilong em. Tasol ol samting ol i painimaut i kamapim klia olsem tru tumas, Jisas i bin wokim dispela mirakel. (Jon 9:​1, 5-​34) Taim Jisas i wokim pinis narapela mirakel, ol dispela birua i bel kros na tok: “Bai yumi mekim wanem? Dispela man i save wokim planti mirakel.” (Jon 11:47) Tasol ol man nating ol i pilim ol mirakel Jisas i wokim na planti ol i kirap bilip long em.​​—Jon 2:​23; 10:​41, 42; 12:​9-​11.

Ol Mirakel Bilong Jisas​—Piksa Bilong Samting Bai Kamap Bihain

Ol mirakel bilong Jisas i kamapim klia olsem em i Mesaia na Pikinini bilong God. Na tu, ol i kamapim as na yumi inap bilip long ol tok promis bilong Baibel olsem bihain ol man bilong bihainim tok bai kamap orait olgeta. Wanpela tok promis olsem, em long Aisaia sapta 35, em mipela i kamapim long kirap bilong stori. Long ol man i pret long God, Aisaia 33:24 i tok: “I no gat man . . . bai i tok olsem, ‘Mi gat sik.’ ” Wankain tok promis olsem i stap tu long Kamapim Tok Hait 21:​4: “[God] bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo [pen na hevi bilong nau] ol i pinis olgeta.”

Ol man i save beten long truim bilong ol dispela tok profet i ken kamap taim ol i kolim beten bilong Jisas, em hap tok bilong en i olsem: “Kingdom bilong Yu i mas i kam. Laik bilong Yu i mas kamap long graun olsem em i save kamap long heven.” (Matyu 6:​10, King Jems Nupela Testamen) Yes, God i laik kamapim laik bilong em long graun na long ol lain man. Tru, i gat as na God i larim sik na bagarap bilong skin i painim ol man, tasol liklik taim na ol dispela samting bai pinis olgeta. God i no inap larim ol dispela samting i bagarapim ples bilong em long “putim lek” antap long en.​​—Aisaia 66:1.a

Ol i Kamap Orait—Ol i No Pilim Pen o Givim Mani

Maski ol man i karim hevi bilong wanem wanem sik, Jisas i oraitim ol wantu tasol na ol i no pilim pen, na em i no tokim ol long baim. Planti man i harim stori bilong ol mirakel Jisas i wokim na i no longtaim na “planti lain manmeri i kam long em. Na ol i bringim ol lek nogut na ol aipas na ol bun krungut na ol mauspas na planti arapela sikman tu, na ol i putim klostu long lek bilong Jisas. Na em i mekim ol i kamap orait.” Ol manmeri i mekim wanem? Matyu i bin lukim ol dispela samting i kamap na em i tok: “Ol manmeri i lukim ol mauspas i toktok na ol bun krungut i kamap orait na ol lek nogut i wokabaut na ol aipas i lukluk, na ol i tingting planti. Na ol i litimapim nem bilong God bilong Israel.”​​—Matyu 15:​30, 31.

Tingim tu olsem ol man bilong giaman na pulim mani bilong ol man, ol yet i save makim sampela man bilong oraitim ol, tasol Jisas i no mekim olsem, nogat. Planti wanblut na pren bilong ol man i gat sik “ol i putim [ol sikman] klostu long lek bilong Jisas. Na em i mekim ol i kamap orait.” Orait nau yumi ken skelim sampela mirakel Jisas i wokim bilong oraitim ol man.

Aipas: Taim Jisas i stap long Jerusalem, em i oraitim wanpela man em “taim mama i karim em, em i aipas pinis.” Dispela man i gat nem long taun olsem aipas man bilong singaut long mani. Olsem na yu ken tingim bikpela amamas bilong ol man taim ol i lukim em i wokabaut na em inap lukluk gen! Tasol i no olgeta man i amamas. Sampela man long lain Farisi​—em lain i gat biknem long dispela taim​—ol i bel nogut long Jisas i bin kamapim long ples klia ol pasin nogut bilong ol, olsem na ol i wok strong long painim sampela pasin giaman long Jisas. (Jon 8:​13, 42-​44; 9:​1, 6-​31) Olsem na ol i sutim ol askim long dispela man Jisas i bin oraitim, na bihain ol i mekim long papamama bilong em, na bihain gen long dispela man. Tasol ol bekim ol i kisim long ol askim bilong ol i kamapim klia olsem Jisas i bin mekim tru dispela mirakel, na dispela i mekim ol i kros. Dispela man Jisas i oraitim, em i tingting planti long pasin nogut bilong ol dispela bikman bilong lotu i gat tupela maus, na em i tok: “Long bipo tru na i kam inap nau i no gat stori bilong wanpela man em i stap aipas long taim mama i karim em, na bihain wanpela man i opim ai bilong em. Sapos God i no bin salim dispela man i kam, orait em i no inap mekim wanpela samting.” (Jon 9:​32, 33) Dispela man em bipo i bin stap aipas, em i bekim stretpela tok i kamapim bilip bilong em, na long dispela as ol Farisi i “rausim em i go,” olsem ol i pinisim em olgeta long lotu.​​—Jon 9:​22, 34.

Yaupas: Taim Jisas i stap long Dekapolis long hap is bilong wara Jordan, ol manmeri long dispela hap “ol i bringim wanpela man i kam long em, yau bilong en i pas na tang bilong en i hevi, na em i no inap toktok gut.” (Mak 7:​31, 32) Jisas i oraitim dispela man, na tu, em i kamapim olsem em i tingim gut ol tingting i stap long bel bilong dispela man, olsem nogut em i sem long ai bilong planti manmeri. Baibel i stori olsem Jisas i kisim dispela yaupas man i go “lusim ol manmeri, na tupela tasol i stap” na em i oraitim em. Na long dispela taim tu, ol manmeri i lukim dispela mirakel “ol i kirap nogut tru na i tok, ‘Olgeta samting em i mekim, em i mekim gutpela tasol. Em i mekim ol yaupas i harim tok, na ol mauspas i toktok.’ ”​​—Mak 7:​33-​37.

Bun i dai olgeta: Taim Jisas i stap long Kaperneam, ol manmeri i karim wanpela man long bet em bun bilong em i dai olgeta na ol i bringim em i kam long Jisas. (Matyu 9:2) Ves 6 i go long 8 i stori long samting i bin kamap. Jisas i tok olsem long dispela man em bun bilong em i dai: “ ‘Yu kirap na kisim bet bilong yu, na yu go long haus bilong yu.’ Na dispela man i kirap, na i go long haus bilong en. Ol manmeri i lukim dispela na ol i pret. Na ol i litimapim nem bilong God.” Jisas i wokim dispela mirakel long ai bilong ol disaipel na ol birua. Ol disaipel i no bel nogut long Jisas, olsem na ol i “litimapim nem bilong God” long samting ol i bin lukim.

Sik: “Wanpela man i gat sik lepra i kam long Jisas na i . . . brukim skru na i tokim Jisas olsem, ‘Sapos yu laik, yu inap long mekim mi i kamap klin long ai bilong God.’ Na Jisas i sori tru long em, na i putim han long em, na i tokim em olsem, ‘Mi laik. Yu kamap klin.’ Orait wantu sik lepra i lusim dispela man.” (Mak 1:​40-​42) Jisas i no bel nogut na em i oraitim dispela man, nogat, em i sori tru long em. Tingim sapos yu yet yu gat sik lepra. Bai yu pilim olsem wanem sapos yu gat wanpela sik nogut na dispela sik i bagarapim skin bilong yu na yu mas i stap wanpis longwe long ol man, tasol nau wantu tasol wanpela man i oraitim yu na yu no pilim pen long skin taim em i mekim olsem? Em nau, yu inap save long as na wanpela lepraman em Jisas i oraitim em, em i “brukim skru na putim pes i go daun long graun klostu long lek bilong Jisas, na i givim tenkyu long em.”​​—Luk 17:​12-​16.

Bagarap: Laspela mirakel Jisas i wokim paslain long ol i kotim em na nilim em long diwai, em mirakel bilong oraitim man. Aposel Pita i no tingting gut na em i laik pasim ol birua taim ol i laik kisim Jisas i go, na em i “pulim bainat na i paitim wokboi bilong hetpris, na bainat i katim yau long han sut bilong dispela wokboi na yau i pundaun.” (Jon 18:​3-5, 10) Stori bilong dispela samting long Buk Luk i tok Jisas “i putim han long yau bilong dispela man, na yau i kamap gutpela gen.” (Luk 22:​50, 51) Long dispela taim tu, Jisas i kamapim pasin sori long ai bilong ol pren na birua bilong em​​—em ol man i holim em.

Yes, taim yumi skelim gut ol mirakel Jisas i bin wokim, yumi inap pilim moa yet olsem ol dispela mirakel i bin kamap tru tru. (2 Timoti 3:​16) Na olsem mipela i kamapim long pastaim, kain stadi olsem i mas strongim bilip bilong yumi long tok promis bilong God long oraitim sik bilong ol man bilong bihainim tok. Baibel i kamapim insait bilong bilip Kristen olsem “yumi save gut tru olsem, olgeta gutpela samting God i promis pinis long givim yumi na yumi wet long kisim, em bai yumi kisim tru. Maski ai bilong yumi i no lukim ol dispela samting, yumi save gut tru olsem, dispela olgeta samting i stap.” (Hibru 11:1) Dispela i kamapim klia olsem God i laik strongim yumi long kisim strongpela bilip i gat as tru bilong en, na i no olsem wanpela tok o tingting nating tasol. (1 Jon 4:1) Taim yumi kisim kain bilip olsem, yumi bai kamap strong moa long ol samting bilong spirit, na skin bai stap gutpela moa, na bai yumi amamas moa.​​—Matyu 5:3; Rom 10:17.

Pastaim Man i Mas Kamap Orait Long Ol Samting Bilong Spirit!

Planti manmeri em ol i gat gutpela skin, ol i no i stap amamas. Sampela ol i traim long kilim i dai skin bilong ol yet, long wanem, ol i no gat gutpela samting bilong wetim i kamap bihain, na tu, ol i pilim olsem ol hevi i daunim ol. Ol kain manmeri olsem ol i gat bagarap bilong spirit​​—long ai bilong God, dispela kain bagarap i nogut moa yet, winim bagarap bilong skin. (Jon 9:​41) Tasol planti manmeri em ol i gat bagarap bilong skin, olsem Christian na Junior em yumi bin stori pinis long ol, ol i stap amamas. Bilong wanem? Long wanem, ol i stap gut long ol samting bilong spirit, na ol i wetim gutpela samting bai i kamap em Baibel i as bilong en, na dispela i strongim ol.

Jisas i tingim samting yumi ol man i mas kisim na em i tok: “Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.” (Matyu 4:4) Ol animal i mas kisim ol kaikai bilong skin na em tasol, tasol ol man i no olsem​—ol i mas kisim narapela samting moa. God i wokim yumi i “kamap olsem God yet,” olsem na yumi mas kisim ol kaikai bilong spirit​​—yumi mas kisim save bilong God na olsem wanem yumi insait long ol samting God bai mekim, na olsem wanem yumi ken mekim laik bilong em. (Stat 1:​27; Jon 4:​34) Taim yumi kisim save long God, yumi pilim olsem i stap bilong yumi i gat as bilong en, na em i strongim yumi long mekim wok bilong God. Na tu, yumi mas kisim dispela save bilong God bambai yumi ken kisim laip oltaim long Paradais bai kamap long graun. Jisas i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”​​—Jon 17:3.

Yumi ken tingim tu olsem ol man long taim bilong Jisas ol i no bin kolim Jisas olsem “Man bilong oraitim sik,” tasol ol i kolim em olsem “Tisa.” (Luk 3:​12; 7:​40) Bilong wanem? Long wanem, Jisas i skulim ol man long rot tru bilong pinisim ol hevi bilong ol man​​—em Kingdom bilong God. (Luk 4:​43; Jon 6:​26, 27) Dispela gavman bilong heven long han bilong Jisas Krais bai bosim olgeta hap bilong graun na truim olgeta tok promis bilong Baibel i stori long ol stretpela man bai stap long graun. (KTH 11:15) Olsem na long beten bilong em, Jisas i toktok long Kingdom bilong God bai kam na laik bilong Em bai kamap long graun.​​—Matyu 6:​10.

Planti manmeri em ol i gat bagarap bilong skin, tasol taim ol i kisim save long gutpela samting bai kamap bihain, krai bilong bel hevi i senis na kamap olsem krai bilong amamas. (Luk 6:​21) Tru tumas, God bai pinisim sik na bagarap bilong skin, na tu, em bai pinisim as bilong ol pen na hevi i painim ol man​​—em sin. Aisaia 33:24 na Matyu 9:​2-7, em yumi stori long en long pastaim, ol i makim olsem sin i as bilong ol sik samting i painim yumi. (Rom 5:​12) Olsem na taim sin i pinis, ol lain man bai amamas long i ‘stap gutpela tru olsem ol pikinini bilong God,’ ol bai stap gutpela olgeta long tingting na long skin.​​—Rom 8:​21.

Ol manmeri i gat gutpela skin, ating ol i no pilim tumas dispela gutpela samting ol i holim. Tasol i no olsem long ol lain i gat sampela bagarap bilong skin na ol i karim bikpela hevi long en. Ol i save olsem gutpela skin na laip i gutpela samting tru, na i stap bilong man inap senis wantu tasol. (Saveman 9:​11) Olsem na mipela i laik bai ol manmeri i ritim dispela nius, sapos ol i gat bagarap bilong skin, ol i ken tingim gut ol gutpela tok promis bilong God i stap long Baibel. Jisas i bin givim laip bilong em bambai ol dispela tok promis i ken kamap tru. Em nambawan gutpela as na yumi ken bilip tru long ol dispela tok promis, a?​​—Matyu 8:​16, 17; Jon 3:​16.

[Futnot]

a Bilong kisim sampela save moa long as na God i larim pen na hevi i stap, lukim buklet Tru God i Save Tingim Yumi?, em ol Witnes Bilong Jehova i wokim.

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim