Kisim Skul Long Tok Bilong God

Jisas Krais Em i Husat?

Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.

1. Jisas Krais em i husat?

I no gat narapela man i olsem Jisas. Paslain long mama i karim em long graun, em i bin stap long heven. (Jon 8:23) Em i namba wan samting God i bin wokim, na em i helpim God long wokim olgeta narapela samting. Jehova yet i bin wokim Jisas, olsem na Baibel i kolim Jisas olsem “pikinini tru” bilong God. Jisas i mekim wok olsem Mausman Bilong God, olsem na Baibel i kolim em “Tok.”​—⁠Jon 1:​1-3, 14; ritim Sindaun 8:​22, 23, 30; Kolosi 1:​15, 16.

2. Bilong wanem Jisas i kam long graun?

God i salim Pikinini bilong em i kam long graun long rot bilong kisim laip bilong em long heven na putim long bel bilong wanpela nupela meri Juda, nem bilong em Maria. Olsem na Jisas i no gat wanpela papa bilong graun. (Luk 1:​30-35) Jisas i kam long graun (1) bilong skulim ol manmeri long tok i tru bilong God, (2) bilong stap olsem gutpela piksa long pasin bilong bihainim laik bilong God, na (3) bilong givim laip bilong em i gutpela olgeta olsem ofa bilong “baim bek” ol man.​—⁠Ritim Matyu 20:28; Jon 18:⁠37.

3. Bilong wanem yumi mas i gat pe bilong baim bek yumi?

Dispela tok baim bek i makim pe bilong helpim wanpela man long kamap fri. Pasin bilong i go lapun na i dai em i no laik bilong God long pastaim tru. Olsem wanem yumi save long dispela? God i tokim namba wan man Adam olsem sapos em i mekim sin, em bai i dai. Sapos Adam i no bin mekim sin, em i no inap i dai. Tru Adam i no dai inap sampela handret yia bihain, tasol taim em i brukim lo bilong God em i kirap long i go lapun na em i dai. (Stat 2:​16, 17; 5:⁠5) Olgeta tumbuna pikinini bilong Adam i kamap bihain ol i kisim sin na dai long em. Long dispela rot sin i kamap long graun na sin i kisim olgeta man. Dispela em i as na yumi mas i gat pe bilong baim bek yumi.​—⁠Ritim Rom 5:12; 6:⁠23.

4. Bilong wanem Jisas i dai?

Husat inap givim pe bilong baim bek yumi long indai? Taim yumi dai, dispela em i pe bilong sin bilong yumi yet. Yumi ol man i no gutpela olgeta, olsem na yumi no inap baim bek ol narapela long sin bilong ol.​—⁠Ritim Song 49:​7-9.

Jisas i no kisim sin long wanpela papa bilong graun, olsem na taim em i dai, em i no dai long sin bilong em yet, nogat, em i dai bilong baim bek sin bilong ol narapela. God i salim Pikinini bilong em i kam na dai bilong helpim yumi, na dispela i kamapim klia bikpela pasin laikim bilong God long ol man. Na tu, long rot bilong bihainim ol tok bilong Papa bilong em na givim laip bilong em bilong baim bek sin bilong yumi Jisas i kamapim olsem em i laikim tru yumi.​—⁠Ritim Jon 3:16; Rom 5:​18, 19.

5. Jisas i mekim wanem wok long nau?

Taim Jisas i bin oraitim ol sikman, kirapim bek ol man i dai pinis, na helpim ol man i karim bikpela hevi, em i kamapim long ples klia samting em bai mekim long bihain long olgeta man i bihainim tok bilong em. (Luk 18:​35-42; Jon 5:​28, 29) Bihain long Jisas i dai, God i givim bek laip long em olsem wanpela spirit. (1 Pita 3:18) Jisas i wet i stap long han sut bilong God inap long Jehova i givim strong long em bilong stap King na bosim olgeta hap bilong graun. (Hibru 10:​12, 13) Nau Jisas i mekim wok olsem King long heven, na ol disaipel bilong em i autim dispela gutnius long olgeta hap.​—⁠Ritim Daniel 7:​13, 14; Matyu 24:⁠14.

Klostu nau, Jisas bai yusim strong bilong em olsem King bilong pinisim olgeta pen na hevi, na ol manmeri husat i save kamapim ol dispela hevi. Planti milion manmeri em ol i bilip long Jisas na bihainim tok bilong em, ol bai kisim laip bilong i stap oltaim long Paradais long graun.​—⁠Ritim Song 37:​9-11.

Bilong kisim sampela save moa, lukim sapta 4 bilong dispela buk, em ol Witnes Bilong Jehova i wokim.Tru Tru Baibel i Tok Wanem?

[Piksa long pes 17]

Planti milion manmeri em ol i bilip long Jisas na bihainim tok bilong em, ol bai kisim laip long Paradais long graun