Olsem Wanem Yu Inap Kamap Pren Bilong God?

1, 2. Husat sampela pren bilong Jehova?

YU LAIK bai wanem kain man i stap pren bilong yu? Wanpela em yu laikim. Ating yu laik poromanim man i gat wankain tingting na laik olsem yu. Na ating yu laikim man i gat ol gutpela pasin na ol pasin yu laikim.

² God Jehova i bin makim sampela man long stap pren bilong em. Olsem, Abraham em i wanpela bilong ol pren bilong Jehova. (Aisaia 41:8; Jems 2:23) Jehova i laikim Devit tu. Em i tok olsem Devit em ‘man i save mekim ol samting i stret wantaim ol tingting i stap long bel bilong em.’ (Aposel 13:22) Na profet Daniel i “dia tumas” long ai bilong Jehova.—Daniel 9:23.

3. Bilong wanem Abraham, Devit, na Daniel i stap pren bilong Jehova?

³ Olsem wanem Abraham, Devit, na Daniel i kamap pren bilong Jehova? Jehova i tokim Abraham olsem: “Yu bin bihainim tok bilong mi.” (Stat 22:18) Jehova i save kamap pren bilong ol man i save daunim ol yet na bihainim tok bilong em. Wanpela lain inap kamap pren bilong em tu. Jehova i tokim lain Israel olsem: “Yupela i mas bihainim tok bilong mi, na mi bai stap God bilong yupela, na yupela bai i stap ol manmeri bilong mi.” (Jeremaia 7:23) Olsem na sapos yu laik kamap pren bilong Jehova, yu mas bihainim tok bilong em.

JEHOVA I SAVE LUKAUTIM OL PREN BILONG EM

4, 5. Olsem wanem Jehova i lukautim ol pren bilong em?

⁴ Baibel i tok Jehova i save painim rot bilong “soim strong bilong em long helpim ol man husat i givim bel olgeta long em.” (2 Stori 16:9) Long Buk Song 32:8, Jehova i tok promis long ol pren bilong em olsem: “Bai mi mekim yu kisim pasin bilong skelim gut ol samting na skulim yu long pasin mi laik yu bihainim. Bai mi givim edvais long yu na ai bilong mi bai stap long yu.”

⁵ Wanpela strongpela birua i laik pasim yumi long i stap pren bilong God. Tasol Jehova i laik lukautim yumi. (Ritim Song 55:22.) Yumi stap pren bilong Jehova, na yumi givim bel olgeta long mekim wok bilong em. Maski hevi i painim yumi, yumi stap gut long em. Na yumi gat wankain tingting olsem bilong man bilong raitim song. Em i tok long Jehova olsem: “Em i stap long rait sait bilong mi, olsem na mi no ken guria.” (Song 16:8; 63:8) Olsem wanem Satan i laik pasim yumi long i stap pren bilong God?

SATAN I SUTIM TOK LONG OL MAN

6. Satan i sutim wanem tok long ol man?

⁶ Long Sapta 11 yumi kisim save olsem Satan i bin sutim tok long Jehova na tok em i giaman na i no mekim stretpela pasin taim em i no larim Adam tupela Iv yet i makim wanem samting i stret na wanem samting i no stret. Buk Jop tu i stori olsem Satan i sutim tok long olgeta manmeri i laik i stap pren bilong God. Satan i tok ol man i mekim wok bilong God, long wanem, ol i laik kisim ol samting long em, na pasin bilong laikim God i no as na ol i mekim. Na Satan i tok tu olsem em inap long pulim ol man long givim baksait long God. Orait yumi ken skelim yumi inap lainim wanem samting long Jop na olsem wanem Jehova i lukautim em.

7, 8. (a) Olsem wanem Jop i no wankain olsem ol arapela manmeri long graun? (b) Satan i tok wanem long Jop?

⁷ Jop em i husat? Em i wanpela gutpela man i bin i stap long graun inap 3,600 yia i go pinis. Jehova i tok i no gat wanpela man i olsem em long graun long dispela taim. Jop i gat bikpela rispek long God, na em i nolaik tru long pasin nogut. (Jop 1:8) Yes, Jop em i wanpela gutpela pren bilong Jehova.

⁸ Satan i sutim tok olsem Jop i tingting long kisim ol samting long God olsem na em i mekim wok bilong God. Satan i tokim Jehova olsem: “Oltaim yu save lukautim em gut olsem banis i raunim em na famili bilong em na olgeta samting em i gat. Na oltaim yu save blesim olgeta samting em i mekim, na ol sipsip na bulmakau samting bilong em i kamap planti tru long graun. Tasol sapos yu putim han bilong yu i go na rausim olgeta samting em i gat, orait bai yu lukim em i mekim tok nogut long yu long ai bilong yu stret.”—Jop 1:10, 11.

9. Jehova i larim Satan long mekim wanem?

⁹ Satan i tok Jop i mekim wok bilong God, long wanem, em i kisim ol gutpela samting long Em. Satan i tok tu olsem em inap long mekim na Jop bai stop long mekim wok bilong Jehova. Jehova i no orait long tok bilong Satan, tasol em i larim Satan i traim Jop na long dispela rot dispela bai kamapim klia olsem Jop i laikim Jehova na i stap pren bilong Em o nogat.

SATAN I PUTIM OL HEVI LONG JOP

10. Satan i putim wanem ol hevi long Jop? Na Jop i mekim wanem?

¹⁰ Pastaim Satan i stilim o bagarapim olgeta animal bilong Jop. Bihain Satan i kilim i dai klostu olgeta wokman bilong Jop. Olgeta samting bilong Jop i bagarap. Long laspela hevi, Satan i kilim i dai tenpela pikinini bilong Jop long bikpela win na ren. Tasol Jop i stap gut long Jehova. “Tru ol dispela samting i kamap long em, tasol Jop i no mekim sin o sutim tok long God olsem em i putim hevi long em.”—Jop 1:12-19, 22.

11. (a) Satan i mekim wanem samting moa long Jop? (b) Jop i mekim wanem?

¹¹ Satan i no givap. Em i tokim God olsem: “Mekim save long bodi bilong em, orait bai yu lukim em i mekim tok nogut long yu long ai bilong yu stret.” Satan i givim Jop wanpela sik nogut i givim bikpela pen long em. (Jop 2:5, 7) Tasol Jop i stap gut yet long Jehova. Em i tok: “I go inap long taim mi dai, mi no inap lusim [o, givap long] pasin bilong mi long i stap gut long God!”—Jop 27:5.

12. Olsem wanem Jop i soim klia olsem Satan i giaman?

¹² Jop i no save long tok Satan i sutim na as na em i karim planti pen na hevi. Em i ting Jehova i kamapim ol dispela hevi i painim em. (Jop 6:4; 16:11-14) Tasol maski i olsem, Jop i stap gut yet long Jehova. Em i no gat tupela tingting. Jop i no tingim em yet. Em i pren bilong God, long wanem, em i laikim Em. Olgeta tok Satan i sutim i giaman!

13. Pasin bilong Jop long stap gut long God i kamapim wanem samting?

¹³ Maski Jop i no save long wanem samting i kamap long heven, em i stap gut long God na kamapim klia olsem Satan em i man nogut. Jehova i givim gutpela pe long Jop long em i stap gut long em.—Jop 42:12-17.

OLSEM WANEM SATAN I SUTIM TOK LONG YU?

14, 15. Satan i sutim wanem tok long olgeta man na meri?

¹⁴ Yu inap kisim gutpela skul i kam long ol samting i painim Jop. Long nau, Satan i sutim tok long yumi olsem yumi mekim wok bilong Jehova long wanem yumi laik kisim ol samting long Em. Long Jop 2:4, Satan i tok: “Wanpela man i laik i dai, em bai givim olgeta samting bilong em bilong seivim laip bilong em yet.” Olsem na Satan i no sutim tok long Jop tasol, em i sutim tok tu long olgeta man na meri olsem ol i tingim ol yet tasol. Planti handet yia bihain long Jop i dai, Satan i wok yet long tok bilas long Jehova na sutim tok long ol wokman bilong em. Yumi kisim save long dispela long tok bilong Provep 27:11, we Jehova i tokim yumi olsem: “Pikinini bilong mi, bihainim savetingting na mekim bel bilong mi i amamas, na bai mi inap bekim tok long man husat i save sutim tok [o, tok bilas] long mi.”

¹⁵ Yu ken makim olsem yu bai bihainim tok bilong Jehova na kamap gutpela pren bilong Em na soim olsem Satan em man bilong giaman. Maski yu mas mekim bikpela senis long laip bilong yu bilong kamap pren bilong God, dispela em i nambawan gutpela disisen yu inap mekim! Dispela disisen em i bikpela samting. Satan i sutim tok olsem yu bai i no stap gut long God taim hevi i painim yu. Satan i traim long mekim ol samting na bai yu no stap gut long God. Olsem wanem em i mekim olsem?

16. (a) Satan i yusim wanem ol rot bilong pasim ol man long mekim wok bilong Jehova? (b) Olsem wanem Devil inap traim long pasim yu long mekim wok bilong Jehova?

¹⁶ Satan i save yusim kain kain rot bilong pasim yumi long i stap pren bilong God. Em i “olsem wanpela laion i singaut strong na i painim ol man bilong kaikai.” (1 Pita 5:8) Yu no ken kirap nogut sapos ol pren, ol wanblut, o ol narapela i traim long pasim yu long stadi long Baibel na mekim samting i stret. Taim kain samting olsem i painim yumi, yumi inap ting olsem Satan i kirapim ol long birua long yumi.a (Jon 15:19, 20) Na tu, Satan i save senisim pasin bilong en na kamap olsem “ensel bilong lait.” Olsem na em inap traim long giamanim yumi long sakim tok bilong Jehova. (2 Korin 11:14) Narapela rot Satan i save yusim bilong pasim yumi long mekim wok bilong Jehova em long mekim yumi ting olsem yumi no gutpela inap long mekim wok bilong God.—Provep 24:10.

BIHAINIM OL LO BILONG JEHOVA

17. Bilong wanem yumi bihainim tok bilong Jehova?

¹⁷ Taim yumi bihainim tok bilong Jehova, yumi kamapim klia olsem Satan em man bilong giaman. Wanem samting bai helpim yumi long bihainim tok? Baibel i tok: “Yupela i mas laikim Jehova, God bilong yupela. Yupela i mas laikim em long bel olgeta bilong yupela na long laip olgeta bilong yupela na long strong olgeta bilong yupela.” (Lo 6:5) Yumi bihainim tok bilong Jehova bikos yumi laikim em. Taim pasin bilong yumi long laikim God i go bikpela, yumi bai laik long mekim olgeta samting em i tokim yumi long mekim. Aposel Jon i tok: “Pasin bilong laikim God i olsem, yumi bihainim ol lo bilong em; na ol lo bilong em i no givim hevi long yumi.”—1 Jon 5:3.

18, 19. (a) Wanem sampela samting em Jehova i tok i no gutpela? (b) Olsem wanem yumi save Jehova i no save tokim yumi long mekim ol samting yumi no inap mekim?

¹⁸ Tasol wanem sampela samting em Jehova i tokim yumi olsem i no stret? Sampela bilong ol i stap long blok “Sakim Ol Pasin Jehova i Nolaik Tru Long En.” Ating pastaim yu inap ting sampela bilong ol i no nogut tumas. Tasol taim yu ritim ol tok bilong Baibel na tingim gut ol dispela tok, yu bai luksave olsem em i savetingting long bihainim ol lo bilong Jehova. Ating yu bai luksave tu olsem yu gat wok long senisim sampela pasin bilong yu. Ating sampela taim em bai hatwok, tasol sapos yu mekim ol dispela senis, bel bilong yu bai stap isi na yu bai amamas long i stap gutpela pren bilong God. (Aisaia 48:17, 18) Olsem wanem yumi save yumi inap mekim ol dispela senis?

¹⁹ Jehova i no save tokim yumi long mekim samting yumi no inap mekim. (Lo 30:11-14) Em i gutpela Pren bilong yumi, olsem na em i save gut long yumi winim yumi yet. Em i save long ol samting yumi inap mekim na ol samting yumi no inap mekim. (Song 103:14) Aposel Pol i tok: “God i save bihainim ol tok bilong em, na em i no inap larim wanpela traim i kamap long yupela i winim strong bilong yupela, nogat. Taim traim i painim yupela, em bai wokim rot bilong helpim yupela na bai yupela i ken sanap strong na traim i no inap daunim yupela.” (1 Korin 10:13) Yumi ken bilip olsem oltaim Jehova bai givim yumi strong long mekim ol samting i stret. Em bai givim yumi “strong i winim strong bilong yumi ol man” long sanap strong na karim ol bikpela hevi. (2 Korin 4:7) Jehova i bin helpim Pol long karim ol kain hevi, olsem na em inap tok: “Long olgeta samting, mi gat strong long rot bilong dispela man husat i save givim pawa long mi.”—Filipai 4:13.

LAIN LONG LAIKIM OL SAMTING GOD I LAIKIM

20. Yu mas bihainim wanem ol pasin? Bilong wanem?

²⁰ Sapos yumi laik i stap pren bilong Jehova, yumi mas stop long mekim ol pasin we Jehova i tok i no stret, tasol yumi mas mekim sampela samting moa. (Rom 12:9) Ol pren bilong God i save laikim ol samting em i laikim. Buk Song 15:1-5 (Ritim.) i stori long pasin bilong ol. Ol pren bilong Jehova i save bihainim ol pasin bilong em olsem “pasin laikim, amamas, bel isi, i no les kwik, pasin helpim, gutpela pasin, bilip, pasin isi, na bosim bel.”—Galesia 5:22, 23.

21. Olsem wanem yu inap lain long soim ol pasin em God i laikim?

²¹ Olsem wanem yu inap lain long soim ol dispela gutpela pasin? Yu mas kisim save long ol samting Jehova i laikim long rot bilong ritim na stadi oltaim long Baibel. (Aisaia 30:20, 21) Taim yu mekim olsem, pasin bilong yu long laikim Jehova bai go bikpela, na taim pasin laikim bilong yu i go bikpela, yu bai laik long bihainim tok bilong em.

22. Wanem samting bai kamap sapos yu bihainim tok bilong Jehova?

²² Ol senis yu mas mekim long laip bilong yu i kain olsem man i rausim olpela klos na werim nupela klos. Baibel i tok yu mas “rausim olpela pasin” na werim “nupela pasin” olsem yu werim klos. (Kolosi 3:9, 10) Maski i no isi long mekim olsem, tasol taim yumi mekim ol senis na bihainim tok bilong Jehova, em i tok promis long givim yumi “gutpela pe tru.” (Song 19:11) Yes, makim olsem yu bai bihainim tok bilong Jehova, na kamapim klia olsem Satan em man bilong giaman. Mekim wok bilong Jehova bikos yu laikim em na i no olsem yu laik kisim gutpela pe long bihain. Sapos yu mekim olsem, yu bai kamap pren tru bilong God!