Olsem Wanem? God i Gat Asua Long Ol Hevi Bilong Yumi?

TAIM pikinini meri bilong Marion i bikpela pinis na i kisim bagarap long kru bilong em, Marion i mekim wankain samting olsem planti bilong yumi bai mekim.a Em i prea askim God long helpim em. Marion i tok: “Mi no inap tingim wanpela taim bipo we mi bin pilim olsem mi no gat helpim na mi stap wanpis tru.” Bihain, hevi bilong pikinini meri bilong em i go nogut moa na Marion i kisim tupela tingting long God. Em i askim olsem: “Bilong wanem ol dispela samting i kamap?” Em i no kliagut long olsem wanem wanpela God bilong laikim na tingim gut ol man inap givim baksait long em.

Wankain samting i save painim planti manmeri, i no Marion tasol. Planti man long olgeta hap i pilim olsem God i bin givim baksait long ol long taim bilong hevi. Wanpela man i bin kilim i dai tumbuna pikinini bilong Lisa na bihain long dispela Lisa i tok: “Mi wok long tingting planti yet olsem ‘bilong wanem GOD i larim ol kain samting i kamap.’ Bilip bilong mi long God i no go slek olgeta, tasol i no strong olsem bipo.” Wanpela meri, em liklik bebi boi bilong em i bin kisim bagarap, i tok: “God i no bin mekim gut bel bilong mi. Em i no soim olsem em i tingim mi o em i sori long mi.” Na meri i tok moa: “Mi no inap fogivim God.”

Sampela i bel nogut long God taim ol i lukim ol samting i wok long kamap long graun. Ol i lukim sampela lain ol i stap rabis na hangre tru, ol refiuji bilong ol woa i stap nogut tru, planti pikinini i no gat papamama, long wanem, AIDS i kilim ol i dai, na planti milion manmeri moa i gat ol arapela kain sik. Planti i lukim ol kain hevi olsem na ol i tok em asua bilong God, long wanem, i luk olsem em i no kirap mekim samting bilong stretim ol hevi.

Tasol tru tru God i no gat asua long ol hevi i painim ol man. I gat as na yumi ken bilip olsem klostu nau God bai stretim ol samting i bin bagarapim ol man. Mipela i laik bai yu ritim stori i kamap bihain long dispela na bai yu luksave olsem tru tru God i save tingim yumi.

[Futnot]