Stadi 3

Jisas Krais Em i Husat?

Bilong wanem Baibel i kolim Jisas olsem “namba wan” Pikinini bilong God? (1)

Bilong wanem Baibel i kolim em “Tok”? (1)

I gat wanem as na Jisas i kam long graun olsem wanpela man? (2-4)

Bilong wanem em i wokim ol mirakel? (5)

Klostu nau Jisas bai mekim wanem samting? (6)

1. Taim Jisas i no kam yet long graun em i wanpela spirit i stap long heven. Em i namba wan samting God i bin wokim, olsem na Baibel i kolim em “namba wan” Pikinini bilong God. (Kolosi 1:15; KTH 3:14) God yet i wokim wanpela Pikinini tasol, em Jisas. Taim Jisas i no kamap man yet, Jehova i bin makim em olsem “saveman i bosim wok” bilong wokim olgeta narapela samting long heven na graun. (Sindaun 8:​22-31; Kolosi 1:​16, 17) God i makim em tu long i stap nambawan mausman bilong em. Olsem na Baibel i kolim em “Tok.”​—⁠Jon 1:​1-3; KTH 19:⁠13.

2. God i bin putim laip bilong Jisas long bel bilong Maria; long dispela rot em i salim Pikinini bilong em i kam long graun. Jisas i no gat papa bilong graun. Olsem na em i no bin kisim sin o sik samting long dispela rot. I gat 3-pela as na God i salim Jisas i kam long graun: (1) Bilong skulim yumi long tok tru bilong God (Jon 18:37), (2) bilong stap gut long God bambai yumi ken bihainim dispela pasin bilong em (1 Pita 2:21), (3) bilong givim laip bilong em olsem ofa bambai yumi ken kamap fri long sin na dai. Bilong wanem Jisas i mas mekim olsem?​—⁠Matyu 20:⁠28.

3. Taim namba wan man Adam i sakim lo bilong God, em i mekim samting Baibel i kolim “sin.” Olsem na God i tok em i mas i dai. (Stat 3:​17-19) Em i no inapim ol lo God i bin putim, olsem na em i no gutpela olgeta moa. Isi isi em i go lapun na em i dai. Adam i givim sin long olgeta pikinini bilong em. Long dispela as tasol yumi go lapun, na kisim sik, na yumi dai. Olsem wanem God inap kisim bek ol man?​—⁠Rom 5:⁠12.

4. Jisas em i gutpela olgeta wankain olsem Adam. Tasol maski bikpela traim tru i painim Jisas, em i bihainim olgeta tok bilong God​—⁠em i no bihainim pasin bilong Adam. Olsem na em inap givim gutpela laip bilong em olsem ofa bilong baim sin bilong Adam. Baibel i tok em i “baim bek” ol man. Em nau, rot i op na ol pikinini bilong Adam i ken lusim kalabus bilong indai. Olgeta man i bilip long Jisas, God inap lusim sin bilong ol na ol i ken kisim laip oltaim.​—⁠1 Timoti 2:​5, 6; Jon 3:⁠16; Rom 5:​18, 19.

5. Taim Jisas i stap long graun em i oraitim ol sikman, givim kaikai long ol man i hangre, na mekim i dai ol bikpela win na ren. Na tu, em i kirapim bek ol man i dai pinis. Bilong wanem em i wokim ol mirakel? (1) Em i sori long ol man i karim hevi, na em i laik helpim ol. (2) Ol mirakel i kamapim klia olsem em i Pikinini Bilong God. (3) Ol mirakel i soim yumi long ol samting em bai mekim bilong helpim ol manmeri long taim em i bosim graun olsem King.​—⁠Matyu 14:14; Mak 2:​10-12; Jon 5:​28, 29.

6. Jisas i dai na God i kirapim em olsem wanpela spirit, na em i go bek long heven. (1 Pita 3:18) Bihain, God i mekim em i kamap King. Klostu nau Jisas bai pinisim olgeta pasin nogut na ol hevi i stap long graun.​—⁠Song 37:​9-11; Sindaun 2:​21, 22.

[Ol Piksa long pes 7]

Jisas i skulim ol man, na wokim ol mirakel, na tu, em i givim laip bilong em olsem ofa bilong helpim yumi