‘Ol Dokta i Tingting Gen Long Blut’

‘Samting Ol i Mekim Long Helpim Ol Witnes Bilong Jehova Inap Helpim Olgeta Man’

Wanpela niusman (Kris Newcomer) i bin raitim ol dispela het-tok long wanpela nius (Rocky Mountain News), na i tok: ‘Winim 100 dokta long Denva ol i pasim tok long helpim ol Witnes Bilong Jehova, em ol i tok blut i samting holi na em i no stret long ol i kisim blut o ol i givim blut bilong ol long narapela man taim dokta i katim ol, o long ol narapela samting dokta i laik mekim.’ Dokta Greg Van Stiegmann bilong wanpela lain i save stretim ol samting bilong man i no laik kisim blut, na em i wok long wanpela haus sik (University Hospital) long Denva, long Kolorado, em i tok: ‘Mipela i redim sampela wokman ol i orait long senisim sampela pasin bilong ol taim ol i helpim ol sikman.’

Dispela dokta i tok, dispela samting bai helpim ol Witnes Bilong Jehova na ol narapela man tu, long wanem, nau planti ol narapela man i no laik kisim blut. Na em i tok: ‘Mipela i wok strong na bai mipela no ken givim blut long wanpela man. Mipela kisim save olsem, sapos namba wan taim mipela katim man i gat sik kensa, na dispela man i no bin kisim blut paslain na bihain long mipela katim em, skin bilong em inap kamap gutpela gen hariap.’

Na nius i tok moa: “Ol 10,000 Witnes Bilong Jehova long Kolorado i amamas tru long harim nupela tingting bilong ol dokta. Wanpela tok long buk Stat long Olpela Testamen i tok: ‘Yupela i no ken kaikai mit i gat blut i stap yet long en, long wanem, blut em i as bilong laip,’ olsem na long ol Witnes dispela tok i makim olsem ol i no ken kaikai blut, o kisim blut long pasin bilong putim blut i go insait long skin bilong man.”