Krais Jisas—Em i Husat?
“MASKI ol i no bilong lotu Kristen, planti man ol i bilip olsem Em i wanpela bikpela tisa i gat gutpela save. Tru tumas, em i wanpela man i bin senisim tru tingting na i stap bilong planti man.” (Buk The World Book Encyclopedia) Dispela man em i husat? Em Krais Jisas, em i man bilong kirapim lotu Kristen. Yu save long em? Em i mekim sampela samting long i stap bilong yu?
Ol samting i bin kamap taim Jisas i mekim wok bilong em ol i raitim long 4-pela hap bilong Baibel ol i kolim olsem ol Gutnius. Olsem wanem? Ol dispela stori i tru? Will Durant em wanpela man i gat nem bilong raitim stori bilong ol samting i bin kamap bipo, em i skelim dispela samting na em i tok: ‘Wanpela liklik lain man nating ol i bin kamapim stori bilong wanpela bikpela man i gat gutpela pasin i save kirapim ol man long laikim em, na em i gat gutpela lo tru bilong helpim olgeta lain man i stap brata brata, olsem na yumi save ol i stori long wanpela man tru—ol i no inap kamapim nating kain stori olsem.’
Tasol planti milion man long hap bilong Esia na ol narapela hap ol i no save long Jisas. Ating ol i bilip olsem em i bin i stap bipo, tasol ol i ting em i no mekim wanpela samting long i stap bilong ol long nau, nogat tru. Sampela narapela i ting Jisas i no wanpela man ol i ken tingim em, na as bilong dispela tingting em pasin sampela man i bin mekim em ol i tok ol i bihainim Krais. Sampela man long Japan bai tok: ‘Ol “Kristen” i tromoi bom atom long Nagasaki em wanpela biktaun planti Kristen i bin i stap long en winim ol narapela biktaun long Japan.’
Tasol olsem wanem? Yu inap sutim tok long wanpela dokta olsem em i gat asua long sik bilong wanpela man sapos dispela sikman i no bihainim tok bilong dokta long kisim marasin dokta i makim bilong em? Nogat, a? Inap longtaim ol man i tok ol i Kristen ol i no bihainim rot Jisas i makim bilong winim ol hevi bilong ol long olgeta de. Olsem na no ken sakim Jisas, long wanem, ol man i tok ol i Kristen ol i no bihainim tok bilong Jisas. Mobeta yu yet yu kisim save long em. Lukim ol tok bilong Baibel na kisim save olsem Jisas em i husat tru na olsem wanem em inap long senisim laip bilong yu.
Laikim Tru Narapela
Krais Jisas em i wanpela gutpela tisa tru, em i bin i stap long Palestain, klostu 2,000 yia i go pinis. I no gat planti stori long i stap bilong Jisas taim em i pikinini. (Matyu sapta 1 na 2; Luk sapta 1 na 2) Taim em i kisim 30 krismas, Jisas i kirap mekim wok bilong em long “autim tok tru.” (Jon 18:37; Luk 3:21-23) Ol 4-pela man bilong raitim stori bilong Jisas ol i stori gut long wok autim tok bilong em insait long laspela 3 na hap yia em i bin i stap long graun.
Taim Jisas i mekim wok bilong autim tok, em i lainim ol disaipel bilong em long rot bilong stretim kain kain hevi long i stap bilong ol. Em long wanem rot? Long rot bilong laikim tru ol narapela. Long bikpela tok bilong em long maunten, em planti man i save long en, Jisas i lainim ol disaipel bilong em long kamapim pasin bilong laikim ol narapela. Em i tok: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” (Matyu 7:12) Ol man i kolim dispela lo olsem Gutpela Lo Tru. Ol dispela “arapela manmeri” Jisas i toktok long ol, ol i makim tu ol birua bilong yumi. Long dispela bikpela tok bilong em, em i tok moa olsem: “Yupela i mas laikim ol birua bilong yupela, na yupela i mas beten bai God i marimari long ol man i save mekim pasin nogut long yupela.” (Matyu 5:44) Olsem wanem? Dispela kain pasin bilong laikim tru ol narapela inap stretim planti hevi bilong yumi long nau? Hetman bilong ol Hindu long bipo, em Mohandas Ghandi i ting olsem. Em i tok: “Sapos [yumi] wok wantaim long bihainim ol tok Krais i autim antap long maunten, bai yumi inap stretim ol hevi bilong . . . olgeta kantri.” Sapos yumi bihainim ol tok Jisas i bin lainim ol man long en long pasin bilong laikim ol narapela, dispela inap stretim hevi bilong ol man.
Em i Bihainim Tru Pasin Bilong Laikim Ol Narapela
Jisas i bin bihainim ol pasin em i skulim ol man long en. Em i putim laik bilong ol narapela i go pas long laik bilong em, na em i bihainim tru pasin bilong laikim tru ol narapela. Long wanpela de Jisas wantaim ol disaipel bilong em i autim tok long planti manmeri na ol i no gat taim bilong kaikai. Jisas i luksave olsem ol disaipel bilong em i mas “malolo liklik,” olsem na ol i go long wanpela ples i no gat planti man. Tasol planti manmeri i go long dispela hap na wetim ol long kamap. Sapos yu bin stap olsem Jisas long dispela taim, bai yu mekim wanem? Jisas em i “sori tru long ol” na “em i stat long givim planti gutpela tok long ol.” (Mak 6:30-34) Pasin bilong sori tru long ol narapela i kirapim em long helpim ol.
Jisas i no helpim ol narapela, long ol samting bilong spirit tasol, nogat. Em i helpim ol long ol narapela rot tu. Olsem: Em i givim kaikai long 5,000 man (ol meri na pikinini tu i stap) ol i bin harim tok bilong em inap long apinun tru. Narapela taim em i bin givim kaikai long 4,000 manmeri. Long namba wan taim em i mekim wok long 5-pela bret na 2-pela pis, na long narapela taim em i bin mekim wok long 7-pela bret na sampela liklik pis. (Matyu 14:14-21; 15:32-38; Mak 6:35-44; 8:1-9) Em ol mirakel? Yes, em i man bilong wokim ol mirakel.
Jisas i oraitim planti sikman tu. Em i oraitim ol aipas, ol lek nogut, ol man i gat sik lepra, na ol yaupas. Na em i kirapim ol man i dai pinis! (Luk 7:22; Jon 11:30-45) Wanpela taim wanpela lepraman i askim Jisas olsem: “Sapos yu laik, yu inap long mekim mi i kamap klin.” Jisas i mekim wanem? “Jisas i putim han long em, na i tokim em olsem, ‘Mi laik yu kamap klin.’ ” (Mak 1:40, 41) Jisas i laik tru long helpim ol. Long rot bilong ol mirakel em i kamapim klia olsem em i laikim tru ol man i gat hevi.
Yu hatwok long bilipim dispela? Jisas i wokim planti mirakel long ai bilong ol man. Maski ol birua bilong em i laik painim asua long em long olgeta taim, ol i tokaut olsem em i save wokim ol mirakel. (Jon 9:1-34) Na tu, ol mirakel bilong em i gat as bilong en. Ol i kamapim klia olsem Jisas em man God i salim i kam.—Jon 6: 14.
Taim yumi skelim ol samting Jisas i skulim yumi long en na i stap bilong em, dispela bai kirapim yumi long laikim em na long bihainim pasin bilong em long laikim ol narapela. Tasol Jisas i mekim sampela samting moa long i stap bilong yumi. Em i no wanpela bikpela tisa tasol i save skulim ol man long pasin bilong laikim ol narapela. Em i tok, taim em i no kamap man yet long graun em i bin stap olsem dispela wanpela Pikinini Bilong God. (Jon 1:14; 3:16; 8:58; 17:5; 1 Jon 4:9) Bihain long em i bin stap olsem man long graun, em i stap laip yet na dispela em bikpela samting long yu. Baibel i tok olsem Jisas i bin kirap bek na nau em i stap olsem King long Kingdom bilong God. (KTH 11:15) Jisas i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3; 20:31) Tru tumas, sapos yumi kisim save long Krais Jisas bai yumi inap kisim laip oltaim long Paradais! Wanem samting moa yu inap mekim? Gutpela yu ken kisim save moa long Jisas na olsem wanem dispela save i kirapim yu long bihainim pasin bilong em. (2 Korin 5:14) Ol Witnes Bilong Jehova bai amamas long helpim yu.—Jon 13:34, 35.
Ol tok bilong Baibel long dispela nius mipela i kisim long Buk Baibel bilong 1996; tasol taim mipela kisim long Baibel Inglis New World Translation of the Holy Scriptures na tanim long tok Pisin mipela putim NW bihain long en.