Sapta 8
Bilong Wanem God i Larim Pen na Hevi i Stap?
1, 2. Planti man i ting olsem wanem long pen na hevi i save painim ol man?
TAIM bikpela bagarap i kamap na bagarapim ol haus na ol man, planti man i no save bilong wanem kain samting nogut olsem i save kamap. Sampela i tingting planti long ol pasin nogut tru ol raskol i mekim na pasin bilong bagarapim nabaut ol man, ol dispela pasin i go bikpela tru long olgeta hap, na i kamap nogut moa yet, na i olsem ol i mekim nating tasol. Ating yu tu yu tingting olsem: ‘Bilong wanem God i larim pen na hevi i stap?’
2 Ol man i no painim gutpela bekim bilong dispela askim, olsem na planti ol i no bilip moa long God. Ol i pilim olsem em i no save tingim yumi ol manmeri. Sampela i ting, i no gat rot bilong abrusim pen na hevi, na ol i bel nogut na tok God i gat asua long olgeta pasin nogut ol man i mekim. Sapos yu pilim olsem, bai yu amamas long save long tok bilong Baibel long dispela samting.
GOD I NO AS BILONG PEN NA HEVI
3, 4. Olsem wanem yumi inap save tru, Jehova i no as bilong pasin nogut na pen na hevi?
3 Baibel i tokaut klia olsem God Jehova i no as bilong ol pen na hevi yumi lukim hia long graun. Disaipel Kristen Jems i tok: “Sapos samting i kirapim bel bilong wanpela man na i pulim em long mekim sin, em i no ken tok, ‘God i pulim mi long mekim dispela pasin.’ Nogat. Sin i no inap pulim God, na God i no save pulim man long mekim sin.” (Jems 1:13) Olsem na God i no as bilong ol dispela planti planti hevi i painim ol man. Em i no save traim ol man bilong mekim ol i kamap gutpela tru inap long ol i ken i stap long heven; na em i no save givim hevi long ol man bilong bekim pasin nogut ol i ting ol i bin mekim taim ol i stap long narapela bodi bipo, olsem sampela man i bilip long en.—Rom 6:7.
4 Na maski ol man i bin mekim planti pasin nogut tru long nem bilong God na Krais, i no gat liklik tok long Baibel i makim olsem God o Krais i orait long pasin ol i mekim. God na Krais i no save orait long ol man i tok ol i mekim wok bilong tupela, tasol ol i giaman na pulim mani, na kilim ol man i dai na kisim ol samting bilong ol, na mekim planti narapela samting i givim pen na hevi long ol man. Baibel i tok: “Bikpela i no laik tru long pasin bilong man i save mekim pasin nogut.” God i “save stap longwe long ol man i save mekim pasin nogut.”—Sindaun 15:9, 29.
5. Wanem sampela pasin bilong Jehova? Em i ting olsem wanem long ol samting i gat laip em i bin wokim?
5 Baibel i tok, Jehova “i save sori moa yet long yumi, na oltaim em i save marimari long yumi.” (Jems 5:11) Baibel i tokaut olsem Jehova “i laikim tumas stretpela pasin.” (Song 37:28; Aisaia 61:8) Em i no man bilong bekim nogut long ol man. Em i sori long ol samting i gat laip em i bin wokim, na em i lukautim ol. Em i givim olgeta samting long ol bilong helpim ol long i stap gutpela. (Aposel 14:16, 17) Jehova i bin mekim olsem taim em i wokim ol samting i gat laip long graun long pastaim tru na i kam inap long nau.
PASTAIM TRU OL SAMTING I STAP GUTPELA OLGETA
6. Sampela stori bilong ol tumbuna i stori olsem wanem na i wankain liklik olsem stori tru bilong i stap bilong ol man long pastaim tru?
6 Yumi olgeta i lain pinis long karim pen na hevi na long lukim ol narapela man i stap olsem. Olsem na i hatwok long yumi ting wanpela taim inap kamap na bai i no gat pen na hevi moa, tasol pastaim tru ol man i bin i stap olsem. Stori bilong ol tumbuna bilong sampela lain tu i stori olsem. Ol Grik i gat stori long “Faipela Hap Taim Bilong Ol Man,” na ol i kolim namba wan hap taim olsem “Gutpela Taim Tru.” Ol i stori olsem: Long dispela gutpela taim bipo ol manmeri i stap amamas, no gat hatwok, o pen, o ol hevi bilong i go lapun. I gat wanpela stori nating bilong ol Saina olsem, bipo i gat wanpela King (Yelopela King, o Huang-Ti) na long taim em i stap king ol manmeri i sindaun gut wantaim, na taim nogut bilong bikpela win samting i no save painim ol, na ol i stap gut wantaim ol animal bilong bus. Ol lain bilong Persia, Isip, Tibet, Peru, Meksiko, olgeta i gat stori olsem: Long pastaim tru ol manmeri i bin i stap gutpela olgeta na i stap amamas.
7. God i gat wanem laik na em i wokim dispela graun na ol man?
7 Stori nating bilong ol dispela lain i kain olsem stori bilong Baibel long taim ol man i bin kamap pastaim, em ol man i bin raitim long bipo yet. Baibel i stori olsem God i bin putim namba wan man na meri, em Adam na Iv, long ples paradais ol i kolim gaden Iden, na em i tokim tupela: “Yupela i mas kamap planti na i go sindaun long olgeta hap bilong graun na bosim olgeta samting i stap long en.” (Stat 1:28) Dispela tupela tumbuna bilong yumi bilong pastaim ol i stap gutpela olgeta na ol inap tingting long lukim graun olgeta i kamap ples paradais i gat ol gutpela manmeri i stap long en, em ol i stap wanbel na amamas oltaim oltaim. Dispela em laik bilong God long taim em i wokim graun na ol man.—Aisaia 45:18.
SUTIM TOK NOGUT
8. Adam tupela Iv i mas bihainim wanem lo? Tasol wanem samting i bin kamap?
8 Bilong i stap gutpela long ai bilong God, Adam tupela Iv i no ken kaikai pikinini bilong “dispela diwai bilong givim gutpela save long wanem samting i gutpela na wanem samting i nogut.” (Stat 2:16, 17) Sapos tupela i bin bihainim lo bilong Jehova, bai pen na hevi i no inap kamap na bagarapim yumi ol man. Na bai tupela i kamapim klia olsem ol i laikim tru Jehova na ol i stap gut long em. (1 Jon 5:3) Tasol olsem Sapta 6 i stori, tupela i no bin mekim olsem. Satan i kirapim Iv long kaikai pikinini bilong dispela diwai. Bihain Adam tu i kaikai pikinini bilong diwai tambu.
9. Satan i sutim wanem tok long Jehova?
9 Olsem wanem? Yu pilim tru dispela pasin nogut ol i bin mekim? Satan i sutim tok long bikpela namba bilong Jehova, em i God Antap Tru. Taim em i tok, “Yutupela i no inap i dai,” em i daunim tok bilong God, Em i bin tok “Wantu bai yu dai.” Na Satan i mekim narapela tok moa, na i olsem em i tok God i laik pasim Adam tupela Iv long kisim gutpela save em inap mekim tupela i kamap wankain olsem God, na bai i no gat wok moa long Em i makim wanem samting i gutpela na wanem samting i nogut. Dispela tok Satan i sutim long Jehova i kamapim askim olsem: I stret Jehova i stap King bilong heven na graun o nogat?—Stat 2:17; 3:1-6.
10. Satan i sutim wanem tok long ol man?
10 Na i olsem Satan i tok ol man i tingting long helpim ol yet na long dispela as tasol ol i bihainim tok bilong God; i olsem em i laik tok, ol man i no ken holimpas bilip. Em i tok, i no gat wanpela man bai stap gut long God long laik bilong em yet. Dispela tok nogut Satan i sutim long ol man i kamap ples klia long stori bilong Jop long Baibel, em gutpela wokboi bilong Jehova i winim bikpela traim paslain long yia 1600 paslain long Krais. Taim yu kaunim sapta 1 na 2 long Buk Jop yu inap kisim save long as bilong pen na hevi i painim ol man na bilong wanem God i larim i stap.
11. Jop em i wanem kain man? Tasol Satan i sutim wanem tok long em?
11 Satan i sutim tok long Jop, “em i gutpela man tru na i no gat asua.” Satan i kamapim wanpela askim na i olsem em i tok Jop i gat tingting nogut; em i tokim God: “Yu ting bai Jop i aninit long yu sapos em i no kisim wanpela samting long han bilong yu, a?” Orait nau Satan i toknogutim God na Jop taim em i tok, Jehova i grisim Jop—em i lukautim Jop na givim planti samting long em—na long dispela as tasol Jop i stap gut long Em. Satan i tokim Jehova: “Sapos yu bagarapim na rausim dispela olgeta samting bilong en, orait bai yu lukim em i tok nogut tru long yu.”—Jop 1:8-11.
12. (a) God i mas larim Satan i traim Jop na dispela tasol em i rot bilong bekim wanem ol askim? (b) Wanem samting i kamap long traim bilong Jop?
12 Olsem wanem? Jop i tingim ol gutpela samting em i kisim long God na long dispela as tasol em i mekim wok bilong Jehova? Sapos traim i painim em, bai em i stap gut long God? Na olsem wanem long Jehova yet? Em i bilip tru olsem wokboi bilong em inap winim traim na sanap strong? Bilong bekim gut ol dispela askim Jehova i mas larim Satan i putim wanpela bikpela traim tru long Jop. Jop i winim dispela traim olsem Buk Jop i stori long en, na dispela i kamapim klia tru olsem pasin bilong Jehova i stret olgeta na ol man inap i stap gut long em.—Jop 42:1, 2, 12.
13. Olsem wanem yumi insait long samting i bin kamap long gaden Iden na long Jop?
13 Tasol ol samting i bin kamap long gaden Iden na long Jop, i no dispela ol samting tasol i insait long ol bikpela tok Satan i bin kamapim. Olgeta man long graun, yumi tu wantaim, i insait long dispela bikpela tok. Satan i bagarapim nem bilong God na i tok, i no stret God i stap nambawan bos. Na em i sutim tok long ol man God i bin wokim ol na em i tok, ol i no inap i stap gut long God. Em ol bikpela tok bilong stretim.
ROT BILONG STRETIM TOK
14. Taim wanpela man i sutim tok nogut long man, man hia i ken mekim wanem bilong stretim tok?
14 Yumi ken tok piksa olsem: Yu wanpela gutpela papa na yu gat ol pikinini na famili i stap amamas, tasol wanpela man i stap klostu em i kirap mekim ol tok giaman olsem yu papa nogut. Na em i tok, ol pikinini i no givim bel tru long yu; ol i save stap wantaim yu, long wanem, ol i no save long rot bilong kisim gutpela sindaun i winim dispela, tasol sapos wanpela man i soim rot long ol, bai ol i lusim yu. Ating bai yu tok: ‘Em i giaman!’ Tru, tasol yu bai mekim wanem bilong kamapim klia olsem em i giaman? Ating sampela papa bai belhat na mekim save long man. Tasol dispela pasin i no inap stretim hevi; em bai kamapim sampela hevi moa na i strongim ol tok giaman man i mekim. Gutpela pasin bilong stretim kain hevi olsem, em yu mas givim rot long man i bin sutim tok long yu bambai em i ken traim mekim ol samting bilong kamapim klia olsem tok bilong em i tru, na givim rot long ol pikinini bilong yu i ken tokaut olsem ol i givim bel tru long yu.
15. Jehova i bihainim wanem gutpela tingting bilong stretim tok Satan i sutim long em?
15 Jehova i olsem dispela gutpela papa. Adam na Iv i olsem ol pikinini bilong em, na Satan i olsem dispela man i sutim tok giaman long em. God i bihainim gutpela tingting na em i no kirap wantu tasol na kilim i dai Satan na Adam na Iv. Em i larim ol dispela bikhetman i stap pastaim. Long dispela rot namba wan tumbuna papamama bilong yumi inap kamapim ol pikinini na bai i gat ol man i stap long graun, na Satan i gat rot long kamapim long ples klia olsem tok bilong em i tru o nogat, na nau ol inap stretim ol dispela bikpela tok. Tasol long pastaim tru God i save sampela man bai stap gut long em na dispela bai kamapim klia olsem Satan em i man bilong giaman. Yumi save tenkyu tru long Jehova, long wanem, em i wok yet long helpim na mekim gut long ol man i laikim em tru!—2 Stori 16:9; Sindaun 15:3.
WANEM SAMTING I KAMAP PLES KLIA?
16. Long wanem rot olgeta manmeri bilong graun i bin kam aninit long Satan?
16 Kirap long taim Adam na Iv i bikhet long God, God i larim Satan i wokim kain kain rot bilong bosim ol man. Em i bin stiaim ol gavman na kamapim ol lotu i giamanim ol man na ol i no lotuim Jehova—ol i lotuim em; na em i mekim ol narapela samting tu. Long dispela rot Satan i kamap “god bilong dispela graun,” na em i “hetman i save bosim dispela graun.” (2 Korin 4:4; Jon 12:31) Tru tumas, “dispela graun olgeta em i stap aninit long strong bilong Satan.” (1 Jon 5:19) Olsem wanem? Dispela i makim olsem Satan i truim pinis tok bilong em olsem em inap pulim olgeta manmeri na bai ol i lusim God Jehova? Nogat tru! Jehova i larim Satan i stap, tasol insait long dispela taim Jehova yet i wok long mekim ol samting bilong kamapim laik bilong em. Orait, Baibel i tok wanem long God i bin larim pasin nogut i stap?
17. Taim yumi tingim as bilong pasin nogut na ol hevi, yumi mas save long wanem samting?
17 Jehova i no as bilong pasin nogut na pen na hevi. Satan em i hetman na god bilong dispela graun, olsem na em yet wantaim ol lain bilong em i gat asua na ol man i stap nogut tru long nau; ol i as bilong olgeta pen na hevi i bin painim ol man. I no gat wanpela man inap tok God i as bilong dispela.—Rom 9:14.
18. Jehova i larim pasin nogut na hevi i stap na dispela i kamapim klia wanem samting long pasin bilong ol man long lusim God na bosim wokabaut bilong ol yet?
18 Jehova i larim pasin nogut na hevi i stap na dispela i kamapim long ples klia tru olsem: Pasin bilong lusim God na bosim wokabaut bilong ol yet i no bin helpim ol man long i stap gutpela. Tru tumas, long bipo yet na i kam inap long nau planti bikpela hevi na bagarap i bin kamap. As bilong dispela i olsem: Ol man i bin bihainim laik bilong ol yet na ol i no tingim tok na laik bilong God. Taim lain bilong Jehova long bipo wantaim ol hetman bilong ol i “strong tru long bihainim laik bilong ol yet” na ol i sakim tok bilong em, bikpela hevi i painim ol. Long maus bilong profet Jeremaia, God i tokim ol: “Ol saveman i bin givim baksait long tok bilong mi, Bikpela. Olsem wanem na ol i ting ol i gat bikpela save? Bai ol i sem moa yet na bai ol i painim taim nogut, olsem abus i pas long umben. Na bai tingting bilong ol i bagarap.” (Jeremaia 8:5, 6, 9) Ol manmeri i no bin bihainim ol lo bilong Jehova, olsem na ol i kamap olsem sip i no gat stia na bikpela si i sakim nabaut.
19. Wanem samting i kamapim klia olsem Satan i no inap pulim olgeta man na ol i lusim God?
19 God i larim pasin nogut na hevi i stap, na samting i kamap ples klia em olsem: Satan i no inap pulim olgeta man na ol i lusim Jehova. Stori bilong ol samting i bin kamap bipo i makim olsem i gat sampela man i bin i stap gut long God maski wanem kain hevi na traim i kamap long ol. Insait long ol handet handet yia, Jehova i bin kamapim strong bilong em na helpim ol wokboi bilong em, na ol manmeri i bin tokaut long nem bilong em long olgeta hap bilong graun. (Kisim Bek 9:16; 1 Samuel 12:22) Hibru sapta 11 i stori long ol manmeri bilong bipo ol i bin i stap gut long God, olsem Abel, Enok, Noa, Abraham, Moses. Na Hibru 12:1 i tok, ol dispela witnes bilong em i bikpela lain olsem “bikpela klaut.” Ol i holimpas bilip na ol i no surik liklik. Long nau tu, planti ol i bin i stap gut long God, maski ol man i kilim ol i dai. Ol i bilip tru long God na givim bel tru long em, na long dispela rot ol i kamapim klia olsem Satan i no inap pulim olgeta man na ol i lusim God.
20. Jehova i larim pasin nogut na hevi i stap na dispela i kamapim klia wanem samting bilong God na ol man?
20 Na taim Jehova i larim pasin nogut na hevi i stap, dispela i bin kamapim klia olsem i stret Jehova tasol, em Man bilong wokim olgeta samting, i mas bosim ol man, na em tasol inap bosim ol gut na bai ol i stap gutpela na i stap amamas oltaim oltaim. Insait long planti handet yia i go pinis, ol man i bin kamapim kain kain gavman bilong bosim ol. Tasol wanem samting i bin kamap? Kain kain hevi nogut tru i kamap, na ol dispela hevi i truim tok bilong Baibel olsem ‘ol man i bin bosim ol man na mekim nogut long ol.’ (Saveman 8:9) Jehova tasol inap helpim yumi na pinisim ol dispela hevi na kamapim laik bilong em bilong pastaim. Em bai mekim olsem wanem? Na em bai mekim long wanem taim?
21. Wanem samting bai kamap long Satan? Husat bai mekim dispela samting?
21 Bihain stret long taim Satan i pundaunim Adam na Iv, God i tokaut long samting Em i laik mekim bilong kisim bek ol man. Jehova i tokim Satan: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [olsem pikinini] bilong meri. Bai [em] i krungutim het bilong yu, na bai yu kaikaim lek bilong [em].” (Stat 3:15) Dispela tok promis i kamapim klia olsem God i no ken larim Satan i stap oltaim na mekim ol pasin nogut bilong em. Krais Jisas em i ‘Pikinini’ God i tok promis long em bai kamap, na taim em i stap King bilong Kingdom bai em i ‘krungutim het bilong Satan.’ Tru tumas, “liklik taim” na bai Jisas i bagarapim bikhetman Satan!—Rom 16:20.
BAI YU MEKIM WANEM?
22. (a) Yu mas tingim wanem ol askim? (b) Satan i kamapim belhat bilong em long ol man i stap gut long God, tasol ol i ken bilip tru long wanem samting?
22 Yu save long ol bikpela tok i bin kamap, orait yu bai aninit long husat? Bai yu mekim ol samting i makim olsem yu stap gut long Jehova? Satan i save em i gat sotpela taim tasol, olsem na em i wok strong long kamapim belhat bilong em long ol manmeri i laik holimpas ol lo bilong God. (KTH 12:12) Tasol yu ken wetim God i helpim yu, long wanem, ‘ol man i bihainim Bikpela em i save long rot bilong kisim bek ol long traim.’ (2 Pita 2:9) Em i no ken larim wanpela traim i kamap long yu em i winim strong bilong yu. Em bai wokim rot bambai yu inap sanap strong long traim.—1 Korin 10:13.
23. Yumi ken bilip tru na wetim wanem samting i kamap?
23 Olsem na yumi ken bilip tru na wetim King Krais Jisas i kirap mekim save long Satan na olgeta lain i bihainim em. (KTH 20:1-3) Jisas bai pinisim olgeta lain i gat hap asua long ol hevi na hatwok i bin painim ol man. Tasol dispela taim i no yet, na long nau i gat wanpela samting i save givim bikpela hevi long yumi, olsem: Wanpela long famili bilong yumi em i dai. Kaunim Sapta 9 na bai yu ken save wanem samting i painim ol man i dai pinis.
TRAIM SAVE BILONG YU
Olsem wanem yumi save Jehova i no as bilong pen na hevi i save painim ol man?
Satan i kamapim wanem ol bikpela tok long Iden na ol dispela tok i kamap klia long taim bilong Jop?
God i larim pen na hevi i stap na long dispela rot wanem samting i bin kamap ples klia?