Jop i Stap Strong—Yumi Tu Inap!
“Ol man i bin strongim bel na karim hevi, ol i save stap gut na amamas.”—JEMS 5:11.
‘SATAN i laik holimpas mi! Mi pilim olsem Jop!’ A. H. Macmillan i tok olsem long wanpela gutpela pren bilong em long nambawan ofis bilong ol Witnes Bilong Jehova. Long Ogas 26, 1966, Brata Macmillan i dai na pinisim wok bilong em long graun taim em i gat 89 krismas. Em i save, ol gutpela wok bilong ol Kristen God i bin makim ol, olsem em yet, bai “go wantaim ol.” (KTH 14:13) Na tru tumas, ol bai mekim yet wok bilong Jehova, long wanem, ol i bilong kirap bek na i go long heven na i stap oltaim oltaim, no ken i dai. Ol pren bilong Brata Macmillan i amamas long em i kisim pinis dispela prais. Tasol taim em i lapun pinis, kain kain hevi i painim em, olsem sik na sampela hevi moa, na em i pilim tru olsem Satan i laik pundaunim em na bai em i no stap gut moa long God.
2 Taim Brata Macmillan i tok em i pilim olsem Jop, em i toktok long wanpela man em planti hevi i bin painim em bilong traim bilip bilong em, tasol em i stap strong. Jop i sindaun long “kantri Us,” ating em i stap long hap not bilong Arebia. Em i kamap long lain bilong Siem, em pikinini bilong Noa, na em i save lotuim Jehova. Ating ol traim i bin painim Jop namel long taim Josep i dai na taim Moses i kamapim klia olsem em i stretpela man. Insait long dispela taim i no gat wanpela man i bin givim bel long God olsem Jop i mekim. Jehova i lukim Jop i no gat asua long wanpela samting, na em i stretpela man na man bilong pret long God.—Jop 1:1, 8.
3 Jop ‘i gat biknem i winim ol arapela man long ol kantri long hap sankamap,’ na em i gat bikpela lain wokboi na wokmeri na 11,500 sipsip na bulmakau samting. Tasol ol samting bilong spirit i bikpela samting tru long Jop, winim mani kago. Yumi ken ting Jop i bin skulim 7-pela pikinini man na 3-pela pikinini meri bilong em long Jehova, olsem ol papa i stap aninit long God ol i mekim long nau. Na taim ol pikinini i bikpela pinis na i lusim haus bilong Jop, em i mekim wok yet olsem pris bilong famili na wokim ol ofa bilong helpim ol, nogut ol i bin mekim rong.—Jop 1:2-5.
4 Ol Kristen bilong nau ol man i mekim nogut long ol, ol i mas tingim Jop na bai ol i ken strongim bel na karim hevi na no ken les. Jems i tok: “Harim. Yumi save tok olsem, ‘Ol man i bin strongim bel na karim hevi, ol i save stap gut na amamas i stap.’ Yupela i harim pinis stori bilong Jop, em i bin strongim bel na karim olgeta hevi i kamap long em. Na yupela i save, bihain Bikpela i bin mekim gutpela pasin long em. Yes, yumi save, Bikpela em i save sori moa yet long yumi, na oltaim em i save marimari long yumi.” (Jems 5:11) Lain bilong Jisas em God i bin makim ol, na dispela lain “planti manmeri tru” bilong nau, ol tu i mas strongim bel bambai ol i ken winim ol hevi i traim bilip bilong ol. (KTH 7:1-9) Orait, wanem ol hevi Jop i bin karim? Bilong wanem ol dispela hevi i painim em? Stori bilong em inap helpim yumi olsem wanem?
Wanpela Bikpela Tok i Kamap
5 Wanpela bikpela tok i laik kamap long heven, tasol Jop i no save. Wanpela taim “ol ensel i kam bung long ai bilong Bikpela.” (Jop 1:6) Pikinini bilong God, nem bilong em Tok, em i stap. (Jon 1:1-3) Na ol gutpela ensel na ol ensel i bikhet long God ol i stap. (Stat 6:1-3) Na Satan tu i stap, long wanem, taim bilong rausim em long heven em bihain long taim Kingdom i kamap pinis long yia 1914. (KTH 12:1-12) Long taim bilong Jop, Satan i kamapim wanpela bikpela tok, olsem: I stret Jehova i stap King na bosim olgeta man o nogat?
6 Jehova i askim Satan: “Yu stap we na yu kam?” Satan i tok: “Mi raun long olgeta hap [bilong graun] na mi kam.” (Jop 1:7) Em i wok long painim wanpela man bilong kaikai. (1 Pita 5:8, 9) Satan i laik mekim na bai lain bilong God i lusim bilip, na long dispela rot em inap kamapim klia olsem i no gat wanpela man bai bihainim tok bilong God long wanem ol i laikim em tru. Orait, Jehova i askim Satan: “Yu lukim tu wokboi bilong mi, Jop, o nogat? Jop em i gutpela man tru na i no gat asua long ai bilong mi. Em i save lotu na aninit long mi, na i save bihainim olgeta tok bilong mi.” (Jop 1:8) God i save, sin i stap long skin bilong Jop, na em i tingim dispela na i putim ol mak Jop i mas winim, na Jop i winim ol dispela mak. (Song 103:10-14) Tasol Satan i tok: “Yu ting bai Jop i aninit long yu sapos em i no kisim wanpela samting long han bilong yu, a? Mi ting nogat. . . . Oltaim yu save lukaut gut long em na . . . mekim gut long em, na yu bin givim em planti bulmakau moa inap long pulapim olgeta hap bilong kantri.” (Jop 1:9, 10) Satan i krungutim gutnem bilong Jehova taim em i tok, i no gat wanpela man bai tingim bikpela namba na gutpela pasin bilong Jehova na long dispela as tasol ol i laikim em tru na lotuim em—em i mas grisim ol long sampela samting na bai ol i lotuim em. Satan i tok, Jop i tingim ol samting God i givim long em na long dispela as tasol em i lotuim God.
Satan i Mekim Save Long Jop!
7 Orait Satan i tok: “Tasol sapos yu bagarapim na rausim dispela olgeta samting bilong en, orait bai yu lukim em i tok nogut tru long yu.” Orait, God bai bekim wanem tok long Satan? Em i tok: “Mi putim olgeta samting bilong en long han bilong yu. . . . Tasol yu no ken mekim nogut long Jop yet.” Satan i bin tok, God i mekim gut long Jop na em i gat planti samting. Orait, God bai larim hevi i painim Jop, tasol Satan i no ken bagarapim skin bilong Jop. Nau Satan i lusim dispela bung na em i go bilong mekim dispela wok nogut.—Jop 1:11, 12.
8 Kwiktaim Satan i kirap mekim save long Jop. Wanpela wokboi bilong Jop i kam tokim em: “Mipela i bin kisim ol bulmakau i go brukim graun long gaden. Na ol donki i kaikai gras i stap klostu long ol. Orait na wantu ol lain Sabea i kamap na stilim olgeta bulmakau na donki. Na ol i kilim i dai olgeta wokman bilong yu.” (Jop 1:13-15) Jehova i no lukautim moa ol samting bilong Jop. Kwiktaim Satan i kamapim strong bilong em. Narapela wokboi i kam na i tok: “Klaut i pairap bikpela moa na i kilim ol sipsip na wasman, na olgeta i dai pinis.” (Jop 1:16) Em nau, Satan i mekim olsem God yet i as bilong ol dispela hevi i painim wokboi bilong em! Klaut i save kirap long ples antap, olsem na ol man inap ting Jehova yet i kamapim dispela bagarap. Tasol dispela klaut em i wok bilong Satan.
9 Orait Satan i mekim save yet long Jop. Narapela wokboi gen i kam na tok, ol lain Kaldia i kam stilim olgeta kamel bilong Jop na kilim i dai olgeta narapela wokboi. (Jop 1:17) Tasol maski olgeta samting bilong Jop i lus na em i kamap rabis, em i stap gut long God. Orait sapos olgeta samting bilong yu i lus, yu inap karim dispela hevi na stap gut long Jehova?
Bikpela Hevi Moa i Kamap
10 Tasol Satan i no pinis yet long mekim nogut long Jop. Narapela wokboi i kam na i tok: “Ol pikinini bilong yu i mekim bikpela kaikai long haus bilong namba wan pikinini man bilong yu. Orait na wantu wanpela bikpela win i kirap long ples wesan nating na i kam brukim haus na haus i pundaun na kilim i dai olgeta pikinini bilong yu.” (Jop 1:18, 19) Ol man i no save long as bilong dispela bagarap ating ol bai tok, em ‘wok bilong God.’ Tasol long strong bilong em, Satan i mekim nogut long samting bel bilong Jop i laikim moa yet.
11 Bel bilong Jop i bagarap stret. ‘Em i brukim klos bilong em na i rausim olgeta gras long het na i brukim skru na putim het i go daun long graun.’ Tasol em i tok: “Bikpela yet i bin givim mi olgeta samting, na nau em i rausim pinis . . . Mi litimapim nem bilong en.” Na Baibel i tok: “Taim nogut i painim Jop, tasol em i no mekim sin na em i no tok nogut long God.” (Jop 1:20-22) Em nau, Satan i lus gen. Orait, olsem wanem sapos dai i painim wanpela long famili bilong yumi ol wokboi bilong God na bel bilong yumi i bagarap stret? Sapos yumi givim bel olgeta long Jehova na bilip long em, dispela inap helpim yumi long karim dispela hevi na stap gut long God, olsem Jop i bin mekim. Olsem na stori bilong Jop inap strongim bel bilong ol manmeri God i makim pinis na ol poroman bilong ol i gat tingting long i stap long graun.
Tok i Go Bikpela
12 Orait Jehova i singautim ol ensel i kam bung gen. Jop i kamap rabis pinis na i no gat pikinini moa, na i olsem God yet i mekim nogut long em, tasol em i stap gut yet long God. Satan i no laik tokaut olsem ol tok em i bin sutim long God na Jop i giaman. Nau ol ‘pikinini bilong God’ bai harim ol tok pait i go i kam, taim Jehova i wok long stiaim Satan i go bambai em i ken pinisim dispela tok.
13 Orait Jehova i askim Satan: “Yu stap we na yu kam?” Na Satan i bekim tok olsem: “Mi raun long olgeta hap [bilong graun] na mi kam.” Jehova i tokim Satan gen long wokboi bilong em, Jop, em i stretpela man na i no gat asua long ai bilong God na em i save pret long God, na em i wok yet long holimpas bilip. Satan i tok: “Sapos wanpela man i laik i stap gut, em inap givim olgeta samting bilong en bilong baim bek laip bilong en. Olsem na mi laik bai yu bagarapim bodi bilong en, na bai yu lukim em i tok nogut tru long yu.” Olsem na God i tok: “Mi larim em i stap long han bilong yu . . . tasol yu no ken kilim em i dai.” (Jop 2:2-6) Satan i laik tok, long sampela samting Jehova i lukautim yet Jop, olsem na em i tok long bagarapim skin bilong Jop. God i no inap larim Satan i kilim i dai Jop; tasol Satan i save, wanpela sik nogut bai givim bikpela pen long em na i olsem God yet i givim strafe long em long sampela rong em i bin mekim hait.
14 Orait Satan i lusim bung na em i go mekim dispela wok nogut. Em i mekim na “ol strongpela sua i kamap long olgeta hap bilong bodi bilong Jop.” Jop i karim bikpela pen tru; em i sindaun long sit bilong paia na em i skrapim ol sua long hap sospen graun i bruk. (Jop 2:7, 8) Jop i kisim bikpela pen tru na dispela sik i samting nogut tru long ai bilong ol man, na i no gat wanpela dokta long graun inap tekewe sik bilong em, long wanem, strong bilong Satan yet i kamapim. Jehova tasol inap tekewe sik bilong Jop. Sapos yu wanpela wokboi bilong Jehova na yu gat wanpela sik, yu mas tingim God em inap helpim yu long karim, na em inap givim laip oltaim long yu long nupela taim i no gat sik long en.—Song 41:1-3; Aisaia 33:24.
15 Bihain meri bilong Jop i tok: “Olsem wanem na yu bihainim God yet? Mobeta yu lusim em na tok nogut long em na yu ken i dai.” Ating meri i laik kirapim Jop long tok nogut long God. Tasol Jop i tok: “Tok bilong yu i olsem tok bilong kranki meri tru. Sapos yumi save kisim ol gutpela samting God i givim long yumi, orait bilong wanem yumi no inap kisim tu ol hevi?” Em nau, wok bilong Satan i lus gen. Baibel i tok: “Em i no mekim wanpela tok nogut long God.” (Jop 2:9, 10) Sapos sampela long famili i birua long lotu bilong yumi na ol i tok, yumi pinisim nating strong bilong yumi long mekim ol wok Kristen, na ol i laik kirapim yumi long lusim Jehova, orait yumi inap winim dispela traim na sanap strong olsem Jop i bin mekim, long wanem, yumi laikim tru Jehova na yumi laik litimapim nem bilong em.—Song 145:1, 2; Hibru 13:15.
Tripela Man Bilong Giaman
16 Orait Satan i tingim narapela rot—tripela “pren” bilong Jop i kam lukim em na ol i mekim olsem ol i laik strongim bel bilong em. Wanpela em Elifas, ating em i tumbuna pikinini bilong Abraham na i kamap long lain bilong Iso. Ating krismas bilong em i winim ol narapela, long wanem, em i go pas long toktok. Na Bildat tu i stap—em i tumbuna pikinini bilong Sua, em wanpela pikinini bilong Abraham na meri bilong em Ketura. Namba 3 man em Sofar, bilong kantri Nama, ating long Arebia long hap bilong not-wes. (Jop 2:11; Stat 25:1, 2; 36:4, 11) Olsem sampela long nau i laik subim ol Witnes Bilong Jehova long lusim God, olsem tasol Satan i stiaim tripela man hia long sutim ol tok giaman long Jop na bai em i tokaut olsem em i bin mekim ol dispela rong, na em bai lusim God.
17 Tripela i mekim olsem ol i sori tru long Jop na ol i krai na brukim klos bilong ol na tromoi graun long het bilong ol. Tasol ol i sindaun wantaim Jop inap 7-pela san na 7-pela nait na ol i no mekim wanpela tok bilong strongim Jop! (Jop 2:12, 13; Luk 18:10-14) Tripela giamanman hia i no tingim liklik ol samting bilong spirit, olsem na ol i no inap strongim Jop na toktok long Jehova na ol tok promis bilong em. Tasol ol i tingting kranki long Jop na ol i redi long sutim dispela tok giaman long em taim ol inapim ol de bilong krai sori. Taim 7-pela de i no pinis yet, yangpela man Elihu i kam sindaun long arere na bai em i ken harim ol tok i kamap.
18 Bihain Jop i kirap toktok. Tripela i no strongim bel bilong em, olsem na em i kirap toknogutim de mama i karim em. Na em i tingting, bilong wanem em i stap laip yet na karim dispela hevi. Em i laik bai em i ken i dai na stap isi—em i ting em i no inap i stap amamas moa, long wanem, nau em i stap rabis, na olgeta pikinini bilong em i dai, na em i gat bikpela sik tru. Tasol God i no larim Satan i kilim em i dai.—Jop 3:1-26.
Ol i Kirap Sutim Tok Long Jop
19 I gat tripela bikpela tok i kamap bilong traim Jop. Long tripela tok olgeta, Elifas i mekim tok pastaim. Long namba wan tok, em i askim olsem: “Yu inap tingim wanpela man i bin bihainim stretpela pasin na i no gat rong, em i bin bagarap na i dai? Ating nogat.” Na long pinis bilong namba wan tok em i tok, ating Jop i bin mekim pasin nogut na God i givim strafe long em. (Jop, sapta 4 na 5) Long namba tu tok, Elifas i tok bilas long gutpela tingting bilong Jop na em i tok: “Save bilong yu i no winim save bilong mipela.” Elifas i laik tok, Jop i mekim olsem em i winim God. Long pinis bilong namba tu tok bilong em, em i tok Jop i no bilip long God, na em i bin kisim mani long pasin i no stret, na em i man bilong trik na giaman. (Jop, sapta 15) Long laspela tok bilong em, Elifas i sutim planti tok giaman long Jop—olsem em i pulim nating mani bilong ol man, na pasim kaikai na wara long ol man i rabis, na mekim nogut long ol meri em man bilong ol i dai pinis na ol pikinini i no gat papamama.—Jop, sapta 22.
20 Namba tu man bilong toktok, em Bildat. Em i mekim kain tok olsem bilong Elifas. Tripela tok bilong em i sotpela liklik, tasol ol i olsem naip i sutim lewa. Em i tok, ol pikinini bilong Jop i mekim rong na God i kilim ol i dai. Long tingting kranki em i tok piksa olsem: Ol wel pitpit bilong tais i save drai sapos graun i no gat wara, na i olsem tasol long “ol man i givim baksait long God.” Dispela tok i stret, tasol Jop i no mekim pasin olsem. (Jop, sapta 8) Bildat i laik tok, kain hevi i painim Jop em i save painim ol man nogut. (Jop, sapta 18) Long namba 3 tok bilong em, Bildat i tok, yumi ol man i olsem “ol liklik snek bilong graun,” olsem na yumi no klin long ai bilong God.—Jop, sapta 25.
21 Sofar em i namba 3 man bilong toktok. Em i bihainim kain tingting olsem bilong Elifas na Bildat. Sofar i tok, Jop em i man nogut, na em i mas lusim ol pasin nogut bilong em. (Jop, sapta 11 na 20) Sofar i toktok tupela taim tasol na em i no gat tok moa bilong mekim. Tasol long olgeta tok bilong tripela man hia, Jop i strongim bel na bekim tok long ol. Wanpela taim em i tok: “Planti taim mi bin harim dispela kain tok, na mi les tru long harim gen. Yupela i no helpim mi liklik.”—Jop 16:2, 3.
Yumi Inap i Stap Strong
22 Ating planti hevi wantaim inap painim yumi tu, olsem i bin painim Jop, na Satan i laik bai yumi bel hevi na lusim strong, na long dispela rot bai yumi lusim bilip. Sapos yumi gat hevi long mani, em bai wok long kirapim yumi long lusim Jehova. Sapos wanpela long famili i dai, o bikpela sik i painim yumi, Satan bai wok long kirapim yumi long putim asua i go long God. Na ating sampela bai sutim tok giaman long yumi, olsem ol poroman bilong Jop i bin mekim. Olsem tok bilong Brata Macmillan i makim, ating Satan i laik ‘holimpas yumi,’ tasol yumi inap karim dispela hevi na stap strong.
23 Olsem yumi lukim, Jop i wok long karim hevi bilong em. Tasol olsem wanem? Ating bel bilong em i bagarap olgeta na em i no gat strong moa? Tru em i no tingim moa wanpela gutpela samting em inap wetim i kamap bihain o olsem wanem? Orait, bai yumi lukim.
Bai Yu Bekim Olsem Wanem?
◻ Wanem bikpela tok Satan i kamapim long taim bilong Jop?
◻ Bikpela traim i painim Jop long wanem rot?
◻ Tripela “poroman” bilong Jop i sutim wanem tok long em?
◻ Olsem Satan i bin mekim long Jop, ating em bai wok long mekim wanem long yumi na bai yumi no stap gut moa long Jehova?
[Askim Bilong Stadi]
1. Wanpela lapun Kristen i tok wanem long ol hevi i painim em?
2, 3. Jop em i husat?
4. (a) Taim ol man i mekim nogut long ol Kristen, bilong wanem ol i mas tingim Jop? (b) I gat wanem sampela askim long Jop bai yumi skelim?
5. Wanem samting i kamap long heven na Jop i no save?
6. Satan i laik mekim wanem? Em i tok wanem na em i krungutim gutnem bilong Jehova?
7. Satan i tok wanem long God? Jehova i bekim wanem tok long em?
8. (a) Wanem ol samting bilong skin Jop i bin holim na ol i lus? (b) Husat i as tru bilong dispela “klaut i pairap bikpela moa”?
9. Taim Jop i kamap rabis, em i lusim God o olsem wanem?
10, 11. (a) Wanem samting i painim tenpela pikinini bilong Jop? (b) Taim ol pikinini bilong Jop i dai, em i ting olsem wanem long Jehova?
12, 13. Long narapela bung i kamap long heven, Satan i tokim God long givim rot long em bilong mekim wanem? Orait God i tok wanem long dispela?
14. Satan i mekim wanem long Jop? Bilong wanem i no gat wanpela man bilong graun inap tekewe pen bilong em?
15. Meri bilong Jop i laik kirapim em long mekim wanem? Tasol em i tok wanem long meri?
16. Husat i kam lukim Jop bilong mekim olsem ol i laik strongim bel bilong em? Tasol Satan i stiaim ol long mekim wanem?
17. Tripela man hia i mekim wanem? Tasol inap 7-pela san na 7-pela nait ol i no mekim wanem?
18. Bilong wanem Jop i laik bai em i ken i dai na stap isi?
19. Elifas i sutim wanem tok giaman long Jop?
20. Bildat i sutim wanem kain tok long Jop?
21. Sofar i tok, Jop i bin mekim wanem ol rong?
22, 23. (a) Olsem Satan i bin mekim long Jop, ating em bai wok long mekim wanem long yumi na bai yumi no stap gut moa long God Jehova? (b) Jop i karim kain kain hevi, tasol yumi ken mekim wanem ol askim long tingting bilong em?
[Piksa long pes 10]
A. H. Macmillan