Ol Witnes Bilong Jehova Long Olgeta Hap—India
INDIA! Dispela kantri em i bikpela tru. Long olgeta 6-pela 6-pela manmeri long graun, wanpela i stap long India. I gat olsem 1,000 bikpela na liklik tok ples long dispela kantri. Planti man, inap 83 pesen, ol i bilong lotu Hindu, na 11 pesen em ol Muslim, na ol narapela ol i bilong lotu Sik, Buda, Jain, na ol lotu ol i kolim Kristen.
Long sampela yia i go pinis na i kam inap nau, wok bilong ol Witnes Bilong Jehova i kamap gutpela tru. Ol i bin painim sampela manmeri i gat pasin olsem sipsip na ol i laik sanap strong na helpim wok bilong Kingdom bilong Jehova, maski ol man i birua long ol na givim planti hevi long ol.
Wanpela yangpela meri long wanpela famili Hindu, sik polio i bin bagarapim han lek bilong em taim em i liklik yet. Em i kisim bikpela pen na hevi tru na dispela i kirapim em long tingting long God na em i laik save, em i stap bilong mekim wanem. Orait em i kirap long skelim planti lotu, tasol ol i no helpim em liklik. Olsem na em i no bilip moa long ol lotu, tasol em i bilip yet long God.
Long dispela taim, tupela Witnes i bungim dispela yangpela meri taim ol i go long ol haus na autim tok. Em i stori long dispela taim na em i tok: “Klostu mi krai taim mi harim ol i kaunim Kamapim Tok Hait 21:4.” Em i kisim planti buk na nius samting bilong Sosaiti Was Taua na em i orait long ol i kam stadi wantaim em long Baibel, maski mama bilong em i nolaik tru long en. Yangpela meri i senisim planti pasin bilong em, na em i sanap strong, maski famili bilong em i strong long pasim em, na bihain em i kisim baptais na kamap wanpela Witnes Bilong Jehova. Em i tok: “Nau mi wok long kamap strong, na planti hevi i bin painim mi long dispela rot. Tasol oltaim Jehova i stap wantaim mi na em i givim bel isi tru na bikpela amamas long mi.”
Sanap Strong Long Skul
Tisa i bin tokim wanpela yangpela sista long i go long haus lotu Katolik wantaim ol wanklas bilong em. Long gutpela pasin sista i tok, em i no inap i go, long wanem, em i wanpela Witnes Bilong Jehova na em laik lotuim Jehova tasol—em i no ken lotuim narapela god. Tisa i tok, taim ol narapela sumatin i go long haus lotu, orait em tu i mas i go. Tasol sista i sanap strong na em i tok, ol narapela i go long lotu, ol i no save beten long Jehova, olsem na em i no inap i go lotu wantaim ol.
Sista i strong strong na nau tisa i laik save long sampela bilip moa bilong em. Olsem na long de bihain, sista i givim wanpela Wastaua long tisa i stori long pasin bilong lotuim Jehova. Tisa i pilim tru ol tok em i kaunim na em i tok, olgeta wok o pasin bilong lotu ol i mekim long skul, em i no ken tokim sista long insait long en. Sista i tilim 10-pela nius long em wantaim ol narapela tisa.
Bihainim Lo Bilong God Long Blut
Long nau wanpela kain sik fiva i kamap na kalap long planti man long hap bilong Kerala. Dispela sik i save bagarapim kidni, na bihain ol dokta i mas putim ol long wanpela masin bilong klinim blut. Ol i save givim blut long planti man i gat dispela sik. Long wanpela biktaun, 14 manmeri i gat dispela sik ol i go slip long haus sik. Wanpela em i Witnes, na em i wanpela elda bilong kongrigesen long dispela taun. Ol dokta i tokim em, ol inap givim blut tasol long em—ol i no gat narapela samting bilong helpim em. Elda i kamapim bilip bilong em long ol, em Baibel i as bilong en, na em i strong long sakim blut. (Aposel 15:28, 29) Ol dokta i tok pait wantaim em i go i go, na ol i tok em bai i dai, long wanem, em i no laik kisim blut.
Ol narapela 13 man i gat dispela sik ol i kisim blut. Sori tumas, tupela de samting bihain olgeta i dai. Brata tasol i stap laip! Ol lain bilong bosim haus sik ol i kirap nogut long dispela. Na ol dokta na nes samting ol i pilim tru gutpela pasin bilong ol manmeri bilong kongrigesen, oltaim ol i save kam lukim brata long haus sik. Taim em i redi long lusim haus sik, em i go long ol dokta na tok tenkyu long ol, tasol ol i tokim em: “Yu no ken tenkyu long mipela. Yu mas tenkyu long God bilong yu, Jehova. Em yet i bin helpim yu na yu abrusim bagarap—mipela nogat. Taim yu beten long God bilong yu, Jehova, yu mas askim em long helpim mipela tu.”
[Blok long pes 24]
OL SAMTING BILONG KANTRI
Yia Bilong Wok Bilong 1994
HAMAS OL I AUTIM TOK: 14,271
SKELIM OLSEM: 1 Witnes insait long 65,266
HAMAS I BUNG LONG MEMORIAL: 38,192
HAMAS PAINIA, AVERES: 1,780
HAMAS BAIBEL-STADI, AVERES: 12,453
HAMAS I BAPTAIS: 1,312
HAMAS KONGRIGESEN: 410
BRENS-OFIS: LONAVLA
[Piksa long pes 25]
Brens-ofis, Lonavla
[Piksa long pes 25]
Ol i autim tok long taim bilong “Gutnius Bilong i Stap Oltaim” kibung long 1963
[Piksa long pes 25]
Autim tok long man i maket long kaikai ausait long traipela haus Ret Fot long Deli