As na Pasin Nogut i Stap Yet
BAIBEL i tok: “God i save bihainim stretpela pasin.” (Song 145:17; KTH 15:3) Profet Moses i tok long em olsem: “Oltaim em i save bihainim tok bilong en na em i no save giaman. Na pasin bilong en i gutpela na stretpela tasol.” (Lo 32:4) Jems 5:11 i tok: “Bikpela em i save sori moa yet long yumi, na oltaim em i save marimari long yumi.” God i no inap kirapim ol man long mekim pasin nogut, na em i no save mekim olsem.
Disaipel Jems i tok: “Sapos samting i . . . pulim [man] long mekim sin, em i no ken tok, ‘God i pulim mi long mekim dispela pasin.’ Nogat. Sin i no inap pulim God, na God i no save pulim man long mekim sin.” (Jems 1:13) God Jehova i no save traim ol man bilong mekim pasin nogut, na em i no traim long pulim ol bilong mekim ol samting i nogut tru. Orait yumi laik save, em asua bilong husat na i gat ol pasin nogut na ol pen na hevi dispela pasin i kamapim?
Asua Bilong Husat?
Jems, man bilong raitim Baibel, em i putim hap asua bilong ol pasin nogut i go long ol man. Em i tok: “Laik nogut bilong yumi yet i save grisim yumi na giamanim yumi, bilong kirapim yumi long mekim sin. Orait . . . bihain em i save kamapim sin, . . . Na taim sin i kamap bikpela, em i save kamapim dai.” (Jems 1:14, 15) Man yet i save bihainim ol laik nogut bilong bel. Na tu, yumi kisim sin long ol tumbuna bilong pastaim. Sin i gat strong na em inap mekim ol laik nogut bilong bel i kamap strong na i kamapim ol samting nogut tru. (Rom 7:21-23) Tru tumas, sin yumi bin kisim long ol tumbuna em “i bin i stap olsem king” na bosim yumi long mekim ol pasin nogut i save kamapim bikpela pen na hevi. (Rom 5:21) Na tu, ol man nogut inap kirapim ol arapela long mekim pasin nogut.—Sindaun 1:10-16.
Tasol as tru bilong ol pasin nogut em Satan. Em yet i bin kamapim pasin nogut long graun. Jisas Krais i kolim Satan olsem “dispela man nogut,” na “hetman i save bosim dispela graun,” em ol lain bilong graun i no bihainim stretpela pasin. Ol i save bihainim tok bilong Satan taim ol i putim yau long tok bilong em long givim baksait long gutpela rot bilong God Jehova. (Matyu 6:13, NW; Jon 14:30; 1 Jon 2:15-17) Namba 1 Jon 5:19 i tok: “Dispela graun olgeta em i stap aninit long strong bilong Satan.” Tru tumas, Satan wantaim ol ensel bilong em i save “giamanim olgeta manmeri bilong graun” na i kamapim “bikpela hevi.” (KTH 12:9, 12) Olsem na Satan yet i gat bikpela hap asua long ol pasin nogut i kamap.
Saveman 9:11 i kamapim narapela as bilong ol hevi na pen, em i tok: “Taim nogut i save painim yumi olgeta.” Jisas Krais i stori long 18 man ol i bin kisim bagarap taim wanpela longpela haus i pundaun antap long ol. (Luk 13:4) Ol i kisim bagarap, long wanem, ol i bin stap long dispela ples taim haus i pundaun. Na ol wankain samting i save kamap long nau. Olsem: Wanpela brik long het bilong haus i antap tru em inap lus na pundaun na paitim wanpela man i wokabaut long rot. Orait, yu ting em i asua bilong God? Nogat. Dispela bagarap i bin kamap nating na i no gat man i save em bai kamap. Na i wankain tu long taim wanpela sik i kamap insait long famili, o wanpela i dai wantu na nau poroman marit i stap wanpis na pikinini i no gat papa o mama moa.
Olsem na God i no gat asua long ol pasin nogut, na em i no save kamapim ol pen na hevi, nogat. Jehova i tingting pinis long pinisim tru olgeta pasin nogut na ol lain i save kamapim dispela pasin. (Sindaun 2:22) Na em bai mekim sampela samting moa. Baibel i tokaut long samting God i tingting pinis long mekim long rot bilong Krais, olsem “bagarapim na rausim wok bilong Satan.” (1 Jon 3:8) Pasin bilong dispela graun—em pasin bilong mangal long mani, pasin birua, na ol pasin nogut tru—em bai pinis olgeta. Na God bai “mekim drai wara i stap long ai bilong olgeta,” olsem na bai i no gat pen na hevi moa. (KTH 21:4) Tasol ating bai yu askim olsem: ‘Bilong wanem God i no mekim yet dispela samting? Bilong wanem em i larim pasin nogut wantaim pen na hevi i stap inap long nau?’ Bilong painim bekim bilong ol dispela askim, yumi ken tingim stori bilong Adam na Iv.
Wanpela Bikpela Tok i Kamap
Ol samting i bin kamap long taim ol man i kamap nupela long graun, dispela i as na God i bin larim pasin nogut i stap inap long nau. Wanpela samting i bin kamap long dispela taim i kamapim wanpela bikpela tok long Man Bilong Wokim olgeta samting—em wanpela tok ol i no inap stretim hariap tasol. Orait nau yumi ken stori gut long samting i bin kamap long dispela taim.
God Jehova i bin wokim namba wan man na meri i gutpela olgeta, na em i putim tupela long ples Paradais. God i bin givim wanpela samting long ol na dispela i mekim na ol i narakain tru long ol animal—ol yet inap makim wanem rot ol i laik bihainim. (Stat 1:28; 2:15, 19) Adam na Iv inap skelim wanem pasin ol i laik bihainim—pasin i stret o pasin i no stret. Tupela inap wokim tingting bilong ol bilong makim samting ol i laik mekim, olsem laikim tru Man Bilong Wokim ol, mekim wok bilong em, na bihainim tok bilong em. O ol inap makim narapela rot—olsem bosim wokabaut bilong ol yet na sakim tok bilong God.
Bilong givim rot long Adam tupela Iv long kamapim klia olsem ol i laikim em tru, God tru i putim wanpela tambu long tupela. Em i tokim Adam: “Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.” (Stat 2:16, 17) Bilong God i ken orait long ol—na dispela bai helpim ol yet wantaim ol pikinini em bihain bai ol i kamapim—Adam na Iv i no ken kaikai pikinini bilong wanpela diwai. Ol bai bihainim dispela tambu o nogat?
Baibel i tokim yumi long samting i kamap. Long maus bilong wanpela snek, Satan i tokim Iv: “Ating God i tambuim yutupela long kaikai pikinini bilong olgeta diwai bilong gaden, a?” Iv i kamapim tok bilong God na nau Satan i tokim em: “Yutupela i no inap i dai. Sapos yutupela i kaikai pikinini bilong dispela diwai, bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God. God i save long dispela, olsem na em i tambuim yutupela long kaikai pikinini bilong dispela diwai.” Em nau, Iv i lukim dispela diwai i gutpela tru, olsem na em “i kisim pikinini bilong dispela diwai na i kaikai.” Orait bihain “em i givim sampela long man bilong em, na man tu i kaikai.” (Stat 3:1-6) Em nau, Adam wantaim Iv i mekim wok nogut long pasin bilong i stap fri long makim wanem samting ol i laik mekim, na ol i sakim tok bilong God na mekim sin.
Yu pilim tru dispela samting nogut i kamap? Tok bilong Satan i narapela kain long tok God i bin givim long Adam. Na tok bilong Satan i makim olsem, i no gat wok long Jehova i mas helpim tupela long makim wanem samting i stret na wanem samting i no stret. Dispela i kamapim wanpela bikpela tok olsem, i stret Jehova i bosim ol man o nogat. Olsem na dispela bikpela tok Satan i kamapim i olsem: I stret Jehova i stap nambawan bos o nogat? Orait, God tru i mekim wanem bilong stretim dispela bikpela tok?
I Mas i Gat Bikpela Hap Taim
Jehova i gat strong long bagarapim dispela 3-pela bikhetman—Satan, Adam, na Iv. Strong bilong God i winim tru strong bilong ol. Tasol Satan i no sutim tok long strong bilong God. Em i sutim tok olsem i no stret long Jehova i bosim ol man. Dispela bikpela tok i sutim tu ol ensel na ol man bilong graun. Ol i mas save, dispela presen God i bin givim long ol, olsem ol yet inap long makim wanem rot ol i laik bihainim, ol i mas mekim stretpela wok long en—ol i mas i stap insait long mak bilong ol lo God i bin putim long ol samting bilong skin, stretpela pasin, na bilong pas gut wantaim God. Sapos nogat, orait bikpela hevi bai painim ol, wankain olsem bikpela bagarap i painim man i sanap long rup bilong haus i antap tru na kalap i go daun na em i no tingim strong i stap long graun ol i kolim graviti. (Galesia 6:7, 8) Sapos ol ensel na ol man i lukim ol samting nogut i save kamap taim ol man i laik bosim wokabaut bilong ol yet, dispela inap helpim ol. Tasol dispela bai kisim bikpela hap taim.
Bilong pilim gut olsem i mas i gat bikpela hap taim bilong stretim sampela bikpela tok, yumi ken tok piksa olsem: Papa bilong wanpela famili i laik resis wantaim papa bilong narapela famili long traim strong bilong tupela na long save wanem papa i gat bikpela strong moa. Ol inap stretim kwik dispela tok. Ol i ken apim sampela bikpela ston bilong traim strong bilong ol. Wanem papa i bin apim ston i gat bikpela hevi moa, orait strong bilong em bai i win. Tasol olsem wanem sapos i gat wanpela tok long wanem papa i save laikim tru ol pikinini man na pikinini meri bilong em, na ol tu i save laikim em tru? O sapos tok i kamap long wanem papa i save lukautim gut famili bilong em? Sapos ol i kamapim bikpela strong bilong ol, o ol i mekim sampela tok tasol, dispela bai i no inap. Bikpela hap taim i mas lus pastaim, na ol man i mas glasim gut pasin bilong tupela papa, na skelim long tingting wanem papa i win long lukautim gut famili.
Bikpela Hap Taim i Soim Wanem Samting?
Inap 6,000 yia samting i go pinis, Satan i kamapim bikpela tok olsem i stret God i stap nambawan bos o nogat. Orait ol samting i bin kamap long graun i kamapim klia wanem samting? Tingim tupela samting i insait long tok Satan i bin sutim long God. Satan i tokim Iv: “Yutupela i no inap i dai.” (Stat 3:4) Taim Satan i tok tupela i no inap i dai sapos ol i kaikai pikinini bilong diwai tambu, i olsem Satan i tok Jehova i giaman. Dispela tok i nogut tru! Sapos God i no bin tok tru long dispela samting, yumi no inap bilipim ol narapela tok bilong em, a? Tasol dispela bikpela hap taim i go pinis em i kamapim klia wanem samting?
Ol samting nogut i kamap long Adam na Iv, olsem sik, pen, lapun na, bihain ol i dai. Baibel i tok: “Adam i stap inap 930 yia olgeta na em i dai.” (Stat 3:19; 5:5) Na long rot bilong Adam ol dispela hevi i kamap long olgeta manmeri bilong graun. (Rom 5:12) Ol dispela planti tausen yia i go pinis i kamapim klia tru olsem Satan em i “man bilong tok giaman, na em i papa tru bilong pasin bilong tok giaman,” na dispela i soim yumi olsem Jehova em i “God bilong mekim tok tru tasol.”—Jon 8:44; Song 31:5, NW.
Na Satan i tokim Iv: “Sapos yutupela i kaikai pikinini bilong dispela diwai, bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God.” (Stat 3:5) Long dispela tok giaman bilong em, i olsem Satan i givim rot long ol man na bai ol inap bosim wokabaut bilong ol yet. Long pasin giaman, Satan i makim olsem sapos ol man i no stap aninit long God na ol i bosim ol yet, i stap bilong ol bai i gutpela moa. Tasol yu ting i stap bilong ol man i kamap gutpela moa?
Insait long ol dispela planti yia ol man i stap long graun, ol strongpela gavman i bin kamap na i go pinis. Ol i bin traim olgeta kain gavman bilong ol man. Tasol long olgeta taim ol samting nogut tru i bin painim ol lain man bilong graun. Wanpela man bilong raitim Baibel inap 3,000 yia i go pinis em i tok: “Sampela bikman i wok long daunim ol arapela manmeri na mekim nogut long ol.” (Saveman 8:9) Profet Jeremaia i tok: “Mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Na maski ol saveman i bin kamapim ol kain kain nupela samting bilong helpim ol man long nau, dispela i no makim olsem ol dispela tok bilong Baibel i giaman, nogat. Ol yia i kam na i go pinis i kamapim long ples klia olsem ol dispela tok bilong Baibel i tru olgeta.
Bai Yu Mekim Wanem?
Dispela bikpela hap taim God i bin larim ol man i bosim wokabaut bilong ol yet i kamapim klia olsem bikpela tok Satan i bin kamapim olsem i no stret Jehova i stap nambawan bos, dispela tok i giaman tru. Jehova em i Nambawan King bilong heven na graun. I stret em i bosim olgeta samting em i bin wokim, na pasin bilong em long bosim ol man em i win olgeta. Ol ensel bilong heven em ol i bin stap planti milion yia aninit long wok king bilong God, ol i tokaut klia olsem: “Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting. Long laik bilong yu yet yu bin mekim olgeta samting i kamap, na nau dispela olgeta samting i stap.”—KTH 4:11.
Orait yu ting olsem wanem long dispela bikpela tok i bin kamap long wok king bilong God? Yu ting God em inap tru long i stap King bilong bosim yu? Sapos olsem, yu mas daun long Jehova olsem nambawan bos. Bilong mekim olsem, yu mas bihainim ol gutpela tok i tru na ol tok kaunsel bilong Baibel long olgeta samting bilong i stap bilong yu. ‘God i as bilong pasin bilong laikim ol arapela,’ na dispela pasin laikim bilong em i as bilong ol lo na tok bilong em. (1 Jon 4:8) Jehova i no save pasim ol gutpela samting bilong helpim yumi. Olsem na yu ken bilip tru long tok bilong Baibel, em i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.”—Sindaun 3:5, 6.
[Piksa long pes 7]
Yu inap makim olsem yu laik i stap aninit long wok king bilong God sapos yu stadi long Baibel na bihainim ol tok bilong en long i stap bilong yu
[Piksa Kredit Lain long pes 4]
© Jeroen Oerlemans/Panos Pictures