Wanpela Bikpela Raun i Mekim na Wanpela Ailan i Amamas

Kuba em wanpela gutpela ailan long hap bilong Karibian. I no longtaim i go pinis na ol man long dispela hap ol i kisim nupela strong long ol samting bilong spirit. Long pinis bilong yia 1998, ol Witnes Bilong Jehova long dispela kantri long Wes Indis ol i kisim wanpela blesing ol i bin wet longtaim long en. Em namba wan taim insait long 30 yia samting na sampela brata bilong Lain Bilong Bosim Ol Witnes Bilong Jehova ol i go long Kuba, na 15 brata sista i go wantaim ol long kibung. Ol dispela brata sista ol i bilong Beljam, Gret Briten, Itali, Nu Silan, Ostrelia, Ostria na Pueto Riko.

DISPELA em i wanpela bikpela samting tru long ol 82,258 pablisa bilong Kingdom long dispela hap na long 87,890 manmeri i bung wantaim ol long Kaikai Bilong Bikpela long 1998.

Long Disemba 1 i go inap 7, 1998, Lloyd Barry, John Barr, na Gerrit Lösch, ol i go lukim Haus Betel long Havana, na ol i go long sampela “Bihainim Rot God i Makim” Kibung Distrik i kamap long Kuba. Ol i amamas long ol inap bung wantaim ol elda bilong raun, na save gut moa long ol bikman bilong gavman bilong Kuba.

Brata John Barr i tok: “Dispela em i wanpela bikpela samting long i stap bilong mi na meri bilong mi long ol samting mipela i bin mekim. Ol gutpela brata na sista bilong yumi long Kuba i givim bel tru long tok i tru! Taim mi lusim ol mi pilim tru olsem, bikpela lain brata bilong yumi i stap long olgeta hap em wanpela gutpela samting tru!” Na Lloyd Barry i tok: “Ol samting i bin kamap long dispela wik i helpim mi long save gut long ol hevi bilong ol brata bilong yumi long dispela hap.”

Insait long 5-pela yia i go pinis, ol Witnes Bilong Jehova i bin kisim tok orait long i stap fri long mekim lotu long Kuba, na ol toktok ol bikman bilong gavman long Kuba i mekim i makim olsem ol i laik dispela samting i stap olsem i go i go.

Long Septemba 1994, ol i kirap long prinim ol nius samting long Haus Betel long Havana. Ol Witnes Bilong Jehova inap bung wantaim gen na autim tok long ol haus long ples klia. Bihain, long 1998, ol bikman i orait long 18 Witnes Bilong Jehova bilong ol narapela kantri i ken go long Kuba, na 3-pela brata bilong Lain Bilong Bosim Ol Witnes ol tu i insait long dispela lain.

Amamas Long Bung Gen Wantaim

Taim ol dispela brata sista i kamap long ples balus Hose Marti, long Havana, wanpela lain bilong gavman na lain bilong Haus Betel ol i stap bilong bungim ol na ol i mekim gut long ol dispela brata sista i kam. Namel long ol i gat wanpela brata, em i tingim yet laspela taim wanpela brata bilong Lain Bilong Bosim Ol Witnes i bin go long Kuba long 1961​—⁠em Milton Henschel. Long dispela taim brata hia i gat 12-pela krismas; long nau em i wanpela wasman bilong raun.

Taim ol dispela brata sista i kamap long Haus Betel, lain bilong Betel i amamasim ol long ol kain kain plaua, wanpela brata yet i bin planim bilong dispela bikpela de. Aiwara i pundaun taim famili bilong Betel i tok amamas long ol brata sista i kam. Bihain ol i kaikai wantaim. Ol i kaikai pik ol i kukim long paia long pasin bilong ol Kuba, na rais na bin, kumu, na yaka wantaim mojo (em wanpela sos ol i wokim long galik na wel bilong oliv), na ol prut. Bihain long ol i kaikai pinis wan wan brata long Lain Bilong Bosim Ol Witnes i givim wanpela tok bilong strongim ol long tingim wok bilong Betel em i gutpela samting tru. Tok bilong brata Lösch i kirapim ol, long wanem, em i toktok long ol brata long tok ples Spen. Long famili Betel i gat 48 brata sista i save wok olgeta de long Betel na 18 brata sista i save kam long Betel bilong helpim ol liklik taim.

Maski ol buk na Baibel bilong Kuba ol i prinim long Itali, insait long kantri yet ol i prinim ol Wastaua na Kirap! i no gat kala kala, long tupela masin ol i mas wokim long han. Bilong wokim olgeta nius em ol i mas kisim, ol i mas wok planti aua, na mekim bikpela wok long han na wok long rum i no gat bikpela spes long en. Ol volantia i tingim tru gutpela wok bilong Jehova ol i mekim long dispela rot.​—⁠2 Korin 4:​7.

Ol Bikpela Samting Bilong Kibung

Ol 18 brata sista i bruk long 3-pela lain na ol i go long narapela narapela kibung distrik i kamap long 3-pela hap​—⁠olsem Havana, Holgin, na Kamagwe. Ol kibung i gat 3-pela de, na long wan wan de bikpela lain brata sista​—⁠planti bilong ol em ol elda na painia​—⁠ol i singautim ol bilong i go long wan wan kibung. Ol i bin tokim ol Witnes olsem dispela kibung bai i narapela kain, tasol ol i no save olsem sampela brata long Lain Bilong Bosim Ol Witnes bai kam long kibung. Ol i kirap nogut tru long lukim ol dispela gutpela brata wantaim ol meri bilong ol i kam ausait long bas long Fraide moningtaim!

Ol brata i kisim tok orait long gavman na ol i sanapim ol sia na pletfom samting long ol hap graun ol i mekim ol kibung long en. Long ples kibung long Havana, i gat tok bilong “Song 133:⁠1” ol i bin katim long wanpela ston. Dispela i kirapim ol brata long tingim ol tok i stap long ves: “Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas, na ol i ken i stap belgut”! Tru tumas, long taim bilong kibung, gutpela pasin i stap namel long ol Kristen i bung long dispela hap.

Ol brata sista i kam long narapela kantri ol i toktok long gutpela pasin bilong ol brata long kamapim ol tok na ol soim, na ol i kirap nogut long pasin bilong ol long mekim pilai, em stori bilong Baibel long Daniel sapta 3 i as bilong en na i makim ol samting i kamap long Babilon bipo. Wanpela sista i tok: “Ol man i mekim pilai ol i mekim gut tru, na ol i bihainim stret nek i toktok na yu no inap save olsem em nek i kamap long kaset. . . . Ol man nogut bilong Babilon ol i luk olsem man nogut tru, na 3-pela Hibru i strong tru na ol i sanap strong.”

Sampela man bilong wanpela lain bilong gavman (Office of Religious Affairs) na ol narapela bikman bilong gavman ol i kam long ol kibung, ol i tok amamas long ol brata i stretim gut ol samting na long gutpela pasin bilong ol. Brata Barry i tok tenkyu long ol bikman bilong gavman long gutpela pasin ol i mekim long ol brata sista bilong ol narapela kantri i kam long kibung. Ol brata i sanap na paitim han longpela taim inap sampela minit bilong kamapim klia amamas bilong ol long ol tok, na tu, long ol bikman bilong gavman i orait long larim ol i mekim ol kibung. Wanpela famili Kristen i tok: “Dispela samting i winim tru samting mipela i bin ting bai kamap​—⁠dispela i kain olsem kibung intenesenel! Em i gutpela, long wanem, em i kamapim klia bikpela strong bilong Jehova long mekim ol tok promis bilong em i kamap tru.”

Ol kibung tu i opim rot long ol narapela i kisim gut save long ol Witnes. Wanpela draiva bilong bas i go long kibung long Sarere na long Sande tu. Em i tok olsem em i bin harim planti tok long ol Witnes Bilong Jehova, tasol nau em i save olsem ol i gutpela man na ol i lain bilong i stap isi.

“Ol Samting Mipela i No Inap Lusim Tingting Long En”

Ol brata sista i go long ol kibung ol i pilim tru gutpela pasin pren bilong ol man bilong Kuba. Ol manmeri bilong Kuba ol i man bilong wok, na ol i man bilong bihainim lo, na ol i save mekim gut long man. Wanpela man i go long kibung i tok: “Planti taim ol man mipela i no save long ol i helpim mipela.”

Lain i go long kibung i pilim tru bilip, amamas, na pasin sori ol Witnes bilong Kuba i kamapim. Maski i gat ol bikpela hevi i stap, ol i putim Jehova i stap olsem strongpela banis bilong ol. (Song 91:⁠2) John Barr i tok: “I gat planti gutpela samting mi kirap nogut long en long dispela namba wan raun bilong mi long Kuba​—⁠ol gutpela samting bilong dispela kantri, gutpela pasin bilong ol man mi bungim ol; na bikpela samting tru, pasin bilong ol Witnes long Kuba long ol samting bilong spirit. I no gat wanpela taim mi bin harim kain singsing bilong Kingdom ol i bin mekim olsem​—⁠ol i givim bel tru long mekim. Na pasin bilong ol long paitim han longpela taim em tu i narapela kain​—⁠taim ol i pilim tru ol samting bilong spirit ol i paitim han inap longpela taim! Em ol samting mipela i no inap lusim tingting long en. Bai mipela i tingim inap long olgeta taim bihain.”

Song 97:1 i tok: “Ol ailan, yupela i mas belgut.” Tru tumas, ol Witnes Bilong Jehova long ailan Kuba i amamas long ol i wok long kamap fri long lotuim God, na ol i amamas long dispela bikpela raun ol brata sista bilong ol narapela kantri i mekim na kam long ol kibung long Kuba.

[Ol Piksa long pes 8]

Planti famili i go long ol “Bihainim Rot God i Makim” Kibung Distrik long Kuba

[Piksa long pes 8]

Ol i opim gen Haus Betel long Havana long 1994

[Piksa long pes 8]

Lain Bilong Bosim Ol Witnes i sainim Baibel ol bai givim long ol bikman bilong gavman olsem presen