Rot Bilong Mekim God i Amamas

YUMI inap mekim wanem bilong mekim God i amamas? I gat sampela samting yumi inap givim em?— Jehova i tok: “Olgeta wel abus bilong bus . . . i bilong mi yet.” Em i tok tu olsem: “Ol silva na gol i stap long olgeta kantri, em i bilong mi tasol.” (Song 24:1; 50:10; Hagai 2:8) Tasol i gat wanpela samting yumi inap givim long God. Em wanem samting?—

Jehova i larim yumi yet i makim olsem bai yumi mekim wok bilong em o nogat. Em i no fosim yumi long mekim ol samting em i laik bai yumi mekim. Yumi ken traim long kliagut long as na God i wokim yumi bilong yumi yet inap makim olsem bai yumi mekim wok bilong em o nogat.

Ating yu save long robot i wanem samting. Em wanpela masin i mekim ol samting man bilong wokim em i laik masin i mekim. Olsem na robot yet i no inap makim wanem samting em i laik mekim. Jehova inap wokim yumi olgeta i kamap olsem ol robot. Em inap wokim yumi na bai yumi mekim tasol ol samting em i laik bai yumi mas mekim. Tasol God i no mekim olsem. Yu save bilong wanem em i no mekim olsem?— Sampela toi i olsem ol robot. Taim yu presim wanpela baten, ol i mekim stret ol samting olsem man bilong wokim ol i bin makim. Yu bin lukim wanpela toi olsem?— Planti man i save les long ol toi i save mekim tasol ol samting man bilong wokim ol i bin makim. God i no laik bai yumi bihainim nating tok bilong em olsem ol robot em i bin wokim bilong mekim wok bilong em. Jehova i laik bai yumi mekim wok bilong em, long wanem, yumi laikim em na yumi laik bihainim tok bilong em.

Yu ting Papa bilong yumi long heven i pilim olsem wanem taim yumi bihainim tok bilong em, long wanem, yumi laik mekim olsem?— Yu stori, pasin bilong yu i save mekim papamama bilong yu i pilim olsem wanem?— Baibel i tok pikinini i gat gutpela tingting i save mekim “papamama bilong en i amamas,” tasol pikinini i no gat gutpela tingting i save mekim “papamama i bel hevi tru.” (Sindaun 10:1) Olsem wanem? Yu bin luksave olsem taim yu mekim ol samting mama na papa bilong yu i tokim yu long mekim, dispela i save mekim ol i amamas?— Tasol ol i save pilim olsem wanem taim yu sakim tok bilong ol?—

Orait nau yumi ken tingim Papa bilong yumi long heven, em Jehova. Em i tokim yumi long olsem wanem yumi inap mekim em i amamas. Plis kisim Baibel bilong yu na opim long Sindaun 27:11. Long dispela ves, God i toktok long yumi olsem: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” Yu save long mining bilong dispela tok olsem sutim tok long man?— Ating wanpela man i lap long yu na tok yu no inap long mekim samting yu tok yu inap mekim. Olsem wanem Satan i save sutim tok long Jehova?— Nau yumi ken stori long dispela.

Tingim, long Sapta 8 bilong dispela buk yumi bin lainim olsem Satan i laik stap Namba Wan na em i laik bai olgeta man i mas bihainim tok bilong em. Satan i tok ol man i lotuim Jehova, long wanem, Jehova bai givim laip oltaim long ol sapos ol i mekim olsem. Taim Satan i pulim pinis Adam na Iv long sakim tok bilong Jehova, Satan i sutim tok long God. Em i tokim God olsem: ‘Ol man i tingim tasol ol samting yu givim long ol na ol i mekim wok bilong yu. Sapos yu opim rot long mi, mi inap mekim olgeta man i givim baksait long yu.’

I tru olsem ol dispela tok stret i no stap long Baibel. Tasol taim yumi ritim stori bilong Jop, yumi inap lukim klia olsem Satan i bin mekim kain tok olsem long God. Em i bikpela samting tru long Satan na long Jehova olsem Jop bai stap gut long God o nogat. Yumi ken opim Baibel bilong yumi long Jop sapta 1 na sapta 2 na kisim save long ol samting i bin kamap.

Lukim long Jop sapta 1 olsem Satan i stap long heven taim ol ensel i kam lukim Jehova. Olsem na Jehova i askim Satan: “Yu stap we na yu kam?” Satan i bekim olsem em i bin lukluk raun long olgeta hap bilong graun. Olsem na Jehova i askim em: ‘Yu lukim tu Jop, em i save lotu long mi na em i no save mekim wanpela pasin nogut?’​—Jop 1:​6-8.

Kwiktaim Satan i givim ol eskius. ‘Jop i lotuim yu, long wanem, em i no gat ol hevi. Sapos yu no lukautim em na givim ol gutpela samting long em, em bai tok nogut tru long yu.’ Jehova i tok: ‘Orait, Satan, yu ken mekim wanem samting yu laik mekim long em, tasol no ken bagarapim Jop yet.’​—Jop 1:​9-​12.

Satan i mekim wanem?— Em i mekim na ol man i stilim ol bulmakau na donki bilong Jop na kilim i dai ol wasman bilong ol. Laitning i kilim i dai ol sipsip na ol wasman bilong ol. Bihain, ol man i kam stilim ol kamel na kilim i dai ol wasman bilong ol. Na laspela samting, Satan i mekim na bikpela win i bagarapim haus em tenpela pikinini bilong Jop i stap long en, na kilim i dai olgeta bilong ol. Maski olgeta dispela samting i kamap, Jop i lotu yet long Jehova.​—Jop 1:​13-​22.

Taim Jehova i lukim gen Satan, Jehova i tok olsem Jop i stap gut yet long Em. Satan i givim eskius na tok: ‘Sapos yu larim mi bagarapim bodi bilong em, bai em i tok nogut tru long yu.’ Olsem na Jehova i larim Satan i bagarapim bodi bilong Jop, tasol em i tokim Satan long no ken kilim i dai Jop.

Satan i mekim na ol sua i pulap long skin bilong Jop. Ol dispela sua i smel nogut tru na i no gat man i laik i stap klostu long em. Meri bilong Jop tu i tokim em olsem: ‘Tok nogut long God na yu ken i dai’! Ol man em ol i giaman olsem ol i pren bilong Jop ol i kam lukim em na mekim em i pilim nogut moa yet, ol i tok em i bin mekim ol pasin nogut, olsem na em i kisim ol dispela hevi. Tasol maski Satan i givim olgeta dispela pen na hevi long Jop, em i stap gut yet long Jehova na mekim wok bilong em.​—Jop 2:​1-​13; 7:5; 19:​13-​20.

Yu ting pasin bilong Jop long stap gut long Jehova i mekim na Jehova i pilim olsem wanem?— Dispela i mekim na em i amamas, long wanem, Jehova inap tokim Satan olsem: ‘Lukim Jop! Em i lotuim mi, long wanem, em i laik mekim olsem.’ Olsem wanem? Bai yu bihainim pasin bilong Jop, na stap olsem man Jehova i ken tok olsem yu kamapim klia Satan i man bilong giaman?— Em i wanpela gutpela samting tru long yumi ken kamapim bekim bilong ol tok Satan i sutim olsem em inap pulim ol man na bai ol i no lotuim Jehova. Jisas i bin tingim dispela i wanpela gutpela samting tru em inap mekim.

Bikpela Tisa i no bin larim Satan i pulim em long mekim pasin i no stret. Pasin bilong em i mekim Papa bilong em i amamas tru! Jehova inap makim Jisas na tokim Satan olsem: ‘Lukim Pikinini bilong mi! Em i bin stap gut tru long mi, long wanem, em i laikim mi!’ Tingim tu bikpela amamas bilong Jisas long mekim Papa bilong em i belgut tru. Dispela amamas i mekim na Jisas i bin karim pen na i dai long diwai pos.​—Hibru 12:2.

Olsem wanem? Yu laik bihainim pasin bilong Bikpela Tisa na mekim Jehova i amamas?— Sapos olsem, orait wok yet long kisim save long ol samting Jehova i laik bai yu mas mekim, na mekim em i amamas long rot bilong bihainim laik bilong em!