Dai, Laspela Birua, Bai Pinis Olgeta

1, 2. (a) Adam na Iv i gat wanem kain sindaun long pastaim? (b) Dispela i kamapim wanem ol askim?

TAIM God i wokim Adam na Iv, tupela i no gat wanpela birua. Tupela i no gat sin, ol i gutpela olgeta na ol i stap long ples paradais. Tupela i pas gut wantaim Krieta bilong ol na ol i stap olsem pikinini man na pikinini meri bilong em. (Stt. 2:7-9; Luk 3:38) God i givim wok long ol, na dispela i soim klia olsem God i laik bai ol i stap laip oltaim oltaim. (Ritim Stat 1:28.) Ol i mas “kamap planti na i go sindaun long olgeta hap bilong graun,” na sampela haptaim bai lus paslain long ol i inapim dispela wok. Tasol God i tok ol i mas ‘bosim olgeta samting i stap long graun,’ olsem ol pis, pisin, na animal, na dispela i makim olsem Adam na Iv i mas stap laip oltaim, na Adam i no inap dai na lusim wok bilong em olsem wasman.

² Orait, wai na ol samting i kamap long graun long nau i narapela kain olgeta? Hau na planti samting i stap olsem birua na i pasim ol man long i stap amamas, na nambawan birua em dai? God bai mekim wanem bilong pinisim ol dispela birua? Bekim bilong ol dispela askim na ol narapela askim i stap long ol stori bilong Baibel. Yumi ken skelim sampela bilong ol dispela stori.

GUTPELA TOK LUKAUT

3, 4. (a) God i givim wanem lo long Adam na Iv? (b) Bilong wanem em i bikpela samting long Adam na Iv i mas bihainim dispela lo?

³ Adam na Iv inap i stap laip inap oltaim oltaim. Tasol ol yet i mas mekim sampela samting, olsem ol i mas pulim win, dring wara, slip, na kisim kaikai. Bikpela samting moa, ol i mas pas gut wantaim Man i givim laip long ol. (Lo 8:3) Ol i mas larim God i stiaim ol, na long dispela rot ol bai amamas long i stap laip yet. Jehova i toksave gut long Adam long dispela samting paslain long Em i wokim Iv. “God Jehova i tokim man olsem: ‘Yu ken amamas long kaikai prut bilong olgeta diwai bilong dispela gaden. Tasol yu no ken kaikai prut bilong diwai bilong givim save long wanem samting i gutpela na wanem samting i nogut, long wanem, sapos yu kaikai prut bilong dispela diwai, long dispela de yu bai dai.’”—Stt. 2:16, 17, NW.

⁴ “Diwai bilong givim save long wanem samting i gutpela na wanem samting i nogut” i makim olsem God i gat rait long tokaut long wanem samting i gutpela na wanem samting i nogut. Adam inap save long wanem samting i gutpela na wanem samting i nogut, long wanem, God i wokim em i kamap olsem God yet, na Adam i gat maus bilong bel. Dispela diwai bai helpim Adam na Iv long luksave olsem oltaim ol i mas larim Jehova i stiaim ol. Sapos ol i kaikai prut bilong dispela diwai, dispela bai makim olsem ol yet i laik bosim wokabaut bilong ol, na dispela bai putim bikpela hevi long ol yet na long ol tumbuna pikinini bilong ol. Tok lukaut bilong God na strafe bai painim ol i soim olsem ol bai mekim bikpela rong tru sapos ol i sakim tok bilong God.

DAI I PAINIM OL MAN

5. Olsem wanem Satan i pulim Adam na Iv long sakim tok bilong God?

⁵ Bihain long God i wokim Iv, Adam i toksave long Iv long lo bilong God. Iv i save gut long dispela lo na em inap kolim gut olgeta wan wan tok bilong en. (Stt. 3:1-3) Iv i kolim dispela lo taim em i toktok wantaim wanpela man husat i yusim traipela snek long toktok wantaim em. Dispela man em Satan, em i wanpela pikinini spirit bilong God, na em i laik bosim wokabaut bilong em yet na kisim strong na namba. (Skelim Jems 1:14, 15.) Olsem na em i sutim tok olsem God i mekim tok giaman. Em i tokim Iv olsem sapos Iv i bosim wokabaut bilong em yet, em i no inap dai, nogat, em bai kamap wankain olsem God. (Stt. 3:4, 5) Iv i bilipim dispela tok na em i kaikai prut bilong diwai em God i bin tambuim, na dispela i soim olsem em i laik bosim wokabaut bilong em yet, na em i grisim Adam tu long bihainim em. (Stt. 3:6, 17) Satan i bin mekim tok giaman. (Ritim 1 Timoti 2:14.) Tasol Adam i “harim tok bilong meri bilong [em].” Traipela snek i stap olsem pren, tasol Satan i birua na em i save olsem Iv bai dai sapos em i sakim tok bilong God.

6, 7. Olsem wanem Jehova i mekim wok Jas na kotim ol bikhetlain?

⁶ Adam na Iv i tingim laik bilong ol yet, olsem na ol i bikhet long Man husat i givim laip na olgeta samting ol i gat. Jehova i save long olgeta samting i bin kamap. (1 Sto. 28:9; ritim Sindaun 15:3.) Em i larim Satan, Adam, na Iv long kamapim klia olsem ol i gat wanem tingting long em. Jehova i stap olsem Papa, olsem na em i bel hevi tru. (Skelim Stat 6:6.) Jehova i mas stap olsem Jas bilong sapotim na inapim tok em yet i bin mekim long pastaim long hevi bai painim ol bikhetlain.

⁷ God i tokim Adam olsem: “Sapos yu kaikai prut bilong dispela diwai [bilong givim save long wanem samting i gutpela na wanem samting i nogut], long dispela de yu bai dai.” Ating Adam i tingim olsem em bai dai insait long wanpela de i gat 24 aua long en. Taim Adam i brukim lo bilong God, ating em i ting olsem Jehova bai givim strafe long em paslain long san i go daun. Bihain, Jehova i toktok long Adam na Iv “long apinun, taim ples i kol.” (Stt. 3:8) I olsem em i mekim kot, na em i harim stori bilong Adam na Iv long ol samting i bin kamap. (Stt. 3:9-13) Em i kolim strafe bai painim ol dispela bikhetlain. (Stt. 3:14-19) God i tokaut pinis long wok em i laik bai Adam na Iv na ol pikinini bilong ol i mekim, olsem na sapos em i kilim Adam na Iv long dispela taim stret, orait tok bilong em bai lus nating. (Ais. 55:11) God i tokim Adam na Iv olsem ol bai dai, na kirap long dispela taim stret ol i karim hevi bilong sin, tasol God i larim Adam na Iv long kamapim ol pikinini husat bai kisim ol blesing long rot bilong ol samting God bai kamapim long bihain. Adam na Iv i dai pinis long de ol i mekim sin, long wanem, long tingting bilong God, 1 tausen yia i olsem wanpela “de.”—2 Pita 3:8.

8, 9. Sin bilong Adam i putim wanem hevi long ol pikinini bilong em? (Lukim piksa long kirap bilong stadi.)

⁸ Yu ting ol pikinini bilong Adam na Iv bai karim hevi bilong rong em papamama bilong ol i bin mekim? Yes. Rom 5:12 i tok: “Long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.” Abel em namba 1 man husat i stap gut long God na em i dai. (Stt. 4:8) Bihain, ol narapela pikinini bilong Adam i kamap lapun na ol i dai. Yu ting ol i kisim sin na dai long papamama bilong ol? Aposel Pol i tok: “Wanpela man i bin sakim tok na long dispela pasin planti manmeri i kamap sinman.” (Rom 5:19) Sin na dai yumi kisim long Adam i kamap olsem nambawan birua bilong ol manmeri, na ol manmeri i no inap tru long abrusim. Adam na Iv i save olsem ol pikinini na ol tumbuna pikinini i kamap bihain bai karim hevi bilong sin na dai, na yumi no save long tupela i bin pilim olsem wanem, tasol dispela samting i bin kamap.

⁹ Baibel i tok, hevi bilong sin na dai i mekim na “olgeta lain manmeri i gat bel hevi na ol i stap olsem ol man i sori long man i dai pinis, na dispela hevi bilong ol i olsem klos bilong sori ol i putim.” (Ais. 25:7) Dispela “klos bilong sori” i makim olgeta kain hevi i kalabusim olgeta manmeri. Olsem na i stret long tok: “Long rot bilong Adam ol man i save dai.” (1 Kor. 15:22) Olsem na Pol i tok: “Mi pilim nogut tru! Husat bai kisim bek mi long dispela bodi em bilong i dai.” Olsem wanem? Yu ting wanpela inap kisim bek yumi?—Rom 7:24.

SIN NA DAI BAI PINIS OLGETA

10. (a) Kolim sampela ves bilong Baibel we i soim olsem Jehova bai pinisim dai olgeta. (b) Ol dispela ves bilong Baibel i kamapim klia olsem Jehova na Pikinini bilong em i gat wanem pasin?

¹⁰ Jehova inap kisim bek Pol. Aisaia i mekim dispela hap tok “klos bilong sori,” na bihain stret em i tok: “[God] bai i pinisim dai tru na bai dai i no kamap moa long ol. God, Bikpela bai i pinisim krai bilong ol na mekim drai wara bilong ai bilong olgeta manmeri.” (Ais. 25:8) Sapos wanpela samting i givim hevi long pikinini, papa bilong em bai tekewe dispela samting na mekim drai aiwara bilong pikinini. Olsem tasol, Jehova i amamas tru long pinisim dai! Wanpela man bai helpim em long mekim dispela wok. Long 1 Korin 15:22, yumi ritim dispela tok: “Long rot bilong Adam ol man i save dai, olsem tasol long rot bilong Krais ol man bai kisim laip.” Pol tu i askim olsem: “Husat bai kisim bek mi”? Em i tok moa olsem: “Mi tenkyu long God long rot bilong Jisas Krais, Bikpela bilong yumi!” (Rom 7:25) Pasin laikim i bin kirapim Jehova long wokim ol manmeri bilong i stap long graun, na dispela pasin laikim i no pinis taim Adam na Iv i bikhet long God. Dispela man husat i bin helpim Jehova long wokim namba 1 man na meri, em tu i laikim na amamas tru long ol tumbuna pikinini bilong Adam na Iv, na pasin laikim bilong em i no senis. (Snd. 8:30, 31) Tasol olsem wanem bai em inap kisim bek ol?

11. Jehova i stretim wanem rot bilong helpim ol manmeri?

¹¹ Olgeta manmeri i gat sin na dai i painim ol, long wanem, Adam i bin mekim sin na Jehova i mekim stretpela kot. (Rom 5:12, 16) Baibel i tok: “Rong bilong wanpela man i mekim na olgeta kain man i gat kot.” (Rom 5:18) Jehova i no inap kalapim ol lo em yet i bin putim, olsem na em i ken mekim wanem bilong pinisim strafe i painim ol manmeri? Jisas i bekim dispela askim, na em i tok: “Pikinini bilong man . . . i kam bilong . . . givim laip bilong em olsem pe bilong baim bek planti manmeri.” (Mat. 20:28) Dispela man husat i stap olsem fes Pikinini bilong Jehova long heven, em i bon long graun na kamap man i gutpela olgeta, na em i tokaut klia olsem em bai givim pe bilong baim bek ol man. Olsem wanem dispela pe bai inapim stretpela lo?—1 Tim. 2:5, 6.

12. Husat i givim pe i stret bilong baim bek man?

¹² Taim Jisas i kamap long graun na stap man i gutpela olgeta, laip bilong em i wankain long laip bilong Adam paslain long em i mekim sin. Jehova i tingting pinis olsem, Adam bai kamapim ol pikinini i gutpela olgeta na ol manmeri bai kamap planti na i go sindaun long olgeta hap bilong graun. Jisas i laikim tru Papa bilong em na ol tumbuna pikinini bilong Adam, olsem na taim em i kamap man long graun, em i givim laip bilong em olsem ofa. Jisas i gutpela olgeta na em i givim dispela laip olsem ofa, na dispela laip i wankain long gutpela laip em Adam i bin lusim. Bihain, Jehova i kirapim bek Pikinini man bilong em na em i stap spirit long heven. (1 Pita 3:18) Jehova i orait long ofa bilong Jisas, em man i gutpela olgeta, na dispela ofa i olsem pe bilong baim bek man, na em inap baim bek ol tumbuna pikinini bilong Adam na ol inap kisim laip oltaim em Adam i bin lusim. I olsem Jisas i kisim ples bilong Adam. Pol i stori olsem: “Rait Holi i tok: ‘Namba 1 man Adam i bin kamap man i gat laip.’ Laspela Adam i bin kamap wanpela spirit i givim laip.”—1 Kor. 15:45.

13. “Laspela Adam” bai mekim wanem bilong helpim ol manmeri i dai pinis?

¹³ Taim bai kamap na “laspela Adam” bai kamap olsem “wanpela spirit i givim laip” long olgeta lain man. Planti tumbuna pikinini bilong Adam bai kirap bek na kisim laip. Bilong wanem? Long wanem, ol i bin stap laip long bipo na ol i dai. I stret long ol i kirap bek na kisim laip gen long graun.—Jon 5:28, 29.

14. Jehova i kamapim wanem samting bilong pinisim sin em Adam i givim long ol tumbuna pikinini bilong em?

¹⁴ Olsem wanem ol manmeri bai kamap fri long kalabus bilong sin? Jehova i bin kamapim wanpela Kingdom gavman, na “laspela Adam” bai mekim wok King long dispela Kingdom, na em bai mekim wok King wantaim hap lain em Jehova i bin makim ol namel long ol manmeri bilong graun. (Ritim Revelesen 5:9, 10.) Dispela hap lain husat bai wok wantaim Jisas long heven, ol i save pinis long ol hevi em sin i kamapim. Inap 1 tausen yia olgeta, Jisas na ol wanwok bilong em bai helpim ol manmeri long graun long pinisim ol hevi bilong sin we ol i no inap pinisim long strong bilong ol yet.—Rev. 20:6.

15, 16. (a) Taim Baibel i mekim dispela hap tok, “dai, dispela laspela birua,” dispela i makim wanem samting? (b) Wanem taim bai dai i pinis olgeta? (c) Olsem 1 Korin 15:28 i kamapim, Jisas bai mekim wanem?

¹⁵ Kingdom bai mekim wok bos inap 1 tausen yia, na long pinis bilong en, olgeta manmeri husat i bihainim tok ol bai kamap fri long olgeta hevi ol i bin kisim long pasin bikhet bilong Adam. Baibel i tok: “Long rot bilong Adam ol man i save dai, olsem tasol long rot bilong Krais ol man bai kisim laip. Olgeta wan wan i kisim laip long taim bilong ol yet: Krais pastaim, em i olsem namba 1 kaikai i redi long gaden, na bihain ol lain bilong Krais bai kisim laip long taim em i kam i stap. Bihain, pinis i kamap, em long taim em i putim kingdom long han bilong God na Papa bilong em. Em long taim em i pinisim olgeta gavman na olgeta wok bos na olgeta samting i gat strong. Long wanem, Krais i mas mekim wok king i go inap long God i putim olgeta birua i stap aninit long lek bilong en. Na dai, dispela laspela birua, em bai pinisim olgeta.” (1 Kor. 15:22-26) Tru tumas, em bai pinisim dai em yumi bin kisim long Adam. Dai i olsem “klos bilong sori” we i kalabusim olgeta lain man, na em bai pinis olgeta.—Ais. 25:7, 8.

¹⁶ Aposel Pol i pinisim tok bilong em olsem: “Taim olgeta samting i stap aninit pinis long Pikinini, orait Pikinini bai putim em yet aninit long God, em Man husat i putim olgeta samting i stap aninit long Pikinini, na bai God i ken i stap het bilong olgeta samting.” (1 Kor. 15:28) Long dispela taim, Pikinini Bilong God bai kamapim pinis samting em wok king bilong em i mas kamapim. Em bai helpim olgeta manmeri long graun na ol bai kamap gutpela olgeta, olsem na em bai belgut na putim em yet aninit long Jehova na larim Jehova i stap het bilong olgeta manmeri long graun.

17. Wanem samting bai painim Satan?

¹⁷ Olsem wanem long Satan, em man husat i go pas long kamapim olgeta pen na hevi we i painim ol manmeri long graun? Revelesen 20:7-15 i bekim dispela askim. Taim olgeta manmeri kamap gutpela olgeta, God bai larim Satan long mekim laspela traim na em bai laik giamanim ol manmeri. Satan na lain bilong em bai pinis olgeta long “namba 2 dai.” (Rev. 21:8) Ol i no inap stap moa, olsem na i no gat rot long pinisim dai bilong ol. Tasol “namba 2 dai” i no stap olsem birua bilong ol man husat i laikim tru God na mekim wok bilong em.

18. Long pastaim, God i bin givim wok long Adam, na hau bai dispela wok i kamap?

¹⁸ Ol manmeri long graun bai kamap gutpela olgeta na Jehova bai orait long ol inap kisim laip oltaim, na i no gat wanpela samting bai stap olsem birua bilong ol. Ol bai inapim wok em God i bin givim long Adam long pastaim. Graun bai pulap long ol tumbuna pikinini bilong Adam, na ol bai amamas long lukautim graun na lukim planti kain kain samting i gat laip. Yumi mas pilim tru ol samting em Jehova i mekim bilong pinisim dai, dispela laspela birua bilong yumi!