Ol Witnes Bilong Jehova Long Olgeta Hap—Tailan
INSAIT bilong nem Tailan i olsem: “Ples bilong ol man i stap fri.” Inap 57,000,000 manmeri i stap, em ol i man bilong pasin isi, na ol i save wok strong, na ol i gat kain kain lotu. Planti ol i bilong lotu Buda, tasol long hap saut-is bilong dispela kantri long Esia, planti ol i bilong ol misin i gat nem Kristen. Olgeta i mas harim gutpela tok bilong Kingdom bilong God.—Matyu 24:14.a
Ol Ranaweman i Harim Tok Bilong Kingdom
Long ol liklik maunten bilong Tailan, klostu long boda bilong kantri Mianma, i gat ol kem bilong 10,000 samting ranaweman bilong lain Karen. Nau sampela i kirap bihainim tok i tru bilong Baibel. Wanpela famili long dispela hap ol i Witnes Bilong Jehova na ol i wok long autim tok bilong Kingdom long ol ranaweman. Wok bilong ol i kirap olsem wanem?
Sampela yia bipo wanpela yangpela man i lusim Misin Angliken na em i kamap wanpela Witnes Bilong Jehova. Pasto i kirapim ol wanblut bilong em long birua long em. Tasol em i stap isi na karim hevi na isi isi ol i lusim pasin birua. Tasol ol pasto i wok long tok bilas long em i go inap long tupela yia bipo, em long dispela taim misin i pinisim ol long wok pasto, long wanem, ol i pamuk. Nau lain bilong misin i no gat wasman. Ol wanblut tru na ol narapela famili bilong dispela Witnes ol i kirap nogut na ol i pilim olsem i no gat man bilong helpim ol. Elevenpela ol i lusim Misin Angliken na tokim ol Witnes long stadi wantaim ol na lainim ol long Baibel.
Ol i stadi gut, na sampela ranaweman moa i insait long stadi. Kwiktaim planti ol i kisim save long tok i tru, na 17 nupela Witnes i baptais long wanpela wara i ran namel long kem. Ol i amamas long bubu mama i gat 88 krismas em i baptais wantaim ol!
Video i Kirapim Tingting
Rot i op bilong planti ranaweman moa i ken kamap Witnes. Long 1993, inap 57 ol i bung long taim bilong Memorial. Long Me, 1993, wasman sekit i kam na 67 i bung bilong harim wanpela tok em i mekim. Na inap 250 ol i bung bilong lukim video bilong Sosaiti Wastaua i stori long oganaisesen bilong ol Witnes Bilong Jehova (Jehovah’s Witnesses—The Organization Behind the Name).
Meri bilong pasto Baptis long kem bilong ol ranaweman, em i go harim wanpela pablik-tok bilong ol Witnes na em i raitim ol tok bilong Baibel em i harim. Em i tokim man bilong em, em i les long harim ol wankain tok ol i autim oltaim long haus lotu. Pasto i kros na em i tok, sapos meri i go long miting bilong ol Witnes, ol narapela long misin bai bihainim em. Taim meri i go gen, man i kisim naip na ranim em, na em i kukim ol pepa, em meri i bin raitim ol tok bilong Baibel long en, na ol buk na nius bilong Baibel em meri i holim. Tasol maski, long taim bilong lukim video, meri i go gen. Bihain em i stori long man long ol samting em i lukim long video. Man i senisim tingting na em i laik lukim video. Em i hevi long em i bin kukim ol pepa na buk bilong Baibel.
Olsem na ol man long Tailan i harim tok bilong Kingdom na dispela i mekim ol i kamap fri tru long “ples bilong ol man i stap fri.”—Jon 8:32.
[Ol Futnot]
a Sapos yu laik kisim sampela save moa long dispela, yu ken lukim kalenda bilong ol Witnes Bilong Jehova bilong 1994.
[Blok long pes 24]
OL SAMTING BILONG KANTRI Yia Bilong Wok Bilong 1993
HAMAS OL I AUTIM TOK: 1,434
SKELIM OLSEM: Wanpela insait long 40,299
HAMAS I BUNG LONG MEMORIAL: 3,342
HAMAS PAINIA, AVERES: 232
HAMAS BAIBEL-STADI, AVERES: 1,489
HAMAS I KISIM BAPTAIS: 92
HAMAS KONGRIGESEN: 39
BRENS-OFIS: BANKOK
[Piksa long pes 25]
Ol i wok strong long autim gutpela tok bilong Kingdom
[Piksa long pes 25]
Namba wan brens-ofis, 1947
[Piksa long pes 25]
Em famili bilong Betel, ol i sanap long ai bilong nupela brens-ofis long Bankok, ol i opim long Februeri 8, 1992