Masin i No Inap Pasim Em Long Autim Tok

Sampela taim man i mas strongim bel bilong i stap laip. Dispela i stori bilong wanpela meri i gat strongpela bel. Nem bilong em Laurel Nisbet.

MAMA i karim Laurel long 1912 long Los Enjeles. Em i amamas long stap laip na em i givim bel long man na tupela pikinini bilong em. Tasol long 1948 wanpela samting i kamap na dispela samting i traim amamas bilong em long i stap laip. Em i kisim sik polio.

Inap sampela de Laurel i kisim sik olsem kus, tasol bihain em i no inap meknaisim skin bilong em, olsem na man bilong em i kisim em i go long haus sik. I no em wanpela tasol i gat dispela sik, planti i gat sik polio. Nau em i pret. Planti man i stap long haus sik na ol i pas pas, olsem na Laurel i mas slip long ples bilong wokabaut insait long haus sik. Em i hatwok long pulim win, olsem na em i wetim wanpela masin bilong helpim em​—masin bilong wetlewa. Bihain liklik ol i putim em insait long dispela masin na nau masin i helpim em long pulim win!

Ol saveman i bin wokim masin bilong wetlewa bilong helpim ol man i gat sik polio na ol masol long bros bilong ol i bagarap. Bipo ol saveman i ting man i mas stap liklik taim tasol insait long dispela masin inap long ol masol i strong gen na man yet inap pulim win. Tasol sori tru, Laurel na ol dispela saveman i kisim save olsem, dispela masin i kamap olsem ples tru bilong planti man i gat sik polio. Olsem na Laurel i stap insait long dispela kain masin na slip long baksait bilong em inap 37 yia. Long olgeta narapela man o meri i gat sik polio, i no gat wanpela i mas slip long dispela masin longpela taim olsem Laurel.

Laurel i gat 36 krismas taim em i mas slip long masin bilong wetlewa. Em i gat man na tupela pikinini bilong lukautim. Taim em i kisim save olsem em i mas stap long dispela masin, em i bel hevi stret. Liklik taim, olsem wanpela de, em i sori long em yet, na bihain em i tingting olsem em i mas karim tasol dispela hevi. Bihain man bilong em i kisim em i kam long haus. Maski Laurel i stap long masin bilong wetlewa na em i no inap lusim, em i lain long lukautim haus na famili bilong em.

Tingim hevi bilong Laurel. Em i slip insait long masin na het tasol i stap ausait. Em i pas insait na win i no inap kam ausait. Wanpela pam i pas aninit long masin na em i save stretim strong bilong win insait long masin. Na inap 15 taim long olgeta minit dispela pam i save kamautim hap win long masin. Dispela i mekim na bros bilong em i wok taim win i go insait long nus o long maus. Na taim pam i putim win i go insait gen long masin, dispela i mekim long bros na em i tromoi win long nus o maus. Laurel inap meknaisim het tasol, ol narapela hap bilong skin i dai olgeta. Ol i putim wanpela glas antap long masin na em inap lukim ol samting long rum na em inap lukim dua na ol man i kam insait long dua. [Lukim piksa]

Ol Witnes i Kam

Wanpela taim wanpela Witnes Bilong Jehova, em Del Kuring, i kam lukim Laurel. Em i kam stret long masin Laurel i slip long en, na em i lainim Laurel long olgeta gutpela tok tru bilong Baibel. Laurel i save tingim gut Baibel, olsem na em i no pasim tingting na bel, em i harim tok. Del i kirap na stadim Baibel wantaim Laurel na long 1965 em i bin dediketim laip bilong em long God olsem wanpela Witnes Bilong Jehova. Nau em i gat gutpela samting long i stap bilong em. Em i save, bihain long Paradais God bai kamapim long dispela graun, em bai wokabaut gen! Na em i amamas tru taim pikinini meri bilong em Kay i bihainim wankain bilip.

Ating yu gat askim olsem: ‘Olsem wanem? Em i baptais?’ Nogat. Laurel i no inap pulim win sapos em i no stap insait long masin. Olsem na em i no inap go insait tru long wara. Na tu, em i no inap i go long Haus Kingdom o long wanpela kibung. Na taim pikinini bilong em i baptais, em i no lukim. Tasol samting Laurel i mekim bilong mekim laik bilong Jehova, i winim tru pasin bilong planti Kristen i no gat sik.

Laurel em meri tru bilong autim gutpela tok. Taim em i slip 37 yia long masin bilong wetlewa em i bin helpim 17 manmeri long kisim stretpela tok long Baibel. Em i mekim olsem wanem? Em i no inap i go long haus bilong ol man olsem planti Witnes i save mekim, tasol em i save autim tok long ol man i save kam helpim em, olsem ol nes samting. Na mi wanpela bilong ol dispela manmeri Laurel i bin helpim ol long kisim tok i tru.

Long 1972 mi lain long kamap nes, olsem na long dispela taim mi kirap long lukautim Laurel. Taim wok bilong mi i pinis, mitupela Laurel i save toktok bambai narapela i ken kisim save long narapela. Wanpela taim Laurel i tok: “Mi laik yu kaunim wanpela buk long mi.” Mi orait long dispela, na nau Laurel i tokim mi long kisim liklik buk Tok i Tru i Bringim Man Long Laip Oltaim. Mi askim em long mi mas kirap we na kaunim. Em i tok: “Kirap long sapta 1.” Long dispela rot Laurel i kirap na stadim Baibel wantaim mi na bihain mi tu i kamap wanpela Witnes Bilong Jehova i dediket pinis.

Wanpela rum long haus bilong Laurel i gat bikpela windo, na Laurel i stap long dispela rum. I gat planti man i wokabaut i go i kam long rot, olsem na husat i wokabaut klostu long haus bilong Laurel, ol inap lukim masin bilong em. Planti man i wokabaut i go i kam ol i save sori taim ol i lukim Laurel i slip long dispela masin, olsem na planti man i save kam insait long haus. Sampela bilong ol dispela man Laurel i no save long ol. Olgeta taim Laurel i amamas long bungim ol man na em i save autim tok long ol. Em i no pret long autim tok long Jehova, na ol manmeri i kirap nogut long tingting bilong Laurel long ol gutpela samting em i wetim i kamap bihain. Pasin bilong Laurel i bin litimapim nem bilong Jehova.

Laurel i no inap slip planti, long wanem, skin bilong em i no meknais liklik, olsem na skin i no les olsem skin bilong yumi i save les. Na pam i pas aninit long masin bilong em na i save pairap liklik. Olsem na taim em i no slip, em i save mekim wanem? Em i givim bel long beten long Papa bilong em long heven. Ating em i bin beten long God i ken strongim em long sanap strong na karim hevi bilong em, tasol planti taim em i bin beten long God i ken helpim ol brata sista Kristen bilong em. Em i save tingim tru ol narapela man na olgeta de em i save tok tenkyu long Jehova long ol gutpela samting em i mekim long em.

Taim wanpela wasman bilong ol Witnes Bilong Jehova i kam long taun bilong Laurel, olgeta taim em i save go lukim em. Planti bilong ol dispela man i bin go lukim Laurel, ol i tok, pasin bilong Laurel i save strongim ol! Tru tumas, olgeta taim Laurel i amamas na em i tingim ol rot bilong autim tok.

Em i bin kisim kain kain sik. Wanpela taim apendiks bilong em i bruk, olsem na kwiktaim haus sik i salim ka i kam na ol i siksti i go long haus sik. Long 1953 samting ol dokta i no save long rot bilong mekim i dai tingting bilong sikman i save slip insait long masin bilong wetlewa taim ol i laik katim em. Olsem na taim dokta i katim Laurel, em i no mekim i dai tingting bilong em.

Ol i No Mekim Wok Long Blut

Em i bin kisim sik kensa, na ol bikpela sik long skin, na ol dokta i mas katim em. Na i hatwok long em taim skin i skrap na em i no inap skrapim skin bilong em yet, nes i mas mekim. Maski ol masol bilong em i dai olgeta, skin inap pilim ol samting olsem taim skin i skrap samting. Dispela i gutpela, long wanem, em i no kisim ol liklik sua long skin bilong em. Laurel i save tingim gut skin bilong em. Long olgeta wik mipela fopela nes i mas holim em na tanim em bilong wasim skin bilong em. Dispela i givim hatwok long Laurel, tasol Laurel i no toktok planti long en.

Em i bikpela wok long lukautim Laurel, tasol mipela save amamas na lap. Long olgeta wik mipela mas pasim samting long nek bilong em na win i stap insait long masin i no inap i kam ausait. Taim mipela mekim olsem, Laurel i save tok: ‘Samting bilong Satan!’ Tru tumas, Laurel i save husat i as bilong olgeta sik. Satan i bin grisim namba wan man na meri long givim baksait long Jehova, olsem na sin, sik na indai i kamap long dispela graun.

Skin bilong Laurel i dai olgeta, tasol long ol samting bilong spirit em i stap gut. Sapos rot i op, Laurel i save toktok wantaim ol man long gutpela samting em i wetim, em Paradais. Na klostu long taim em i dai na ol dokta i mas katim em, em i bihainim yet stretpela pasin. Long 1985 Laurel i gat 72 krismas. Klostu long taim ol dokta i laik katim em, ol i tokim Laurel, ol i no inap katim em sapos ol i no inap mekim wok long blut. Pikinini meri bilong Laurel i tokim dokta long laik bilong mama, olsem em i no laik kisim blut. Long dispela taim skin bilong Laurel i no gat strong na ol dokta i bin putim paip gumi insait long nek bilong em, olsem na Laurel inap toktok isi isi tasol. Wanpela samting i pasim rot bilong pekpek, olsem na skin olgeta i kisim sik nogut long dispela, na Laurel i olsem em i dai pinis.

Tasol dokta i tok em i mas harim long maus bilong Laurel olsem em i no laik kisim blut. Olsem na mipela i bin tok isi long yau bilong Laurel olsem: ‘Laurel, yu yet i mas tokim dokta yu no laik kisim blut.’ Mi kirap nogut tru, long wanem, wantu ai bilong Laurel i go bikpela, na em i tok strong long dokta long em i no ken givim blut long em. Em i kamapim sampela tok bilong Baibel na tokim dokta ol Witnes Bilong Jehova i ting sapos ol i kisim blut ol i mekim bikpela rong long God. Na mi no inap tru lusim tingting long narapela tok Laurel i mekim long dokta, olsem: ‘Dokta, sapos mi kisim save olsem yu bin helpim mi long stap laip long rot bilong blut, bai mi laik long i dai tasol. Olsem na wok yu bin mekim em yu bin mekim nating.’ Taim dokta i harim Laurel i tok olsem, dokta i save em i no laik tru long kisim blut, na em i kirap nogut tru long strongpela tingting na bel bilong Laurel. Olsem na em i tok, em bai harim tok bilong Laurel.

Ol dokta i wok 4-pela aua long katim Laurel. Bihain ol dokta i rausim em long masin bilong wetlewa na putim em long bet. Em namba wan taim insait long 37 yia Laurel i bin lusim dispela masin. Ol dokta i katim nek liklik na putim gumi insait na dispela gumi i pas long wanpela kain masin bilong pamim win i go insait long nek bilong Laurel. Nau Laurel i pret. Em i no inap toktok, long wanem, dispela gumi i pas long paip bilong nek. Em i pilim olsem em i no inap pulim gut win. Tripela de bihain long ol dokta i katim em, em Ogas 17, 1985, Laurel i dai.

Mi inap tingim laspela tok em i bin mekim long mi taim ol dokta i laik mekim i dai tingting bilong em paslain long ol i katim em. Em i tok: “Chris, yu no ken lusim mi.” Nau mi wetim taim bilong dispela olpela pasin i pinis na taim bilong ol daiman i kirap bek. Mi tingim tru dispela de gutpela pren bilong mi Laurel Nisbet bai kirap bek na mi ken holim em na tok: “Mi stap. Mi no bin lusim yu.”​—Christine Tabery i bin kamapim dispela stori.