“Mi Bin Holimpas Bilip Bilong Mi Long God”
OL PREN BILONG BRUNELLA INCONDITI I KAMAPIM DISPELA STORI
“LONG Sarere mi stap wanpis na i olsem de i no laik pinis hariap. Mi wanpela mi stap long rum, na mi bel hevi i stap. I olsem mi wokabaut insait long haus, na wantu wanpela man i pasim strong dua long pes bilong mi, na mi no inap i go moa. Mi wok long painim rot, tasol nogat.”
Brunella Inconditi i gat 15 krismas na bel bilong em i hevi tru. Long wanem, dispela Sarere em i bikpela de bilong em tasol dispela de i lus nating. Kirap long 1990 em i wok long givim bel long Jehova na laikim tumas Baibel, olsem na em i dediket long Jehova. Em i laik kisim baptais long Julai 1990, long “Gutpela Tok Ples” Kibung Distrik bilong ol Witnes Bilong Jehova long Montreol, long Kanada. Tasol long dispela taim bikpela traim i painim em na i stap long em i go inap long taim em i dai.
Brunella i laik baptais long Sarere long kibung, tasol tupela de paslain em i kisim save olsem em i gat sik kensa ol i kolim lukimia. Ol dokta long haus sik bilong ol pikinini i laik kirap kwik long helpim Brunella, olsem na em i slip long haus sik.
Ol Dokta i Pilim Tru Tok Em Yet i Mekim
Brunella i save, blut em i holi long ai bilong God Jehova. (Wok Pris 17:11) Papa bilong em, Edmondo, na mama bilong em, Nicoletta, tupela i bin tokim ol dokta ol i no ken givim blut long Brunella, tasol papa i tok: “Brunella i laik bai em yet i tokim ol dokta, maski lo bilong gavman i makim em i pikinini yet. Em i tok strong olsem em i no laik bai ol dokta i mekim samting long em i kalapim lo bilong Baibel i tambuim blut.”—Aposel 15:20.
Long Julai 10, 1990, tripela dokta na wanpela meri welfe i bung wantaim papamama bilong Brunella na tupela elda bilong kongrigesen bilong ol Witnes Bilong Jehova long dispela hap. Ol dokta i kisim save pinis olsem Brunella i gat bikpela sik kensa, na ol i stori long ol samting ol i laik mekim bilong helpim em. Ol i tok, i hatwok long stretim dispela sik. Wanpela elda i tok, “ol dokta na meri welfe i pilim tru gutpela pasin bilong Brunella na strongpela tingting bilong em long bihainim tok bilong God. Ol i pilim tu bikpela sori bilong papamama long pikinini, na gutpela pasin bilong ol brata sista long kongrigesen, em ol i sambai long famili. Na ol i amamas mipela i pilim tingting bilong ol na wok ol i laik mekim.”
Ol dokta i laik abrusim blut. Ol i laik givim ol strongpela marasin long Brunella, tasol ol bai givim isi isi bambai i no bagarapim tumas ol hap bilong blut bilong em. Mama (Nicoletta) i tok: “Ol dokta i tingim gut skin na bel na bilip bilong Brunella. Olsem na ol i orait long toktok wantaim wanpela bikpela dokta i gat save long helpim ol pikinini i gat dispela sik na em i no mekim wok long blut.” Brunella na ol nes na dokta long haus sik i pas gut wantaim.
Ol Wok Bilong Spirit
Marasin Brunella i kisim long pastaim i helpim em liklik, tasol hevi bilong em i no pinis. I kam inap long Novemba 1990 na marasin i daunim strong bilong sik, olsem na kwiktaim Brunella i kisim baptais. Em i stori long ol samting i bin painim em long ol dispela mun na em i tok: “Em hatwok. Bilong karim kain hevi olsem, yu mas i gat strong na strongpela tingting. Traim i painim bilip bilong mi tu, tasol mi sanap strong, na mi gat tingting yet long mekim wok painia oltaim [autim tok long olgeta de].”
Tasol long kirap bilong yia 1991, sik i kamap strong gen. Em i kisim gen ol strongpela marasin na klostu em i dai, tasol olgeta i kirap nogut na amamas tru, long wanem, em i no i dai. Long Ogas em i gat strong inap long em i mekim wok painia haptaim long dispela mun. Tasol bihain sik i kamap strong gen, na long Novemba 1991 sik kensa i stap long planti hap bilong bodi bilong em. Narapela lain dokta long narapela haus sik i kirap long putim em long paua bilong kilim dispela sik.
Brunella i karim bikpela hevi, tasol em i stap strong na tingim ol wok em i laik mekim bihain. Pastaim ol dokta i bin tokim em, ol i ting em i gat 6-pela mun tasol bilong i stap, tasol wanpela yia na 6-pela mun bihain em i stap yet, na em i wok yet long tingim ol wok em i laik mekim. Wanpela elda i tok: “Em i wok strong bambai em inap mekim ol wok em i laik mekim. Brunella i bilip long tok promis bilong God long kamapim Paradais na dispela i strongim em. Em i no gat bikpela krismas, tasol em i kamap strong long spirit. Pasin na tingting bilong em i strongim kongrigesen, na olgeta manmeri i save long em, ol nes na dokta tu, ol i laikim em.” Mama bilong em i tok: “Em i no save toktok planti. Taim wanpela i askim em, ‘Yu stap olsem wanem?’ em i save tok, ‘Mi stap orait,’ o ‘Mi stap gutpela liklik, na olsem wanem long yu?’ ”
Em Bai Stap Long Bihain
Brunella i laik go long “Ol Man i Stap Olsem Lait” Kibung Distrik bilong ol Witnes Bilong Jehova long Julai 1992. Tasol long taim bilong kibung, em i stap long haus sik, na em i laik i dai. Tasol em i laik tru long lukim pilai long kibung, Mekim Ol Samting i Stret Long Ai Bilong Jehova, olsem na ol i putim em long wilsia na em i go long kibung.
Sampela de paslain long em i dai, em i lusim haus sik na i stap wantaim famili. Mama i tok: “Inap long taim em i dai, em i save tingim ol narapela, winim em yet. Em i kirapim ol long stadi long Baibel, na em i tok, ‘Bai yumi stap wantaim long Paradais.’ ”
Em i dai long Julai 27, 1992. Em i holim strong bilip olsem em bai kirap bek na i stap long Paradais long graun. Em i kirap tasol long mekim ol wok em i laik mekim, tasol em i tingting long kirap bek na mekim yet wok bilong God. Sampela de paslain long em i dai, em i raitim pas, na ol i kaunim long bung bilong planim em.
“Yes Ol Pren:
“Tenkyu long yupela i kam; dispela i strongim famili bilong mi.
“Mi laik tokim ol manmeri i bin sambai long mi—yumi bin karim bikpela hevi. Sampela taim yumi bel hevi tru, tasol sampela taim yumi lap. I olsem mi gat pait i stap longtaim na i hatwok, tasol mi pilim olsem mi winim pinis. Olsem Baibel i tok: ‘Mi bin ran strong long gutpela resis bilong laip. Nau mi kamap pinis long mak, na mi bin holimpas bilip bilong mi long God.’—2 Timoti 4:7.
“Mi lain long planti samting, na mi kamap strong, na ol pren bilong mi i lukim dispela senis. Mi laik tok tenkyu long yupela olgeta manmeri i bin sambai long mi.
“Yupela ol manmeri i bilip long nupela taim na long Jehova, yupela i save i gat taim bilong kirap bek, olsem Jon 5:28, 29 i tok. Olsem na yupela i mas i stap strong long tok i tru na bai yumi bung wantaim gen.
“Mi laik tok tenkyu long yupela olgeta i save long bikpela hevi mi bin karim. Mi laik holim yupela longtaim na givim kis long yupela wan wan. Mi laikim tumas yupela olgeta.”
Maski Brunella i yangpela na em i gat sik, em i no larim dispela i pasim em long dediket long God. Em i bilip na strongim bel na gutpela pasin bilong em i kirapim yumi olgeta yangpela na lapun long lusim olgeta kain samting em inap pasim rot na bai yumi no ran strong long resis bilong kisim laip.—Hibru 12:1.