Skin i Gutpela Olgeta, Em i Olsem Driman Nating Tasol?
OLSEM WANEM? Yu bin kisim bikpela sik o dokta i bin katim yu? Sapos dispela samting i bin painim yu, ating nau yu amamas tru long laip bilong yu, winim bilong bipo. Tasol maski yu gat strongpela skin o nogat, yu bilip olsem yu inap kisim skin i gutpela olgeta, no gat sik samting? Ating i olsem dispela samting i no inap kamap, long wanem, planti man i gat ol bikpela sik olsem kensa o sik bilong klok. Tru tumas, yumi planti i save sik sampela taim, tasol skin i gutpela olgeta i no olsem driman nating.
God i no wokim ol man bambai ol i mas hatwok long karim ol hevi sik na indai i save kamapim, nogat; em i wokim skin i gutpela, no gat sik. Olsem na bilong daunim sik na indai, Jehova i wokim rot bambai yumi ken stap oltaim, no gat sik samting. Dispela rot em ofa bilong Krais Jisas. “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Ol man i stap oltaim long nupela taim God i tok promis long kamapim, bai ol i no ken hatwok long skin i sik o lapun. Sapos olsem, wanem samting bai kamap long sik?
Sik Bai Pinis
Pasin bilong Krais Jisas long oraitim sik em piksa bilong samting bai kamap bihain. Baibel i stori long ol dispela mirakel olsem: “Ol aipas ol i lukluk gen, na ol lek nogut ol i wokabaut. Skin bilong ol man i gat sik lepra, em i kamap klin, na ol yaupas i harim toktok. Ol man i dai pinis, ol i kirap gen, na ol rabisman i harim gutnius.” (Matyu 11:3-5) Tru tumas, olgeta sikman i go long Jisas “ol i kamap orait gen.” (Matyu 14:36) Olsem na “ol manmeri i lukim ol mauspas i toktok na ol bun krungut i kamap orait na ol lek nogut i wokabaut na ol aipas i lukluk, na ol i tingting planti. Na ol i litimapim nem bilong God bilong Israel.”—Matyu 15:31.
Tru, i no gat wanpela man long nau em inap oraitim ol sikman olsem, tasol yumi inap bilip olsem taim God i bosim graun, skin bilong olgeta manmeri bai gutpela olgeta—sik bilong tingting na skin bai pinis olgeta. Tok promis bilong God i stap long Kamapim Tok Hait 21:3, 4: “Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”
Man! Tingim wanpela taim na i no gat wok moa long ol haus sik na klinik na ol kampani bilong wokim marasin na ol samting bilong stretim sik! Na long Paradais i kamap bek, bel hevi na ol sik bilong tingting bai pinis olgeta. Yumi bai amamas tru long i stap bilong yumi; na amamas bai stap long bel bilong yumi oltaim. Tru tumas, bikpela strong bilong God bai kirapim ol samting long skin bilong man na bai skin bilong em i wok long kamap nupela gen, na ol gutpela samting bilong ofa bilong Krais bai pinisim ol samting nogut sin i save mekim long skin. “I no gat man . . . bai i tok olsem, ‘Mi gat sik.’ ”—Aisaia 33:24.
Gutpela samting tru yu inap wetim—em long kamap gutpela olgeta long skin na spirit aninit long Kingdom bilong God! Taim yu bihainim stretpela tingting nau long ol samting yu mekim long i stap bilong yu na kisim ol kaikai samting bilong helpim gut skin, yu ken wetim ol gutpela samting God bai kamapim long nupela taim. Taim yu stap long graun, Jehova i ken ‘givim ol gutpela samting long yu, na mekim yu i kamap yangpela gen na strong olsem tarangau’!—Song 103:5.