Jop i Litimapim Nem Bilong Jehova

“Mi litimapim nem bilong [Bikpela].”​​—JOP 1:​21.

1. Ating husat i raitim buk bilong Jop, na long wanem taim?

MOSES i gat 40 krismas taim em i ranawe lusim Isip na bai Fero i no ken kilim em i dai, na em i go i stap long Midian. (Ap. 7:​23) Long Midian, ating em i harim stori bilong ol traim i painim Jop, em i stap long kantri Us, klostu long Midian. Planti yia bihain, taim Moses na lain Israel i stap klostu long hap bilong Us long pinis bilong raun bilong ol long ples drai nating, ating Moses i harim stori bilong ol laspela yia bilong Jop. Stori bilong ol Juda i tok, Moses i raitim buk bilong Jop bihain long dai bilong Jop.

2. Wanem sampela rot we Buk Jop i strongim bilip bilong ol wokboi bilong Jehova long nau?

² Buk Jop i strongim bilip bilong ol wokboi bilong God i stap long nau. Long wanem rot? Stori bilong Jop i helpim yumi long kisim mining bilong sampela bikpela samting i bin kamap long heven na long bikpela tok i bin kamap long wok bos bilong God. Na stori bilong Jop i helpim yumi long save gut moa long pasin bilong stap gut long God, na long as na sampela taim Jehova i larim ol wokboi bilong em i kisim pen na hevi. Na Buk Jop i kamapim olsem Satan em i nambawan birua bilong Jehova na ol manmeri. Na tu, buk i kamapim klia olsem ol man i gat sin ol inap stap gut long Jehova, olsem Jop i bin mekim, maski bikpela hevi i painim ol. Orait nau yumi ken skelim sampela samting Buk Jop i stori long en.

Satan i Traim Jop

3. Jop i wanem kain man? Wanem samting i kirapim Satan long mekim nogut long em?

³ Jop i wanpela maniman na em i gat namba. Em i wanpela papa i save bihainim stretpela pasin. Em i save givim gutpela skultok long ol narapela na i save helpim ol lain i sot long ol samting. Tasol nambawan bikpela samting, Jop i save pret long God na aninit long em. Baibel i tok: “Em i gutpela man tru na i no gat asua long ai bilong God. Em i save lotu na aninit long God, na i save bihainim olgeta tok bilong en. Na em i no save mekim wanpela pasin nogut.” Pasin bilong Jop long givim bel tru long God, dispela samting i mekim na Satan i birua long Jop​—mani na namba bilong em, nogat.​​—Jop 1:​1; 29:​7-​16; 31:1.

4. Satan i sutim tok long wanem pasin bilong Jop? Man i gat dispela pasin em i wanem kain man?

⁴ Kirap bilong Buk Jop i stori long wanpela bung i kamap long heven we ol ensel i kam bung long ai bilong Jehova. Satan tu i stap, na em i sutim tok long Jop. (Ritim Jop 1:​6-​11.) Tru, Satan i toktok long ol mani kago bilong Jop, tasol samting em i sutim tok long en, em pasin bilong Jop long stap gut long God. Pasin bilong stap gut long God i makim pasin we man i bihainim stretpela pasin na i no gat asua o rong long ai bilong God. Em i save givim bel tru long Jehova.

5. Satan i sutim wanem tok long Jop?

⁵ Satan i tok, Jop i tingim em yet tasol na dispela em i as na em i lotu long God, pasin bilong stap gut long God, nogat. Satan i tok, God i save givim planti gutpela samting long Jop na i save lukautim em gut, na long dispela as tasol Jop i stap gut long Jehova. Bilong bekim dispela tok bilong Satan, Jehova i larim Satan i mekim nogut long dispela gutpela man. Orait nau, insait long wanpela de tasol, Jop i harim tok olsem olgeta bulmakau sipsip samting bilong em i lus, ol wokman bilong em i dai, na ol 10-pela pikinini bilong em ol tu i dai. (Jop 1:​13-​19) Olsem wanem? Dispela i mekim na Jop i lusim pasin bilong stap gut long God? Baibel i stori long tingting bilong Jop long ol samting nogut i painim em, olsem: “Bikpela yet i bin givim mi olgeta samting, na nau em i rausim pinis ol dispela samting. Olsem na mi litimapim nem bilong en.”​​—Jop 1:​21.

6. (a) Wanem samting i kamap long narapela bung long heven? (b) Taim Satan i sutim tok long pasin bilong Jop long stap gut long Jehova, em i tingim husat moa?

⁶ Bihain, i gat narapela bung i kamap long heven. Satan i sutim tok gen long Jop, olsem: “Mi ting sapos wanpela man i laik i stap gut, em inap givim olgeta samting bilong en bilong baim bek laip bilong en. Olsem na mi laik bai yu bagarapim bodi bilong en, na bai yu lukim em i tok nogut tru long yu.” Tasol dispela tok bilong Satan i no go long Jop wanpela tasol, nogat. Taim Satan i tok, “Sapos wanpela man i laik i stap gut, em inap givim olgeta samting bilong en bilong baim bek laip bilong en,” em i sutim tok long olgeta “man” i lotu long Jehova. Bihain, God i orait long Satan i givim wanpela bikpela sik long Jop. (Jop 2:​1-8) Tasol dispela i no laspela traim i painim Jop, nogat.

Skul Yumi Kisim Long Pasin Bilong Jop

7. Meri bilong Jop na 3-pela man i kam lukim Jop, ol i putim wanem hevi long Jop?

⁷ Pastaim, meri bilong Jop, em tu i kisim ol wankain hevi olsem man bilong em i kisim. Taim ol pikinini bilong em i dai, na olgeta mani kago bilong famili i lus, ating bel bilong em i bagarap stret. Na ating em i bel hevi tru taim em i lukim man bilong em i karim hevi bilong wanpela bikpela sik. Em i tokim Jop: “Olsem wanem na yu bihainim God yet? Mobeta yu lusim em na tok nogut long em na yu ken i dai.” Orait nau 3-pela man i kam​​—Elifas, Bildat, na Sofa​​—ol i mekim olsem ol i laik strongim bel bilong Jop. Tasol ol i kamapim sampela tok i no stret, na ol i ‘no helpim em liklik.’ Bildat i tok, ol pikinini bilong Jop i bin mekim sampela rong na i stret ol i dai. Elifas i tok, ol hevi bilong Jop i olsem strafe bilong sampela sin bipo em i bin mekim. Em i tok, God i no save tingim ol man i stap gut long em! (Jop 2:​9, 11; 4:8; 8:4; 16:2; 22:​2, 3) Maski tok bilong ol i putim bikpela hevi long Jop, em i stap gut long God. Tru, Jop i gat rong taim em i “tok long em yet i mekim stretpela pasin na pasin bilong God i no stret.” (Jop 32:2) Tasol em i no larim ol hevi i mekim na em i lusim God, nogat.

8. Olsem wanem Elihu i stap gutpela piksa bilong ol man long nau i gat wok long givim skultok long ol narapela?

⁸ Orait nau yumi ken stori long Elihu, em tu i kam lukim Jop. Pastaim Elihu i putim yau na harim tok bilong Jop na 3-pela pren bilong em. Maski Elihu i yangpela long ol dispela 4-pela man, em i kamapim gutpela tingting, winim bilong ol. Em i mekim gutpela pasin long Jop taim em i toktok wantaim em, em i kolim nem bilong em. Elihu i mekim gutpela tok amamas long Jop i bin bihainim stretpela pasin. Tasol em i tok tu olsem Jop i bin tingting tumas long kamapim stretpela pasin bilong em. Orait nau Elihu i strongim bel bilong Jop, em i tok, oltaim pasin bilong stap gut long God i save kamapim gutpela samting. (Ritim Jop 36:​1, 11.) Elihu i stap gutpela piksa tru bilong ol man long nau i gat wok long givim skultok long ol narapela! Em i stap isi, putim gut yau, mekim gutpela tok amamas, na givim gutpela skultok.​​—Jop 32:6; 33:32.

9. Jehova i helpim Jop olsem wanem?

⁹ Orait nau narakain samting i painim Jop, Jehova yet i toktok wantaim Jop! Baibel i tok: “Bikpela i stap insait long bikpela win na ren na i bekim tok bilong Jop.” Long rot bilong sampela askim, Jehova i helpim Jop long stretim tingting bilong em. Jop i larim God i stretim em, na i tok: “Mi rabis na samting nating tasol. . . . Mi sindaun long das na long sit bilong paia, bilong soim yu olsem mi tanim bel pinis.” Taim Jehova i toktok pinis wantaim Jop, nau Em i kamapim kros bilong Em long ol dispela 3-pela pren, long wanem, ol i no bin autim “tok tru.” Jop i beten askim God long helpim ol. “Bihain long Jop i bin beten bilong helpim ol pren bilong en, Bikpela i givim em gutpela sindaun gen. Bikpela i givim Jop planti samting tru, i dabolim olgeta samting em i bin i gat bipo.”​​—Jop 38:1; 40:4; 42:​6-​10.

Yumi Laikim Jehova Inap Long Wanem Mak?

10. Bilong wanem Jehova i no larim tasol dispela tok Satan i bin sutim long Jop na em i no bagarapim Satan?

¹⁰ Jehova em i Krieta na Bos bilong olgeta samting em i bin wokim. Olsem na bilong wanem em i tingim dispela tok Satan i sutim long Jop? God i tingim dispela, long wanem em i save olsem, sapos em i larim tasol dispela tok i stap, o em i bagarapim Satan, dispela i no inap stretim bikpela tok Satan i bin kamapim. Satan i bin tok olsem sapos olgeta mani kago bilong Jop i pinis, bai em i no stap gut long God. Tasol Jop i no lusim pasin bilong stap gut long God. Orait nau Satan i tok, ol man bai lusim God sapos ol i pilim bikpela pen long skin. Jop i kisim wanpela bikpela sik i givim bikpela pen tru long em, tasol em i stap gut long God. Olsem na dispela gutpela man, maski em i sinman, em i kamapim long ples klia olsem Satan em i man bilong giaman. Tasol olsem wanem long ol narapela man i lotu long God?

11. Olsem wanem Jisas i soim klia olsem Satan em i man bilong tok giaman?

¹¹ Olgeta wan wan wokboi bilong God husat i stap gut long God maski Satan i givim wanem wanem hevi long ol, ol i kamapim long ples klia tok giaman bilong dispela birua. Jisas i kam long graun na i soim klia olsem Satan i man bilong tok giaman. Jisas em i man i gutpela olgeta, wankain olsem namba wan tumbuna bilong yumi, Adam. Pasin bilong Jisas long i stap gut long God i go inap long em i dai, dispela i soim klia olsem Satan em i man bilong tok giaman tasol na ol tok em i bin sutim long ol man i no tru.​​—KTH 12:10.

12. Olgeta wan wan wokboi bilong Jehova i gat rot, na wok, long mekim wanem?

¹² Tasol Satan i save wok yet long traim ol man husat i lotu long Jehova. Yumi olgeta wan wan i gat rot, na wok, long stap gut long God na soim klia olsem yumi mekim wok bilong Jehova, long wanem, yumi laikim em na yumi no tingim yumi yet tasol. Yumi gat wanem tingting long dispela wok? Yumi tingim dispela wok bilong stap gut long Jehova olsem wanpela gutpela samting tru. Na samting i strongim bel bilong yumi em olsem: Yumi save olsem Jehova i givim strong long yumi na bai yumi inap sanap strong, na wankain olsem em i bin mekim long Jop, em i no save larim wanpela bilong ol traim i winim strong bilong yumi.​​—1 Ko. 10:13.

Satan​​—Wanpela Birua na Apostet

13. Buk Jop i helpim yumi long kisim wanem save long Satan?

¹³ Ol Skripsa Hibru i stori long Satan i sutim tok long Jehova na giamanim ol manmeri. Ol Skripsa Grik i stori moa long Satan i birua long Jehova, na long Buk Kamapim Tok Hait, yumi kisim save olsem klostu nau Jehova bai kamapim long ples klia olsem em i Nambawan Bos na Satan bai bagarap. Buk Jop i helpim yumi long kisim sampela save moa long pasin bikhet bilong Satan. Taim Satan i kam long ol bung i kamap long heven, em i no kam na bai em i ken litimapim nem bilong Jehova, nogat. Em i gat tingting nogut, na samting em i tingting long mekim i nogut tru. Bihain long Satan i sutim tok long Jop na Jehova i orait long em i ken traim Jop, ‘Satan i lusim Bikpela na i go.’​​—Jop 1:​12; 2:7.

14. Satan i gat wanem tingting long Jop?

¹⁴ Em nau, Buk Jop i kamapim klia olsem Satan em birua bilong ol manmeri. Namel long tupela bung long heven em Jop 1:6 na Jop 2:1 i stori long en, i gat wanpela haptaim​—em yumi no save long longpela bilong en​—we Satan i traim Jop. Jop i stap gut long God, olsem na Jehova inap tokim Satan: “Yu bin grisim mi na mi bin larim yu i mekim save nating long [Jop]. Tasol em i no lusim mi. Nogat. Em i bihainim mi tru olsem bipo.” Tasol Satan i no tokaut olsem ol tok em i bin sutim long Jop i no tru, nogat. Em i strong long narapela bikpela traim i mas painim Jop. Olsem na Satan i bin traim Jop long taim em i gat planti mani kago na long taim em i stap rabis. Tru tumas, Satan i no sori liklik long ol rabisman o long ol lain em bikpela hevi i painim ol. Em i save heitim tru ol man i stap gut long God. (Jop 2:​3-5) Tasol Jop i stap gut long God na dispela i kamapim klia olsem Satan em man bilong tok giaman.

15. Olsem wanem ol apostet bilong nau i kain olsem Satan?

¹⁵ Satan em i namba wan man long kamap apostet. Ol apostet bilong nau ol i gat ol pasin i kain olsem bilong Satan. Sampela i kisim tingting nogut long sampela brata o sista, ol elda Kristen, o Gavening Bodi. Sampela apostet i no laikim pasin bilong yusim nem bilong Jehova. Ol i no laik kisim save long Jehova o mekim wok bilong em. Olsem papa bilong ol, Satan, ol apostet i laik bagarapim bilip bilong ol man i stap gut long God. (Jo. 8:​44) Long dispela as ol wokboi bilong Jehova i no save bung o toktok wantaim ol!​​—2 Jo. 10, 11.

Jop i Litimapim Nem Bilong Jehova

16. Jop i gat wanem tingting long Jehova?

¹⁶ Jop i save yusim nem bilong Jehova na i litimapim dispela nem. Maski bel bilong Jop i bagarap stret taim em i harim nius bilong indai bilong ol pikinini bilong em, em i no toknogutim God. Na maski Jop i ting God i as bilong ol hevi bilong em, em i litimapim nem bilong Jehova. Bihain, Jop i tok: “Man i save aninit long . . . Bikpela, na i save givim baksait long ol pasin nogut, dispela man i gat gutpela tingting na save.”​​—Jop 28:28.

17. Wanem samting i bin helpim Jop long stap gut long God?

¹⁷ Wanem samting i bin helpim Jop long stap gut long God? Paslain long ol hevi i painim Jop, em i bin kisim pasin bilong pas gut wantaim Jehova. Maski i luk olsem Jop i no save olsem Satan i bin sutim tok long Jehova, Jop i strong long stap gut long God. Em i tok: “I go inap long taim mi dai mi no ken lusim pasin bilong mi long stap gut long God!” (Jop 27:​5, NW) Jop i mekim wanem bilong kisim dispela pasin bilong pas gut wantaim God? Ating em i bin tingim gut ol tok em i harim long ol samting God i bin mekim long Abraham, Aisak, na Jekop, em ol wanblut bilong em. Na long rot bilong lukluk long ol samting God i bin wokim, em inap save long planti pasin bilong Jehova.​​—Ritim Jop 12:​7-9, 13, 16.

18. (a) Jop i mekim wanem bilong soim olsem em i givim bel tru long Jehova? (b) Olsem wanem yumi inap bihainim gutpela pasin bilong Jop?

¹⁸ Ol samting Jop i kisim save long en i kirapim em long mekim ol samting Jehova i laikim. Em i ting nogut ol pikinini bilong em i bin mekim sampela rong long ai bilong God o “tok nogut long God long tingting bilong ol,” olsem na oltaim em i mekim ol ofa. (Jop 1:5) Taim ol bikpela traim tru i painim Jop, em i wok yet long mekim gutpela tok long Jehova. (Jop 10:12) Jop i stap gutpela piksa tru long pasin yumi ken bihainim! Oltaim yumi tu i mas wok long kisim stretpela save long Jehova na long ol samting em i tingting pinis long mekim. Yumi save stadi, go long olgeta miting, beten, na autim gutnius. Na yumi wok strong long tokim ol narapela long nem bilong Jehova. Na wankain olsem pasin bilong Jop long stap gut long God i bin mekim Jehova i amamas, pasin bilong ol wokboi bilong God long nau long stap gut long em i save mekim Jehova i belgut tru. Bai yumi stori long dispela samting long stadi i kamap bihain long dispela.

Yu Inap Tingim?

• Wanem samting i mekim na Satan i sutim tok long Jop?

• Wanem ol traim i painim Jop? Jop i mekim wanem?

• Wanem samting bai helpim yumi long stap gut long God, olsem Jop i bin mekim?

• Long Buk Jop, yumi kisim wanem save long Satan?

[Piksa long pes 4]

Stori bilong Jop i kirapim yumi long tingim bikpela tok i bin kamap long wok king bilong God

[Piksa long pes 6]

Wanem samting inap kamap na i traim pasin bilong yu long stap gut long God?