Ol Samting ‘God Em Wanpela Tasol i God Tru’ i Tok Promis Long En
GOD JEHOVA i bin putim namba wan man na meri long wanpela paradais long graun—em gaden Iden. Em i tokim tupela long kamapim ol pikinini na ‘bosim graun.’ Dispela i makim tu olsem taim famili bilong ol i kamap planti, ol bai surikim Paradais i go long ol narapela hap bilong graun. (Stat 1:26-28; 2:15) Olsem wanem? Dispela samting God i tingting pinis long mekim, olsem ol man bai stap long wanpela paradais long graun, em bai kamap?
Yes, em bai kamap! Tok profet bilong Baibel i tok: “[Bikpela] bai i pinisim dai tru na bai dai i no kamap moa” na em bai “pinisim krai bilong ol na mekim drai wara bilong ai bilong olgeta manmeri.” Taim dispela samting i kamap, “ol manmeri bai i tok olsem, ‘Bikpela, em i God bilong yumi. Yumi bin bilip na wet long em wanpela bai i kisim bek yumi. Em tasol i Bikpela, na em i bin helpim yumi. Olsem na yumi amamas moa yet, long wanem, em i kisim bek yumi pinis.’ ”—Aisaia 25:8, 9.
Laspela buk bilong Baibel i stori long ol samting bai kamap long graun taim pasin bilong nau em Satan i bosim i pinis. Long dispela “nupela graun,” em ol manmeri i laikim God, Baibel i tok: “Haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.”—KTH 21:1-4.
Ol dispela tok promis i gutpela tru, a? Olsem wanem? Yumi ken bilip long ol? Tingim olsem wanem i dai bilong Jisas na ol mirakel em i bin wokim i kamapim klia olsem i gat as tru long yumi bilip olsem God bai inapim olgeta samting em i tok promis long mekim.—2 Korin 1:20.
Jisas i Givim Laip Bilong Em Bilong Baim Bek Ol Man
Taim Satan i kirapim Adam long sakim tok bilong God na mekim sin, olgeta tumbuna pikinini bilong Adam i kisim sin. Baibel i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” Tasol Baibel i tok moa olsem: “Wanpela man [man i gutpela olgeta em Jisas] i bihainim tok, na long dispela pasin bilong em planti manmeri bai i kamap stretpela manmeri.” (Rom 5:12, 19) Olsem yumi bin stori pinis, Jisas em i “narapela Adam i kamap bihain tru,”—em man “bilong heven”—em man i bin givim laip bilong em “bilong baim bek planti manmeri.”—1 Korin 15:45, 47; Matyu 20:28.
Olsem na olgeta man i bilip long Jisas, ol i gat rot long God i “lusim” sin bilong ol na ol inap kisim laip oltaim. (Efesus 1:7; Jon 3:36) Yumi ken amamas tru olsem God Jehova i laikim tumas ol manmeri bilong graun na em i givim Pikinini bilong em bilong kisim bek yumi! (Luk 2:10-12; Jon 3:16) Taim yumi skelim ol samting Jisas i bin mekim bilong helpim ol man long taim em i stap long graun, dispela inap givim save long yumi long ol samting bai kamap bihain. Na ol samting Jisas i bin mekim ol i gutpela samting tru!
Piksa Bilong Nupela Taim
Jisas inap oraitim olgeta man ol i bringim i go long em, maski ol i gat wanem kain sik o bagarap long skin—i no gat wanpela kain sik em i no inap oraitim, nogat. Na tu, em i bin wokim mirakel na long rot bilong sampela pis na bret, em i givim kaikai long planti tausen man.—Matyu 14:14-22; 15:30-38.
Taim Jisas i oraitim wanpela man aipas, ol wantok na ol pren i luksave olsem em wanpela mirakel, tasol ol hetman bilong lotu Juda ol i no bilip. Olsem na dispela man Jisas i bin oraitim, em i tokim ol: “Long bipo tru na i kam inap nau i no gat stori bilong wanpela man em i stap aipas long taim mama i karim em, na bihain wanpela man i opim ai bilong em. Sapos God i no bin salim dispela man i kam, orait em i no inap mekim wanpela samting.”—Jon 9:32, 33.
Long taim Jisas i mekim wok bilong em, kasen bilong em, Jon Bilong Baptais, em ol i kalabusim em, em i salim ol man i go bilong lukim na toksave long em sapos ol tok em i harim long ol samting Jisas i mekim em i tru. Baibel i tok: “Long dispela taim Jisas i wok long mekim orait planti manmeri i gat ol kain kain sik. Na em i rausim planti spirit nogut i stap long ol. Na planti aipas, em i mekim ol i lukluk.” Na Jisas i tokim ol dispela man Jon i bin salim i kam: “Tokim Jon long ol samting nau yutupela i lukim na harim. Ol aipas ol i lukluk gen, na ol lek nogut ol i wokabaut. Skin bilong ol man i gat sik lepra, em i kamap klin, na ol yaupas i harim toktok. Ol man i dai pinis, ol i kirap gen.”—Luk 7:18-22.
Tingim! Sapos gutpela samting olsem i bin kamap long bipo, dispela i mas strongim bilip bilong yu olsem kain samting olsem inap kamap gen, a? Long rot bilong ol mirakel Jisas i wokim, em i soim liklik piksa tasol bilong ol bikpela wok em bai mekim bihain taim em i mekim wok olsem King long Kingdom Bilong God. Ol mirakel bilong em i kamapim klia olsem God i bin salim em i kam, na tru tru em i Pikinini Bilong God.
Taim Kingdom Bilong God i bosim graun, bai i gat truim bilong ol tok profet i stori long ol gutpela samting bai kamap. Olsem Baibel i tok profet pinis, ol aipas bai lukluk, ol yaupas bai harim toktok, ol lek nogut bai kalap olsem ol dia, na i no gat man bai i sik. Gutaim na bel isi bai stap long olgeta hap bilong graun. Na tu, ol animal em long nau ol i save bagarapim man, bihain ol bai stap gut wantaim ol man.—Aisaia 9:6, 7; 11:6-9; 33:24; 35:5, 6; 65:17-25.
Olsem wanem? Yu laik stap laip oltaim taim Kingdom Bilong God i bosim graun na olgeta dispela samting i kamap? Jisas i kolim samting yu mas mekim taim em i beten long Papa bilong em: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) I gutpela sapos yu no ken larim wanpela samting i pasim yu long kisim dispela save em inap helpim yu long kisim laip.
[Piksa long pes 10]
Dispela em samting God i tok promis long kamapim long graun