Fopela Gutnius−Tok i Tru o Stori Nating?

SAMPELA man i save skelim skelim tok bilong Baibel na bai ol i ken painim hap tok kranki long en. Longtaim pinis ol dispela man i sutim kain kain tok long Gutnius bilong Krais, em Matyu na Mak na Luk na Jon i raitim. Ol i tok, planti tok insait long ol dispela stori i pait wantaim ol narapela tok. Na ol i tok ol man i bin raitim ol dispela tok planti planti yia bihain long taim ol dispela samting i kamap, olsem na stori bilong en i no stret. Ol i tok, stori bilong ol mirakel bilong Krais em stori giaman tasol bilong ol dispela man bilong raitim tok.

Wanpela man bilong raitim stori bilong bipo, em Will Durant, em i raitim wanpela buk (Caesar and Christ) na long dispela buk em i wok long skelim ol samting dispela fopela Gutnius i stori long en, olsem i stret o nogat. Em i tok, tru i gat sampela tok i olsem i pait wantaim narapela tok, tasol dispela i liklik samting tasol, i no as tru bilong stori. Em i tok, ol Gutnius i stori long wankain samting−tok bilong ol i no pait. Ol i mekim wankain stori na yumi inap save gut long Krais.

Tasol olsem wanem long tok ol dispela man i sutim long dispela fopela Gutnius, em ol i tok Matyu na Mak na Luk na Jon ol i no stori long samting tru i bin kamap long bipo? Durant i tok moa, olsem: ‘Ol dispela man i skelim skelim ol tok bilong Nupela Testamen−sapos ol i skelim strong stori sampela narapela man bilong bipo i bin raitim na ol man i bilip long en, olsem tok bilong Hamurabi o Devit o Sokratis, orait bai tok bilong ol dispela man i kamap olsem stori nating tasol. Ol evanselis i raitim dispela fopela Gutnius ol i gat strongpela tingting long ol samting bilong lotu, tasol ol i stori long sampela samting ol man i stori nating bai haitim−ol i stori long ol aposel i resis long kisim bikpela namba insait long Kingdom, na ol i ranawe taim ol man i holim Jisas, na Pita i sakim Jisas na tok em i no save long Em, . . . Ol man i kaunim ol dispela stori ol inap save, dispela man ol i raitim stori bilong em, em i wanpela man tru em i bin stap long bipo.’

Na bihain Durant i tok: ‘Sapos ol dispela man inap kamapim stori bilong wanpela man na stori gut long strong bilong em na ol gutpela pasin bilong em na kirapim ol man long laikim em tru, na ol i stori long gutpela lo tumas na olgeta man bai i stap brata brata tru, na ol i stori nating tasol, orait dispela em i wanpela mirakel i winim tru ol mirakel fopela Gutnius i stori long en. Inap 200 yia samting ol man i bin sutim tok long ol dispela stori bilong Krais, tasol stori bilong laip na pasin na ol tok bilong Krais i stap yet, na planti man i save long dispela samting tru i bin kamap long bipo.’