Bilong Wanem Yumi Mas Bilip Long Krais Jisas?
“PLANTI man i no Kristen ol tu i bilip olsem Em i wanpela bikpela tisa i gat gutpela tingting na save. Em i wanpela man i gat strong bilong stiaim wokabaut bilong ol man.” (The World Book Encyclopedia) “Em” i husat? Em Krais Jisas, man i kirapim lotu Kristen.
Maski dispela buk i tok wanem, long planti handet milion manmeri long hap bilong Is na sampela narapela hap, Krais Jisas em i wanpela man ol i no save long en—ol i tingim nem tasol bilong em ol i bin lukim long ol buk bilong haiskul. Na tu, insait long ol lotu i gat nem Kristen, i gat sampela pris pasto na ol tisa bilong lotu ol i tok olsem yumi no save tru long Jisas, na ol i no bilip tumas long ol tok bilong fopela gutnius long Baibel i gat stori bilong i stap bilong Jisas long en.
Olsem wanem? Ol fopela man bilong raitim Gutnius, ol i kamapim nating stori bilong Jisas? Nogat tru! Wanpela saveman i gat nem, em Will Durant, em i skelim ol stori bilong ol dispela Gutnius, na em i tok: “Ol man bilong raitim Gutnius bilong Jisas, ol i no bikpela saveman bilong graun, tasol insait long liklik hap taim, ol i bin kamapim stori bilong wanpela man i gat bikpela strong na ol gutpela gutpela pasin i save kirapim ol man long laikim em, na em i gat gutpela lo tru, na long rot bilong em bai ol man i stap brata brata, olsem na yumi save ol i stori long wanpela man tru—ol i no inap kamapim nating kain stori olsem. Inap 200 yia samting ol man i bin sutim tok long ol dispela stori bilong Krais, tasol stori bilong laip na pasin na ol tok bilong Krais i stap yet, na planti man i save long dispela samting tru i bin kamap long bipo.”
Tasol i gat sampela man em ol i no laik save long Jisas, long wanem, ol i lukim sampela pasin nogut bilong ol man i tok ol i Kristen. Sampela man long Japan i save tok, ‘Ol i tromoi bom atom long Nagasaki. Na long Nagasaki i gat planti Kristen, winim planti siti long Japan.’ Tasol olsem wanem? Sapos wanpela man i sik, long wanem, em i no bihainim tok bilong dokta, inap yumi sutim tok long dokta? Inap longtaim pinis ol man i tok ol i Kristen ol i bin sakim ol gutpela tok bilong Jisas, em ol tok i olsem marasin bilong stretim ol hevi bilong ol manmeri. Tasol Jisas i tokim yumi long rot bilong stretim ol hevi i save painim yumi long olgeta wan wan de, na ol hevi i save painim ol manmeri long olgeta hap bilong graun. Olsem na mipela i laik bai yu kaunim stori i kamap bihain long dispela na bai yu yet i ken save, Jisas i wanem kain man.