Rot Bilong Putim Pasin Bilong Laikim Tru God Long Bel Bilong Pikinini

LONG nau, i gat hatwok tru long kisim pasin bilong pas gut wantaim God Jehova. (Song 16:8) Olsem Baibel i tok profet long en, yumi stap long taim bilong “planti hevi nogut tru.” Planti manmeri i “laikim tumas ol kain kain pasin bilong amamas bilong dispela graun, na ol . . . i no laikim God.” (2 Timoti 3:​1-5) Tru tumas, i no gat planti man long nau i gat pasin bilong laikim tru God.

Bilong pikinini i ken laikim tru God long bel bilong em, yumi mas wok strong long helpim em long mekim olsem. Yumi mas helpim ol pikinini bilong yumi long putim pasin bilong laikim tru God Jehova long bel bilong ol. Olsem wanem yumi ken mekim olsem?

Toktok Gut Wantaim

Yumi inap helpim ol pikinini bilong yumi long laikim tru God long bel bilong ol sapos pasin bilong laikim tru God i stap long bel bilong yumi yet. (Luk 6:40) Baibel i kamapim klia dispela samting, na i tok: “Yupela i mas laikim tumas God, Bikpela bilong yumi. Yupela i mas laikim em tru long bel bilong yupela na long tingting bilong yupela na long strong bilong yupela. Oltaim yupela i mas tingim ol dispela lo nau mi givim long yupela. Na yupela i mas lainim ol pikinini bilong yupela long ol dispela lo.”​—Lo 6:​4-7.

Olsem wanem yumi ken helpim pikinini bilong yumi long kisim pasin bilong laikim tru God long bel bilong em? Namba wan, yumi mas save wanem samting i stap long bel bilong pikinini. Namba tu, yumi mas kamapim ol samting i stap long bel bilong yumi yet.

Taim Jisas Krais na tupela disaipel bilong em i wokabaut long rot i go long Emeus, Jisas i kirapim ol long stori long ol samting ol i wet long en na ol samting ol i tingting planti long en. Jisas i putim yau long tok ol i mekim na bihain em i stretim tingting bilong ol long rot bilong kamapim mining bilong ol tok bilong Baibel. Bihain ol i tok: ‘Tru tumas, taim em i givim toktok long mitupela, bel bilong mitupela i bin kirap tru.’ Ol i bin toktok gut wantaim na kamapim tingting i stap long bel bilong ol. (Luk 24:​15-​32) Olsem wanem yumi ken save long tingting i stap long bel bilong ol pikinini bilong yumi?

I no longtaim i go pinis, mipela i askim sampela papamama em pikinini bilong ol i bikpela pinis na i stap gutpela piksa insait long kongrigesen long stori long pasin bilong toktok gut wantaim. Olsem: Long Meksiko, Glen i gat fopela pikinini i bikpela pinis.a Em i tok: “Pasin bilong papamama long toktok gut wantaim ol pikinini i no save kamap nating. Mi na meri bilong mi i lusim sampela wok i no bikpela samting tumas na bai mipela i gat taim bilong stap wantaim ol pikinini. Taim ol i yangpela, sampela taim mipela i sindaun wantaim ol inap planti aua long apinun na toktok wantaim ol long olgeta kain samting ol i laik toktok long en. Na long taim bilong kaikai tu, mipela i putim yau long tok bilong ol na long dispela rot mipela i save long ol tingting o pasin kranki bilong ol, na nau long pasin isi mipela i stretim ol, na planti taim ol pikinini i no luksave long dispela.”

Bilong toktok gut wantaim, yumi mas kamapim ol samting i stap long bel bilong yumi yet. Jisas i tok: “Gutpela man i gat planti gutpela tingting i stap long bel bilong en. . . . Kain tingting i pulap long bel, em maus i save autim.” (Luk 6:45) Toshiki, em tripela pikinini bilong em i insait long fultaim sevis long Japan, em i tok: “Mi tokim ol planti taim long as na mi bilip long Jehova​—wanem samting i mekim na long bel olgeta mi bilip olsem em i stap, na olsem wanem ol samting i bin painim mi i kirapim mi long bilip tru olsem tok bilong Baibel em i tru na em i nambawan gutpela buk bilong stiaim laip bilong man.” Long Meksiko, Cindy i tok: “Man bilong mi i bin beten wantaim ol pikinini long olgeta taim. Taim ol i harim ol tok em i kamapim long bel bilong em, ol i save Jehova i stap tru tru.”

Pasin Bilong Yumi Yet i Gat Bikpela Strong

Pasin bilong yumi i gat bikpela strong, winim tok bilong yumi. Long dispela rot ol pikinini inap lukim pasin bilong yumi long laikim tru God i bikpela olsem wanem. Ol man i lukim pasin bilong Jisas Krais long bihainim tok bilong Jehova, na long dispela rot ol inap save olsem pasin bilong Jisas long laikim God i bikpela tru. Jisas i tok: “Mi laik bai ol manmeri bilong graun i save, mi laikim tru Papa, na mi save mekim olgeta samting Papa i tokim mi long mekim.”​—Jon 14:31.

Gareth, em wanpela Witnes Bilong Jehova long Wales, em i tok: “Ol pikinini bilong yumi i mas luksave olsem yumi laikim tru Jehova na yumi traim long mekim ol samting long pasin em i laikim. Olsem: Mi save tokaut long ol popaia bilong mi na long dispela rot ol pikinini bilong mi i ken lukim olsem mi bihainim tok bilong God. Nau ol pikinini i traim long mekim wankain pasin.”

Greg, long Australia, em i tok: “Mipela i laik bai ol pikinini bilong mipela i lukim olsem tok i tru em i nambawan bikpela samting long laip bilong mipela. Taim mipela i wokim ol disisen long samting bilong wok o amamas, pastaim mipela i skelim ol dispela samting bai mekim wanem long ol wok Kristen bilong mipela. Mipela i amamas long lukim olsem pikinini meri bilong mipela i gat 19 krismas, em i save bihainim dispela tingting long wok painia haptaim bilong em.”

Helpim Ol Pikinini Long Save Gut Long God

Yumi no inap laikim o trastim wanpela em yumi no save gut long em. Taim aposel Pol i laik bai ol Kristen long Filipai i strongim pasin bilong ol long laikim Jehova, em i tok: “Oltaim mi save prea olsem, pasin bilong laikim tru ol arapela em i ken kamap strong moa long laip bilong yupela, na bai yupela i gat planti save, na tingting bilong yupela i ken kamap klia tru.” (Filipai 1:9) Falconerio i wok long mekim bikpela long fopela pikinini long Peru, em i tok: “Pasin bilong ritim na stadi oltaim long Baibel wantaim ol pikinini i strongim bilip bilong ol. Sampela taim mi no stadi wantaim ol, na mi lukim olsem pasin bilong ol long laikim God i no strong moa.” Gary, long Australia, i tok: “Planti taim mi soim ol pikinini bilong mi ol samting i kamapim klia olsem truim bilong ol tok profet bilong Baibel i wok long kamap. Mi soim tu ol gutpela samting em pasin bilong bihainim ol stiatok bilong Baibel i save kamapim. Pasin bilong mipela long mekim famili stadi long olgeta taim i bikpela samting tru bilong strongim bilip bilong ol.”

Sapos famili i stap bel isi na i gat pasin bilong rispek, orait taim famili i stadi wantaim, save bai i go long bel bilong ol pikinini na dispela samting bai mekim ol pikinini i amamas long lainim ol samting. (Jems 3:18) Shawn na Pauline bilong Briten i gat fopela pikinini, ol i tok: “Taim mipela i mekim famili stadi, mipela i no laik krosim ol pikinini, maski ol i mekim bikpela nois. Mipela i mekim stadi long kain kain pasin. Sampela taim mipela i singautim ol pikinini long makim samting mipela bai stadi long en. Mipela i yusim ol vidio em oganaisesen bilong Jehova i wokim. Sampela taim mipela i lukim gen wanpela hap bilong vidio o stopim vidio bambai mipela i ken toktok long en.” Wanpela mama bilong Briten, nem bilong em Kim, em i tok: “Mi save redim gut famili stadi bambai mi ken mekim ol askim i kirapim ol pikinini long wokim tingting. Mipela i save amamas long stadi. Mipela i save lap planti.”

Makim Ol Poroman

Sapos ol pikinini bilong yumi i stap wantaim ol manmeri em ol i pren bilong God, em i isi moa long ol pikinini i ken kisim pasin bilong laikim tru Jehova na amamas long lotu i tru. Ating yumi mas wok strong bilong stretim rot na bai ol pikinini i ken toktok na pilai wantaim ol gutpela poroman. Tasol dispela hatwok bai i no lus nating! Na tu, em i gutpela long stretim rot na bai ol pikinini i ken bungim ol Witnes Bilong Jehova husat i bin makim fultaim sevis olsem wanpela wok ol i laik mekim oltaim. Planti ol i bin makim dispela rot, long wanem, ol i bin bung wantaim ol strongpela wokboi bilong God. Wanpela sista husat i bin kamap misineri, em i tok: “Planti taim papamama bilong mi i singautim ol painia i kam kaikai wantaim mipela. Ol i amamas tru long wok ol i mekim, olsem na mi tu i laik mekim wok bilong God olsem wanpela painia.”

Ol samting inap stiaim tingting bilong pikinini bilong yumi long mekim gutpela samting o samting nogut. Olsem na ol poroman nogut i traim pasin bilong yumi long mekim gut wok olsem papa na mama. (1 Korin 15:33) Em i hatwok liklik long lainim ol yangpela long rot bilong abrusim ol poroman i no laikim Jehova na i no save long em. (Sindaun 13:20) Shawn, em pastaim yumi stori long em, em i tok: “Mipela i lainim ol pikinini bilong mipela long mekim gutpela pasin pren long ol wanskul bilong ol, tasol ol i no ken poromanim ol taim skul i pinis long apinun. Ol pikinini bilong mipela i save long as na ol i no ken insait long ol spot na ol arapela samting klas i save mekim taim skul i pinis long apinun.”

Pasin Bilong Skulim Pikinini i Kamapim Gutpela Samting

Taim yumi skulim ol pikinini long kamapim bilip bilong ol long ol arapela, yumi helpim ol long amamas long kamapim pasin bilong ol long laikim tru God. Mark i sindaun long Amerika, em i tok: “Mipela i laik bai ol pikinini man bilong mipela i amamas long kamapim bilip bilong ol long ol arapela long kain kain taim, na i no tasol long taim mipela i werim gutpela klos bilong autim tok long ol haus. Olsem na taim mipela i go painim amamas long sampela hap, kain olsem long pak, nambis, o bikbus, mipela i save kisim Baibel na ol nius bilong Baibel i go wantaim, na mipela i toktok wantaim ol man long ol dispela hap long ol samting mipela i bilip long en. Ol pikinini man bilong mipela i amamas long autim tok wantaim mipela long kain rot olsem. Ol i save insait long toktok mipela i mekim wantaim ol man na ol i kamapim bilip bilong ol.”

Lapun aposel Jon i bin helpim planti manmeri long strongim pasin bilong ol long laikim tru God. Em i tok: “Taim mi harim tok long ol pikinini bilong mi [long spirit] i bihainim tok tru, orait mi save amamas tru, na dispela amamas i winim ol arapela kain amamas bilong mi.” (3 Jon 4) Sapos yumi helpim pikinini bilong yumi long laikim tru God long bel bilong ol, bai yumi kisim wankain amamas.

[Futnot]

[Ol Piksa long pes 9]

Pasin bilong toktok gut wantaim long ol samting bilong bilip i no save kamap nating

[Piksa long pes 10]

Skulim ol pikinini bilong yu long kamapim pasin bilong ol long laikim tru God

[Kredit Lain]

Courtesy of Green Chimneys Farm