Skin Bilong Olgeta Man Bai Gutpela Olgeta

OLSEM pasin, na sindaun, na rot bilong kisim marasin samting, skin yumi kisim long papamama, em tu i mekim na yumi gat strongpela skin o yumi save sik planti. Sapos papa o mama i gat wanpela sik, ating bihain taim yumi go bikpela wankain sik i painim yumi.

Wanpela saveman bilong helt i tok: ‘Skin yumi kisim long papamama i makim olsem yumi no ken sik tumas, o yumi bai stap laip longpela taim, o yumi dai long bel bilong mama o taim em i karim yumi.’

Maski yumi kisim sik long papamama o nogat, sapos het i pen, o ol masol bilong yumi i go strong, o bel na tingting bilong yumi i les tru, o ol bun bilong yumi i no strong, o yumi gat sik long klok, o narapela sik​—sik i painim yumi, long wanem, skin na tingting i no gutpela olgeta. Wanem as bilong sik?

As Bilong Sik

Wanpela dokta i bin stap long taim bilong ol aposel, em Luk, em i bekim dispela askim long wanpela pas spirit holi i kirapim em long raitim. Dispela pas i stori long olgeta wok na pasin bilong Jisas. Luk i raitim tok olsem: Wanpela de sampela man i karim wanpela man i kam long Jisas. Ol i laik Jisas i oraitim bek dispela man, em bun bilong em i dai olgeta. Jisas i bin tok: “Pren, mi lusim pinis ol sin bilong yu.” Na bilong makim olsem em i gat strong long lusim sin bilong man, Jisas i tok: “Mi tokim yu, yu kirap na kisim bet bilong yu, na yu go long haus bilong yu.” Man i kirap na wokabaut i go! Wanem samting i kamap? “Olgeta manmeri i kirap nogut tru long lukim dispela samting . . . na ol i litimapim nem bilong God.”​—Luk 5:​17-26.

Jisas i stori long wanem kain sin? Bekim bilong dispela askim i helpim yumi long save bilong wanem yumi save sik, go lapun, na dai. ‘Spirit bilong God yet i bin kamapim olgeta tok bilong Baibel,’ olsem na Baibel inap helpim yumi long save long dispela kain sin. (2 Timoti 3:16; 2 Pita 1:21) Baibel i tok, God i wokim skin bilong Adam i gutpela olgeta, na em inap amamas oltaim long gutpela skin bilong em sapos em i bihainim tok bilong God.

Tasol laik bilong Adam na em i brukim lo bilong God. Taim em i bikhet na em i no laik aninit moa long Man i bin wokim em, em i kamap sinman. Wanem samting i kamap? Nau skin bilong Adam i no gutpela olgeta, em i save sik, na bihain em i dai. Olsem na sin i as bilong sik na indai Adam i bin kisim.

Sapos papamama i gat sik, dispela sik inap kalap long pikinini bilong ol, long wanem, pikinini i kisim skin bilong papamama. Olsem na Adam i no inap givim laip i stap gutpela olgeta long ol pikinini bilong em, em yumi ol man. Yumi tu i kamap sinman na kisim sik. Olsem na sin bilong Adam i as bilong olgeta sik. (Stat 2:17; 3:​1-19; Rom 5:12) Wanem samting inap baim bek yumi long sin?

Rot Bilong Stretim Hevi

Skin bilong olgeta man i go nogut, long wanem, Adam i bikhet long lo bilong God. Olsem na bilong kisim skin i gutpela olgeta na no ken sik samting, i mas i gat wanpela man bilong kisim bek yumi long dispela samting i bagarapim yumi. (Rom 5:​18, 19) Olsem wanem? Bilong baim bek dispela kain laip, wanpela man i gutpela olgeta wankain tru olsem Adam long pastaim, em i mas lusim gutpela laip bilong em olsem ofa, dispela i olsem pe i wankain stret. Lo bilong God i tok, laip i pe o bekim bilong laip.​—Lo 19:21.

Tasol i no gat wanpela man long lain bilong Adam i gutpela olgeta na em inap baim bek yumi​—olgeta i sinman. Tasol long pasin sori Jehova i opim rot na givim Pikinini bilong em, Jisas, em pikinini i gutpela olgeta, na em i “givim laip bilong em bilong baim bek planti manmeri,” na long dispela rot “bai yumi kisim laip long em.”​—Matyu 20:28; 1 Jon 4:9; Song 49:7.

Ol samting Jisas i mekim taim em i stap long graun i makim olsem Papa bilong em, Jehova, i givim namba long em long lusim sin bilong ol man, olsem em i bin mekim long dispela man em bun bilong em i dai olgeta, na Jisas i tok: “Mi lusim pinis ol sin bilong yu.” Jisas i oraitim bek man na em i wokabaut i go. Planti taim Jisas i mekim wok long strong bilong God na wantu tasol ol aipas, yaupas, na planti sikman moa i orait bek.

Baibel i stori long ol mirakel bilong Jisas olsem: “Planti lain manmeri i kam long em. Na ol i bringim ol lek nogut na ol aipas na ol bun krungut na ol mauspas na planti arapela sikman tu, na ol i putim klostu long lek bilong Jisas. Na em i mekim ol i kamap orait. Na ol manmeri i lukim ol mauspas i toktok na ol . . . lek nogut i wokabaut na ol aipas i lukluk, na ol i tingting planti.” (Matyu 15:​30, 31) Na wanpela samting i narakain tru​—Jisas i gat strong long kirapim bek man i dai pinis. Baibel i stori long sampela man i dai pinis na Jisas i bin kirapim bek ol.​—Luk 7:​11-16; 8:​49-56; Jon 11:​14, 38-44.

Ol dispela mirakel Jisas i bin wokim i helpim yumi long save, i no gat wanpela sik Jisas i no inap oraitim. Olsem wanem? Em bai mekim wok gen long strong bilong God? Dispela strong bai helpim yumi tu?

Skin Bai Kamap Gutpela Olgeta

Ol tok profet bilong Baibel i makim olsem Jisas i mekim pinis wok king long gavman bilong God long heven. God i givim namba long em bilong rausim ol gavman bilong nau na bosim graun. (Song 110:​1, 2; Daniel 2:44) Olgeta samting dispela beten Jisas i bin lainim ol disaipel bilong em long en bai kamap tru olgeta: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:10) Wanpela laik bilong God taim Kingdom bilong em long heven i bosim graun, em long stretim bek skin bilong olgeta man na sik i no ken painim ol.

Olsem na i no long spirit tasol, long skin tu, “ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.” Na bai i no gat wanpela man bai i tok, “Mi gat sik.”​—Aisaia 33:24; 35:​5, 6.

Aninit long Kingdom bilong God, ol man i no ken i dai olsem nau, long wanem, skin bilong ol bai gutpela olgeta. Baibel i tok promis olsem: “Olgeta manmeri i bilip long em [Jisas] . . . bai ol i kisim laip i stap gut oltaim oltaim.” Na “God i save givim nating presen long yumi, em laip i stap oltaim.” (Jon 3:16; Rom 6:23) Tru tumas, bipo tru man bilong raitim Song i tok promis: “Ol stretpela man bai i kisim graun God i givim ol, na bai ol i stap oltaim long en.” (Song 37:29) Olsem Jisas i bin mekim taim em i stap long graun, em bai kirapim ol daiman na opim rot bilong ol i ken kisim skin i gutpela olgeta, no ken sik. Baibel i tok: “God bai i kirapim bek ol man i dai pinis, em ol stretpela man na ol man nogut wantaim.”​—Aposel 24:15.

Aninit long Kingdom graun bai kamap gutpela, olsem na hangre, em wanpela as na nau planti man i kisim sik, i no ken kamap moa. Baibel i tok profet olsem: “Ol diwai i save karim kaikai, bai ol i karim planti moa. Na planti kaikai bai i kamap long ol gaden. . . . Ol manmeri bilong mi . . . bai ol i stap gut long graun bilong ol yet.” (Esekiel 34:27) “Planti gutpela kaikai i kamap pinis long graun bilong mipela. God, em i God bilong mipela, em i bin mekim gut tru long mipela.” (Song 67:6) “Planti rais na wit samting i ken kamap long ol gaden.” (Song 72:16) “Ples wesan nating wantaim ples drai bai ol i amamas tru, long wanem, ol naispela plaua bai i kamap na karamapim ol dispela hap.”​—Aisaia 35:1.

Laspela buk long Baibel i stori gut long sindaun bilong ol man long nupela taim God bai kamapim olsem: “[God] bai i mekim drai wara i stap long ai bilong olgeta . . . Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.”​—KTH 21:4.

Olsem wanem? Yu save tok​—‘Man! Mi hatwok long bilipim dispela tok.’ Orait, tingim: Taim Adam i no kamap sinman yet, skin bilong em i gutpela olgeta, em i no save sik. Sapos long dispela taim wanpela man inap toktok wantaim Adam na em i tokim em, bihain ol sikman na ol lapun bai pulap long graun, ating Adam i hatwok long bilipim tok bilong em, a? Tasol nau, dispela ol samting i stap pinis.

Tasol aninit long Kingdom bilong God, tru tumas, skin bilong ol man bai kamap gutpela olgeta, ol i no ken sik samting. Baibel i tok: “Dispela tok em i tru olgeta.” (KTH 21:5) Samting God i tok bai kamap, em bai kamap, long wanem, “God i no inap tru long giaman.”​—Hibru 6:18.

Orait, yu ken mekim wanem long nau na yu inap amamas long kisim ol dispela gutpela samting? Rot bilong i stap oltaim, no gat sik samting, Jisas i bin tokaut long en taim em i beten long Papa bilong em olsem: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”​—Jon 17:3.

Askim ol Witnes Bilong Jehova long lainim yu long tok bilong Baibel long haus bilong yu yet, no gat pe. Ol bai amamas long helpim yu long save moa long ol gutpela tok promis bilong God. Dispela em namba wan rot bilong helpim yu long wokabaut long rot bilong kisim skin i gutpela olgeta, no gat sik samting!

[Piksa long pes 14]

Long nupela taim God bai kamapim, skin bilong olgeta man bai gutpela olgeta