God i Save Tingim Tru Yu
EM PASIN bilong yumi man long singaut long God bilong helpim yumi taim bikpela hevi i painim yumi. Yumi save mekim olsem, long wanem, God i helpim yumi taim bikpela hevi i painim yumi. Em i stret, long wanem, em “i gat biknem na i gat olgeta strong” na “yumi no inap makim save bilong en.” (Song 147:5) Em inap tru long helpim yumi long winim ol hevi bilong yumi. Na tu, Baibel i singautim yumi long “autim olgeta hevi na olgeta tingting bilong [yumi] long em.” (Song 62:8) Tasol bilong wanem planti man i pilim olsem God i no save bekim ol prea bilong ol? Dispela i makim olsem em i no tingim ol man?
Yu no ken hariap na sutim asua i go long God olsem em i no save mekim samting bilong stretim ol hevi; gutpela yu tingting i go bek long taim yu bin i stap pikinini. Olsem wanem? Taim papamama i no mekim olgeta samting yu bin askim ol long mekim, yu bin sutim tok long ol olsem ol i no laikim yu? Planti pikinini i save tok olsem. Tasol taim yu kamap bikpela pinis yu kisim save olsem i gat kain kain rot bilong kamapim pasin laikim, na pasin bilong tok yes long olgeta samting pikinini i laikim i no pasin laikim tru tru.
Olsem tasol sapos Jehova i no save bekim ol prea bilong yumi long rot yumi laikim, dispela i no makim olsem em i givim baksait long yumi. Tru, God i save kamapim long kain kain rot olsem em i tingim yumi.
“Yumi Save Kisim Laip Long Em”
Namba wan rot em olsem: God i givim yumi ‘laip na strong na yumi wokabaut.’ (Aposel 17:28) Em i givim laip long yumi na dispela i kamapim tru olsem em i tingim yumi!
Na tu, Jehova i save givim yumi ol samting yumi mas kisim bilong i stap laip. Baibel i tok: “Yu save mekim gras i kamap bilong ol bulmakau i ken kaikai, na olkain samting mipela manmeri i save planim, em tu yu mekim i kamap na mipela i kisim kaikai long en.” (Song 104:14) Man Bilong Wokim yumi em i save givim yumi ol samting yumi mas kisim, na em i givim planti samting moa. “Em i mekim ren i lusim skai na i kam daun long yupela, na em i mekim planti gutpela kaikai i kamap. Em i givim yupela planti kaikai na i mekim bel bilong yupela i amamas.”—Aposel 14:17.
Tasol sampela i tingting yet olsem, ‘Sapos God i laikim tru yumi, bilong wanem em i larim yumi karim pen na hevi?’ Olsem wanem? Yu save long bekim bilong dispela askim?
Yu Ting God i Gat Asua?
Planti taim pasin bilong ol man yet i mekim na ol i karim pen na hevi. Olsem: I gat sampela samting ol man i mekim na ol i save pinis ol inap kisim bagarap long ol dispela samting. Tasol maski i olsem ol man bai pamuk, dring planti, kisim ol drak, smok tabak, mekim ol spot em man inap kisim bikpela bagarap long en, spit tru taim ol i draivim ka, na ol kain samting olsem. Sapos man i mekim ol dispela samting na em i kisim pen na hevi long en, em asua bilong husat? Em asua bilong God o asua bilong man i no bihainim gutpela tingting? Baibel i tok: “Nogut yupela i giamanim yupela yet na yupela i ting yupela inap long trikim God. Yupela bai i no inap tru. Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu.”—Galesia 6:7.
Na tu, planti taim ol man i save bagarapim ol arapela man. Taim wanpela kantri i laik pait long narapela kantri, ol pen na hevi i kamap long dispela i no asua bilong God. Taim wanpela raskol i mekim nogut long wanpela man, yu ting em asua bilong God na man i kisim bagarap o indai? Nogat tru! Taim wanpela dikteta i mekim nogut, givim bikpela pen, na kilim i dai ol man em i bosim, yu ting i stret long tok God i gat asua? Dispela i no stretpela tingting.—Saveman 8:9.
Tasol olsem wanem long ol planti milion man husat i stap rabis tru o ol i sot tru long kaikai? God i gat asua long dispela samting? Nogat. Graun i save kamapim planti kaikai, inap long olgeta man i ken kaikai. (Song 10:2, 3; 145:16) Ol man i no save tilim gut ol dispela kaikai em God i save givim long ol na dispela i mekim na planti man i hangre na ol i stap rabis. Na pasin mangal bilong ol man i mekim na ol i no inap stretim dispela hevi.
As Bilong Ol Dispela Hevi
Husat i gat asua taim wanpela man i kisim sik o em i dai, long wanem, em i go lapun? Olsem wanem? Bai yu kirap nogut long save olsem dispela tu i no asua bilong God? God i no bin wokim man bilong i go lapun na i dai.
Taim Jehova i putim namba wan man na meri, em Adam na Iv, long gaden Iden, ol inap i stap oltaim long wanpela paradais hia long graun. Tasol Jehova i laik bai dispela graun i pulap long ol man i pilim tru ol gutpela samting ol i bin kisim. Olsem na em i tok ol i mas mekim samting bilong i stap laip. Bilong i stap laip long Paradais, Adam na Iv i mas stap daun long Man i Bilong Wokim ol.—Stat 2:17; 3:2, 3, 17-23.
Sori tru, Adam na Iv i bin bikhet. Iv i bihainim tok bilong Satan. Em i giamanim Iv na i olsem em i tok God i no laik givim wanpela gutpela samting long em. Olsem na Iv i laik kisim independens long God na “kisim save long wanem samting i gutpela, na wanem samting i nogut, na . . . kamap wankain olsem God.” Adam i bihainim Iv long bikhet long God.—Stat 3:5, 6.
Taim Adam na Iv i mekim sin ol i soim olsem ol i no fit long kisim laip oltaim. Ol samting nogut bilong sin i kisim ol. Strong bilong ol i go slek na bihain ol i dai. (Stat 5:5) Tasol pasin bikhet bilong ol i bin mekim bikpela samting moa. Yumi kisim yet pen na hevi long sin bilong Adam na Iv. Aposel Pol i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Rom 5:12) Yes, pasin bikhet bilong Adam na Iv i mekim na olsem wanpela sik nogut sin na indai i kisim olgeta man.
Nambawan Samting i Soim Olsem God i Tingim Yumi
Olsem wanem? Dispela i makim olsem ol man em God i bin wokim bai stap nogut long olgeta taim bihain? Nogat. Na nau yumi laik stori long nambawan samting i soim olsem God i tingim yumi. God i givim samting i dia tumas long em yet bilong kisim bek ol man long sin na indai. Pe bilong baim bek ol man em laip bilong Jisas i gutpela olgeta, na long laik bilong em yet Jisas i givim dispela samting. (Rom 3:24) Olsem na aposel Jon i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Long rot bilong dispela bikpela pasin laikim, yumi inap kisim laip oltaim. Pol i tok long ol Rom olsem: “Wanpela man i mekim stretpela pasin, na God i ting long dispela na i kolim yumi olgeta stretpela man, na yumi stap laip.”—Rom 5:18.
Yumi save tru, long taim God i makim bai i no gat pen na indai moa hia long graun. Ol samting Buk Kamapim Tok Hait i stori long en bai kamap tru: “Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:3, 4) Ating yu bai tok, ‘Mi no inap stap laip na lukim dispela samting i kamap.’ Tasol ating yu inap lukim dispela samting. Na maski yu dai, God inap kirapim bek yu. (Jon 5:28, 29) Dispela em i samting God i tingting pinis long mekim long yumi, olsem na dispela samting tasol bai i kamap. Dispela tok olsem God i no save tingim yumi, em i no stret!
“Go Klostu Tru Long God”
Yumi amamas long save olsem God i kirap pinis long stretim rot bai yumi ol man i no gat pen na hevi bihain. Tasol olsem wanem long nau? Yumi inap mekim wanem sapos wanpela man yumi laikim tru em i dai o pikinini bilong yumi i kisim sik? Taim bilong God i rausim sik na indai i no yet. Tok bilong Baibel i soim olsem yumi mas wet liklik taim yet long dispela samting i kamap. Tasol God i no lusim yumi na yumi no gat helpim. Disaipel Jems i tok: “Go klostu tru long God, na em bai i kam klostu tru long yupela.” (Jems 4:8) Yes, Man Bilong Wokim yumi i singautim yumi long pas gut wantaim em, na husat i save mekim olsem ol i save pilim olsem em i sapotim ol maski wanem kain hevi i painim ol.
Tasol olsem wanem yumi ken i go klostu long God? Klostu 3,000 yia i go pinis King Devit i bin mekim wankain askim, olsem: “Bikpela, . . . husat inap sindaun long Saion, dispela maunten bilong yu yet?” (Song 15:1) Devit i bekim askim bilong em yet taim em i tok: “Man i bihainim laik bilong God long olgeta samting, na i mekim stretpela pasin oltaim, na i save tok tru oltaim, em bai i stap long haus bilong yu. Em i no save krungutim gutpela nem bilong narapela man. Em i no save mekim nogut long ol pren.” (Song 15:2, 3) I olsem Jehova i amamas long ol man husat i bihainim rot em Adam na Iv i bin sakim. Em i save go klostu long ol man husat i mekim laik bilong em.—Lo 6:24, 25; 1 Jon 5:3.
Yumi ken mekim laik bilong God olsem wanem? Yumi mas kisim save long wanem samting “i gutpela long ai bilong God, em Man bilong kisim bek yumi,” na bihainim dispela. (1 Timoti 2:3) Bilong mekim olsem yumi mas kisim stretpela save long Tok Bilong God, em Baibel. (Jon 17:3; 2 Timoti 3:16, 17) Yumi no ken ritim nating Baibel. Yumi mas bihainim pasin bilong ol Juda i bin i stap long Beria na ol i bin harim Pol i autim tok. Pol i bin stori long ol olsem: “Ol i harim tok . . . na ol i laikim tru. Na long olgeta de ol i save ritim na skelim tok i stap long buk bilong God, bilong ol i ken save, tok bilong em i tru, o nogat.”—Aposel 17:11.
Olsem tasol long nau, taim yumi stadi gut long Baibel, dispela i save strongim bilip bilong yumi long God na i helpim yumi long pas gut tru wantaim em. (Hibru 11:6) Na tu, em i helpim yumi long save long pasin Jehova i mekim long ol man—em i no tingting long helpim ol long nau tasol, nogat, em i tingim wanem samting bai helpim ol stretpela man long bihain bihain.
Tingim tok bilong sampela Kristen husat i pas gut wantaim God. Danielle i gat 16 krismas, em i tok: “Mi laikim tru Jehova, na i gat planti samting mi mas tenkyu long em. Em i givim mi papamama husat i laikim em tru na ol i bin lainim mi long ol tok bilong Baibel.” Wanpela Kristen long Yurugwai i tok: “Bel bilong mi i amamas tru long ol samting Jehova i bin mekim, na dispela i kirapim mi long tenkyu long Jehova long gutpela pasin bilong em na bilong em i stap pren bilong mi.” Na God i save amamas long ol yangpela tu. Gabriela i gat 7-pela krismas, em i tok: “Mi laikim tru God, winim olgeta narapela samting long olgeta hap bilong graun! Mi gat Baibel bilong mi yet. Mi laik tru long kisim save long God na Pikinini bilong em.”
Long nau, planti milion manmeri long olgeta hap ol i wanbel long tok bilong man bilong raitim song, em i tok: “Mi stap klostu long yu [God] na dispela i gutpela tru.” (Song 73:28) Ol i bin kisim helpim long karim ol hevi i painim ol long nau, na ol i bilip tru long kisim laip oltaim long Paradais long graun. (1 Timoti 4:8) Gutpela sapos yu putim mak olsem yu laik “i go klostu tru long God,” a? Tru tumas, Baibel i tok: “Em i no i stap longwe long yumi olgeta wan wan.” (Aposel 17:27) Yes, God i save tingim tru yu!
[Ol Piksa long pes 5]
Long kain kain rot Jehova i save kamapim olsem em i tingim yumi
[Piksa long pes 7]
Ol liklik pikinini tu inap go klostu long God
[Ol Piksa long pes 7]
Long nau, Jehova i save helpim yumi long karim hevi. Long wanpela taim em i makim, em bai rausim sik na indai