Namba 10 Hap
Gutpela Nupela Taim God Bai Kamapim
1, 2. Taim Armagedon i pinis, wanem samting bai kamap?
TAIM Armagedon, em pait bilong God, i pinis, bai gutpela nupela taim i kamap. Ol man i abrusim bagarap long Armagedon ol i bin stap gut long God, na bai ol i stap long dispela nupela taim na kisim ol gutpela gutpela samting i kam long han bilong God!
2 Kingdom bilong God bai bosim graun na bai ol man i wok long kamapim bek paradais long graun. Ol bai wok strong long mekim ol gutpela wok bilong helpim ol narapela, na dispela bai helpim olgeta manmeri i stap laip long dispela taim. Graun bai kamap gutpela ples bilong ol man i ken i stap long en na i stap bel isi na amamas.
Stretpela Pasin i Senisim Pasin Nogut
3. Bihain liklik long Armagedon wanem bikpela hevi bai pinis long yumi?
3 Olgeta samting Satan i bin kamapim i mas pinis pastaim, na bai ol dispela gutpela samting i ken kamap. Bai i no gat moa ol samting i save brukim ol man, olsem ol lotu giaman, na sampela pasin kranki i bosim sindaun bilong ol man, na ol gavman. Na bai i no gat moa ol tok giaman bilong Satan bilong paulim tingting bilong ol man; ol lain i kamapim ol dispela tok bai pinis. Spirit o win bilong dispela graun bilong Satan bai pinis olgeta! Bikpela hevi bilong yumi bai pinis!
4. Stori long bikpela senis bai kamap long ol samting ol man i lain long mekim.
4 Ol tingting bilong ol gavman bilong graun i save bagarapim ol man, ol bai pinis; ol gutpela tingting i kam long God bai helpim ol man. God i tok: “Bai mi yet mi skulim ol pikinini bilong yu.” (Aisaia 54:13) Long olgeta taim bai God i lainim ol man, na bai ol i save gut long em; “dispela save bai inapim olgeta hap graun olsem solwara i inapim mak bilong en olgeta.” (Aisaia 11:9) Ol man i no ken lain moa long ol pasin nogut; bai God i “skulim ol long stretpela pasin.” (Aisaia 26:9) Bai olgeta man i bihainim gutpela tingting na gutpela pasin.—Aposel 17:31; Filipai 4:8.
5. Wanem samting bai painim olgeta pasin nogut na man nogut?
5 Olsem na bai i no gat moa pasin bilong kilim man i dai, o pasin pait, o bagarapim meri, o pasin stil, o narapela pasin nogut. Bai i no gat wanpela man i karim hevi long pasin nogut narapela man i mekim. Sindaun 10:30 i tok: “Ol stretpela man i save stap gut . . . Tasol ol man nogut i no inap i stap olsem. Nogat.”
No Gat Sik Moa
6, 7. (a) Taim Kingdom i bosim graun, wanem samting nogut bai pinis? (b) Taim Jisas i stap long graun em i mekim wanem na em i kamapim klia dispela samting?
6 Long nupela taim, olgeta samting nogut pasin bikhet bilong pastaim i bin kamapim bai pinis. Taim Kingdom i bosim graun, bai olgeta sik i pinis, na bai ol man i no go lapun moa. Long nau, maski skin bilong yu i strongpela liklik, bai yu go lapun, na bai ai i kamap tudak, na tit i bagarap, na yau i no harim gut, na skin i slek, na klok na lewa samting i no wok gut, na bai yu dai.
7 Tasol i no longtaim na ol dispela samting nogut i painim yumi long rot bilong namba wan tumbuna papamama bai i pinis. Yu tingim ol samting Jisas i bin mekim taim em i stap long graun na i makim olsem bihain bai i no gat sik moa? Baibel i tok: “Planti lain manmeri i kam long em. Na ol i bringim ol lek nogut na ol aipas na ol bun krungut na ol mauspas na planti arapela sikman tu, na . . . em i mekim ol i kamap orait.” Ol manmeri i lukim ol dispela sikman i kamap orait, na ol i kirap nogut.—Matyu 15:30, 31.
8, 9. Stori long amamas bai kamap long nupela taim long ol man em skin bilong ol i kamap gutpela, no gat sik?
8 Taim olgeta sik bilong yumi i pinis long nupela taim bihain bai yumi amamas tru! Pen i save painim yumi long taim yumi gat sik, em bai i pinis olgeta. “No gat man . . . bai i tok olsem, ‘Mi gat sik.’ ” “Ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem dia, na ol mauspas bai ol i singaut na amamas.”—Aisaia 33:24; 35:5, 6.
9 Bai yumi amamas tru long kirap long moningtaim na lukim olsem nau skin i stap gutpela, a? Ol lapun bai amamas long lukim skin bilong ol i kamap strong gen olsem long taim ol i yangpela, na bai ol i amamas long save, bihain bai ol i stap gutpela olgeta olsem Adam tupela Iv long pastaim. Baibel i tok promis olsem: “Bodi bilong dispela man bai i kamap gutpela na strongpela gen, wankain olsem em i bin i stap long taim em i yangpela man.” (Jop 33:25) Bai yumi amamas long rausim ol aiglas, na liklik masin bilong harim gut tok, na stik bilong wokabaut, na wilsia, na marasin! Bai i no gat wok moa long ol haus sik na ol kain kain dokta.
10. Olsem wanem long i dai?
10 Taim skin bilong ol man i kamap gutpela olsem, bai ol i no laik i dai. Na ol i no ken i dai, long wanem, bai ol i no kalabus moa long sin na i dai. Krais “i mas i stap king i go inap em i daunim olgeta birua bilong en. Em i pinisim pinis olgeta arapela birua, orait em bai i pinisim dai tu.” “God i save givim nating presen long yumi, em laip i stap oltaim.”—1 Korin 15:25, 26; Rom 6:23; lukim tu Aisaia 25:8.
11. Kamapim Tok Hait i stori olsem wanem long ol gutpela samting bilong nupela taim?
11 Laspela hap bilong Baibel i stori long ol gutpela samting God bai mekim bilong helpim ol manmeri i stap long Paradais, long wanem, em i save tingim tru ol. Baibel i tok: “ [God] bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—Kamapim Tok Hait 21:3, 4.
Ol Man i Dai Pinis Bai Kirap Bek
12. Olsem wanem Jisas i bin kamapim klia strong God i givim long em bilong kirapim bek ol man?
12 Jisas i bin oraitim ol sikman na ol lek nogut, na tu em i kirapim bek sampela man long matmat. Long dispela rot em i kamapim klia strong God i bin givim long em bilong kirapim bek man. Yu tingim wanpela taim Jisas i bin go long haus bilong wanpela man, em pikinini meri bilong em i dai? Jisas i tokim dispela liklik meri: “Yu kirap.” Na wanem samting i bin kamap? “Kwiktaim dispela liklik meri i kirap na i wokabaut.” Ol manmeri i lukim dispela samting na “ol i kirap nogut tru.” Ol i amamas nogut tru!—Mak 5:41, 42; lukim tu Luk 7:11-16; Jon 11:1-45.
13. Wanem ol kain man bai kirap bek?
13 Long nupela taim “God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Long dispela taim bai Jisas i mekim wok long strong God i bin givim long em bilong kirapim bek ol man, long wanem, em yet i tok: “Kirap bek, em mi yet. Na laip, em mi yet. Na man i bilip long mi, maski sapos em i dai, em bai i stap laip yet.” (Jon 11:25) Na em i tok tu: “Olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.”—Jon 5:28, 29.
14. I dai bai pinis, olsem na wanem samting moa bai pinis?
14 Ol man i dai pinis, taim narapela narapela lain bilong ol i kirap bek na bung gen wantaim famili bilong ol, bai bikpela amamas i kamap long olgeta hap bilong graun! Bai i no gat toksave moa long ol nius long husat husat i dai pinis, na bai ol man i stap laip yet i bel hevi. Nogat. Ating bai i gat toksave long husat husat nau tasol ol i kirap bek na bel bilong ol famili bilong ol bai amamas. Ol man i no ken i dai moa, olsem na bai i no gat moa wok bilong planim man i dai pinis o ol ples matmat!
No Gat Pait Moa
15. Olsem wanem ol man bai mekim tru samting Maika i tok profet long en?
15 Long olgeta samting ol man i mekim bai i no gat pait moa. Ol pait, na ol man i save kirapim ol pait, na ol man bilong wokim ol samting bilong pait, ol bai pinis. Long wanem, bai ol manmeri i no tingim moa lain o skin bilong man na ol i bruk bruk. Long dispela taim “bai ol i paitim bainat bilong ol i kamap olsem ain bilong brukim graun, . . . Na olgeta lain manmeri bai i no pait moa, na bai ol i no skul moa long pait.”—Maika 4:3.
16. God bai mekim wanem na bai pait i no inap kamap gen?
16 Ating yu kirap nogut long dispela, long wanem, long bipo yet na i kam inap long nau ol man i bin pait na kapsaitim blut bilong planti man. Tasol as bilong dispela i olsem ol i bin i stap aninit long ol man na ol spirit nogut. Long nupela taim aninit long Kingdom, bai God i “mekim i dai pait long olgeta hap graun. Em i save brukim olgeta banara na spia, na i save kukim ol hap plang [bilong pait] long paia.”—Buk Song 46:8, 9.
17, 18. Long nupela taim ol man na ol animal bai stap olsem wanem wantaim?
17 Ol man wantaim ol animal bai stap isi wantaim olsem long Iden. (Stat 1:28; 2:19) God i tok: “Long dispela taim bai mi mekim wanpela kontrak wantaim olgeta wel abus na ol snek na ol pisin. Na bai ol i . . . stap isi long dispela graun na ol i no ken pret moa.”—Hosea 2:18.
18 Baibel i tok: “Ol wel dok na ol pikinini sipsip bai i stap gut wantaim, na ol lepat bai i slip wantaim ol pikinini meme. Ol pikinini bulmakau wantaim ol yangpela laion bai i raun na kaikai wantaim, na ol liklik manki bai i was long ol.” Inap long olgeta taim bihain bai ol animal i no ken bagarapim moa ol man o narapela animal. “Ol laion bai i kaikai gras olsem ol bulmakau”!—Aisaia 11:6-9; 65:25.
Graun Bai Kamap Paradais
19. Graun bai kamap wanem samting?
19 Olgeta hap bilong graun bai kamap gutpela ples paradais bilong ol man i ken i stap long en. Olsem na Jisas inap tok promis long wanpela man i bilip long em, olsem: “Bai yu stap wantaim mi long [Paradais].” Baibel i tok: “Ples wesan nating wantaim ples drai bai ol i amamas tru, long wanem, ol naispela plaua bai i kamap na karamapim ol dispela hap. . . . Na ol wara bai i kamap . . . na ran i go long olgeta hap.”—Luk 23:43; Aisaia 35:1, 6.
20. Olsem wanem na bihain hangre i no ken bagarapim moa ol man?
20 Taim Kingdom bilong God i bosim graun, hangre i no ken bagarapim moa ol planti milion man. “Planti rais na wit samting i ken kamap long ol gaden bilong ol manmeri.” “Ol diwai i save karim kaikai, bai ol i karim planti moa. Na planti kaikai bai i kamap long ol gaden. . . . Na bai ol [man] i stap gut long graun bilong ol yet.”—Buk Song 72:16; Esekiel 34:27.
21. Olsem wanem long i no gat ples slip, na ol haus nogut, na ol hap i gat planti raskol?
21 Na bai i no gat sampela man i stap rabis, o i no gat ples slip, o i stap long haus nogut, o long hap i gat planti raskol. “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. Ol birua bai i no inap kam moa na rausim ol.” “Olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.”—Aisaia 65:21, 22; Maika 4:4.
22. Baibel i stori olsem wanem long ol blesing bai kamap long wok bos bilong God?
22 Ol manmeri bai kisim olgeta dispela gutpela samting na planti samting moa long Paradais. Buk Song 145:16 i tok: “ [God] i save givim kaikai samting long olgeta inap long ol i stap gut.” Olsem na Baibel i tok: “Ol manmeri i daunim nem bilong ol yet bai God i givim olgeta graun long ol. Bai ol i sindaun gutpela tumas na amamas i stap. . . . Ol stretpela man bai i kisim graun God i givim ol, na bai ol i stap oltaim long en.”—Buk Song 37:11, 29.
Ol Samting Bilong Bipo Bai Pinis
23. Olsem wanem Kingdom bilong God bai stretim olgeta pen na hevi yumi bin karim?
23 Kingdom bilong God bai pinisim olgeta samting nogut i bin givim hevi long ol man inap 6,000 yia pinis. Ol man i bin karim bikpela pen na hevi, tasol ol amamas bilong dispela taim bihain bai moa yet. Bai ol man i no tingim moa pen na hevi i bin painim ol. Ol gutpela tingting na wok bilong ol long olgeta de bai mekim na bai ol i no tingim moa ol dispela samting nogut bilong bipo.
24, 25. (a) Wanem samting bai kamap, olsem Aisaia i tok profet long en? (b) Olsem wanem yumi ken save, bihain bai yumi no tingim moa pen na hevi yumi karim bipo?
24 God i save tingim tru ol man na em i tok: “Mi wokim nupela skai [nupela gavman long heven bilong bosim ol man] na nupela graun [ol stretpela manmeri long graun]. Na ol man bai i no inap tingim moa ol samting i bin kamap bipo. Yupela i ken bel gut na amamas oltaim long nupela samting nau mi wokim.” “Nau olgeta hap graun i ken i stap bel isi gen, na olgeta manmeri i ken singaut amamas.”—Aisaia 14:7; 65:17, 18.
25 Olsem na long rot bilong Kingdom, bai God i pinisim pasin nogut i bin stap longtaim. Na inap long olgeta taim bihain bai em i kamapim klia olsem em i tingim tru yumi, long wanem, bai em i givim planti planti blesing long yumi, na bai yumi no tingim moa ol pen na hevi bilong bipo.
26. Bilong wanem God bai stretim pen na hevi yumi bin karim?
26 Em rot bilong God long stretim pen na hevi ating yumi bin karim long dispela taim nogut. Em i save, i no asua bilong yumi na sin i stap long skin bilong yumi; em asua bilong namba wan tumbuna papamama bilong yumi. Na i no asua bilong yumi na yumi kamap long graun bilong Satan. Sapos Adam tupela Iv i bin stap gut long God, bai yumi kamap long gutpela ples paradais. Olsem na God bai mekim bikpela pasin sori tru bilong stretim ol hevi ol narapela i bin putim long yumi.
27. Truim bilong wanem ol gutpela tok profet bai kamap long nupela taim?
27 Long nupela taim ol manmeri bai i stap fri tru olsem Rom 8:21, 22 i tok: “Long taim God i makim, God bai i pinisim dispela kalabus bilong bagarap nau olgeta samting i stap long en, na bai olgeta samting i stap gutpela tru [olsem] ol pikinini bilong God. Yumi save, olgeta samting God i bin wokim, olgeta i pilim pen olsem meri i laik karim pikinini. Na olgeta i krai nogut i stap, i kam inap long nau.” Long nupela taim bai ol man i lukim ol samting i kamap tru olsem dispela beten i tok: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:10) Gutpela pasin bai kamap long Paradais long graun wankain olsem i stap long heven.
[Ol Piksa long pes 23]
Long nupela taim, ol lapun bai kamap yangpela gen
[Piksa long pes 24]
Olgeta kain sik bai pinis long nupela taim
[Piksa long pes 25]
Long nupela taim ol man i dai pinis bai kirap bek na i stap laip
[Piksa long pes 26]
‘Ol i no ken skul moa long pait’
[Ol Piksa long pes 27]
Ol man na ol animal bai stap isi wantaim long Paradais
[Piksa long pes 27]
‘God i save givim kaikai samting long olgeta inap long ol i stap gutpela’
[Piksa long pes 28]
Kingdom bilong God bai stretim olgeta pen na hevi yumi bin karim