Sapta 12

Yu Insait Long Wanpela Bikpela Tok

1, 2. (a) Ol samting yu mekim, bilong wanem em i bikpela samting long yu? (b) Em i bikpela samting tu long husat? Bilong wanem em i bikpela samting long em?

OL SAMTING yu mekim em bikpela samting. Em inap helpim yu long i stap amamas long bihain o em inap nogutim yu. Na ol samting yu mekim em i as bilong ol samting bai painim yu taim dispela pasin bilong nau i pinis, olsem: Bai yu tu yu pinis o bai yu winim dispela taim na i stap oltaim long nupela stretpela taim God bai kamapim.—1 Jon 2:17; 2 Pita 3:13.

² Tasol ol samting yu mekim em i helpim o nogutim ol narapela man tu. Olsem: Ol samting yu mekim em inap litimapim nem bilong papamama bilong yu o bagarapim nem bilong ol. Baibel i tok: “Sapos pikinini man i gat gutpela tingting na save, orait papamama bilong em i amamas. Tasol sapos pikinini i bihainim longlong pasin, orait papamama i belhevi tru.” (Provep 10:1) Na bikpela samting em olsem: Ol samting yu mekim em inap amamasim God Jehova o mekim em i bel hevi. Bilong wanem i olsem? Long wanem i gat wanpela bikpela tok i bin kamap na yu insait long en.

OL MAN BAI STAP GUT LONG GOD?

3. Seten i sutim wanem tok bilas long Jehova?

³ Seten i bin kamapim dispela bikpela tok taim em i pulim Adam tupela Iv na ol i bikhet long God olsem Seten i bin mekim. (Jenesis 3:1-6) Olsem na Seten i ting i gat as na em i ken mekim tok bilas long Jehova, olsem: ‘Ol manmeri i save tingim tasol ol samting yu givim long ol na ol i mekim wok bilong yu. Tasol sapos yu givim rot long mi, mi inap pulim olgeta man na bai ol i lusim yu.’ Sapos yumi lukim stori bilong Jop long Baibel yumi ken save Seten i bin sutim kain tok bilas olsem long God.

4, 5. (a) Jop em i husat? (b) Long taim bilong Jop wanem samting i kamap long heven?

⁴ Jop em i kamap long graun planti handet yia bihain long taim pasin bikhet i kamap long Iden. Jop em i stretpela man na em i stap gut long wok bilong God. Tasol yu ting ol samting Jop i mekim em i bikpela samting long God na long Seten? Baibel i tok em i bikpela samting long tupela. Baibel i stori long Seten i kam sanap long ai bilong Jehova long heven na tupela i toktok wantaim, olsem:

⁵ “Taim i kamap bilong ol pikinini bilong God tru i mas kam sanap long ai bilong Jehova, na Seten tu em i kam sanap wantaim ol. Na Jehova i tokim Seten: ‘Yu kam we?’ Na Seten i bekim tok long Jehova olsem: ‘Mi raun raun long graun na mi kam.’ Na Jehova i tokim Seten: ‘Yu tingim gut boi bilong mi Jop? Long olgeta hap bilong graun i no gat wanpela man i kain olsem em. Em i no gat asua long wanpela samting; em i stretpela man. Em i save pret long God, na em i abrusim pasin nogut.’ ”—Jop 1:6-8, NW.

6. Wanem bikpela tok i kamap long taim bilong Jop, olsem Baibel i stori long en?

⁶ Bilong wanem Jehova i tokim Seten, Jop em i stretpela man? Long wanem wanpela tok i bin kamap olsem: Bai Jop i stap gut long God o nogat? Tingim dispela askim God i givim long Seten, em i tok: “Yu kam we?” Na tingim dispela tok Seten i bekim long God, em i tok: “Mi raun raun long graun na mi kam.” Dispela askim bilong God na bekim bilong Seten i soim yumi, God i givim rot long Seten bilong truim dispela tok em i bin sutim long God, olsem em inap pulim olgeta man na bai ol i lusim God. Orait, taim Jehova i kolim ol gutpela pasin bilong Jop, Seten i tok wanem?

7, 8. (a) Seten i tok i gat wanem as na Jop i mekim wok bilong God? (b) Jehova i mekim wanem bilong stretim dispela bikpela tok?

⁷ “Na Seten i bekim tok long Jehova, em i tok: ‘Ating Jop i pret nating long God? Ating yu no bin lukautim em gut, na haus bilong em tu, na olgeta samting bilong em? Olgeta wok han bilong em i mekim, yu bin mekim i kamap gutpela, na ol bulmakau sipsip samting bilong em ol i kamap planti na pulap long graun. Tasol nau plis, yu kirap na bagarapim olgeta samting bilong em na bai yu lukim, long pes bilong yu stret bai em i toknogutim yu, o nogat.’ ”—Jop 1:9-11, NW.

⁸ Taim Seten i tok olsem, em i haitim as tru bilong gutpela pasin Jop i mekim, olsem em i stap gut long God. Seten i tok, ‘Jop i no givim bel tru long yu; em i tingim ol samting yu givim long em na em i mekim wok bilong yu.’ Na Seten i tok, Jehova i mekim wok nogut long bikpela strong bilong em, long wanem oltaim em i save lukautim Jop. Olsem na bilong stretim dispela tok, Jehova i tokim Seten: “Orait! Olgeta samting bilong em i stap long han bilong yu! Tasol yu no ken bagarapim skin bilong em!”—Jop 1:12, NW.

9. Seten i givim wanem hevi long Jop? Na wanem samting i kamap?

⁹ Wantu tasol Seten i kirap mekim nogut long Jop. Em i mekim na planti bulmakau sipsip samting bilong Jop i bagarap, na em i kirapim ol lain man i kam stilim sampela. Em i mekim na ol 10-pela pikinini bilong Jop i dai. Ol samting bilong Jop i lus, tasol em i stap gut long God. Em i no toknogutim God. (Jop 1:2, 13-22) Tasol ol hevi bilong em i no pinis.

10. Seten i mekim wanem na yumi save em i traim gen long pundaunim Jop?

¹⁰ Wanpela taim moa Seten i kam sanap wantaim ol narapela ensel long ai bilong Jehova. Na Jehova i tokim Seten gen long tingim stretpela pasin bilong Jop, na Jehova i tok: “Em i sanap strong yet; em i no lusim mi.” Na Seten i tok: “Man bai lusim olgeta samting bilong lukautim laip bilong em. Orait nau plis, yu kirap na bagarapim bun na skin bilong em na bai yu lukim, long pes bilong yu stret bai em i toknogutim yu, o nogat.”—Jop 2:1-5, NW.

11. (a) Wanem sampela hevi moa Seten i givim long Jop? (b) Na wanem samting i kamap?

¹¹ Orait, nau Jehova i larim Seten i mekim laik bilong em long Jop, tasol Jehova i tok: “Yu no ken kilim em i dai.” (Jop 2:6, NW) Olsem na Seten i kirap givim wanpela sik nogut tru long Jop. Jop i karim bikpela pen moa yet, olsem na em i beten tokim God em i laik bai em i dai. (Jop 2:7; 14:13, 14) Meri bilong Jop tu i givim hevi long Jop. Em i krosim Jop na em i tok: “Yu toknogutim God na bai yu dai.” (Jop 2:9, NW) Tasol Jop i tok: “Bai mi stap gut long God inap long taim mi dai!” (Jop 27:5, NW) Jop i no lusim God. Olsem na yumi save, Seten i giaman taim em i tok, Jop i no givim bel tru long God. Na Seten i no inap pulim olgeta man na bai ol i lusim God.

12. (a) Jop i mekim wanem na God inap bekim tok long Seten? (b) Jisas i stap gut long God na yumi save long wanem samting?

¹² Jop i stap gut long Jehova na Jehova i amamas tru! Baibel i kirapim yumi tu long mekim olsem: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” (Provep 27:11) Seten i sutim tok long God na em i tok, bai ol man i no stap gut long God. Tasol Jop i stap gut long God, olsem na God i amamas, long wanem, em inap bekim tok long Seten. Na i no Jop tasol, planti manmeri moa ol i bin i stap gut long God na God inap bekim tok long Seten. Nambawan man bilong i stap gut long God, em Jisas. Em i gutpela man olgeta na maski olgeta kain traim na hevi Seten i putim long em, tasol em i sanap strong na i stap gut long God. Orait Adam i gutpela man olgeta na sapos em i laik em tu em inap i stap gut long God.

OLSEM WANEM LONG YU?

13. (a) Ol samting yu mekim, olsem wanem em i insait long dispela bikpela tok? (b) Yumi mekim wanem na bai God i amamas long yumi o em i bel hevi?

¹³ Orait, olsem wanem long ol samting yu mekim? Ating yu pilim olsem i no bikpela samting. Tasol nogat. Em i bikpela samting. Long wanem, ol samting yu mekim em i helpim God long bekim tok long Seten, o em i helpim tok bilas bilong Seten. Jehova i laik bai yu mekim wok bilong em na bai yu inap i stap oltaim. (Jon 3:16) Taim ol Isrel i bikhet long God, ol i mekim em i bel hevi. (Sam 78:40, 41) Orait, olsem wanem? Ol samting yu mekim i amamasim Jehova o mekim em i bel hevi? Sapos yu laik bai God i amamas long yu, orait yu mas kisim save long ol lo bilong em na bihainim.

14. (a) Yumi mas bihainim wanem ol lo bilong God long ol samting bilong marit na bai God i amamas long yumi? (b) Sapos yumi brukim ol dispela lo, bilong wanem yumi gat bikpela rong?

¹⁴ Seten i laik tru long kirapim olgeta manmeri long brukim ol lo bilong God long marit, na long kamapim pikinini, na long ol wok bilong ol insait long famili. God i putim ol lo bilong helpim yumi long i stap amamas. Ol dispela lo i tambuim pamuk na pasin bilong bagarapim marit. (1 Tesalonaika 4:3-8; Hibru 13:4) Taim ol manmeri i brukim lo bilong God, planti pikinini i kamap nating na ol i no gat papamama bilong sori long ol na lukautim ol. O ating bai meri i rausim bel na kilim i dai pikinini taim pikinini i no kamap yet. Na tu, planti manmeri i mekim pasin pamuk na sik nogut bilong pamuk i painim ol. Na sapos bihain ol i kamapim pikinini, dispela sik i stap long skin bilong ol em inap bagarapim pikinini. Sapos yu pamuk, olsem yu slip wantaim man o meri yu no marit tru long em, orait, yu mekim pasin nogut tru, yu mekim rong long God. Jop i tok: “Sapos bel bilong mi i kirap long wanpela meri na mi hait na wet long dua bilong haus bilong man i stap klostu long mi . . . em i pasin nogut tru, em i wanpela bikpela rong na bai mi gat kot.”—Jop 31:1, 9, 11, NW.

15. (a) Sapos yumi mekim pasin pamuk husat tasol bai amamas long yumi? (b) Sapos yumi bihainim lo bilong God, olsem wanem dispela em i savepasin?

¹⁵ Seten i bosim ol manmeri bilong dispela graun, olsem na ol i ting i no gat rong long pamuk. Tasol nogut ol i paulim tingting bilong yu. Sapos yu pamuk, yu amamasim husat? Seten tasol. Yu no amamasim Jehova. Sapos yu laik bai Jehova i amamas long yu, orait yu mas ‘klia long pasin pamuk.’ (1 Korin 6:18) Tru, sampela taim i hatwok long yumi stap gut long lo bilong God. Jop tu i gat hatwok. Tasol sapos yu bihainim lo bilong God, yu bihainim savepasin, na bai yu stap amamas. Na bikpela samting, bai yu helpim God long bekim tok long Seten na bihain bai God i givim laip oltaim long yu na bai yu inap i stap amamas oltaim long graun.

16. (a) Jop i stap gut long God na God i mekim gut long em olsem wanem? (b) Maski kain kain hevi Seten i save putim long ol man, olsem em i bin kilim i dai 10-pela pikinini bilong Jop, tasol yumi save long wanem samting?

¹⁶ Tru, Seten i mekim na Jop i go rabis olgeta na 10-pela pikinini bilong em ol i dai. Bikpela hevi tru i painim Jop. Tasol Jop i karim dispela hevi na sanap strong; em i stap gut long God. Olsem na God i mekim gut tru long em. God i givim planti samting moa long em, winim bilong bipo. Na Jop i kamapim 10-pela pikinini moa. (Jop 42:10-17) Na yumi ken save, ol 10-pela pikinini bilong Jop, em Seten i kilim ol i dai, bihain bai ol i kirap bek. Olsem na maski wanem kain traim na hevi God i larim Seten i kamapim, tasol God bai stretim long taim bilong en.

17. Bilong wanem ol samting yumi mekim em i bikpela samting tru?

¹⁷ Olsem na ol samting yu mekim em i bikpela samting. Em i bikpela samting long God Jehova na long Seten tu. Long wanem yu insait long dispela bikpela tok Seten i bin kamapim, olsem: Ol man inap i stap gut long God o nogat.

[Piksa long pes 106]

Seten i tok sapos em i putim traim long ol man bai ol i lusim God, tasol taim em i traim Jop, Jop i stap gut long God

[Piksa long pes 110]

Sapos yu pamuk, olsem yu slip wantaim man o meri yu no marit tru long em, orait yu mekim rong long God

[Piksa long pes 111]

Jop i stap gut long Jehova, olsem na Jehova i givim planti samting moa long em, winim bilong bipo