Mi Kisim Tingting Bilong God Long Blut

Wanpela Dokta i Kamapim Stori Bilong Em

MI STAP long bikpela ples bung bilong haus sik, na mi stori long wanpela lain dokta long ol samting mi bin painimaut taim mi sekim bodi bilong wanpela man i dai pinis. Man hia i dai pinis em i gat wanpela buk nogut, na mi tok: “Yumi ken ting namba wan as na dispela man i dai em sik hemolisis [ol retpela sel bilong blut i bagarap] na ol kidni i no wok moa, long wanem, em i bin kisim planti blut.”

Wanpela profesa i sanap na i kros na singaut: “Olsem wanem? Yu laik tok mipela i givim blut nogut long em?” Mi bekim tok: “Mi no bin tok olsem.” Mi soim sampela piksa slait long sampela liklik hap bilong kidni bilong dispela man, na mi tok moa: “Yumi ken lukim olsem planti retpela sel bilong blut long kidni i bagarap na yumi ken ting dispela i mekim na kidni i no wok moa.”a I luk olsem sampela i laik kros, na maus bilong mi i drai. Maski mi wanpela yangpela dokta na em i wanpela profesa, mi pilim olsem mi no ken surik.

Taim dispela samting i kamap, mi no wanpela Witnes Bilong Jehova. Mama i karim mi long 1943 long Sendai, wanpela taun long hap not bilong Japan. Papa bilong mi i wanpela dokta ol i kolim patolojis na dokta bilong stretim sik bilong tingting, olsem na mi tu i stadi bilong kamap dokta. Long namba 2 yia bilong mi long skul bilong kamap dokta, long 1970, mi maritim wanpela yangpela meri, nem bilong em Masuko.

Lain Long Kamap Patolojis

Masuko i bin wok mani bilong lukautim mipela taim mi wok long pinisim skul bilong mi. Mi amamas tru long stadi long ol samting bilong marasin. Mi kirap nogut long lukim olsem bodi bilong man i gutpela tru! Tasol mi no bin tingting olsem wanpela Man Bilong Wokim yumi i stap. Mi ting pasin bilong kisim planti save long ol nupela samting bilong marasin bai givim mining long laip bilong mi. Olsem na taim mi kamap dokta pinis, mi stadi yet long lain long kamap patolojis​—⁠em stadi bilong kisim save long ol sik, na ol as bilong sik, na sik i mekim wanem long ol man.

Taim mi katim ol man i dai pinis long kensa bilong painimaut ol samting bilong sik bilong ol, mi kisim tupela tingting long ol samting blut i mekim long ol man i kisim blut. Ol man i gat bikpela kensa ol inap sot long blut, long wanem, sik i mekim na ol i lusim planti blut. Kimoterapi i mekim na ol man i sot long blut, olsem na planti taim ol dokta i tok ol i mas kisim blut. Tasol mi ting olsem taim man i kisim blut, dispela i as na kensa i go long ol narapela hap bilong bodi. Maski sampela man i gat wanem tingting long dispela, long nau ol dokta i save taim man i kisim blut dispela i mekim na bodi i no strong moa long pait long sik, na em inap mekim na buk nogut i kamap gen na ol man i gat sik kensa i no inap sakim dispela sik.b

Ol samting mi stori long en pastaim i bin kamap long 1975. Dispela profesa i bin go pas long helpim dispela sikman na em i saveman tru long ol samting bilong blut. Olsem na yumi no ken kirap nogut olsem em i kros nogut tru taim em i harim mi tok olsem pasin bilong sikman long kisim blut i mekim na em i dai! Tasol mi stori yet i go, na isi isi bel bilong em i kol.

No Gat Sik na Indai

Long dispela taim wanpela lapun meri, em i wanpela Witnes Bilong Jehova, i kam lukim meri bilong mi. Taim em i toktok long meri bilong mi em i kolim tok “Jehova,” na meri bilong mi i askim em long mining bilong en. Dispela Witnes i tok: “Jehova em i nem bilong trupela God.” Kirap long taim em i liklik yet na i kam inap long dispela taim Masuko i bin ritim Baibel, tasol long Baibel em i ritim ol i senisim nem bilong God na putim “BIKPELA.” Nau em i save olsem God em i wanpela man na em i gat nem!

Wantu Masuko i kirap stadi long Baibel wantaim dispela Witnes. Taim mi kam bek long haus long 1 klok long moningtaim, meri bilong mi i amamas tru na i tokim mi: “Baibel i tok God bai pinisim ol sik na indai!” Mi bekim tok: “Sapos dispela i kamap, em bai gutpela tru!” Em i tok moa: “Klostu nau nupela taim bai kamap, olsem na mi no laik yu lusim nating taim bilong yu.” Mi ting em i laik mi lusim wok dokta, olsem na mi kros na mipela i no wanbel moa.

Tasol meri bilong mi i wok strong long helpim mi. Em i beten long God bilong helpim em long painim sampela gutpela skripsa na em i soim ol long mi. Tok bilong Saveman 2:​22, 23 i sutim tru bel bilong mi. Skripsa i tok: “Oltaim yumi save hatwok na tingting planti long ol samting, tasol dispela i bekim wanem gutpela samting long yumi? . . . Long nait yumi wok yet long tingting planti na i no gat malolo bilong yumi. Dispela pasin tu i no gat as bilong en.” Dispela i bin stret long samting mi bin mekim​—⁠mi bin wok long kisim save long ol nupela samting bilong marasin long san na long nait, tasol dispela i no bin givim amamas tru long mi.

Long wanpela Sande moningtaim long Julai 1975, taim meri bilong mi i lusim haus pinis na i go long Haus Kingdom bilong ol Witnes Bilong Jehova, wantu mi kirap na mi tu i go. Meri bilong mi i kirap nogut tru long lukim mi long Haus Kingdom, na ol Witnes i mekim gutpela tok amamas long mi. Kirap long dispela taim, mi go long olgeta Sande long miting. Wanpela mun samting bihain, wanpela Witnes i kirap stadi long Baibel wantaim mi. Tripela mun bihain long ol Witnes Bilong Jehova i bin toktok wantaim meri bilong mi long namba wan taim, em i kisim baptais.

Mi Kisim Tingting Bilong God Long Blut

I no longtaim na mi lain olsem Baibel i tok ol Kristen ‘i no ken kaikai blut.’ (Aposel 15:​28, 29; Stat 9:⁠4) Mi gat tupela tingting pinis long blut i mekim wanem long man, olsem na mi no hatwok long kisim tingting bilong God long blut.c Mi ting, ‘Sapos i gat wanpela Man Bilong Wokim yumi na em i tok olsem, dispela tok i mas stret.’

Na tu, mi lain olsem sin bilong Adam i mekim na ol man i gat sik na i dai. (Rom 5:​12) Long dispela taim mi bin wok long kisim save long sik ateriosklerosis. Taim yumi go lapun, ol rop bilong blut bilong yumi i go strong na liklik na dispela i mekim na yumi save kisim ol sik bilong klok, sik bilong ol rop bilong blut long kru, na sik bilong kidni. Olsem na i stret yumi tok sin yumi kisim long Adam i as bilong ol dispela samting. Bihain long dispela, mi no strong moa long kisim bikpela save long ol samting bilong marasin. God Jehova tasol inap pinisim ol sik na indai!

Long Mas 1976, inap 7-pela mun bihain long mi kirap stadi long Baibel, mi lusim stadi bilong mi long yunivesiti bilong haus sik. Mi ting mi no inap wok gen olsem wanpela dokta, tasol mi painim wok long narapela haus sik. Mi kisim baptais long Me 1976. Mi pasim tok long bel olsem nambawan gutpela samting mi inap mekim long laip bilong mi em autim tok fultaim, olsem mekim wok painia, na mi kirap mekim olsem long Julai 1977.

Sambai Long Tingting Bilong God Long Blut

Long Novemba 1979, mitupela Masuko i go sindaun long hap bilong wanpela kongrigesen long provins Chiba we ol i sot tru long ol man bilong autim tok. Mi painim wanpela haus sik na mi inap mekim wok haptaim. Long namba wan de bilong mi long wok, wanpela lain dokta bilong katim man i banisim mi. Planti taim ol i askim mi: “Yu wanpela Witnes Bilong Jehova, bai yu mekim wanem sapos ol i bringim wanpela sikman i kam na em i mas kisim blut?”

Long gutpela pasin mi tokim ol olsem mi bai bihainim tingting bilong God long blut. Mi tokim ol olsem i gat ol senis bilong blut na mi bai wok strong tru long helpim ol sikman i kam lukim mi. Mipela i bin toktok inap wanpela aua, na nambawan dokta bilong katim man i tok: “Mi klia long tok bilong yu, tasol sapos ol i bringim wanpela sikman i bin lusim planti blut, bai mipela i lukautim em.” Dispela nambawan dokta i gat nem olsem i hatwok long stap gut wantaim em, tasol bihain long dispela tok mipela i pas gut wantaim, na long olgeta taim em i rispek long ol bilip bilong mi.

Traim Rispek Bilong Mi Long Blut

Taim mipela i mekim wok long Chiba, ol i wokim wanpela nupela hetkota bilong ol Witnes Bilong Jehova bilong Japan long Ebina. Wanpela taim long wik mitupela meri bilong mi i bin go long Ebina bilong lukautim helt bilong ol volantia Witnes i wokim dispela haus ol i kolim Betel. Sampela mun bihain, ol i singautim mipela long wok fultaim long Betel Ebina. Olsem na long Mas 1981 mipela i go sindaun long ol haus ol i sanapim bilong ol 500 volantia. Long moningtaim, mi helpim ol long klinim ol ples waswas na toilet long hap ol i wokim ol nupela haus, na long apinun mi sekim ol sikman.

Wanpela sikmeri mi lukautim em Ilma Iszlaub, em i bin lusim Australia na i kam long Japan olsem misineri long 1949. Em i gat sik bilong blut ol i kolim lukimia na ol dokta i tokim em olsem insait long sampela mun em bai dai. Ilma i no laik kisim blut bambai em i ken stap laip sampela yia moa, na em i laik stap long Betel inap long em i dai. Long dispela taim i no gat yet ol marasin bilong helpim ol retpela sel bilong blut, olsem marasin erythropoietin. Olsem na sampela taim mak bilong blut (hemoglobin) i go daun long 3 o 4 gram! (Mak bilong blut bilong man i no gat sik em 12 i go 15.) Tasol mi traim bes bilong helpim em. Ilma i bilip strong tru long Tok Bilong God i go inap long em i dai long Janueri 1988​—⁠inap 7-pela yia bihain!

Long ol yia i go pinis, sampela volantia long brens ofis bilong ol Witnes Bilong Jehova long Japan i mas kisim operesen. Gutpela tru, ol dokta long ol haus sik i stap klostu ol i bin wok gut wantaim mipela taim ol i katim ol sikman na i no mekim wok long blut. Planti taim ol i singautim mi long operesen tieta bilong lukim operesen, na sampela taim mi bin helpim ol long mekim operesen. Mi tenkyu long ol dispela dokta i rispektim tingting bilong ol Witnes Bilong Jehova long blut. Pasin bilong wok wantaim ol i bin opim rot long mi long toktok wantaim ol long ol bilip bilong mi. I no longtaim i go pinis na wanpela bilong ol dispela dokta i kamap Witnes i baptais.

Pasin bilong ol dokta long helpim ol Witnes Bilong Jehova na i no mekim wok long blut i bin helpim tru wok bilong ol dokta. Pasin bilong katim man na i no mekim wok long blut i kamapim ples klia olsem i gutpela sapos man i no kisim blut. Ol dokta i kisim save olsem ol sikman i save kamap orait hariap na i no gat planti hevi bihain long operesen.

Lain Yet Long Nambawan Dokta

Mi traim long kisim save long ol nupela samting bilong marasin na ol pasin bilong helpim ol sikman. Tasol mi wok tu long lain long Jehova, em nambawan Dokta. Em i no skelim man long ausait tasol, nogat, em i save skelim man olgeta. (1 Samuel 16:⁠7) Taim mi mekim wok olsem dokta, mi traim long helpim man olgeta, mi no save tingim tasol sik bilong em. Long dispela rot mi ken helpim gut ol man i gat sik.

Mi wok yet long Betel, na pasin bilong helpim ol narapela long save long Jehova​—⁠na tingting bilong Jehova long blut tu​—⁠dispela i givim bikpela amamas tru long mi. Mi beten long Nambawan Dokta, God Jehova, olsem liklik taim nau na em bai pinisim ol sik na indai tu.​​—⁠Stori bilong Yasushi Aizawa.

[Ol Futnot]

[Rait long pes 30]

“Mi tokim ol olsem i gat ol senis bilong blut na mi bai wok strong tru long helpim ol sikman i kam lukim mi”

[Rait long pes 31]

“Pasin bilong katim man na i no mekim wok long blut i kamapim ples klia olsem i gutpela sapos man i no kisim blut”

[Rait long pes 31]

Antap: Mi mekim wanpela tok bilong Baibel

Han sut: Wantaim meri bilong mi, Masuko, long nau