Olsem Wanem Jisas Inap Senisim i Stap Bilong Yu?
KRAIS JISAS em i wanpela Bikpela Tisa na em i bin stap long hap bilong Palestain klostu 2000 yia i go pinis. Yumi no save gut long i stap bilong em taim em i liklik mangi. Tasol Baibel i tok olsem taim em i gat 30 krismas, em i kirap mekim wok “bilong autim tok tru.” (Jon 18:37; Luk 3:21-23) Ol fopela disaipel i raitim stori bilong i stap bilong em, ol i stori long ol samting Jisas i bin mekim insait long 3 na hap yia em i mekim wok autim tok.
Taim Jisas i mekim wok bilong em long graun, em i tokim ol disaipel bilong em long wanpela tok na dispela tok inap helpim ol man long stretim planti hevi i wok long kamap long graun. Wanem dispela tok? Jisas i tok: “Na nau mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela.” (Jon 13:34) Em nau, pasin bilong laikim ol narapela em inap helpim ol man long stretim planti hevi. Narapela taim ol disaipel i askim Jisas, wanem lo em i namba wan, na em i tok: “ ‘Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.’ Dispela lo em i bikpela, na em i namba wan tru. Na namba 2 lo em i wankain olsem dispela. Em i olsem, ‘Yu mas laikim ol wantok olsem yu laikim yu yet.’ ”—Matyu 22:37-40.
Long ol toktok na pasin bilong em, Jisas i bin lainim yumi long olsem wanem yumi ken laikim tru God na ol narapela man. Nau yumi ken skelim sampela pasin bilong Jisas na bai yumi ken save ol pasin bilong em inap lainim yumi long wanem samting.
Ol Tok Em i Skulim Ol Man Long En
Long wanpela bikpela tok bilong em antap long maunten, em planti man i save long en, Krais Jisas i tokim ol disaipel bilong em: “I no gat wanpela man inap i stap aninit long tupela bosman wantaim. Bai em i laikim wanpela na bel nogut long narapela. Bai em i harim tok bilong wanpela na givim baksait long narapela. Yupela i no inap i stap aninit long God na long mani wantaim.” (Matyu 6:24) Planti manmeri i bilip olsem mani inap helpim ol long stretim olgeta kain hevi, olsem na tok bilong Jisas olsem yumi mas putim God i stap namba wan long wokabaut bilong yumi, dispela tok i stret long helpim yumi long nau o nogat? Tru, yumi mas i gat mani bilong lukautim yumi. (Saveman 7:12) Tasol sapos yumi larim “Mani” i stap bos bilong yumi, “pasin bilong laikim tumas mani” bai bosim yumi, olsem bosim olgeta samting yumi mekim. (1 Timoti 6:9, 10) Planti i bin larim mani i bosim ol na nau famili bilong ol i bruk, o sik i painim ol, o laip bilong ol i lus.
Tasol sapos yumi tingim God i olsem Bos bilong yumi, orait i stap bilong yumi bai i gat as bilong en. Em i Man bilong wokim yumi—em i As bilong laip—olsem na em inap tru long yumi lotuim em wanpela tasol. (Song 36:9; KTH 4:11) Ol man i kisim save long ol pasin bilong em na laikim em, dispela i kirapim ol long bihainim ol lo bilong em. (Saveman 12:13; 1 Jon 5:3) Taim yumi mekim olsem, dispela i helpim yumi long i stap gut.—Aisaia 48:17.
Na long bikpela tok bilong em antap long maunten, Jisas i lainim ol disaipel bilong em long pasin bilong laikim ol narapela manmeri. Em i tok: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” (Matyu 7:12) Dispela tok “manmeri” em Jisas i bin mekim wok long en, em i makim tu ol birua bilong yumi. Long dispela tok bilong em long maunten, em i tok tu olsem: “Yupela i mas laikim ol birua bilong yupela, na yupela i mas beten bai God i marimari long ol man i save mekim pasin nogut long yupela.” (Matyu 5:43, 44) Dispela kain pasin bilong laikim ol narapela inap helpim ol man long stretim planti hevi i wok long painim yumi long nau, a? Bikman bilong ol Hindu em Mohandas Gandhi i bin ting olsem. Em i tok: “Sapos [yumi] wok wantaim long bihainim ol tok Krais i autim antap long maunten, long dispela bai yumi stretim ol hevi . . . bilong olgeta kantri.” Ol tok bilong Jisas long laikim ol narapela bai helpim ol man long stretim planti bilong ol hevi sapos ol i bihainim ol dispela tok.
Ol Wok Bilong Em
Jisas i no skulim tasol ol man long pasin bilong laikim ol narapela; em yet i bihainim dispela pasin. Olsem: Em i tingim laik bilong ol narapela pastaim. Wanpela taim, Jisas na ol disaipel i mekim bikpela wok tru bilong helpim ol manmeri na ol i no gat taim bilong kisim kaikai. Jisas i save ol disaipel bilong em i mas kisim liklik malolo, olsem na em i kisim ol i go long wanpela hap i no gat man long en. Tasol taim ol i kamap long dispela hap, i gat ol manmeri i wetim ol i stap. Yu yet bai mekim wanem sapos yu bin lukim ol dispela manmeri, em ol i laik bai yu helpim ol, tasol yu gat laik long kisim liklik malolo pastaim? Jisas i “sori tru long ol” na “em i stat long givim planti tok long ol.” (Mak 6:34) Jisas i tingim tru ol narapela na oltaim dispela i save kirapim em long helpim ol.
Jisas i no bin skulim tasol ol manmeri, em i mekim sampela samting moa. Em i helpim ol long ol samting bilong skin. Olsem: Wanpela taim em i givim kaikai long 5,000 samting manmeri em ol i bin i kam harim tok bilong em i go inap long apinun. Bihain long dispela, em i givim kaikai long narapela bikpela lain manmeri—inap olsem 4,000—em ol i harim tok bilong em inap 3-pela de olgeta na ol i no gat kaikai. Long namba wan taim, em i mekim wok long 5-pela bret na 2-pela pis, na long namba tu taim, em i mekim wok long 7-pela bret na sampela liklik pis. (Matyu 14:14-22; 15:32-38) Em ol mirakel, a? Tru tumas, em i wanpela man bilong wokim ol mirakel.
Na tu, Jisas i bin oraitim planti sikman. Em i oraitim ol man i aipas, ol lek nogut, ol man i gat sik lepra, na ol yaupas. Em i kirapim tu ol man i dai pinis! (Luk 7:22; Jon 11:30-45) Wanpela taim, wanpela man i gat sik lepra i tokim em: “Sapos yu laik, yu inap long mekim mi i kamap klin long ai bilong God.” Jisas i mekim wanem? “Jisas i sori tru long em, na i putim han long em, na i tokim em olsem, ‘Mi laik. Yu kamap klin.’ ” (Mak 1:40, 41) Long rot bilong ol kain mirakel olsem, Jisas i kamapim klia olsem em i laikim tru ol dispela man i karim pen na hevi.
Olsem wanem? Yu hatwok long bilip long ol mirakel bilong Jisas? Sampela i hatwok long mekim olsem. Tasol tingim: Jisas i bin mekim ol mirakel long ai bilong planti manmeri. Ol birua bilong em, em olgeta taim ol i laik painim rot bilong sutim tok long em, ol tu i no inap tok olsem em i no bin wokim ol mirakel. (Jon 9:1-34) Na tu, ol mirakel bilong em i gat as bilong en. Ol i helpim ol man long save olsem em i dispela Man God i salim i kam.—Jon 6:14.
Taim Jisas i wokim ol mirakel, em i no laik kisim biknem long em yet. Nogat. Em i litimapim nem bilong God, em As bilong strong em i kisim bilong wokim ol mirakel. Wanpela taim long Kaperneam, em i stap insait long wanpela haus i gat planti manmeri i pulap long en. Wanpela man em han lek bilong em i dai, em i laik bai Jisas i oraitim em, tasol em i no inap i go insait. Olsem na ol pren bilong em i opim rup bilong haus na slingim bet i gat sikman i slip long en i go daun. Jisas i lukim olsem ol i gat bilip, olsem na em i oraitim em. Olsem na ol manmeri i “litimapim nem bilong God” na ol i tok: “Bipo mipela i no lukim kain samting olsem. Nogat tru.” (Mak 2:1-4, 11, 12) Ol mirakel Jisas i mekim ol i litimapim nem bilong Jehova, God bilong em, na ol i helpim ol manmeri i gat hevi.
Ol mirakel Jisas i bin wokim bilong oraitim ol sikman, em i no nambawan bikpela as na Jisas i mekim wok bilong em. Wanpela man i bin raitim stori bilong i stap bilong Jisas, em i tok: “Dispela tok mi raitim, em mi raitim bai yupela i ken bilip long Jisas em dispela man God i makim bilong kisim bek ol manmeri bilong en. Em i Pikinini Bilong God. Na sapos yupela i bilip, orait bai yupela i kisim laip long nem bilong em.” (Jon 20:31) Yes, Jisas i bin kam long graun bilong helpim ol man i bilip bambai ol i ken kisim laip.
Ofa Bilong Em
Ating bai yu askim olsem, Jisas i bin kam long graun, a? ‘Em i lusim wanem hap na i kam?’ Jisas yet i tok: “Mi no lusim heven na kam daun bilong bihainim laik bilong mi yet. Nogat. Mi kam daun bilong bihainim laik bilong Papa, em i bin salim mi na mi kam.” (Jon 6:38) Taim Jisas i no kamap man yet long graun, em i bin stap long heven olsem Pikinini bilong God. Wanem laik bilong dispela Man i bin salim em i kam long graun? Jon, em wanpela bilong ol man i bin raitim Gutnius, em i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Olsem wanem dispela samting inap helpim ol man long kisim laip oltaim?
Baibel i stori long olsem wanem i dai i kamap olsem wanpela samting ol manmeri i no inap abrusim. God i bin givim laip long namba wan man na meri na ol inap tingting long kisim laip inap oltaim oltaim. Tasol long laik bilong ol yet ol i sakim tok bilong Man bilong wokim ol. (Stat 3:1-19) Dispela samting ol i mekim, olsem sin, em i bringim dai i kam long olgeta pikinini bilong Adam na Iv. (Rom 5:12) Bilong ol manmeri i ken kisim laip tru, sin na indai i mas pinis olgeta.
I no gat wanpela saientis inap pinisim tru indai long rot bilong senisim sampela sel samting insait long skin bilong man. Tasol Man bilong wokim yumi em i gat rot bilong helpim ol gutpela manmeri long kamap gutpela olgeta bambai ol i ken stap oltaim oltaim. Baibel i kolim dispela samting olsem pe bilong baim bek ol man. Namba wan man na meri i bin baim ol yet na ol pikinini bilong ol i go kalabus long sin na dai. Tupela i tromoi laip bilong ol olsem ol man i gutpela olgeta na i bihainim tok bilong God, na ol i kisim laip bilong bosim wokabaut bilong tupela yet, na makim wanem samting i gutpela na wanem samting i nogut. Bilong baim bek laip bilong man i gutpela olgeta, ol man i mas givim wanpela pe i wankain stret olsem dispela gutpela laip em namba wan man na meri i bin lusim. Ol manmeri i gat sin i stap long skin, olsem na ol i no inap tru long givim dispela kain pe.—Song 49:7.
Olsem na God Jehova yet i mekim ol samting bilong helpim ol manmeri. Em i kisim gutpela laip bilong dispela wanpela Pikinini bilong em na putim long bel bilong wanpela nupela meri i no bin slip wantaim wanpela man, na dispela meri i karim Jisas. Sampela yia i go pinis, ating bai yu hatwok long bilip olsem wanpela nupela meri inap karim wanpela pikinini taim em i no slip yet wantaim wanpela man. Tasol long nau, ol saientis i bin kamapim ol animal i wankain stret olsem mama bilong ol na ol i bin kisim jin bilong wanpela animal na putim long narapela animal. Olsem na husat inap tok Man bilong wokim yumi em i no inap mekim narapela samting na mekim meri i karim pikinini? I no gat wanpela, a?
Laip bilong wanpela man i gutpela olgeta em i stap pinis, olsem na nau i gat pe bilong baim bek ol manmeri long sin na indai. Tasol dispela pikinini i bin kamap long graun olsem Jisas, em i mas i go bikpela pastaim na bai em inap kamap “dokta” na givim “marasin” bilong stretim sik bilong ol manmeri. Jisas i mekim olsem taim em i stap stret olgeta na em i no mekim wanpela sin. Jisas i bin lukim ol man i karim hevi bilong sin, na tu, em yet i pilim ol hevi bilong i stap olsem wanpela man. Dispela i mekim na em i kamap olsem wanpela dokta i gat pasin sori tru. (Hibru 4:15) Ol mirakel em i bin wokim bilong oraitim ol man taim em i stap long graun, ol i kamapim klia olsem em i laik oraitim ol sikman, na em i gat strong long oraitim ol.—Matyu 4:23.
Bihain long 3 na hap yia bilong em long mekim wok autim tok hia long graun, ol birua i kilim Jisas i dai. Em i bin kamapim klia olsem wanpela man i gutpela olgeta em inap stap gut long Man bilong wokim em, maski ol bikpela hevi tru i painim em. (1 Pita 2:22) Laip bilong em olsem wanpela man i gutpela olgeta na em i givim olsem wanpela ofa, dispela i kamap olsem pe bilong baim bek ol manmeri long sin na i dai. Krais Jisas i tok: “Sapos wanpela man i laikim tumas ol pren bilong en na i lusim laip bilong em yet bilong helpim ol, orait dispela pasin bilong laikim ol arapela i winim tru ol arapela pasin bilong laikim ol arapela manmeri.” (Jon 15:13) Long de namba 3 bihain long em i dai, God i kirapim bek Jisas olsem wanpela spirit, na sampela wik bihain em i go long heven bilong givim dispela pe long Jehova bilong baim bek ol manmeri. (1 Korin 15:3, 4; Hibru 9:11-14) Long dispela rot, Jisas inap mekim wok long ofa bilong em long helpim ol man i bihainim em.
Dispela samting Jisas i bin mekim bilong oraitim ol man long ol sik bilong spirit, na sik bilong tingting na bel, na sik bilong skin, yu laik bai dispela samting i ken helpim yu? Bilong mekim olsem, man i mas bilip long Krais Jisas. I gutpela sapos yu yet i kam long dispela dokta, a? Yu inap kam long Krais Jisas long rot bilong kisim save long em na long ol wok em i bin mekim bilong kisim bek ol manmeri i stap gut long em. Ol Witnes Bilong Jehova bai amamas long helpim yu.
[Piksa long pes 5]
Jisas i laik oraitim ol sikman na em i gat strong long oraitim ol
[Piksa long pes 7]
Indai bilong Jisas i mekim wanem long yu?