Ol Witnes Bilong Jehova Long Olgeta Hap​—⁠Polan

LONG 1989 ol gavman Komyunis i stap long hap bilong solwara Boltik i go inap long solwara Blaksi i laik pundaun. Taim pasin birua bilong ol kantri komyunis i wok long pinis, nau ol kantri long Isten Yurop i kirap long bihainim laik bilong ol yet. Polan em i wanpela bilong ol dispela kantri; em i gat kain kain maunten na ol bikpela hap graun i stret.a

Ol manmeri bilong Polan i save givim bel long wok, na sampela saientis na saveman i gat biknem long wokim musik na ol piksa, ol i bilong Polan. Na samting i gutpela moa, long nau Polan i gat planti manmeri i autim gutnius bilong Kingdom bilong God.

Ol i No Pret Long Kamapim Bilip Giaman

Planti manmeri long Polan i gat laik long kisim save long tok i tru bilong Baibel. Tasol sampela i larim ol wanblut na ol man i stap klostu i pasim ol. Olsem: Klostu long Wrokla wanpela meri i bin stadi long Baibel wantaim ol Witnes Bilong Jehova, tasol em i lusim stadi taim ol wanfamili na ol pren i givim hevi long em. Tasol yangpela pikinini meri bilong em i bin ritim sampela hap long ol Wastaua i kamapim rong bilong ol lotu giaman. Dispela i kirapim em na em i laik save long tok i tru.

Em i mekim Baibel-stadi inap 6-pela mun na nau dispela yangpela meri i laik lusim tru lotu giaman. Em i go lukim pris bilong tokim em long dispela samting. Pris i tokim em long raitim wanpela pepa i tok olsem: “Mi K​—⁠​—⁠ P​—⁠​—⁠ i lusim bilip bilong lotu Katolik.”

Long Sande bihain, pris i ritim dispela toksave long taim bilong lotu. Ai bilong bubu papa bilong yangpela meri i raun na em i pundaun, na bubu mama i krai. Tasol sampela narapela i save go long dispela haus lotu i tok: “Em nau, em i no pret long tokaut long ol planti pasin giaman i stap long lotu bilong mipela.” Nau dispela yangpela meri i gat strongpela bel, em i wanpela sista i baptais pinis, na em i kirapim pinis 7-pela Baibel-stadi long ples bilong em.

‘Pasin Bilong Ol’

Niuspepa Kujawy i Pomorze i raitim wanpela stori olsem: “Bai Yupela Lukim Pasin Bilong Ol na Bai Yupela Save.” Hap bilong dispela stori i tok, ol man i go long lotu ol “i no tingting strong long bihainim ol lo ol i mas bihainim. Ol i narapela kain long ol Witnes Bilong Jehova, em ol i tokaut long ol lo bilong Baibel na ol i bihainim dispela tok.”

Niuspepa i skelim pasin bilong bilas bilong ol Witnes wantaim ol narapela Kristen na stori i tok: “Ating ol narapela Kristen i no save, na planti taim ol i no bihainim ol bikpela tok na lo bilong lotu bilong ol. . . . Tingting na pasin bilong ol Witnes Bilong Jehova i wankain long tok ol i mekim, na long dispela rot ol i kamapim klia olsem ol i no ‘giaman profet,’ nogat; pasin ol i mekim i makim klia ol i wanem kain man. ‘Ol man i no save go long rop i gat nil bilong kisim ol pikinini bilong diwai wain, a?’ (Matyu 7:​15-20).”

Wanpela meri i bel hevi na em i bin raitim pas long niuspepa Przyjaciółka, long wanem, pikinini man bilong em i lusim lotu Katolik na i kamap wanpela Witnes Bilong Jehova. Niuspepa i bekim wanem tok? Em i tok: ‘Sapos pikinini man bilong yu i pas wantaim ol Witnes Bilong Jehova, na em i lain na kisim bilip bilong ol, dispela em i samting bilong em yet, na yumi mas orait long dispela. . . . Dispela lotu i gat planti gutpela pasin, olsem ol i stap wanbel tru na pas gut wantaim, na ol i bihainim pasin i stret na ol lo bilong ples. Na tu, ol i bihainim ol samting ol i pilim i tru na i stret. Dispela em ol gutpela pasin.’

[Ol Futnot]

[Blok long pes 9]

OL SAMTING BILONG KANTRI

Yia Bilong Wok Bilong 1993

HAMAS OL I AUTIM TOK: 113,551

SKEL I OLSEM: 1 Witnes insait long 339 man

HAMAS I BUNG LONG MEMORIAL: 235,642

HAMAS PAINIA, AVERES: 7,961

HAMAS BAIBEL-STADI, AVERES: 79,131

HAMAS I KISIM BAPTAIS: 8,164

HAMAS KONGRIGESEN: 1,397

BRENS-OFIS: Nadasin

[Piksa long pes 9]

Brens-ofis bilong Polan long Lots long 1948

[Piksa long pes 9]

Ol i pasim ol bikpela toksave long bros na wokabaut, Jun 1948, long Is Prasia

[Piksa long pes 9]

Ol 72 brata sista i wok long Haus Betel long Polan, Janueri 1993

[Piksa long pes 9]

Nupela brens-ofis long Nadasin