HAP 7

Rot Bilong Skulim Pikinini

“Oltaim yupela i mas tingim ol dispela lo nau mi givim long yupela. Na yupela i mas lainim ol pikinini bilong yupela long ol dispela lo.”—Lo 6:6, 7

Taim Jehova i kamapim famili, em i makim papamama long lukautim ol pikinini. (Kolosi 3:20) Yutupela i stap olsem papamama, olsem na em wok bilong yutupela long trenim pikinini long laikim Jehova na long kamap man o meri bilong mekim gut wok. (2 Timoti 1:5; 3:15) Na tu, yutupela i mas save long tingting i stap long bel bilong pikinini. Em i bikpela samting long yutupela i mas stap gutpela piksa. Yutupela inap skulim gut pikinini long Tok Bilong Jehova sapos yutupela i putim tok i go daun long bel bilong yutupela yet.—Song 40:8.

1 OPIM ROT LONG PIKININI INAP TOKTOK WANTAIM YU

BAIBEL I TOK: “Olgeta man i mas putim yau kwik long harim tok, na ol i no ken hariap long mekim toktok.” (Jems 1:19) Yutupela i laik bai ol pikinini i no pret long toktok wantaim yutupela. Ol pikinini i mas save olsem yutupela i redi long putim yau taim ol i laik toktok. Kamapim bel isi insait long famili na bai ol pikinini i no pret long kamapim tingting bilong ol. (Jems 3:18) Sapos ol i ting olsem yutupela bai mekim hatpela pasin o skelim ol, ating ol bai pret long toktok wantaim yutupela. Mekim pasin isi long ol pikinini, na oltaim tokim ol olsem yutupela i laikim ol.—Matyu 3:17; 1 Korin 8:1.

SAMTING YU KEN MEKIM:

Taim ol pikinini i laik toktok, yutupela i mas redi long putim yau
Toktok wantaim ol pikinini long olgeta taim, na i no long taim bilong hevi tasol

2 KLIAGUT LONG SAMTING OL I LAIK TOKTOK LONG EN

BAIBEL I TOK: “Sapos man i putim yau gut long tok bilong ol man i skulim em, orait em bai i gat gutpela sindaun.” (Sindaun 16:20) Sapos yutupela i laik kliagut long tingting tru i stap long bel bilong ol pikinini, orait no ken tingting tasol long toktok bilong ol. Planti yangpela i save bilasim tok bilong ol o mekim ol tok ol i no min long mekim. “Putim gut yau pastaim, na bihain yu ken bekim tok. Sapos yu no mekim olsem, orait yu mekim longlong pasin.” (Sindaun 18:13) No ken hariap long kros.—Sindaun 19:11.

Mama i hariap long kros long tok pikinini gel i mekim

SAMTING YU KEN MEKIM:

Maski pikinini i mekim wanem tok, no ken katim tok o kirap kwik long kros
Traim long tingim hau yutupela i bin pilim taim yutupela i gat wankain krismas olsem ol, na wanem samting em i bikpela samting long yutupela

3 WANBEL LONG STRETIM PIKININI

BAIBEL I TOK: “Pikinini, yu mas harim tok bilong papamama bilong yu na yu no ken sakim tok bilong tupela.” (Sindaun 1:8) Jehova i givim namba long papa na mama wantaim long lukautim pikinini. Yutupela i mas skulim ol pikinini long rispektim na bihainim tok bilong yutupela. (Efesus 6:1-3) Ol pikinini inap luksave sapos papamama i no “wanbel tru long holim wankain tingting na wankain laik.” (1 Korin 1:10) Sapos yutupela i no wanbel, orait no ken kros long ai bilong ol pikinini bikos dispela inap mekim na ol i no inap rispektim yutupela.

Papa i kisim pikinini boi i go long sait na stretim em taim mama na brata bilong em i stap long neks rum

SAMTING YU KEN MEKIM:

Toktok wantaim na wanbel long olsem wanem yutupela bai stretim pikinini
Sapos yu na poroman marit i gat narapela narapela tingting, orait traim long pilim tingting bilong poroman marit

4 MEKIM PLEN

BAIBEL I TOK: “Skulim pikinini bilong yu long bihainim gutpela pasin.” (Sindaun 22:6) Sapos yutupela i laik skulim gut pikinini, orait yutupela i mas toktok wantaim long olsem wanem yutupela bai skulim em, na dispela i makim tu olsem yutupela i mas stretim pikinini. (Song 127:4; Sindaun 29:17) Pasin bilong stretim pikinini i no makim olsem yutupela i givim panismen tasol, nogat, yutupela i mas helpim ol pikinini long kliagut long risen bilong ol lo yutupela i putim. (Sindaun 28:7) Na tu, skulim pikinini long laikim Tok Bilong Jehova na luksave long ol stiatok bilong en. (Song 1:2) Dispela bai helpim em long skulim gut maus bilong bel.—Hibru 5:14.

SAMTING YU KEN MEKIM:

Skulim ol pikinini long tingim God olsem Man i stap tru na ol inap trastim em
Helpim ol long luksave na abrusim ol samting we inap bagarapim pasin bilong ol, kain olsem ol samting i stap long Intenet na sosel netwok. Skulim ol long olsem wanem ol inap abrusim ol man nogut bilong mekim pasin sem

Papamama stat long trenim pikinini long mekim wok bilong Jehova, kirap long taim em i liklik yet i go inap long em i kisim baptais — “Skulim pikinini bilong yu long bihainim gutpela pasin”