Jisas i Kisim Bek Yumi Olsem Wanem?

“Jisas i kisim bek yumi!” “Jisas i Man bilong kisim bek yumi!” Long planti kantri, ol man i save putim ol dispela tok long ples klia long ol banis bilong haus na long ol hap planti man i save bung long en. Planti milion man ol i bilip olsem Jisas em i Man bilong kisim bek ol. Sapos yu askim ol, “Jisas i kisim bek yumi olsem wanem?” ating ol bai bekim tok olsem, “Jisas i dai bilong helpim yumi,” o “Jisas i dai bilong tekewe sin bilong yumi.” Yes, indai bilong Jisas i opim rot na yumi inap abrusim bagarap. Tasol olsem wanem na indai bilong wanpela man inap baim sin bilong planti lain manmeri? Bai yu bekim wanem tok sapos ol i askim yu, “Olsem wanem indai bilong Jisas inap helpim yumi long abrusim bagarap?”

BAIBEL i kamapim tok bilong bekim dispela askim, na dispela tok i klia tru na i gat bikpela insait bilong en. Bilong save long bikpela insait bilong en, pastaim yumi mas tingim i stap bilong Jisas na indai bilong em olsem rot bilong stretim wanpela bikpela hevi tru. Long dispela rot tasol bai yumi inap save gut long olsem wanem indai bilong Jisas inap helpim tru yumi.

Taim God i salim Jisas i kam bilong givim laip bilong em, God i laik stretim wanpela hevi i bin kamap taim Adam i mekim sin. Dispela sin i bin kamapim bikpela hevi tru! Namba wan man na meri bilong em, Iv, ol i gutpela olgeta. Gutpela gaden Iden i olsem ples bilong ol. God i givim gutpela wok long ol bilong lukautim ples gaden bilong ol. Ol i gat wok long bosim ol narapela animal samting long graun na mekim long pasin sori. Na taim ol man i kamapim ol pikinini na planti milion man i pulap long graun, ol i gat wok long skruim paradais i go inapim olgeta hap bilong graun. (Stat 1:​28) Man! Ol i kisim gutpela wok tru em ol inap kisim amamas long en! Na tu, ol inap poroman gut wantaim narapela narapela. (Stat 2:​18) Ol i no sot long wanpela samting. Ol inap long i stap laip oltaim oltaim.

I hatwok long yumi ting olsem Adam na Iv inap mekim sin. Tasol namba wan man na meri ol i bikhet long man i wokim ol​​—⁠God Jehova. Long rot bilong wanpela snek, Satan i giamanim Iv long sakim tok bilong Jehova, na Adam i bihainim em long mekim wankain pasin.​​—⁠Stat 3:​1-6.

Man bilong wokim olgeta samting em i save pinis long wanem samting em bai mekim long Adam na Iv. Em i bin toksave pinis long wanem samting bai painim ol sapos ol i sakim tok bilong em, em i tok: “Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.” (Stat 2:​16, 17) Samting ol i mekim i kamapim wanpela bikpela askim na i mas i gat rot bilong bekim dispela askim.

Bikpela Hevi i Bungim Ol Lain Man

Namba wan sin i kamapim bikpela hevi tru long olgeta lain man. Taim God i wokim Adam, em i bin kamap man i gutpela olgeta. Olsem na i gat rot long ol pikinini bilong em inap i stap laip oltaim. Tasol Adam i mekim sin paslain long em i kamapim pikinini. Ol lain man i no kamap yet taim God i tokaut long strafe bilong em: “Na bai yu wok hat tru long kisim kaikai bilong yu na tuhat bai i kamap long pes bilong yu. Na bai yu hatwok oltaim inap yu dai na yu go bek long graun. Long wanem, mi bin wokim yu long graun, na bai yu go bek gen long graun.” (Stat 3:​19) Olsem na taim Adam i mekim sin na em i dai, olgeta lain man tu ol i kisim dispela strafe bilong i dai.

Olsem na bihain aposel Pol i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Rom 5:​12) Em nau, dispela namba wan sin i mekim na ol pikinini bilong tupela em pastaim ol i bilong kisim skin i gutpela olgeta taim mama i karim ol na ol i gat rot long i stap oltaim, nau ol i no kamap olsem​—⁠ol i kisim sik, na kamap lapun, na ol i dai.

Ating sampela man bai tok, “Em i no stretpela pasin. Mipela yet i no bin sakim tok bilong God​​—⁠Adam yet i bin mekim. Olsem na bilong wanem mipela i no inap i stap laip oltaim na stap amamas?” Yumi save olsem sapos wanpela papa i bin stilim ka na kot i tok long putim pikinini man bilong em long kalabus, i stret tru long pikinini i tok: “Em i no stret! Mi no bin mekim wanpela rong.”​​—⁠Lo 24:⁠16.

Taim Satan i grisim namba wan man na meri long mekim sin, ating em i bin ting olsem God bai tingting planti long samting em i mas mekim. Satan i kirap kwik long birua long God​—⁠taim Adam na Iv i no kamapim yet ol pikinini. Taim Adam i mekim sin, long dispela taim stret wanpela bikpela askim i kamap, olsem: Jehova bai mekim wanem long ol pikinini em Adam na Iv bai kamapim?

God Jehova i mekim stretpela pasin. Man bilong bihainim stretpela pasin, Elihu, i tok: “God I Gat Olgeta Strong i no inap mekim pasin nogut. Nogat tru.” (Jop 34:10) Na profet Moses i tok long Jehova olsem: “God bilong yumi i save stap olsem oltaim. Em i olsem wanpela bikpela strongpela ston i no save senis. Oltaim em i save bihainim tok bilong en na em i no save giaman. Na pasin bilong en i gutpela na stretpela tasol.” (Lo 32:⁠4) Samting God i mekim bilong stretim dispela hevi em sin bilong Adam i kamapim, i no pasim rot bilong yumi long kisim laip oltaim long Paradais long graun.

God i Stretim Gutpela Rot Tru

Tingim rot bilong stretim hevi em God i kamapim taim em i kolim strafe bilong Satan. Jehova i tokim Satan: “Bai mi mekim yu i stap birua bilong meri [oganaisesen bilong God long heven], na meri i stap birua bilong yu. Na bai mi mekim ol lain bilong yu [ol lain man Satan i bosim] i birua long lain bilong meri [Jisas Krais]. Bai ol i krungutim het bilong yu [Satan], na bai yu kaikaim lek bilong ol [indai bilong Jisas].” (Stat 3:​15) Long dispela namba wan tok profet bilong Baibel, Jehova i tokaut long laik bilong em long salim Pikinini spirit bilong em long heven i kam long graun, na stap olsem man i gutpela olgeta, em Jisas, na bihain em bai dai olsem man i no gat sin long skin​​—⁠i olsem ol i kaikaim lek bilong em.

Bilong wanem God i laik bai wanpela man i gutpela olgeta em i mas i dai? Orait, Jehova i bin tok long wanem samting bai painim Adam sapos em i mekim sin? Em i bin tok Adam bai i dai, a? (Stat 2:​16, 17) Aposel Pol i tok: “Sin i save givim pe long ol wokboi bilong en. Dispela pe em dai tasol.” (Rom 6:​23) Taim Adam i dai, dispela i olsem pe bilong sin em i bin mekim. God i bin givim laip long em, tasol long laik bilong em yet em i mekim sin, olsem na indai bilong em i olsem strafe bilong sin em i mekim. (Stat 3:​19) Na olsem wanem long dispela strafe ol lain man i kisim long rot bilong sin bilong Adam? I mas i gat wanpela man i dai bilong baim bek ol long sin bilong ol. Tasol indai bilong husat bai inap tru long pinisim sin bilong ol lain man?

Lo em God i bin givim long ol lain Israel bilong bipo i tok long ol “i mas kilim dispela man i dai [“olsem bekim bilong laip i bin lus,” NW ].” (Kisim Bek 21:23) Dispela stretpela lo i makim olsem man i dai bilong baim sin bilong yumi, laip bilong em i mas wankain olsem laip Adam i bin lusim. Laip bilong wanpela man i gutpela olgeta, em tasol bai inap long baim pe bilong sin. Jisas em i wanpela man i gutpela olgeta. Tru tumas, Jisas “i bin givim laip bilong em yet bilong baim bek olgeta manmeri” bambai olgeta lain man i kamap long rot bilong Adam na ofa bilong Krais inap baim bek ol, ol inap abrusim bagarap.​​—⁠1 Timoti 2:6; Rom 5:​16, 17.

Indai Bilong Jisas i Gat Bikpela Pe

Indai bilong Adam i no gat bikpela pe, long wanem, i stret long em i mas i dai. Tasol indai bilong Jisas em i gat bikpela pe bilong en, long wanem, em i no gat sin na em i dai. God Jehova inap orait long gutpela laip bilong Jisas olsem pe bilong baim bek ol tumbuna pikinini bilong Adam em ol i bihainim tok bilong God. Ofa bilong Jisas i olsem pe bilong baim ol sin bipo yumi bin mekim na i no dispela tasol, nogat. Long wanem, sapos i olsem, yumi no inap wetim ol gutpela samting i kamap bihain. Yumi sinman pinis taim mama i karim yumi, olsem na yumi bai mekim yet ol popaia. (Song 51:⁠5) Yumi tenkyu tru olsem indai bilong Jisas i opim rot bilong yumi long kamap gutpela olgeta​—⁠em laik bilong Jehova long pastaim tru long ol pikinini bilong Adam na Iv i mas i stap olsem!

Yumi ken tok piksa olsem: Adam i kain olsem wanpela papa i dai na em i lusim wanpela bikpela dinau (sin) long yumi bilong bekim, tasol i no gat rot bilong yumi long bekim dispela dinau. Tasol Jisas i kain olsem wanpela gutpela papa i dai na em i lusim bikpela mani tru long yumi, na dispela mani i pinisim bikpela dinau em Adam i bin lusim long yumi, na em inap helpim yumi long bihain inap oltaim oltaim. Indai bilong Jisas i tekewe sin bilong yumi, na tu, em i opim rot long yumi inap kisim gutpela sindaun long bihain.

Jisas em man bilong kisim bek yumi, long wanem, em i dai bilong helpim yumi. Tru tumas, indai bilong em i wanpela gutpela samting tru! Taim yumi tingim indai bilong em olsem rot bilong God long stretim dispela bikpela hevi em sin bilong Adam i bin kamapim, dispela bai strongim bilip bilong yumi long Jehova na long pasin bilong em long mekim ol samting. Yes, indai bilong Jisas em i rot bilong kisim bek “olgeta manmeri i bilip” long em na bai ol inap lusim ol hevi bilong sin, sik, lapun, na indai. (Jon 3:​16) Olsem wanem? Yu tenkyu tru long God i bin mekim dispela gutpela pasin sori na stretim rot bilong kisim bek yumi?

[Piksa long pes 5]

Adam i kamapim sin na indai long olgeta lain man

[Piksa long pes 6]

Jehova i stretim gutpela rot tru bilong kisim bek ol man